ទិដ្ឋភាពទូកុងតឺន័រនៅកំពង់ផែខេត្តព្រះសីហនុ។ ហុង មិនា
ភ្នំពេញៈ កម្ពុជារំពឹងទទួលបានកំណើននៃការបណ្តាក់ទុនផ្ទាល់ពីវិនិយោគិនជប៉ុនកាន់តែច្រើន ខណៈរដ្ឋាភិបាល និងផ្នែកឯកជនកំពុងខិតខំផ្សព្វផ្សាយពីសក្តានុពលដែលខ្លួនមានទាំងកត្តាភូមិសាស្ត្រ ច្បាប់វិនិយោគ កម្លាំងពលកម្ម និងទីផ្សារនាំចេញទំនិញ ជាដើម។
នាយករដ្ឋមន្ត្រីកម្ពុជាលោក ហ៊ុន ម៉ាណែត ក្នុងដំណើរទស្សនកិច្ចទៅប្រទេសជប៉ុន កាលពីខែធ្នូ ឆ្នាំ ២០២៣ ដើម្បីចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន ឆ្នាំទី៥០ នៃមិត្តភាព និងកិច្ចសហប្រតិបត្តិការអាស៊ាន-ជប៉ុន ក៏បានចូលរួមនៅក្នុងសិក្ខាសាលាវិនិយោគកម្ពុជាឆ្នាំ ២០២៣ ដោយបានជួបផ្ទាល់ជាមួយនឹងវិនិយោគិនជប៉ុន ដើម្បីធ្វើការផ្សព្វផ្សាយនិងទាក់ទាញពួកគេឱ្យចូលមកបណ្តាក់ទុននៅកម្ពុជាកាន់តែច្រើន រួមទាំងផែនការក្នុងការបង្កើតតំបន់តំបន់សេដ្ឋកិច្ចពិសេសកម្ពុជា-ជប៉ុនផងដែរ។
ជាការឆ្លើយទៅនឹងសំណើរបស់រដ្ឋាភិបាល និងផ្នែកឯកជនកម្ពុជា លោក Yoshihisa Suzuki ប្រធានគណៈកម្មាធិការកិច្ចសហប្រតិបត្តិការធុរកិច្ចមេគង្គ-ជប៉ុន នៃសភាពាណិជ្ជកម្ម និងឧស្សាហកម្មជប៉ុន កាលពីចុងសប្តាហ៍កន្លងមកបានជួបពិភាក្សាជាមួយលោកនាយករដ្ឋមន្ត្រីកម្ពុជា ហ៊ុន ម៉ាណែត មុនបន្តជួបពិភាក្សាជាមួយថ្នាក់ដឹកនាំនៃសភាពាណិជ្ជកម្មកម្ពុជា (CCC) ដែលដឹកនាំដោយ លោក គិត ម៉េង ប្រធានសភាពាណិជ្ជកម្មកម្ពុជា។
កម្ពុជាសង្ឃឹមថា ទទួលបានការវិនិយោគពីក្រុមហ៊ុនជប៉ុនកាន់តែច្រើន
អនុប្រធានសភាពាណិជ្ជកម្មកម្ពុជា លោក លឹម ហេង ដែលចូលរួមក្នុងជំនួបទ្វេភាគីរវាងថ្នាក់ដឹកនាំសភាពាណិជ្ជកម្មកម្ពុជា ជាមួយគណៈប្រតិភូជប៉ុន នៅក្នុងតំបន់សេដ្ឋកិច្ចពិសេសរ៉ូយ៉ាល់ គ្រុប កាលពីថ្ងៃទី ២ ខែកុម្ភៈ បានប្រាប់ភ្នំពេញប៉ុស្តិ៍នៅថ្ងៃទី ៤ ខែកុម្ភៈ ថា ជំនួបរវាងផ្នែកឯកជនកម្ពុជា-ជប៉ុន គឺជាការឆ្លើយតបជាវិជ្ជមាននឹងការអំពាវនាវរបស់ថ្នាក់ដឹកនាំកម្ពុជា នាជំនួបជាមួយវិនិយោគិនជប៉ុនកាលពីអំឡុងខែធ្នូ ឆ្នាំ ២០២៣។ លោកបន្តថា ជំនួបនេះគឺមានសារៈសំខាន់ និងអត្ថន័យធំធេងសម្រាប់ផ្សព្វផ្សាយ និងទាក់ទាញអ្នកវិនិយោគជប៉ុនឱ្យចូលមកវិនិយោគផ្ទាល់នៅកម្ពុជាកាន់តែច្រើន និងបង្កើនចំណងទាក់ទងផ្នែកទីផ្សារឱ្យកាន់តែធំ។
លោកនិយាយថា៖ «បន្ទាប់ពីដំណើរទស្សនកិច្ចរបស់ថ្នាក់ដឹកនាំសភាពាណិជ្ជកម្ម និងឧស្សាហកម្មជប៉ុននេះ ខ្ញុំមានសុទិដ្ឋិនិយមថា កម្ពុជានឹងទទួលបានការវិវឌ្ឍជាវិជ្ជមានថ្មីៗបន្ថែមកាន់តែច្រើនពីវិនិយោគិនជប៉ុន»។
បើតាមលោក លឹម ហេង អ្វីដែលគួរចាប់អារម្មណ៍ខ្លាំងក្នុងជំនួបរវាង CCC ជាមួយភាគីជប៉ុន គឺវត្តមានក្រុមហ៊ុនអាកាសចរណ៍ជប៉ុន Japan Airlines ខណៈកន្លងមកការហោះហើរត្រង់រវាងកម្ពុជា-ជប៉ុន គឺមានតែក្រុមហ៊ុនអាកាសចរណ៍ជប៉ុន ANA ប៉ុណ្ណោះ។
ការវិនិយោគរបស់ជប៉ុននៅកម្ពុជាពេលនេះ គឺមានគម្រោងធំៗច្រើន ដូចជា ក្រុមហ៊ុន Minebea (Cambodia), រោងចក្រផលិតគ្រឿងម៉ាស៊ីន និងម៉ូទ័រ, រោងចក្រដំឡើងរថយន្ត,ផ្សារ Aeon Mall, វិស័យកសិកម្ម និងតំបន់សេដ្ឋកិច្ចពិសេស ជាដើម។
នៅក្នុងជំនួបជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត កាលពីថ្ងៃទី ១ ខែកម្ភៈ លោក Yoshihisa Suzuki បានឱ្យដឹងថា បច្ចុប្បន្នសភាពាណិជ្ជកម្ម និងឧស្សាហកម្មជប៉ុន គឺជាស្ថាប័នសេដ្ឋកិច្ច និងពាណិជ្ជកម្មដ៏ធំមួយនៅប្រទេសជប៉ុន ដោយមានការិយាល័យចំនួន ៥១៥ ទីតាំង និងមានសមាជិកជាង ១,២៥ លាននាក់ ដែលផ្តោតភាគច្រើនលើវិស័យវាយនភណ្ឌ គ្រឿងម៉ាស៊ីន លោហធាតុ ថាមពល សារធាតុគីមី អាហារ លំនៅឋាន បច្ចេកវិទ្យា និងហិរញ្ញវត្ថុ។
គម្រោងបង្កើតតំបន់សេដ្ឋកិច្ច គឺដើម្បីទាក់ទាញវិនិយោគិនជប៉ុន
ប្រធានសមាគមអចលនទ្រព្យសកល លោក សំ សុខនឿន ដែលកំពុងសិក្សាលទ្ធភាពចាប់ដៃគូជាមួយវិនិយោគិនជប៉ុន លើគម្រោងបង្កើតតំបន់សេដ្ឋកិច្ចពិសេសកម្ពុជា-ជប៉ុន បាននិយាយថា នៅពេលមានការវិនិយោគលើតំបន់សេដ្ឋកិច្ចពិសេសពីសំណាក់វិនិយោគិនជប៉ុន គឺពិតណាស់វានឹងជួយទាក់ទាញវិនិយោគិនជប៉ុនឱ្យមកវិនិយោគនៅកម្ពុជាកាន់តែច្រើន។ ជាក់ស្តែងដោយសារបច្ចុប្បន្នតំបន់សេដ្ឋកិច្ចពិសេសនៅកម្ពុជាមានម្ចាស់ភាគច្រើនជាជនជាតិចិន ដូច្នេះវិនិយោគិនចិននៅកម្ពុជាក៏មានជាងគេច្រើនដែរ។
លោកបាននិយាយថា៖ «វិនិយោគិនជប៉ុនភាគច្រើនត្រូវបានគេទទួលស្គាល់ថា ជាវិនិយោគិនមានសក្តានុពល និងមានភាពច្បាស់លាស់ ដូច្នេះបើកម្ពុជាមានតំបន់សេដ្ឋកិច្ចដែលមានម្ចាស់ជាវិនិយោគិនជប៉ុន គឺប្រាកដជាមានឱកាសច្រើនក្នុងការទាក់ទាញក្រុមហ៊ុនជប៉ុនឱ្យចូលមកបណ្តាក់ទុន»។
លោកបានបន្ថែមថា៖ «ទន្ទឹមនឹងការសិក្សាទីតាំងបង្កើតតំបន់សេដ្ឋកិច្ចនេះ ខ្ញុំក៏កំពុងសិក្សាស៊ីជម្រៅជាមួយអ្នកវិនិយោគជប៉ុនដើម្បីស្វែងរកក្រុមហ៊ុនដែលមានលទ្ធភាពកៀរគរក្រុមហ៊ុនជប៉ុនដទៃទៀតឱ្យមកបើករោងចក្រ/សហគ្រាសក្នុងតំបន់សេដ្ឋកិច្ចពិសេសកម្ពុជា-ជប៉ុន ដែលអាចលេចវត្តមាននាពេលខាងមុខ»។
លោកបន្ថែមថា៖ «បើសិនក្រុមហ៊ុនជប៉ុនល្បីៗមកបើករោងចក្រផ្ទាល់នៅកម្ពុជា គឺវានឹងជួយឱ្យគុណភាពផលិតផលប្រើប្រាស់នៅកម្ពុជាកាន់តែល្អ ហើយក៏ជួយលើកកម្ពស់សមត្ថភាពនាំចេញទំនិញកម្ពុជាទៅទីផ្សារអន្តរជាតិផងដែរ»។
នៅក្នុងបំណងទាក់ទាញវិនិយោគិនជប៉ុនឱ្យមកវិនិយោគនៅកម្ពុជាកាន់តែច្រើន លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ២៥ ធ្នូ ឆ្នាំ ២០២៣ បានដឹកនាំកិច្ចប្រជុំអន្តរក្រសួងជាមួយនឹងគណៈប្រតិភូនៃប្រទេសជប៉ុន ដែលដឹកនាំដោយ លោក UENO Atsushi ឯកអគ្គរាជទូតប្រទេសជប៉ុនប្រចាំនៅកម្ពុជា។
ក្នុងកិច្ចប្រជុំនោះបានពិភាក្សាដោយផ្តោតសំខាន់ទៅលើការងារធំៗចំនួន ២ ទី១ ការពង្រីកវិសាលភាពកំពង់ផែស្វយ័តក្រុងព្រះសីហនុឱ្យក្លាយជាកំពង់ផែប្រចាំតំបន់ និងទី២ គម្រោងសិក្សា និងរៀបចំបង្កើតតំបន់សេដ្ឋកិច្ចពិសេសកម្ពុជា-ជប៉ុនដែលជាតំបន់សេដ្ឋកិច្ចពិសេសបង្កើតឡើងដើម្បីជំរុញលើកទឹកចិត្តវិនិយោគិនជប៉ុនឱ្យមកវិនិយោគនៅកម្ពុជាកាន់តែច្រើន។
ជប៉ុន គឺជាដៃគូពាណិជ្ជកម្ម និងវិនិយោគសំខាន់របស់កម្ពុជា
យោងតាមធនាគារជាតិនៃកម្ពុជា បើគិតត្រឹមត្រីមាសទី១ នៃឆ្នាំ ២០២៣ ជប៉ុន ជាប្រទេសដែលវិនិយោគផ្ទាល់នៅកម្ពុជាច្រើនជាងគេទី៤ ដោយមានទឹកប្រាក់សរុប ១១,៣ ទ្រីលានរៀល (កើន ១១,៦ ភាគរយ ធៀបរយៈពេលដូចគ្នាឆ្នាំ ២០២២) គឺបន្ទាប់ពីប្រទេសចិន កូរ៉េ និងសិង្ហបុរី។ វិនិយោគិនជប៉ុនភាគច្រើនវិនិយោគនៅក្នុងវិស័យហិរញ្ញវត្ថុ សំណង់ សណ្ឋាគារ និងអចលនទ្រព្យ ជាដើម។
ស្ថិតិពាណិជ្ជកម្មអន្តរជាតិរបស់អគ្គនាយកដ្ឋានគយ និងរដ្ឋាករកម្ពុជាឱ្យដឹងថា ក្នុងឆ្នាំ ២០២៣ ការធ្វើពាណិជ្ជកម្មរវាងកម្ពុជា-ជប៉ុន មានទឹកប្រាក់សរុប ១,៨ ពាន់លានដុល្លារ ធ្លាក់ចុះ ៧,២ ភាគរយ ធៀបឆ្នាំ ២០២២ ដែលមាន ១,៩៤ ពាន់លានដុល្លារ។ ក្នុងនោះទំនិញកម្ពុជានាំទៅប្រទេសជប៉ុន មានចំនួន ១,១៧ ពាន់លានដុល្លារ កើន ០, ២ភាគរយ និងទំនិញជប៉ុននាំមកកម្ពុជា មានចំនួន ៦២៣,៦ លានដុល្លារ ធ្លាក់ចុះ ១៨,៥ ភាគរយ៕
