ស្ពានស្ទឹងត្រង់កំពុងត្រូវបានសាងសង់ឡើង។ រូបថត MPWT
ភ្នំពេញៈ ជាកិច្ចខំប្រឹងប្រែងដើម្បីធ្វើទំនើបកម្ម និងធ្វើឱ្យប្រសើរឡើងនូវហេដ្ឋារចនាសម្ព័ន្ធ ក៏ដូចជាប្រព័ន្ធភ័ស្តុភារ និងធ្វើឱ្យកម្ពុជាក្លាយជាមជ្ឈមណ្ឌលវិនិយោគដ៏ទាក់ទាញក្នុងតំបន់ រាជរដ្ឋាភិបាលកម្ពុជាបានដាក់ចេញគម្រោងអភិវឌ្ឍន៍ហេដ្ឋារចនាសម្ព័ន្ធចំនួន ១៧៤ ដែលនឹងត្រូវចំណាយថវិកាអស់ចំនួន ៣៦,៦៨ ពាន់លានដុល្លារ នៅចន្លោះឆ្នាំ ២០២៣-២០៣៣។ ការណ៍នេះនឹងផ្តល់នូវភាពទាក់ទាញសម្រាប់ការវិនិយោគប្រកបដោយសក្តានុពលដ៏ធំមួយ។
ផែនការមេគ្រប់ជ្រុងជ្រោយរយៈពេល ១០ ឆ្នាំលើប្រព័ន្ធដឹកជញ្ជូន និងប្រព័ន្ធភ័ស្តុភារត្រូវបានដាក់ឱ្យដំណើរការ
ថ្មីៗនេះរាជរដ្ឋាភិបាលកម្ពុជា បានដាក់ចេញផែនទីបង្ហាញផ្លូវរយៈពេល ១០ ឆ្នាំ នៃផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូននិងភ័ស្តុភារកម្ពុជា ឆ្នាំ ២០២៣-២០៣៣ លើគម្រោងអាទិភាពចំនួន ១៧៤ ដែលមានតម្លៃវិនិយោគតាមការប៉ាន់ប្រមាណ ៣៦,៦៨ ពាន់លានដុល្លារ។
ក្នុងនោះគម្រោងផ្លូវថ្នល់ ៩៤, គម្រោងផ្លូវដែក ៨, គម្រោងដឹកជញ្ជូននៅតាមផ្លូវទឹក ២៣, គម្រោងដឹកជញ្ជូនតាមសមុទ្រ ២០, គម្រោងដឹកជញ្ជូនផ្លូវអាកាស ១០, គម្រោងប្រព័ន្ធភ័ស្តុភារ ១៥, និងគម្រោងអភិវឌ្ឍន៍ហេដ្ឋារចនាសម្ព័ន្ធចំនួន ៤ ផ្សេងៗទៀត។
នៅក្នុងចំណោមគម្រោងទាំងអស់គឺមានប្រហែល ៩០ ជាគម្រោងអភិវឌ្ឍន៍រយៈពេលខ្លី និងមធ្យម និង ៩១ ផ្សេងទៀតជាគម្រោងអភិវឌ្ឍន៍រយៈពេលវែង។ គម្រោងទាំងនេះត្រូវបានតភ្ជាប់គ្រប់មធ្យោបាយទាំងអស់នៃការដឹកជញ្ជូន និងបានតភ្ជាប់ជាមួយមជ្ឈមណ្ឌលភ័ស្ដុភារផងដែរ។
ក្រសួងសាធារណការ និងដឹកជញ្ជូនបានឱ្យដឹងថា៖ «ទោះបីយ៉ាងណាការអភិវឌ្ឍប្រព័ន្ធដឹកជញ្ជូន និងឡូជីស្ទិកនៅកម្ពុជា គឺនៅពុំទាន់អាចឆ្លើយតបបានពេញលេញ និងគ្រប់គ្រាន់តាមតម្រូវការ ព្រមទាំងជាកម្លាំងចលកររុញច្រានការអភិវឌ្ឍផ្នែកសង្គមសេដ្ឋកិច្ច ជាពិសេសដំណាក់កាលនៃការប្រែក្លាយទៅជាប្រទេសមានចំណូលមធ្យមកម្រិតខ្ពស់ និងប្រទេសចំណូលខ្ពស់។
ក្នុងន័យនេះ ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភ័ស្តុភារកម្មកម្ពុជា ឆ្នាំ ២០២៣-២០៣៣ ដាក់ចេញនូវចក្ខុវិស័យដោយបន្តកែលម្អ និងអភិវឌ្ឍប្រព័ន្ធដឹកជញ្ជូន និងឡូជីស្ទិកដោយផ្តោតលើការជំរុញការកសាងហេដ្ឋារចនាសម្ព័ន្ធរូបវន្ត និងអរូបវន្តឆ្ពោះទៅរកការអភិវឌ្ឍប្រព័ន្ធដឹកជញ្ជូនអន្តរមធ្យោបាយមានការតភ្ជាប់ខ្ពស់ និងភាពប្រទាក់ក្រឡាទាំងផ្ទៃក្នុងប្រទេស និងជាមួយតំបន់ដែលនឹងបន្តចូលរួមចំណែកជំរុញ និងទ្រទ្រង់នូវកំណើនសេដ្ឋកិច្ចជាតិ ព្រមទាំងសេចក្តីត្រូវការសង្គមសេដ្ឋកិច្ចប្រកបដោយចីរភាព និងបរិយាបន្ន»។
ការខិតខំរបស់រដ្ឋាភិបាលលើការអភិវឌ្ឍហេដ្ឋារចនាសម្ព័ន្ធ
អតីតរដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ធ្លាប់លើកឡើងថា កម្ពុជាបានរៀបចំផែនការមេដែលមានទឹកប្រាក់រាប់ពាន់លានដុល្លារទៅលើការពង្រឹង និងពង្រីកហេដ្ឋារចនាសម្ព័ន្ធផ្លូវថ្នល់ និងការតភ្ជាប់ទៅគ្រប់ច្រកល្ហកជាពិសេសច្រកទ្វារព្រំដែនអន្តរជាតិជាមួយប្រទេសជិតខាង ដើម្បីធ្វើយ៉ាងណាបង្កើនឧត្តមភាពប្រកួតប្រជែងរបស់កម្ពុជា និងទាក់ទាញវិនិយោគិនពីក្រៅប្រទេសឱ្យមកបណ្តាក់ទុននៅកម្ពុជា។
លោកបញ្ជាក់ថា៖ «រាជរដ្ឋាភិបាលកម្ពុជាបានរៀបចំផែនការមេលើការកែសម្រួលផ្លូវថ្នល់ ការពង្រីកនិងលើកកម្រិតគុណភាពផ្លូវ ២ ទៅ ៤ គន្លង ការបង្កើនការតភ្ជាប់ទៅគ្រប់ច្រកល្ហកសម្រួលដល់ការធ្វើដំណើរ និងការដឹកជញ្ជូនទំនិញបានឆាប់រហ័ស។ ផែនការមេនោះក៏រួមទាំងការរៀបចំហេដ្ឋារចនាសម្ព័ន្ធរូបវន្ត តាមច្រកទ្វារព្រំដែនអន្តរជាតិជាមួយប្រទេស ជិតខាងសំដៅជំរុញការដឹកជញ្ជូន និងការធ្វើចរាចរណ៍ឆ្លងកាត់មានភាពងាយស្រួល ក្នុងគោលបំណងធ្វើយ៉ាងណាបង្កើនឧត្តមភាពប្រកួតប្រជែងរបស់កម្ពុជា ជាពិសេស កាត់បន្ថយចំណាយភ័ស្តុភារកម្ម និងដឹកជញ្ជូន និងទាក់ទាញវិនិយោគផងដែរ»។
ការអភិវឌ្ឍហេដ្ឋារចនាសម្ព័ន្ធ និងប្រព័ន្ធឡូជីស្ទិកចូលរួមចំណែកយ៉ាងសំខាន់នៅក្នុងការកសាងឧត្តមភាពប្រកួតប្រជែង
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជាបានប្រាប់ ភ្នំពេញ ប៉ុស្តិ៍ថា ការវិនិយោគលើវិស័យហេដ្ឋារចនាសម្ព័ន្ធនេះ គឺប្រាកដជានៅក្នុងគោលបំណងធ្វើឱ្យវិស័យដឹកជញ្ជូនកម្ពុជាកាន់តែល្អជាងមុន ដោយអាចបង្រួមរយៈពេលដឹកជញ្ជូន និងជួយធ្វើឱ្យតម្លៃដឹកជញ្ជូនទាបជាងមុនជាដើម។
លោកបន្តថា ប្រទេសកម្ពុជាពេលនេះមានការខ្វះខាតច្រើនទាក់ទងនឹងវិស័យឡូជីស្ទិក និងដឹកជញ្ជូន ដោយមិនទាន់មានគ្រឿងបរិក្ខារទំនើបប្រើប្រាស់គ្រប់គ្រាន់ ហើយកម្ពុជាក៏មិនទាន់មានកំពង់ផែទឹកជ្រៅឱ្យនាវាអន្តរជាតិធំៗចូលចតនៅឡើយទេ។
លោកបញ្ជាក់ថា៖ «វិស័យដឹកជញ្ជូន គឺប្រៀបបានទៅនឹងដំណឹកនាំសម្រាប់លំហូរសកម្មភាពសេដ្ឋកិច្ច ព្រោះបើការដឹកជញ្ជូនដំណើរការល្អ ចរន្តសេដ្ឋកិច្ចក្នុងប្រទេសក៏ដើរល្អដូចគ្នា ហើយចំនួនវិនិយោគិនបរទេសចូលមកបណ្តាក់ទុនក៏កើនឡើងដែរ»។
សកម្មភាពជួសជុលផ្លូវជាតិលេខ៤៨ (ស្រែអំបិល-កោះកុង)។ រូបថត MPWT
ទោះជាយ៉ាងណា លោក ចាន់ដារ៉ា អះអាងថា កន្លងមកលោកធ្លាប់ដឹងថា ក្រសួងមានផែនការសាងសង់មជ្ឈមណ្ឌលឡូជីស្ទិកដ៏ធំមួយនៅរាជធានីភ្នំពេញ ដែលទីនោះជាកន្លែងប្រមូលផ្តុំនៃក្រុមហ៊ុនដឹកជញ្ជូន ឃ្លាំងស្តុក ព្រមទាំងមានបំពាក់នូវប្រព័ន្ធទំនើបកម្មសម្រាប់ប្រើប្រាស់ក្នុងវិស័យដឹកជញ្ជូនជាច្រើនទៀតផង។
អគ្គនាយកក្រុមហ៊ុនសេវាកម្មហិរញ្ញវត្ថុ Cambodian Investment Management លោក Anthony Galliano បានឱ្យដឹងថា ការចំណាយរបស់រដ្ឋាភិបាលលើគម្រោងហេដ្ឋារចនាសម្ព័ន្ធមានភាពច្បាស់លាស់និងល្អិតល្អន់។
លោកថ្លែងថា៖ «វិនិយោគិនបរទេសក្នុងវិស័យផលិតកម្ម និងភ័ស្តុភារផ្តោតជាពិសេសលើផ្នែកយុទ្ធសាស្ត្រ និងវិស័យសំខាន់ៗ។ ទាំងអស់នេះនឹងបង្កើតការទាក់ទាញសម្រាប់ការវិនិយោគផ្ទាល់ពីបរទេស»។
លោកបញ្ជាក់ថា៖ «ការពិតដែលថាកម្ពុជាក្នុងពេលឆាប់ៗនេះ នឹងមានព្រលានយន្តហោះថ្មីចំនួន ២ ដែលមានចំណុះ និងសមត្ថភាពខ្លាំងត្រៀមរៀបចំប្រទេសមួយនេះ សម្រាប់ការវិលត្រឡប់ទៅរកការរីកចម្រើនផ្នែកទេសចរណ៍ និងវិវត្តទៅជាការតភ្ជាប់មជ្ឈមណ្ឌលក្នុងតំបន់ទៀតផង»៕
