គ្រូបង្វឹកពេលកំពុងបង្ហាត់ព្រះនាង នរោត្តម អម្រិតា ជិះសេះផ្លោះរបារនាពេលកន្លងទៅ។ សហការី
ភ្នំពេញៈ ដោយមានសែស្រឡាយជារាជវង្ស ព្រះនាងតូច នរោត្តម អម្រិតា មិនបានប្រើខ្សែជីវិតរស់នៅបែបសុខស្រួល ដោយមិនមានអ្នកបម្រើឆ្វេងស្តាំ ដើម្បីឱ្យស័ក្តិសមទៅនឹងសាច់សាលោហិតជាសែស្តេចនោះទេ ប៉ុន្តែយុវតីរូបនេះ បែរជាប្រើប្រាស់កម្លាំងជាមួយកាយសម្បទាដ៏អំណោយផលរបស់ខ្លួន ដើម្បីចាប់យកជំនាញកីឡាជិះសេះទៅវិញ ព្រោះព្រះនាងចង់ប្រើជំនាញមួយនេះជាស្ពានឈានទៅបង្កើតនូវស្នាដៃ ដើម្បីលើកមុខមាត់ប្រទេសជាតិឱ្យស័ក្តិសមជាចៅស្រីម្នាក់របស់ព្រះបាទនរោត្តមសីហនុព្រះបរមរតនកោដ្ឋ។
បើទោះបីជាពេលនេះកីឡាការិនី នរោត្តម អម្រិតា នៅមិនទាន់អាចសាងបានស្នាដៃធំដុំនៅលើឆាកអន្តរជាតិ ប៉ុន្តែការដណ្តើមបានមេដាយមាស ពីការប្រកួតពានរង្វាន់ជើងឯកយុវជនអាស៊ីអាគ្នេយ៍លើកទី១ ឆ្នាំ ២០២៣ (The 1st SEA Youth Cup) នៅទីក្រុងបាងកក ប្រទេសថៃ កាលពីចុងឆ្នាំមុន បានក្លាយជាសមិទ្ធផលដ៏ល្អបំផុតដែលបានជំរុញឱ្យព្រះនាងតូចរូបនេះកាន់តែដាក់ចិត្តខ្លាំង ដើម្បីឈានទៅសម្រេចគោលដៅធំតាមឧបនិស្ស័យ និងក្តីស្រមៃពីកុមារភាពមក។
ដោយមានម្តាយជាសែស្តេច គឺព្រះអង្គម្ចាស់ នរោត្តម ណានដាទេវី និងឪពុកឈ្មោះ Ketienmeyer Etienne ព្រះនាង នរោត្តម អម្រិតា បានកើត និងធំដឹងក្តីនៅលើទឹកដីក្រុងប៉ារីស ប្រទេសបារាំង ជាទីកន្លែង ដែលក្មេងស្រីម្នាក់នេះ កើតជាឧបនិស្ស័យស្រឡាញ់ និងចូលចិត្តសត្វ ជាពិសេសគឺសត្វសេះ ហេតុនេះហើយទើប អម្រិតាបានសុំចូលហាត់ជិះសេះតាំងពីកុមារភាព។
នៅក្នុងបទសម្ភាសន៍ផ្ទាល់ជាមួយ ភ្នំពេញ ប៉ុស្តិ៍ ព្រះនាងតូច នរោត្តម អម្រិតា មិនបានប្រើប្រាស់ពាក្យពេចន៍ជាសែរាជវង្សនោះទេគឺប្រើភាសាដូចរាស្ត្រសាមញ្ញធម្មតាដែរ។ «ខ្ញុំចូលចិត្តសត្វតាំងពីនៅតូច គឺនៅផ្ទះរបស់ខ្ញុំ មានឆ្កែមួយ មានឆ្មាមួយ និងមានសត្វបក្សីដែលបានហើរមកលេងផ្ទះរបស់ខ្ញុំ គឺខ្ញុំចូលចិត្តសត្វទាំងអស់នោះណាស់ ជាពិសេសសេះតែម្តង ព្រោះនៅតាមខេត្ត ក្នុងប្រទេសបារាំងមានសេះច្រើន អ៊ីចឹងពេលឃើញសេះហ្នឹង ខ្ញុំសុំប៉ាម៉ាក់ជិះសេះ តាំងពីអាយុ ៥ ឆ្នាំ»។
ដោយទទួលបានការអនុញ្ញាតពីឪពុកម្តាយ កុមារីនរោត្តម អម្រិតា តែងតែយកពេលទំនេរពីការសិក្សាទៅហាត់ជិះសេះ ហើយនៅពេលវិលត្រឡប់មករស់នៅប្រទេសកម្ពុជាវិញ អម្រិតា ដែលបានកើនវ័យដល់ ៧ ឆ្នាំនោះ នៅតែស្វះស្វែងរកកន្លែងជិះសេះ ហើយនៅទីបំផុតក្មេងស្រីម្នាក់នេះ ត្រូវបានខាងសាលាអន្តរជាតិបារាំង École Française Internationale (EFI) នាំមកហាត់ជិះសេះ នៅសហព័ន្ធកម្ពុជាបង្ហាត់ជិះសេះ ដោយមានលោកស្រី ទេព ម៉ូណា ជាប្រធានសហព័ន្ធ។
រំឭកដល់រឿងនេះ ព្រះនាងនរោត្តម អម្រិតា បានបញ្ជាក់ថា៖ «នៅពេលមកដល់ស្រុកខ្មែរដំបូង ខ្ញុំអត់ដឹងថា កន្លែងណាមានការជិះសេះនោះទេ ប៉ុន្តែខ្ញុំបានប្រាប់ទៅខាងសាលា EFI ថា ខ្ញុំចូលចិត្តជិះសេះ អ៊ីចឹងខាងសាលាក៏បាននាំខ្ញុំមកហាត់ជិះសេះរាល់ថ្ងៃអាទិត្យនៅសហព័ន្ធ ហើយក្រោយមកខ្ញុំបានមកហ្វឹកហាត់នៅទីនេះញឹកញាប់តែម្តង និងបានក្លាយជាកីឡាការិនីថ្នាលរបស់សហព័ន្ធនៅឆ្នាំ ២០១៨ ក្នុងអាយុ ១០ ឆ្នាំ»។
ជាមួយការស្រឡាញ់ និងការយកចិត្តទុកដាក់ខ្លាំងលើការហ្វឹកហាត់ ក្រោមការជំរុញ និងលើកទឹកចិត្តបន្ថែមពីព្រះមាតា នរោត្តម ណានដា ទេវី ដែលត្រូវបានជ្រើសតាំងជាអគ្គលេខាធិការសហព័ន្ធកម្ពុជាបង្ហាត់ជិះសេះ កាលពីឆ្នាំ ២០១៨ ដែរនោះ បានជួយឱ្យព្រះនាងតូច អម្រិតា អាចអភិវឌ្ឍខ្លួនបានយ៉ាងលឿនដើម្បីក្លាយជាកីឡាការិនីវ័យក្មេងម្នាក់ ដែលមានសមត្ថភាពលេចធ្លោ ដោយអាចបញ្ជាសេះលោតផ្លោះរបារបានស្ទាត់ជំនាញ ហើយដណ្តើមបានជយលាភីជាបន្តបន្ទាប់ សម្រាប់កម្មវិធីប្រកួត ដែលរៀបចំដោយសហព័ន្ធ និងការប្រកួតប្រណាំងសេះផ្សេងៗទៀត នៅក្នុងស្រុក។
ជាមួយភាពលេចធ្លោនេះ អម្រិតា ត្រូវបានសហព័ន្ធ បញ្ជូនឱ្យទៅប្រកួតពានរង្វាន់ក្របខ័ណ្ឌក្លិបនៅប្រទេសបារាំង ក្នុងឆ្នាំ ២០១៩ និងបានទៅចូលរួមការប្រកួតថ្នាក់ជាតិ នៅប្រទេសម៉ាឡេស៊ី ព្រមទាំងការប្រកួតថ្នាក់ជាតិនៅប្រទេសថៃ និងក្រុងតៃប៉ិក្នុងឆ្នាំ ២០២២ ផងដែរ ប៉ុន្តែព្រះនាងតូចអង្គនេះ មិនទាន់អាចប្រើបទពិសោធន៍ដ៏ក្មេងខ្ចីរបស់ខ្លួនដើម្បីប្រជែងជាមួយអត្តពលិកមានបទពិសោធន៍ និងមានបច្ចេកទេសបញ្ជាសេះច្រើនឆ្នាំរបស់ប្រទេសទាំងអស់នេះបានទេ។
កីឡាការិនីវ័យ ១៥ ឆ្នាំអម្រិតា បាននិយាយថា៖ «សម្រាប់ការទទួលបានឱកាសចេញទៅប្រកួតនៅក្រៅស្រុកកន្លងមក ខ្ញុំមិនទទួលបានជ័យជម្នះល្អទេ ដោយសារខ្ញុំនៅក្មេង ហើយត្រូវប្រកួតជាមួយគេធំៗដែលមានភាពស្ទាត់ជំនាញ និងបានហ្វឹកហាត់យូរឆ្នាំជាងយើង ប៉ុន្តែសម្រាប់ការប្រកួតនៅប្រទេសថៃ កាលពីខែធ្នូ ឆ្នាំ ២០២៣ ខ្ញុំនិងមិត្តរួមក្រុមបានឈ្នះមេដាយមាសយ៉ាងរំភើបបំផុត ព្រោះនេះជាមេដាយមាសលើកដំបូងសម្រាប់ការប្រកួតនៅលើឆាកអន្តរជាតិរបស់សហព័ន្ធផងដែរ»។
សម្រាប់ការប្រកួតពានរង្វាន់ជើងឯកយុវជនអាស៊ីអាគ្នេយ៍ លើកទី១ ឆ្នាំ ២០២៣ (The 1st SEA Youth Cup) នៅទីក្រុងបាងកក ប្រទេសថៃកាលពីថ្ងៃទី ៩ ខែធ្នូ ឆ្នាំ២០២៣ ដោយមាន ៧ ប្រទេសចូលរួមនោះ កីឡាការិនី នរោត្តម អម្រិត កីឡាករ គង់ រតនៈ និងកីឡាករ គិរី ចាន់តុលា គឺម្នាក់ៗបានបញ្ជាសេះលោតផ្លោះរបារបានយ៉ាងល្អដើម្បីឈ្នះមេដាយមាស លើវិញ្ញាសាប្រកួតជិះសេះលោតផ្លោះរបារជាក្រុម។
ការឈ្នះបានមេដាយមាសនេះ បានក្លាយជាជោគជ័យយ៉ាងធំធេងបំផុតដែលឆ្លុះបញ្ចាំងឱ្យឃើញពីការតស៊ូយ៉ាងវែងឆ្ងាយរបស់សហព័ន្ធកម្ពុជាបង្ហាត់ជិះសេះ ដោយបានបង្កើតឡើងតាំងពីឆ្នាំ ២០០៦ ក្រោមគំនិតផ្តួចផ្តើមរបស់ព្រះបាទ នរោត្តម សីហនុ ប៉ុន្តែទើបឈ្នះបានមេដាយមាស ជាលើកដំបូង ពីការប្រកួតនៅលើឆាកអន្តរជាតិ បន្ទាប់ពីក្រុមជិះសេះកម្ពុជា បានឈ្នះមេដាយសំរឹទ្ធស៊ីហ្គេម ជាលើកដំបូង នៅម៉ាឡេស៊ី ឆ្នាំ ២០១៧ និងឈ្នះបានមេដាយសំរឹទ្ធ ១ ទៀតពីការប្រកួត នៅហុងកុង។
ព្រះនាងនរោត្តមអម្រិតាពេលកំពុងរៀបចំកែបសេះមុនហ្វឹកហាត់នាពេលកន្លងទៅ។សហការី
ចំពោះការបង្កើតឱ្យមានការប្រកួត SEA Youth Cup នៅប្រទេសថៃ កាលពីខែធ្នូនោះ ក៏ដើម្បីជាការលើកទឹកចិត្តនិងជំរុញដល់បណ្តាប្រទេស នៅក្នុងតំបន់អាស៊ានចាប់ផ្តើមពង្រឹងប្រភេទកីឡាជិះសេះឡើងវិញផងដែរសម្រាប់ត្រៀមចូលរួមការប្រកួតស៊ីហ្គេម ឆ្នាំ ២០២៥ នៅប្រទេសថៃ បន្ទាប់ពីប្រភេទកីឡាជិះសេះ មិនត្រូវបានដាក់ឱ្យមានការប្រកួតនៅស៊ីហ្គេម ចំនួន ៣ លើកជាប់ៗគ្នា។
ជាមួយការដាក់ឱ្យមានប្រភេទកីឡាជិះសេះក្នុងព្រឹត្តិការណ៍ស៊ីហ្គេមជាថ្មីនេះកីឡាការិនី នរោត្តម អម្រិត បានដាក់គោលដៅខ្ពស់ថា ត្រូវដណ្តើមឱ្យបានមេដាយមាស។ «ខ្ញុំចង់ដណ្តើមបានមេដាយមាសស៊ីហ្គេម នៅឆ្នាំ ២០២៥ ហើយជាមួយការដាក់គោលដៅនេះ ខ្ញុំនឹងបង្កើនការហ្វឹកហាត់ឱ្យបានកាន់តែខ្លាំង ដោយត្រូវប្តូរហាត់ជិះសេះឱ្យបានច្រើនសេះ ព្រោះការហ្វឹកហាត់បែបនេះ នឹងជួយឱ្យយើងកាន់តែមានភាពស្ទាត់ជំនាញ ក្នុងការបញ្ជាសេះដែលយើងមិនធ្លាប់ស្គាល់ក្នុងការប្រកួត»។
ទន្ទឹមជាមួយគ្នានេះ អម្រិតា បានសម្លឹងមើលឃើញថា កម្រិតប្រកួតប្រជែងរបស់ក្រុមអត្តពលិកនៅក្នុងតំបន់អាស៊ាននេះ អាចខុសគ្នាដែលប្រទេសខ្លះគេខ្លាំង និងប្រទេសខ្លះទៀតក៏នៅខ្សោយ។ ប៉ុន្តែកីឡាការិនីជាសែរាជវង្សរូបនេះ បានបញ្ជាក់ថា៖ «បើប្រៀបធៀបកម្រិតសមត្ថភាពបញ្ជាសេះរបស់យើង ទៅនឹងអត្តពលិកនៅតាមបណ្តាប្រទេសនៅក្នុងតំបន់អាស៊ាន វាមិនលើសខ្វះគ្នានោះទេ»។
កីឡាការិនី អម្រិតា បានបន្ថែមថា៖ «កម្រិតរបស់យើងមិននៅក្រោមគេទេ ហេតុនេះខ្ញុំមានការជឿជាក់ថា ប្រសិនបើបានចូលរួមស៊ីហ្គេមឆ្នាំ ២០២៥ យើងនឹងអាចដណ្តើមយកមេដាយមាស។ ខ្ញុំជឿថា ខ្ញុំអាចនឹងឈានទៅសម្រេចគោលដៅនេះបាន ព្រោះពេលនេះយើងមានសេះល្អៗ ហើយគ្រូបង្វឹករបស់យើង ក៏មានជំនាញកាន់តែខ្ពស់ក្នុងការបង្វឹកដល់ពួកយើងផងដែរ»។
ក្រៅពីការដាក់ទិសដៅឈានទៅដណ្តើមយកមេដាយមាស នៅស៊ីហ្គេម កីឡាការិនី នរោត្តម អម្រិត ក៏មានមហិច្ឆតា ចង់ក្លាយជាកីឡាការិនីជិះសេះរបស់កម្ពុជាដំបូងគេ ដែលអាចមានសិទ្ធិទៅចូលរួមការប្រកួតយុវជនអូឡាំពិកអន្តរជាតិ នាពេលអនាគតផងដែរ ព្រោះពេលនេះ អម្រិតា ទើបមានអាយុ ១៥ ឆ្នាំ និងឈានចូល ១៦ ឆ្នាំ បន្ទាប់ពីពិធីបុណ្យចូលឆ្នាំ នៅខែមេសា ឆ្នាំ ២០២៤ ខាងមុខ។
នរោត្តម អម្រិតា បានបញ្ជាក់ថា៖ «ខ្ញុំមានបំណងចង់ទទួលបានឱកាសទៅប្រកួតយុវជនអូឡាំពិកអន្តរជាតិ ហេតុនេះនៅពេលមានកម្មវិធីប្រកួតជម្រុះដណ្តើមសិទ្ធិទៅប្រកួតយុវជនអូឡាំពិកដែលរៀបចំដោយសហព័ន្ធកីឡាបង្ហាត់ជិះសេះអន្តរជាតិខ្ញុំនឹងទៅចូលរួម ព្រោះនេះជាគោលបំណងធំជាងគេរបស់ខ្ញុំ ហើយខ្ញុំនឹងខិតខំប្រឹងប្រែងដើម្បីឈានទៅសម្រេចវាឱ្យបាន»។
ជាមួយការដាក់គោលដៅធំៗ នៅចំពោះមុខនេះ អម្រិតា ដែលកំពុងរៀនថ្នាក់ទី១០ នៅសាលា EFI នៅមិនទាន់បានកំណត់គោលដៅសម្រាប់ការចាប់យកជំនាញអ្វីឱ្យប្រាកដសម្រាប់ការបន្តការសិក្សានៅមហាវិទ្យាល័យនោះទេ ប៉ុន្តែអម្រិតា បានអះអាងថា ខ្លួននៅតែបន្តចាប់យកជំនាញកីឡាជិះសេះនេះ បើទោះបីជាបានរៀនដល់សាកលវិទ្យាល័យក៏ដោយ។
កីឡាការិនីកម្ពស់ ១,៦៧ ម៉ែត្ររូបនេះបានបញ្ជាក់ថា៖ «ខ្ញុំមិនអាចបោះបង់កីឡាជិះសេះនេះទេ ព្រោះខ្ញុំចូលចិត្តសេះខ្លាំងណាស់។ បើទោះបីជាខ្ញុំមិនមានបំណងវិវឌ្ឍខ្លួនឯងរហូតក្លាយជាគ្រូបង្វឹក និងជាថ្នាក់ដឹកនាំសហព័ន្ធ នាពេលអនាគត ប៉ុន្តែខ្ញុំពិតជាមានមហិច្ឆតាដណ្តើមយកមេដាយមាសជូនប្រទេសជាតិ និងប្រជាជនរបស់យើង ក្នុងនាមកីឡាការិនីជាសែរាជវង្សម្នាក់»។
អម្រិតា បានបន្ថែមថា៖ «ការដាក់ចិត្តបែបនេះ ព្រោះខ្ញុំចង់បន្តតំណក់ឈាមរបស់លោកតា (នរោត្តម សីហនុ) ដែលព្រះអង្គក៏ជាអ្នកចូលចិត្តជិះសេះនិងជាអ្នកបង្កើតឱ្យមានសហព័ន្ធកម្ពុជាបង្ហាត់ជិះសេះ ហើយចំណុចនេះហើយ ដែលបានជំរុញ និងលើកទឹកខ្ញុំឱ្យចាប់យកជំនាញកីឡាជិះសេះមកទល់សព្វថ្ងៃ។ នៅពេលនឹកឃើញដល់លោកតាគឺអារម្មណ៍របស់ខ្ញុំកាន់តែមានភាពពុះកញ្ជ្រោលខ្លាំងក្នុងការខំប្រឹងពង្រឹងសមត្ថភាពខ្លួនឯង ហើយខ្ញុំសង្ឃឹមថា ខ្ញុំនឹងអាចក្លាយជាកីឡាការិនីម្នាក់ ដែលផ្តល់ភាពជាគំរូដល់កីឡាការិនីរបស់កម្ពុជាផ្សេងៗទៀត»។
ជាមួយគ្នានេះ លោក ហូយ សុផារិទ្ធ គ្រូបង្វឹកជម្រើសជាតិ និងជាគ្រូប្រចាំនៅសហព័ន្ធកម្ពុជាបង្ហាត់ជិះសេះ បានឱ្យដឹងថា ការដាក់គោលដៅរបស់ព្រះនាងតូច នរោត្តម អម្រិតា ក្នុងការឈានទៅដណ្តើមមេដាយមាស នៅស៊ីហ្គេម ឆ្នាំ ២០២៥ អាចធ្វើទៅបាន ព្រោះពេលនេះមិនថា អម្រិតា នោះទេ ប៉ុន្តែកីឡាករ កីឡាការិនីក្នុងក្រុមជម្រើសជាតិជាមួយគ្នា ក៏មានសមត្ថភាពកើនឡើងដូចគ្នាដែរ។
លោកបាននិយាយថា៖ «កម្រិតសមត្ថភាពរបស់ក្រុមជិះសេះរបស់យើង នៅពេលនេះ មានការកើនឡើង អាចប្រកួតប្រជែងជាមួយបណ្តាប្រទេសនានា ក្នុងការដណ្តើមមេដាយ នៅស៊ីហ្គេមបាន ចំណែកការដាក់គោលដៅដណ្តើមយកមេដាយមាសរបស់កីឡាការិនី នរោត្តម អម្រិតា ខ្ញុំគិតថា អាចធ្វើទៅបាន ព្រោះព្រះនាងស្រឡាញ់ចូលចិត្ត និងបានហ្វឹកហាត់កីឡានេះតាំងពីនៅតូច»។
ទោះបីជាយ៉ាងណា លោក ហូយ សុផារិទ្ធ បានទម្លាយថា ការចេញទៅបោះជំរំហ្វឹកហាត់នៅប្រទេសថៃ និងនៅប្រទេសផ្សេងៗទៀតនាពេលវិស្សមកាល និងការចូលរួមប្រកួតនៅក្នុងព្រឹត្តិការណ៍ផ្សេងៗទៀត នៅមុនការប្រកួតស៊ីហ្គេម ឆ្នាំ ២០២៥ ឈានចូលមកដល់ វាជារឿងដ៏ចាំបាច់សម្រាប់ក្រុមជិះសេះកម្ពុជា ក៏ដូចជា កីឡាការិនី នរោត្តម អម្រិតា ដើម្បីអាចឈានទៅដណ្តើមយកមេដាយបាន។
គ្រូបង្វឹករូបនេះបានបញ្ជាក់ថា៖ «ការដាក់គោលដៅដណ្តើមយកមេដាយមាសនៅស៊ីហ្គេម ឆ្នាំ ២០២៥ របស់ នរោត្តម អម្រិតា មិនជាលឿនពេកទេ ដោយសារព្រះនាង មានមូលដ្ឋានហាត់ជិះសេះតាំងពីនៅតូច។ តែទោះយ៉ាងណា យើងគួរណាស់បានចេញទៅហ្វឹកហាត់នៅក្រៅប្រទេស ព្រមទាំងចូលរួមការប្រកួតផ្សេងៗឱ្យបានច្រើន ក្នុងកម្រិតការបញ្ជាសេះលោតផ្លោះរបារចាប់ពីកម្ពស់ ១,២០ ម៉ែត្រឡើងទៅ ព្រោះនេះជាបទពិសោធន៍យ៉ាងសំខាន់ដើម្បីចូលរួមប្រកួតស៊ីហ្គេមនៅឆ្នាំ ២០២៥ ដែលគេបានកំណត់កម្ពស់លោតរួចហើយ គឺប្រកួតជាក្រុមកម្ពស់ ១,២០ ម៉ែត្រ និងឯកត្តជនកម្ពស់ ១,២៥ ម៉ែត្រ»៕
