ទិដ្ឋភាពទូរកុងតឺន័រនៅកំពង់ផែស្វយ័តខេត្តព្រះសីហនុ។ ហេង ជីវ័ន
ភ្នំពេញៈ ការប្តេជ្ញាចិត្តរបស់មេដឹកនាំប្រទេស ២ ក្នុងតំបន់អាស៊ីអាគ្នេយ៍គឺកម្ពុជា និងម៉ាឡេស៊ី លើការធ្វើឱ្យកាន់តែស៊ីជម្រៅនូវកិច្ចសហប្រតិបត្តិការទ្វេភាគីនោះ វានឹងដើរតួនាទីដ៏សំខាន់ដើម្បីជំរុញទំនាក់ទំនងផ្នែកសេដ្ឋកិច្ច និងការវិនិយោគ ខណៈបច្ចុប្បន្នប្រទេសម៉ាឡេស៊ី គឺជាដៃគូពាណិជ្ជកម្មឈានមុខគេ ហើយក៏ឈរនៅក្នុងចំណោមការវិនិយោគផ្ទាល់ពីបរទេសឈានមុខគេមកកាន់ប្រទេសកម្ពុជាផងដែរ។
មេដឹកនាំទាំង ២ បានព្រមព្រៀងគ្នានៅកម្រិតខ្ពស់ថ្មីមួយនាយករដ្ឋមន្ត្រីកម្ពុជា លោក ហ៊ុន ម៉ាណែត បានទៅបំពេញទស្សនកិច្ចផ្លូវការនៅប្រទេសម៉ាឡេស៊ី កាលពីថ្ងៃទី ២៧ ខែកុម្ភៈថ្មីៗនេះ ដោយបានជួបជាមួយសមភាគីម៉ាឡេស៊ី លោកប្រធានាធិបតី អាន់វ៉ា អ៊ីប្រាហ៊ីម និងជួបជាមួយថ្នាក់ដឹកនាំកំពូលប្រទេសម៉ាឡេស៊ីផ្សេងៗទៀតដូចជា រដ្ឋសភាជាតិ ព្រឹទ្ធសភា ព្រមទាំងក្រុមហ៊ុនពាណិជ្ជករធំៗផងដែរ។
ក្នុងដំណើរទស្សនកិច្ចនោះថ្នាក់ដឹកនាំនៃប្រទេសទាំង ២ ក៏បានប្តេជ្ញាពង្រឹងទំនាក់ទំនងរបស់ខ្លួនថែមទៀតដោយ លោក ម៉ាណែត និងសមភាគីម៉ាឡេស៊ីលោក អាន់វ៉ា អ៊ីប្រាហ៊ីម បានប្រកាសក្នុងសន្និសីទសារព័ត៌មានរួមគ្នាថា នឹងប្តេជ្ញាធ្វើឱ្យប្រសើរឡើងនូវកិច្ចសហប្រតិបត្តិការលើវិស័យសន្តិសុខ ការពារជាតិ ទេសចរណ៍ បច្ចេកវិទ្យា ឌីជីថល ហិរញ្ញវត្ថុ អាហារហាឡាល់...សន្តិសុខថាមពល។
លោក ម៉ាណែត បានថ្លែងថា៖ «ដំណើរទស្សនកិច្ចរបស់លោក អាន់វ៉ា មកកាន់ប្រទេសកម្ពុជាកាលពីខែមីនាឆ្នាំមុន ហើយដំណើរទស្សនកិច្ចរបស់ខ្ញុំនៅពេលនេះ នឹងធ្វើឱ្យទំនាក់ទំនងដ៏យូរអង្វែងរវាងកម្ពុជា និងម៉ាឡេស៊ីកាន់តែស៊ីជម្រៅ»។
រដ្ឋាភិបាលទាំង ២ ក៏បានឯកភាពក្នុងការពិនិត្យលទ្ធភាពនៃការរៀបចំកិច្ចប្រជុំគណៈកម្មការចម្រុះកម្ពុជា-ម៉ាឡេស៊ី សម្រាប់កិច្ចសហប្រតិបត្តិការទ្វេភាគី នៅពេលខាងមុខ និងដើម្បីសម្រួលដល់បណ្ដាញថាមពលក្រោមបាតសមុទ្ររវាងប្រទេសឡាវ កម្ពុជា និងសិង្ហបុរី តាមរយៈដែនទឹកម៉ាឡេស៊ី។
អ្នកជំនាញផ្នែកទំនាក់ទំនងអន្តរជាតិ និងជាអ្នកសង្កេតការណ៍នយោបាយក្នុងតំបន់ លោក សេង វ៉ាន់លី បានលើកឡើងថា ដំណើរទស្សនកិច្ចរបស់លោក ម៉ាណែត បង្ហាញពីការយកចិត្តទុកដាក់យ៉ាងជិតស្និទ្ធចំពោះទំនាក់ទំនងរបស់កម្ពុជាជាមួយម៉ាឡេស៊ី ជាពិសេសរដ្ឋាភិបាល របស់លោក អ៊ីប្រាហ៊ីម។
ទំនាក់ទំនងសេដ្ឋកិច្ចកំពុងកើនឡើងខ្លាំង
ម៉ាឡេស៊ី គឺជាដៃគូពាណិជ្ជកម្មឈានមុខគេមួយសម្រាប់កម្ពុជាកាលពីឆ្នាំ ២០២៣។ ការដោះដូរពាណិជ្ជកម្មទ្វេភាគីរវាងប្រទេសទាំង ២ កាលពីឆ្នាំមុនសម្រេចបានជាង ៦៣២ លានដុល្លារ កើន ២ ភាគរយបើធៀបឆ្នាំ ២០២២។ នេះបើយោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា។
យោងតាមក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ ២០២៣ កម្ពុជាបានទាក់ទាញការវិនិយោគចំនួន ២៦៨ ជាមួយនឹងទុនវិនិយោគជិត ៤,៩ ពាន់លានដុល្លារ កើនជិត ២០ ភាគរយពីចំនួន ៤ ពាន់លានដុល្លារដែលបានកត់ត្រាក្នុងឆ្នាំ ២០២២។ ប្រទេសចិន ឈរនៅកំពូលនៃ FDI នាំមុខគេជាង ៤០ ភាគរយ ហើយតាមពីក្រោយដោយថៃ ជប៉ុន កោះកៃម៉ាន សាម័រ កូរ៉េខាងត្បូង កោះ British Virgin សិង្ហបុរី និងម៉ាឡេស៊ី។
លោក លឹម ហេង អនុប្រធានសភាពាណិជ្ជកម្មកម្ពុជា បានកត់សម្គាល់ឃើញថា ដំណើរទស្សនកិច្ចជាផ្លូវការរបស់លោក ហ៊ុន ម៉ាណែត ទៅកាន់ប្រទេសម៉ាឡេស៊ី មានការចាប់អារម្មណ៍ច្រើនពីវិស័យឯកជនម៉ាឡេស៊ីអំពីឱកាសវិនិយោគនៅកម្ពុជា ដែលពួកគេអាចពង្រីកអាជីវកម្ម ឬការវិនិយោគនៅក្នុងវិស័យផ្សេងៗទៀត។
លោកថ្លែងថា៖ «សភាពាណិជ្ជកម្មកម្ពុជាបានចុះហត្ថលេខាលើអនុស្សរណៈនៃការយោគយល់គ្នាជាមួយសភាពាណិជ្ជកម្មម៉ាឡេស៊ីក្នុងវេទិកាធុរកិច្ចម៉ាឡេស៊ី និងកម្ពុជា»។
លោកបន្ថែមថា សភាពាណិជ្ជកម្មម៉ាឡេស៊ីក៏បានស្នើលោកនាយករដ្ឋមន្ត្រី ហ៊ុន ម៉ាណែត ឱ្យរៀបចំតំបន់សេដ្ឋកិច្ចពិសេសកម្ពុជា និងម៉ាឡេស៊ីផងដែរ។
លោកថ្លែងថា៖ «ជាការឆ្លើយតប លោកនាយករដ្ឋមន្ត្រីរបស់យើងបានយល់ព្រមលើសំណើនេះ ហើយនឹងបង្កើតក្រុមការងារមួយដើម្បីធ្វើឱ្យការងារនេះសម្រេចបាននៅឆ្នាំ ២០២៤។ ខ្ញុំគិតថា បន្ទាប់ពីដំណើរទស្សនកិច្ចផ្លូវការរបស់នាយករដ្ឋមន្ត្រី និងវិស័យឯកជននៅទីនោះ ខ្ញុំជឿថា យើងនឹងមើលឃើញពាណិជ្ជកម្មទ្វេភាគី និងលំហូរការវិនិយោគរវាងប្រទេសទាំង ២ កើនឡើង ដោយសារម៉ាឡេស៊ីក៏ជាសមាជិកកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដូច្នេះពួកគេអាចមកបណ្តាក់ទុននៅទីនេះ ហើយបន្ទាប់មកនាំចេញទៅកាន់បណ្ដាសមាជិកផ្សេងទៀតនៃ RCEP»។
លោក គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបាននិយាយថា ដោយឈរលើរលកនៃកំណើន កម្ពុជាបានក្លាយជាប្រទេសទិញទំនិញពីម៉ាឡេស៊ី ដែលលោកពិពណ៌នាថាជាប្រទេសផលិតគ្រឿងអេឡិចត្រូនិក សម្ភារសំណង់ និងទំនិញប្រើប្រាស់ប្រចាំថ្ងៃក្នុងតំបន់។
លោកថ្លែងថា៖ «ដោយសារវិស័យឧស្សាហកម្ម និងកសិកម្មដែលកំពុងរីកចម្រើនរបស់ប្រទេសម៉ាឡេស៊ី កម្ពុជាអាចកាត់បន្ថយគម្លាតពាណិជ្ជកម្មរបស់ខ្លួនតាមរយៈការនាំចេញផលិតផលដែលមានសក្តានុពលសម្រាប់កែច្នៃនៅប្រទេសម៉ាឡេស៊ី»។
ធនាគារកណ្តាលនៃប្រទេសទាំង ២ បានយល់ព្រមលើកកម្ពស់ការទូទាត់ឆ្លងដែន
ធនាគារកណ្តាលនៃកម្ពុជា និងម៉ាឡេស៊ី បានចុះអនុស្សរណៈនៃការយោគយល់គ្នាដើម្បីពង្រឹងកិច្ចសហប្រតិបត្តិការលើនវានុវត្តន៍ហិរញ្ញវត្ថុ និងការទូទាត់ ជាពិសេសជួយសម្រួលដល់សកម្មភាពពាណិជ្ជកម្ម និងទេសចរណ៍ឆ្លងដែនរវាងប្រទេសទាំង ២ នេះ។ ការណ៍នេះនឹងជួយសម្រួលដល់សកម្មភាពពាណិជ្ជកម្ម និងទេសចរណ៍ឆ្លងដែន។ ពាណិជ្ជកររហូតដល់ ៥ លាននាក់ រួមទាំងអាជីវកម្មខ្នាតតូច មកពីប្រទេសទាំង ២ ដែលបច្ចុប្បន្នទទួលយកការទូទាត់តាមរយៈ QR នឹងទទួលបានអត្ថប្រយោជន៍ពីកិច្ចសហប្រតិបត្តិការនេះ៕
