មន្រ្តីពាក់ព័ន្ធចុះពិនិត្យទីតាំងដាក់ប្រព័ន្ធប្រកាសឱ្យដឹងមុនពីគ្រោះធម្មជាតិនៅក្រុងបាត់ដំបង។ គឹម សារុំ
បាត់ដំបងៈ ប្រព័ន្ធប្រកាសឱ្យដឹងមុនពីគ្រោះធម្មជាតិ គឺបានចូលរួមចំណែកធ្វើឱ្យប្រជាពលរដ្ឋបានត្រៀមបង្ការជាមុន ដើម្បីកាត់បន្ថយពីគ្រោះថ្នាក់ ឬក៏ផលប៉ះពាល់ដោយសារគ្រោះធម្មជាតិផ្សេងៗ ខណៈបច្ចុប្បន្នប្រព័ន្ធនេះត្រូវបានតម្លើងនៅ ៤១ ទីតាំង។
ដើម្បីជាការត្រៀមបង្ការ និងចូលរួមកាត់បន្ថយពីផលប៉ះពាល់ដោយសារគ្រោះមហន្តរាយធម្មជាតិផ្សេងៗ គណៈកម្មាធិការជាតិគ្រប់គ្រងគ្រោះមហន្តរាយបានបង្កើតអេបទូរស័ព្ទ (APP) លេខ1294 ដែលជាប្រព័ន្ធប្រកាសឱ្យដឹងមុនថា នឹងមានគ្រោះធម្មជាតិផ្សេងៗកើតឡើង។
អ្នកស្រីហ្វា អាស៊ីណា រស់នៅភូមិដាំស្ពៃ សង្កាត់ស្លាកែត ខេត្តបាត់ដំបងដែលស្ថិតនៅក្នុងគម្រោងប្រកាសឱ្យដឹងមុនពីគ្រោះមហន្តរាយបាននិយាយថា អ្នកស្រីរស់នៅតាមដងស្ទឹងសង្កែ តែងតែប្រឈមនឹងគ្រោះទឹកជំនន់ជារៀងរាល់ឆ្នាំហើយពេលខ្លះបើស្ថានភាពទឹកឡើងគំហុកខ្លាំងធ្វើឱ្យសមាជិកក្នុងក្រុមគ្រួសាររបស់អ្នកស្រីពិបាកនឹងជម្លៀសខ្លួនបានទាន់ពេលវេលា។ ក៏ប៉ុន្តែបន្ទាប់ពីអាជ្ញាធរសង្កាត់បំពាក់ប្រព័ន្ធប្រកាសឱ្យដឹងមុនពីគ្រោះធម្មជាតិមកធ្វើឱ្យអ្នកស្រីក៏ដូចជាអ្នកភូមិដាំស្ពៃអាចទទួលព័ត៌មានបានដឹងមុនទាន់ពេលវេលា ១ ថ្ងៃទៅ ២ ថ្ងៃ។
ឮអ្នកស្រីប្រាប់ថា៖«ប្រជាពលរដ្ឋរស់នៅក្នុងភូមិខ្ញុំ ពិតជាទទួលបានអត្ថប្រយោជន៍ច្រើនពីប្រព័ន្ធប្រកាសឱ្យដឹងមុននេះ ពេលណាមានគ្រោះមហន្តរាយកើតឡើង ដូចជាខ្យល់ព្យុះ ទឹកជំនន់ជាដើម។ អ៊ីចឹងវាធ្វើឱ្យពលរដ្ឋដឹងទាំងអស់គ្នាតាមរយៈសំឡេងមេក្រូហើយយើងគេចផុតពីគ្រោះ-មហន្តរាយទាំងឡាយបាន»។
ពាក់ព័ន្ធនឹងប្រព័ន្ធប្រកាសឱ្យដឹងមុនពីគ្រោះធម្មជាតិផ្សេងៗនេះដែរ លោក ទួត រ៉ើន ចៅសង្កាត់ស្លាកែត ក្រុងបាត់ដំបងបានប្រាប់ដល់ក្រុមអ្នកសារព័ត៌មាននៅក្នុងបរិវេណសង្កាត់ ដែលមានវត្តមានលោកខ្វៃ អាទិត្យា អនុរដ្ឋលេខាធិការក្រសួងបរិស្ថានផងនោះថា សង្កាត់ស្លាកែតមាន២ ភូមិគឺភូមិដាំស្ពៃ ២១៦ គ្រួសារ និងភូមិស្លាកែត ១៥៥ គ្រួសារហើយអ្នកភូមិដែលនៅប្របមាត់ស្ទឹងសង្កែងាយរងគ្រោះពីទឹកជំនន់មាន ៣៧១ គ្រួសារ។ ចំពោះនៅក្រុងបាត់ដំបងមានសង្កាត់ចំនួន៤ដែលមានឧបករណ៍ផ្តល់សញ្ញាអាសន្នមាន១-សង្កាត់ ព្រែកព្រះស្តេច ២-សង្កាត់ រតន: ៣-សង្កាត់ ស្លាកែត ៤-សង្កាត់ ក្តុលដូនទាវ។
លោកបន្តថា ប្រព័ន្ធប្រកាសឱ្យដឹងមុនពីគ្រោះធម្មជាតិជាបច្ចេកវិទ្យាមួយទំនើបប្រើតាមរយៈ (APP1294) ហើយបើមានករណីគ្រោះធម្មជាតិបម្រុងនឹងកើតឡើង គឺវាលោតជាសញ្ញាសំឡេងក្នុងទូរស័ព្ទឱ្យដឹងតែម្តង។ ប៉ុន្តែដើម្បីឱ្យព័ត៌មាននេះបានឮទៅដល់ប្រជាពលរដ្ឋក្នុងមូលដ្ឋាន គឺមានការបំពាក់ប្រដាប់បំពងសំឡេង (មេក្រូ) ដែលមានសមត្ថភាពឮក្នុងរង្វង់ ៥០០ ម៉ែត្រ ៤ ជ្រុង តែបើលើសពីចម្ងាយនេះអាជ្ញាធរសង្កាត់ត្រូវភ្ជាប់តាមឧគ្ឃោសនសព្ទបន្តទៀតដើម្បីឱ្យឮបានគ្រប់តំបន់ក្នុងមូលដ្ឋានសង្កាត់។
លោកចៅសង្កាត់ស្លាកែតបន្តថា កាលពីមិនទាន់មានប្រព័ន្ធប្រកាសឱ្យដឹងមុន ពីគ្រោះធម្មជាតិតាមរយៈ (APP1294) គឺលោកប្រើមធ្យោបាយដឹងព័ត៌មានតាមក្រសួងធនធានទឹក និងឧតុនិយមហើយប្រកាសតាមឧគ្ឃោសនសព្ទតាមម៉ូតូ ឬម៉ូតូកង់បី ដើម្បីឱ្យប្រជាពលរដ្ឋរស់នៅតាមដងស្ទឹងសង្កែ ដែលមានភូមិដាំស្ពៃ និងភូមិស្លាកែត ឱ្យពួកគាត់ត្រៀមខ្លួន។ ប៉ុន្តែនៅពេលដែលសង្កាត់ទទួលបានគម្រោងរបស់ក្រសួងបរិស្ថានសហការជាមួយអង្គការអង្គការ People in Need (PIN)មក ដោយប្រើ (APP1294) ពេលផ្តល់សំឡេងមកគឺប្រជាពលរដ្ឋក្នុងមូលដ្ឋានអាចដឹងភ្លាម។
លោកថ្លែងថា៖«នៅពេលដែលពួកគាត់ដឹងពីគ្រោះធម្មជាតិកើតឡើង គឺគាត់បានត្រៀមលក្ខណៈជាមុនហើយខាងមន្ទីរធនធានទឹកខេត្តបាត់ដំបងក៏ផ្តល់ព័ត៌មានដែរ កាលណាមានទឹកជន់។ ក្រសួងបរិស្ថានសហការជាមួយអង្គការ (PIN)បំពាក់ប្រព័ន្ធនេះមានសារសំខាន់ណាស់ដើម្បីឱ្យពលរដ្ឋដឹងមុន»។
លោកបានបន្តទៀតថា សម្រាប់អាជ្ញាធរមូលដ្ឋាន បានធ្វើការផ្សព្វផ្សាយដល់ប្រជាពលរដ្ឋឱ្យបានដឹងពីសារប្រយោជន៍នៃប្រព័ន្ធប្រកាសឱ្យដឹងមុន ពីគ្រោះធម្មជាតិនេះ។ ដូច្នេះបើកាលណាប្រជាពលរដ្ឋបានដឹងពីព័ត៌មានមុនគឺពួកគាត់បានត្រៀមលក្ខណៈរួចមុន អ៊ីចឹងអ្វីដែលកើតឡើងវាអាចកាត់បន្ថយការគ្រោះថ្នាក់ ដែលកើតឡើងជាយថាហេតុបានខ្លះដែរ។ ប្រព័ន្ធប្រកាសឱ្យដឹងមុននេះអាចផ្តល់សញ្ញាពីគ្រោះមហន្តរាយធម្មជាតិ ដូចជាភ្លៀងខ្លាំង អាកាសធាតុចុះត្រជាក់ ផ្គររន្ទៈ ខ្យល់កន្ត្រាក់ គឺវាផ្តល់សញ្ញាឱ្យដឹងមុន។
ចំណែកលោក ហេង ប៊ុនម៉ានុត ប្រធានគម្រោងប្រព័ន្ធប្រកាសឱ្យដឹងមុន 1294 នៃអង្គការ People in Need បានឱ្យដឹងថា អង្គការបានដំឡើងសេនស័រប្រព័ន្ធប្រកាសឱ្យដឹងមុនឬហៅថា (ទេពមច្ឆា) បានចំនួន ៤១ ទីតាំងទូទាំង ២៥ ខេត្ត-ក្រុង។ ចំពោះចំនួនអ្នកចុះឈ្មោះចូលប្រព័ន្ធមានប្រហែល ១៩ ម៉ឺននាក់ ហើយមុខសញ្ញា ដែលបានប្រាប់មាន ៣៣១ ដង(មុខសញ្ញាគ្រោះមហយន្តរាយ)។ ចំពោះប្រជាពលរដ្ឋដែលបានទទួលសារមានជាង ១ លាន ១ សែននាក់។
បើតាមលោក ប៊ុន ម៉ានុត ប្រព័ន្ធប្រកាសឱ្យដឹងមុននេះ គឺធ្វើការវិនិច្ឆ័យទៅលើព័ត៌មានដែលទទួលបានជាក់ស្តែងដូចជានៅតាមដងស្ទឹង ដែលមានដាក់ឧបករណ៍វាស់កម្ពស់ទឹក ហើយបើមើលឃើញថា វាអាចនឹងកើតឡើងគឺអង្គការនឹងផ្តល់ដំណឹងតាមរយៈមធ្យោបាយប្រកាសផ្សេងៗ។ មធ្យោបាយមានចំនួន ៤ ក្នុងនោះទី១ មានការតេតាមលេខទូរស័ព្ទទៅលេខទូរស័ព្ទរបស់ប្រជាពលរដ្ឋផ្ទាល់នៅតាមតំបន់ងាយរងគ្រោះ។ មធ្យោបាយទី២តាមគ្រុបតេឡេក្រាមហើយអ្នកណាក៏អាចចូលរួមក្នុងគ្រុបបានដែរ មធ្យោបាយទី៣ផ្សាយតាមវិទ្យុ ABC ទី៤ ការផ្សព្វផ្សាយតាមឧបករណ៍បំពងសំឡេង។
មានតែខេត្តបាត់ដំបងតែ ១ គត់ដែលបំពាក់ឧបករណ៍បំពងសំឡេងក្រៅពីខេត្តនេះគឺប្រើតាមមធ្យោបាយដូចរៀបរាប់ខាងលើ។ ជាទូទៅតំបន់ដែលរងគ្រោះមាននៅគ្រប់ខេត្ត តែតំបន់ងាយរងគ្រោះច្រើនជាងគេមានខេត្តបាត់ដំបង បន្ទាយមានជ័យ ឧត្តរមានជ័យ និងខេត្តព្រះវិហារ។
លោកថ្លែងថា៖«យើងចុះទៅបំពាក់ប្រព័ន្ធប្រកាសឱ្យដឹងមុន 1294 ហើយយើងអាចចុះឈ្មោះនៅក្នុងប្រព័ន្ធហ្នឹងបាន។ ប៉ុន្តែនៅពេលយើងតេទៅលេខ1294 គេនឹងឱ្យយើងរើសខេត្ត រើសស្រុករើសឃុំអ៊ីចឹង សម្រាប់ប្រជាពលរដ្ឋរស់នៅក្នុងឃុំនីមួយៗរបស់គាត់ គឺគាត់អាចចុះឈ្មោះនៅតាមឃុំរបស់គាត់បាន។ ខ្ញុំសូមបញ្ជាក់ថា គាត់រស់នៅឃុំ (ក) តែបើគាត់ចង់ទៅចុះឈ្មោះឃុំ (ខ) ទៀតក៏បានដែរ»។
លោកស្រី ឃ្លោក វិចិត្ររដ្ឋា អនុប្រធាននាយកដ្ឋានប្រែប្រួលអាកាសធាតុ នៃក្រសួងបរិស្ថានបានថ្លែងក្នុងពេលចុះទៅពិនិត្យមើលប្រព័ន្ធប្រកាសឱ្យដឹងមុន នៅសង្កាត់ស្លាកែតថា រាជរដ្ឋាភិបាលបានយកចិត្តទុកដាក់ឆ្លើយតបនឹងការប្រែប្រួលអាកាសធាតុ ហើយការបន្ស៊ាំនឹងការប្រែប្រួលអាកាសធាតុគឺជាអាទិភាព១ របស់រាជរដ្ឋាភិបាលហើយក៏ដូចជាកសាងភាពធន់របស់ប្រជាពលរដ្ឋ ក្នុងសហគមន៍មូលដ្ឋាន ក៏ជាការងារសំខាន់១ ដែរ។
អ៊ីចឹងហើយក្រសួងបរិស្ថាន ដែលមានកម្មវិធីសម្ព័ន្ធភាពប្រែប្រួលអាកាសធាតុកម្ពុជា បានផ្តល់មូលនិធិដល់អង្គការ (PIN) និងសហការជាមួយរដ្ឋបាលក្រុងបាត់ដំបង ដើម្បីអនុវត្តសកម្មភាពគម្រោង១ ដែលមានឈ្មោះថា ប្រព័ន្ធប្រកាសឱ្យដឹងមុន ហើយប្រព័ន្ធនេះ ពិតជាមានសារៈសំខាន់ណាស់ ដើម្បីធ្វើយ៉ាងណាឱ្យប្រជាពលរដ្ឋបានយល់ដឹងជាមុន។
លោកស្រីថ្លែងថា៖«គាត់ដឹងជាមុនដើម្បីត្រៀមខ្លួនឆ្លើយតបនឹងការប្រែប្រួលអាកាសធាតុជាពិសេសឧទាហរណ៍ពេលមានទឹកជំនន់កើតឡើង។ ចំពោះខេត្តបាត់ដំបងនេះ ត្រូវបានកម្មវិធីសម្ព័ន្ធភាពប្រែប្រួលអាកាសធាតុកម្ពុជាដាក់មុនគេនូវឧបករណ៍បំពងសំឡេងនេះ។ នេះជាសមិទ្ធផល១ របស់គម្រោង ដើម្បីធ្វើយ៉ាងណាឱ្យប្រជាពលរដ្ឋបានយល់ដឹងអំពីអាកាសធាតុ ហើយអាចការពារទុកជាមុន»។
លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ភ្នំពេញប៉ុស្តិ៍ថា ប្រព័ន្ធប្រកាសឱ្យដឹងមុន 1294 គឺបានបង្កើតរយៈពេល ១០ ឆ្នាំ មកហើយដោយមានអង្គការ (PIN) ជាដៃគូ។
ដំបូងឡើយ ដាក់តែនៅខេត្តពោធិ៍សាត់ទេ តែរហូតមកដល់បច្ចុប្បន្នបានពង្រីកដល់ ២៥ ខេត្ត-ក្រុងហើយ។ ដំបូងមានតែសារជាសំឡេងទេ តែបច្ចុប្បន្នបានធ្វើទំនើបកម្ម មានមុខងារកាន់តែច្រើនតាមរយៈសារតេឡេក្រាម ជាសារតាមប្រព័ន្ធទំនាក់ទំនងសង្គមហ្វេសប៊ុក និងតាមប្រព័ន្ធបណ្តាញសង្គមផ្សេងៗទៀត។
លោកបន្តថា៖ «1294 បង្កើតឡើង ដើម្បីជូនដំណឹងឱ្យប្រជាពលរដ្ឋបានដឹងពាក់ព័ន្ធព្រឹត្តិការណ៍ ដែលអាចកើតមានឡើងពីអាកាសធាតុ ដើម្បីឱ្យគាត់ត្រៀមលក្ខណៈមុន។ អ៊ីចឹងចំពោះអ្នកដែលចុះឈ្មោះក្នុង1294 គឺអាចទទួលបានសារស្តីពីស្ថានភាពគ្រោះមហន្តរាយ ដែលអាចកើតមានឡើងក្នុងតំបន់ដែលពួកគាត់រស់នៅ»៕
