សាររំឭករបស់សមត្ថកិច្ចឱ្យពលរដ្ឋប្រុងប្រយ័ត្នការឆបោកតាមអនឡាញ។ រូបថត A.C.C.D.
ភ្នំពេញៈ លោក ណាឌី ត្រូវបានគេឆបោកក្នុងបណ្តាញសង្គមអស់ប្រាក់សរុបជិត ៥០០ ដុល្លារ បន្ទាប់ពីដាក់ប្រាក់វិនិយោគជាមួយក្រុមហ៊ុនអនឡាញ (Online) មួយក្នុងរយៈពេលប្រមាណ ៣ ខែ ចាប់ពីដើមខែតុលា ឆ្នាំមុន រហូតដល់ដើមខែមករា ឆ្នាំនេះ។
ក៏ប៉ុន្ដែលោកបានសម្រេចមិនបន្តបង់ប្រាក់វិនិយោគតទៅទៀត បន្ទាប់ពីក្រុមហ៊ុននេះតម្រូវឱ្យលោកបង់ប្រាក់ជាច្រើនដងដើម្បីដកប្រាក់ចំណេញ តែលោកនៅតែមិនអាចដកប្រាក់នេះបានសូម្បីតែ ១ សេន។
ណាឌី គឺជាឈ្មោះដែលអ្នកនិពន្ធបានដាក់ឱ្យដោយសារលោកសុំមិនបញ្ចេញឈ្មោះ ព្រោះតែបារម្ភខ្លាចសមាជិកគ្រួសារដឹងពីរឿងនេះ។លោកណាឌី ដែលរស់នៅខេត្តសៀមរាបបានរៀបរាប់ប្រាប់ ភ្នំពេញ ប៉ុស្ដិ៍ថា មុនដំបូងលោកបានស្គាល់គណនីហ្វេសប៊ុកមួយឈ្មោះ លីន ជាជនជាតិកូរ៉េ ហើយគេបានណែនាំលោកឱ្យវិនិយោគទុនជាមួយក្រុមហ៊ុនរបស់គេ ហើយបុរសឈ្មោះ លីន បានណែនាំពីរបៀបចុះឈ្មោះបើកគណនីក្រុមហ៊ុននេះ ប៉ុន្តែវាមិនដំណើរការនៅពេលលោកចុះឈ្មោះ។
លោក ណាឌី បានបន្ដថា នៅពេលនោះ ឈ្មោះ លីន ក៏បានប្រាប់លោកថា ចាំរូបគេបើកគណនីនេះឱ្យដោយដាក់ឈ្មោះគណនីមួយឱ្យលោក ហើយបានប្រាប់លោកឱ្យដាក់ប្រាក់វិនិយោគចំនួន ៥០ ដុល្លារដែលក្នុង ១ ថ្ងៃទទួលប្រាក់ចំណេញ ១០ ដុល្លារមកវិញ។ ក្រោយមក ណាឌី ប្រាប់ទៅវិញថា លោកមិនមានប្រាក់វិនិយោគទេ តែពេលនោះឈ្មោះ លីន ក៏បានដាក់ប្រាក់ឱ្យលោកចំនួន ៥០ ដុល្លារ ហើយលោកក៏យកប្រាក់នេះវិនិយោគជាមួយក្រុមហ៊ុននេះតែម្ដង។
លោក ណាឌី បានថ្លែងថា៖ «ដល់ពេលអ៊ីចឹងខ្ញុំដាក់លុយរបស់គាត់ឱ្យ ៥០ ដុល្លារ ហ្នឹងទៅមកៗ រហូតទៅបានរយៈពេល ៥ ថ្ងៃ ខ្ញុំក៏ថាឥឡូវ ខ្ញុំសុំដាក់ ១ ថ្ងៃ ១០០ ដុល្លារហ្នឹងទៅ សុំ ១ ថ្ងៃដកម្ដង តែគាត់ឆ្លើយថាអត់ទេ។ គាត់ថា ដាក់ឱ្យយើងទៅជាសមាជិកវីអាយភី (VIP) ហើយ អ៊ីចឹងទាល់តែយើងដាក់ ១០០ ដុល្លារ ៥ ថ្ងៃជាប់គ្នា។ ខ្ញុំសួរថាម៉េចអ៊ីចឹង? ឥឡូវខ្ញុំសុំមិនភ្ជាប់ VIP ទេ ខ្ញុំសុំភ្ជាប់ត្រឹម ១ ថ្ងៃម្ដង។ ដល់ពេលអ៊ីចឹងគាត់ថា ចាំគាត់និយាយជាមួយក្រុមហ៊ុនឱ្យ។ អ៊ីចឹង ខ្ញុំសុំដកលុយវិញ តែគាត់ឱ្យយើងបង់លុយ»។
លោក ណាឌី បានប្រាប់ទៀតថា ដើម្បីអាចដកប្រាក់បានវិញ លោកក៏បានដាក់ប្រាក់[បង់លុយបន្ថែម]តាមការតម្រូវរបស់ឈ្មោះលីន។ ក៏ប៉ុន្តែក្រោយដាក់ប្រាក់បន្ថែមរួចហើយក៏នៅតែមិនអាចដកប្រាក់នេះមកវិញបាន ហើយឈ្មោះ លីន ក៏បានប្រាប់ឱ្យលោកដាក់ប្រាក់ថែមទៀតជាបន្តបន្ទាប់ ដើម្បីដកប្រាក់លោកមកវិញ តែប្រាក់នៅតែមិនអាចដកមកវិញបានដដែល។
លោក ណាឌី ឆ្លើយឆ្លងសារជាមួយឈ្មោះ លីន ជាភាសាអង់គ្លេសតាម Facebook messenger និងផ្ទេរប្រាក់ទាំងនេះតាមប្រព័ន្ធទូរស័ព្ទដៃវៃឆ្លាត (smart phone) របស់ធនាគារក្នុងស្រុកមួយ ខណៈអ្នកទទួលប្រាក់ផ្ទេរពីណាឌីក៏ប្រើគណនីធនាគារក្នុងស្រុកផងដែរ។
លោកថា៖«គេឱ្យថែមទៅ!គេថា យើងត្រូវបានជាប់ជាសមាជិក VIP ហើយ។ អ៊ីចឹងយើងមានរង្វាន់ ៣ ៥០០ ដុល្លារ ដែលលុយយើងដាក់ទើបតែបានជាង ៤០០ ដុល្លារទេ តែយើងឈ្នះរង្វាន់ VIP គេ ៣ ៥០០ ដុល្លារ។ អ៊ីចឹងបូកទៅវាជាង ៣ ៩០០ ដុល្លារ លុយហ្នឹងទាំងអស់លុយរបស់យើង។ ឆែកមើលឃើញនៅក្នុង account ហ្នឹងមែន»។
លោកបានបន្តថា៖ «អ៊ីចឹងខ្ញុំថាខ្ញុំសុំដកលុយហ្នឹង។ គេថា ដកអត់បានទេ ដោយសារជាប់លេខកូដជាប់សោ។ អ៊ីចឹងយើងត្រូវបង់លុយដោះសោ ៧៥០ ដុល្លារ ហើយខ្ញុំថា ខ្ញុំអត់មានទេ។ អ៊ីចឹងខ្ញុំអត់ដកចុះ!អ្នកឯងបោកប្រាស់ខ្ញុំហើយ! គាត់ថា ឥឡូវក្រុមហ៊ុនគេអត់បោកទេ ព្រោះលុយនៅក្នុង account របស់អ្នកឯងក្នុងក្រុមហ៊ុននៅមាននៅឡើយទេ ជាង ៣ ៩០០ ដុល្លារហ្នឹង។ អ៊ីចឹងអ្នកឯងបង់លុយមកគេនឹងដកលុយហ្នឹងឱ្យ។ ខ្ញុំថា ខ្ញុំអត់ដកទេ»។
លុះរំលងបាន ៣ ខែ ក្រោយណាឌី មិនឆ្លើយឆ្លងជាមួយឈ្មោះ លីន ទេ តែអ្នកណែនាំរូបនេះបានប្រាប់ឱ្យ ណាឌី ទាក់ទងផ្ទាល់ទៅក្រុមហ៊ុន ដើម្បីដកប្រាក់នេះបាន ហើយឈ្មោះ លីន ថា នឹងភ្ជាប់តេឡេក្រាមឱ្យ។ ណាឌី ក៏ចង់ដឹងថា តើម្ចាស់តេឡេក្រាមនេះជាអ្នកណា ហើយក៏ធ្វើការភ្ជាប់តេឡេក្រាម។ ក្រោយមកណាឌីក៏ដឹងថា ម្ចាស់តេឡេក្រាមនេះមិនដាក់រូបភាពក្នុង profile ទេ ដោយគ្រាន់តែដាក់ឈ្មោះក្រុមហ៊ុន និងនិមិត្ដសញ្ញា (Logo)។
លោក ណាឌី បានថ្លែងថា៖ «អ៊ីចឹងគេក៏និយាយណែនាំយើងថា ឥឡូវឱ្យបង់ ៣៥០ ដុល្លារ។ ខ្ញុំថា ខ្ញុំអត់មានទេព្រោះរាល់ថ្ងៃខ្ញុំកំពុងតែអត់លុយ។ អ៊ីចឹងម្នាក់ដែលជាអ្នកណែនាំយើងហ្នឹងក៏បាននិយាយថាឥឡូវគាត់ជួយ ១០០ ដុល្លារ ឱ្យខ្ញុំរកថែម ២៥០ ដុល្លារមក។ ខ្ញុំថាអត់មាន អត់មាន! គាត់ថា ឥឡូវអ្នកឯងចរចាផ្ទាល់ជាមួយក្រុមហ៊ុនតាមតេឡេក្រាមទៅ! អ៊ីចឹងគេក៏ឱ្យខ្ញុំបង់លុយ ១៥០ ដុល្លារ ដើម្បីបានដកលុយហ្នឹង។ ខ្ញុំថា ខ្ញុំអត់មានទេ»។
បន្ទាប់មកលោក ណាឌី ក៏ទាក់ទងទៅឈ្មោះលីនវិញ ហើយឈ្មោះ លីន ក៏បានប្រាប់ឱ្យលោកដាក់ប្រាក់ ៥០ ដុល្លារ ហើយខាងក្រុមហ៊ុនឱ្យខ្ចី ១០០ ដុល្លារ។
លោកបន្តថា៖ «អ៊ីចឹងខ្ញុំក៏ដាក់ ៥០ ដុល្លារ ហើយក្រុមហ៊ុនគេឆែកមើលហើយប្រហែលអត់ដល់ ១ នាទីទេ គេផ្ញើសារមកវិញថា គេពិនិត្យឃើញហើយ ៥០ ដុល្លារហ្នឹង ហើយឥឡូវមានអ្នកឧបត្ថម្ភឱ្យអ្នកបាន ១០០ ដុល្លារហើយ ទាំងអស់បាន ១៥០ ដុល្លារហើយ។ អ៊ីចឹង អ្នកឯងចាំមើលគេឆែកមើលប្រព័ន្ធឱ្យម្ដងទៀត»។
លោក ណាឌី បន្តថា៖ «ដល់ឆែកម្តងទៀត គេថា អ្នកឯងត្រូវបង់លុយមួយសាទៀត ៣០ ដុល្លារដើម្បីបានដកលុយហ្នឹង។ ខ្ញុំបញ្ជាក់ហើយបញ្ជាក់ទៀត គេថា លើកចុងក្រោយហើយ ៣០ ដុល្លារហ្នឹង! ខ្ញុំក៏ដាក់ ៣០ ដុល្លារទៅទៀត។ ដាក់ ៣០ ដុល្លារទៅទៀត! ក្រុមហ៊ុនគេឆ្លើយមកវិញថា ទាល់តែថែម ៥០ ដុល្លារទៀតបានដកលុយហ្នឹងបាន។ ខ្ញុំក៏ឈប់! ហើយយប់មិញនេះ (៩ មករា) ក្រុមហ៊ុនក៏នៅផ្ញើសារមកដែរឱ្យខ្ញុំបង់លុយ ៥០ ដុល្លារទៀតជាលើកចុងក្រោយ ហើយខ្ញុំសរសេរទៅថា អ្នកឯងបោកខ្ញុំហើយអ៊ីៗហ្នឹង!។ គេថាអត់ទេ ក្រុមហ៊ុនអត់បានបោកទេ ព្រោះអីលុយអ្នកឯងនៅក្នុងក្រុមហ៊ុននៅឡើយទេ។ តែមកពីអ្នកឯងមិនបង់លុយសម្រាប់ដក។ គេនិយាយអ៊ីចឹង!»។
លោក ណាឌី បានប្រាប់ទៀតថា ការដែលលោកត្រូវបានឆបោកនេះមកពីភាពលោភលន់របស់លោកទេ។ លោកថា៖ «កាលណាយើងចង់បានផលចំណេញពីគេ យើងធ្វើដោយមិនបានគិតពិចារណា ចេះតែធ្វើតាមគេណែនាំ គេលួងលោម វាត្រូវបាត់បង់ផលប្រយោជន៍អ៊ីចឹងហើយ។ បើយើងមិនស្គាល់ពីស្ថានភាព កន្លែងដែលយើងវិនិយោគហ្នឹងច្បាស់យើងកុំវិនិយោគល្អជាង»។
លោកថ្លែងថា៖ «ខ្ញុំគ្រាន់ចង់ថា បើសិនណាជាក្រុមហ៊ុនវាបោកមែន កុំឱ្យមានអ្នកចាញ់បោកដូចខ្ញុំអ៊ីចឹងណា៎! ព្រោះលុយប៉ុណ្ណឹងវាមិនអីទេ តែគ្រាន់ថាមិនចង់ឱ្យមានបុគ្គលផ្សេងចាញ់បោកទៀត។ យើងមិនបន្ទោសពីគេបោកទេ បន្ទោសពីយើងមានភាពលោភលន់។ យើងគិតថា វិនិយោគទៅបានផលចំណេញអ៊ីចឹងណា៎!»។
លោកថ្លែងថា៖ «ខ្ញុំគ្រាន់តែចង់ផ្ដាំទៅថា កុំឱ្យចាញ់បោកអារឿងល្បែងភ្នាល់តាមអនឡាញឬក៏ក្រុមហ៊ុនវិនិយោគតាមអនឡាញអីហ្នឹងកុំ! ព្រោះអីបច្ចុប្បន្នច្រើនណាស់ប្រទេសកម្ពុជា យើងឃើញថា post ផ្សព្វផ្សាយពី trade [វិនិយោគ] ផងពីល្បែងអនឡាញផងមានគ្រប់ប្រភេទ»។
មុនដំបូងឡើយ លោក ណាឌី គិតថា ក្រុមហ៊ុននេះប្រហែលជាទីផ្សារភាគហ៊ុនទើបលោកសម្រេចចិត្តដាក់ប្រាក់វិនិយោគ។ ក្រោយមកទើបលោកគិតថានេះជាការឆបោក។ «និយាយទៅ យើងធ្វើការមានលុយតិចតួចអ៊ីចឹង! គិតថាបើសិនណាជាវិនិយោគជាមួយគេទៅ ១ ថ្ងៃ [វិនិយោគ] ៥០ ដុល្លារ ១ ថ្ងៃបាន ១០ ដុល្លារ ឬក៏អ៊ីចឹងយើងធ្វើតែ ១ ឆ្នាំ ឬអី យើងអាចថា ដោះស្រាយជីវភាពរបស់យើងបានណា៎។ ដល់ពេលអ៊ីចឹង គ្រាន់តែចាប់ផ្ដើមចូលភ្លាមដឹងខ្លួនភ្លាមថាអូ!គេបោក!យើងក៏ដកឈប់ ហើយក៏មិនចង់ឱ្យនរណាដឹងដែរព្រោះអារឿងដែលយើងចាញ់បោកអ៊ីចឹងណា៎!តែពួកវានៅតែព្យាយាមល្បួងយើងឱ្យចូលលេងអ៊ីចឹង»។
នៅមុនវិនិយោគ លោក ណាឌី ក៏បានឆែកមើលប្រវត្តិក្រុមហ៊ុនក្នុង Google ផងដែរ ហើយក៏ឃើញឈ្មោះក្រុមហ៊ុននេះ តែលោកមិនមែនជាអ្នកចេះភាសាអង់គ្លេសច្រើនទេ។ ពេលឆែកឃើញក្រុមហ៊ុននេះហើយ លោកបានឃើញមានការបង្ហោះរូបភាពសកម្មភាពអ្នកវិនិយោគទទួលបានផលចំណេញ ហើយលោកក៏ប្រថុយតាមពួកគេដោយសារមុនពេលលោកប្រថុយ ខាងក្រុមហ៊ុននេះបានបង់ប្រាក់ ៥០ ដុល្លារ ឱ្យលោកវិនិយោគជាលើកដំបូង។ «បានន័យថា គេល្បួងយើង។គេចេញឱ្យសិន ហើយលុយហ្នឹងក៏គេមិនបានយកពីយើងវិញដែរ ៥០ ដុល្លារហ្នឹង។ វានៅលើយើងហ្នឹង!»។
ចំពោះករណីឆបោកនេះ លោក ណាឌី ក៏បានរាយការណ៍ទៅកាន់នាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃតាមរយៈប្រអប់សារហ្វេសប៊ុក (Facebook messenger) របស់នាយកដ្ឋានផងដែរ ដោយលោកចង់ឱ្យសមត្ថកិច្ចជួយចាត់វិធានការលើក្រុមជនឆបោកកុំឱ្យមានទៀត។
លោក ណាឌី បានឱ្យដឹងថា នៅមុនលោកត្រូវបានឆបោកនេះ លោកក៏ធ្លាប់ចាញ់បោកអស់ប្រាក់ជាង ២ ម៉ឺនដុល្លារម្ដងហើយ ដោយវិនិយោគបង់ប្រាក់ផ្ទាល់ជាមួយក្រុមហ៊ុនមួយនៅកម្ពុជាក្នុងឆ្នាំ ២០១៨។
ក្នុងខណៈកំពុងមានការរីកចម្រើនផ្នែកបច្ចេកវិទ្យាឌីជីថលនៅក្នុងកិច្ចប្រជុំមួយកាលពីដើមខែមករា លោក ស ថេត អគ្គស្នងការនគរបាលជាតិបានណែនាំដល់គ្រប់បណ្ដានាយកដ្ឋាន អង្គភាព និងស្នងការដ្ឋាននគរបាលរាជធានីខេត្ត ព្រមទាំងមន្ដ្រីទាំងអស់ ត្រូវពង្រឹងសមត្ថភាព និងដើរឱ្យទាន់សង្គមបច្ចេកវិទ្យាឌីជីថល ខណៈកន្លងទៅនិងមកទល់ពេលនេះ នៅមានពលរដ្ឋជាច្រើនបានរងគ្រោះដោយសារក្រុមជនឆបោកតាមប្រព័ន្ធបច្ចេកវិទ្យា ពិសេសនៅតាមទីជនបទ។
លោកបានបញ្ជាក់ថា តំបន់ដែលមានពលរដ្ឋរងគ្រោះដោយសារបទល្មើសបច្ចេកវិទ្យាច្រើនគឺនៅខេត្តមណ្ឌលគិរី រតនគិរី សៀមរាប និងរាជធានីភ្នំពេញ។
រីឯកាលពីថ្ងៃទី ៣១ ខែមករា លោក ស ថេត ក៏បានបញ្ជាក់ជាថ្មីថា ក្រុមការងារ Hotline Scam ដែលមានមន្ត្រីជំនាញប្រចាំការ ២៤ ម៉ោងលើ ២៤ ម៉ោងកំពុងរង់ចាំទទួលព័ត៌មានពីពលរដ្ឋដែលមានការចាញ់បោកឧក្រិដ្ឋជនតាមប្រព័ន្ធបច្ចេកវិទ្យាបែបនេះ បន្ថែមលើយន្ដការដែលមានស្រាប់ដើម្បីជួយអន្តរាគមន៍និងជួយសម្រួលក្នុងការដាក់ពាក្យបណ្ដឹង។
លោកបានបញ្ជាក់ថា៖ «នៅក្នុងយុគសម័យថ្មីនេះការរងនូវការឆបោកតាមប្រព័ន្ធបច្ចេកវិទ្យា ទោះបីជាមិនមែនបទល្មើសប្រពៃណី ប៉ុន្ដែឈានទៅដល់ការបោកពលរដ្ឋនៅតាមមូលដ្ឋាន»។
កាលពីដើមខែធ្នូ ឆ្នាំមុន នាយកដ្ឋានប្រឆាំងបទល្មើសបច្ចេកវិទ្យាបានឃាត់ខ្លួនជនសង្ស័យម្នាក់ជាស្ត្រីពីបទឆបោកនៅរាជធានីភ្នំពេញ ក្រោយពីជនរងគ្រោះបានដាក់ពាក្យបណ្តឹងទៅនាយកដ្ឋាននេះ។ ជនសង្ស័យបានប្រើប្រាស់គណនីតេឡេក្រាមឆាតទៅជនរងគ្រោះ ដើម្បីចរចាទិញកាបូបម៉ាកក្នុងតម្លៃ ៣ ៨០០ ដុល្លារ តែក្រោយពីបានទទួលកាបូបរួច ជនសង្ស័យមិនបានទូទាត់ប្រាក់ឱ្យជនរងគ្រោះទេ។
ករណីដោយឡែកមួយទៀត កាលពីខែវិច្ឆិកា ឆ្នាំ ២០២៣ កម្លាំងនាយកដ្ឋានប្រឆាំងបទល្មើសបច្ចេកវិទ្យាបានសហការជាមួយតុលាការរាជធានីភ្នំពេញ បានចាប់ខ្លួនជនសង្ស័យជាស្ត្រីម្នាក់ និងបញ្ជូនទៅកាន់តុលាការលើករណីលួចចូលបណ្តាញទំនាក់ទំនងសង្គម បន្លំយកប្រាក់ពីជនរងគ្រោះ ព្រមទាំងក្លែងបន្លំអត្តសញ្ញាណអ្នកដទៃប្រើប្រាស់ក្នុងការប្រើប្រាស់លេខទូរស័ព្ទទៅប្រព្រឹត្តបទល្មើស៕
