ភ្នំពេញ៖ នៅពេលដែលប្រទេសកម្ពុជាចាប់ផ្តើមដំណើរនៃការផ្លាស់ប្តូរឌីជីថល ផែនការមេឌីជីថលអាស៊ានឆ្នាំ២០២៥ (ADM 2025) បម្រើជាមគ្គុទ្ទេសគ៍សំខាន់សម្រាប់ដោះស្រាយភាពស្មុគស្មាញនៃសន្តិសុខតាមអ៊ីនធឺណិត និងការជឿទុកចិត្តលើសេវាកម្មឌីជីថល។
ផែនការមេបង្ហាញពីជំហានសំខាន់ៗ ដែលបណ្ដាប្រទេសអាស៊ាន រួមទាំងកម្ពុជាត្រូវតែអនុវត្ត ដើម្បីកសាងសេដ្ឋកិច្ចឌីជីថលប្រកបដោយសុវត្ថិភាព បរិយាបន្ន និងប្រកួតប្រជែង។
យោងតាមរបាយការណ៍ផែនការមេឌីជីថលអាស៊ានឆ្នាំ២០២៥ បានបង្ហាញថា៖ «នៅក្នុងបរិបទនេះ កម្ពុជាប្រឈមទាំងបញ្ហា និងឱកាស ព្រោះកម្ពុជាកំពុងតែខិតខំពង្រឹងហេដ្ឋារចនាសម្ព័ន្ធឌីជីថល ជំរុញការជឿទុកចិត្តលើសេវាកម្មឌីជីថល និងស្របតាមស្តង់ដាក្នុងតំបន់»។
គោលបំណងស្នូលមួយនៃ ផែនការមេឌីជីថលអាស៊ានឆ្នាំ២០២៥ គឺដើម្បីកសាងទំនុកចិត្តលើសេវាកម្មឌីជីថលនៅគ្រប់ផ្នែកសំខាន់ៗ ដូចជា ហិរញ្ញវត្ថុ ការថែទាំសុខភាព ការអប់រំ និងរដ្ឋាភិបាល។
សម្រាប់ប្រទេសកម្ពុជា នេះមានន័យថា ការអភិវឌ្ឍក្របខ័ណ្ឌសន្តិសុខដ៏រឹងមាំ គឺត្រូវស្របតាមវិស័យសំខាន់ៗទាំងនេះ។
បើប្រៀបធៀបទៅនឹងសមភាគីអាស៊ានមួយចំនួន កម្ពុជានៅតែស្ថិតក្នុងដំណាក់កាលដំបូងនៃការអនុវត្តវិធានការសន្តិសុខតាមអ៊ីនធឺណិតស៊ីជម្រៅ។
របាយការណ៍ផែនការមេឌីជីថលអាស៊ានឆ្នាំ២០២៥ បានបន្តថា៖ «បណ្តាប្រទេស ដូចជា សិង្ហបុរី និងម៉ាឡេស៊ី បានបោះជំហានក្នុងការបង្កើតក្របខ័ណ្ឌសន្តិសុខតាមអ៊ីនធឺណិតកម្រិតខ្ពស់ និងក្រុមឆ្លើយតប ដោយដាក់ខ្លួនពួកគេជាអ្នកឈានមុខគេផ្នែកសន្តិសុខឌីជីថលនៅក្នុងតំបន់»។
ទោះបីជាយ៉ាងណាក៏ដោយ កម្ពុជាកំពុងចាត់វិធានការចាំបាច់ដើម្បីដើរតាមឱ្យទាន់ ដោយការកសាងទំនុកចិត្តក្នុងចំណោមអ្នកប្រើប្រាស់ និងជំរុញការទទួលយកសេវាឌីជីថលកាន់តែទូលំទូលាយ។
សេវាកម្មឌីជីថលនៅកម្ពុជាត្រូវបានផ្សារភ្ជាប់ទៅនឹងការអនុវត្តសន្តិសុខតាមអ៊ីនធឺណិត និងការគ្រប់គ្រងទិន្នន័យឌីជីថល។
របាយការណ៍ផែនការមេ សង្កត់ធ្ងន់លើសារៈសំខាន់នៃការអនុវត្តទាំងនេះក្នុងការកាត់បន្ថយផលប៉ះពាល់ផ្ទាល់នៃការបំពានទិន្នន័យលើអាជីវកម្ម និងអ្នកប្រើប្រាស់។
តាមរយៈការផ្តល់អាទិភាពដល់វិធានការចាំបាច់នានា កម្ពុជាមានគោលបំណងបង្កើតបរិយាកាសឌីជីថលប្រកបដោយសុវត្ថិភាពដែលលើកទឹកចិត្តឱ្យមានទំនុកចិត្តក្នុងចំណោមប្រជាពលរដ្ឋនិងអាជីវកម្មផ្សេងៗ។
របាយការណ៍ផែនការមេបានបន្ថែមថា៖ «ខណៈកំពុងអភិវឌ្ឍបច្ចេកវិទ្យាឌីជីថល កម្ពុជាត្រូវដើរលើផ្លូវវែងឆ្ងាយទៀត បើប្រៀបធៀបទៅនឹងបណ្ដាប្រទេសអភិវឌ្ឍក្នុងតំបន់ ដូចជា សិង្ហបុរី ដែលបានអនុវត្តច្បាប់ការពារទិន្នន័យ និងក្របខ័ណ្ឌសន្តិសុខតាមអ៊ីនធឺណិតរួចហើយ»។
កម្ពុជាក៏បានបោះជំហានយ៉ាងសំខាន់ក្នុងការពង្រឹងកិច្ចសហប្រតិបត្តិការក្នុងតំបន់លើសន្តិសុខអ៊ីនធឺណិតក្នុងក្របខ័ណ្ឌអាស៊ាន។
ការបង្កើតក្រុមឆ្លើយតបឧប្បត្តិហេតុសន្តិសុខកុំព្យូទ័រក្នុងតំបន់ (CSIRT) គឺជាគំនិតផ្តួចផ្តើមដ៏សំខាន់មួយក្នុងគោលបំណងលើកកម្ពស់ការអនុវត្តល្អបំផុតផ្នែកសុវត្ថិភាពនៅទូទាំងវិស័យ។
បញ្ហាប្រឈមមួយសម្រាប់ប្រទេសកម្ពុជាគឺការប្រើប្រាស់សេវាឌីជីថលពីសំណាក់ប្រជាជនក្នុងស្រុក។
របាយការណ៍ផែនការមេបានបន្ថែមថា៖ «ដោយមានប្រជាជនត្រឹមតែ ៣៤ ភាគរយប៉ុណ្ណោះដែលប្រើអ៊ីនធឺណិត កម្ពុជាដើរថយក្រោយប្រទេសជាច្រើន ដូចជា ម៉ាឡេស៊ី (៨០ភាគរយ) និងសិង្ហបុរី (៨៤ភាគរយ)»។
កម្រិតទាបនៃការប្រើអ៊ីនធឺណិតនេះបង្ហាញពីតម្រូវការសម្រាប់កិច្ចខិតខំប្រឹងប្រែងកាន់តែខ្លាំងក្នុងការកសាងទំនុកចិត្ត និងការពង្រីកសេវាកម្មឌីជីថល ជាពិសេសនៅតំបន់ជនបទ និងតំបន់ដែលខ្វះខាត។ ការកែលម្អលទ្ធភាពប្រើប្រាស់អ៊ីនធឺណិត និងតម្លៃសមរម្យនឹងមានសារៈសំខាន់សម្រាប់ការសម្រេចបាននូវគោលដៅនេះ។
សមាសធាតុសំខាន់មួយទៀតនៃយុទ្ធសាស្ត្រឌីជីថលរបស់កម្ពុជា គឺការអភិវឌ្ឍន៍ប្រព័ន្ធអត្តសញ្ញាណឌីជីថល។
យោងតាមរបាយការណ៍ផែនការមេបានឱ្យដឹងថា៖ «បច្ចុប្បន្ននេះ កម្ពុជាសម្រេចបានការគ្របដណ្តប់ ៨៩ភាគរយក្នុងចំណោមមនុស្សពេញវ័យសម្រាប់ប្រព័ន្ធអត្តសញ្ញាណប័ណ្ណមូលដ្ឋានរបស់ខ្លួន»។
ទោះជាយ៉ាងណាក៏ដោយ កម្ពុជានៅតែយឺតជាងប្រទេស ដូចជា ម៉ាឡេស៊ី ដែលមានការគ្របដណ្តប់ ១០០ភាគរយ ជាមួយនឹងប្រព័ន្ធឌីជីថលពេញលេញ។
ការអភិវឌ្ឍន៍ប្រព័ន្ធអត្តសញ្ញាណប័ណ្ណឌីជីថលមានសារៈសំខាន់ណាស់សម្រាប់ការបើកដំណើរការប្រតិបត្តិការអនឡាញប្រកបដោយសុវត្ថិភាព និងគួរឱ្យទុកចិត្ត ដែលជាកត្តាជំរុញដ៏សំខាន់នៃកំណើនសេដ្ឋកិច្ចក្នុងយុគសម័យឌីជីថល៕