សំណង់អគារ ដែលជាសណ្ឋាគារ និងខុនដូ របស់វិនិយោគិនចិននៅក្រុងព្រះសីហនុដែលកំពុងស្ថិតក្នុងការសាងសង់។ ហេង ជីវ័ន
ខេត្តព្រះសីហនុៈ តម្លៃជួលអចលនទ្រព្យនៅក្រុង ព្រះសីហនុ ដែលបានហក់ឡើងយ៉ាងខ្ពស់ក្នុងរយៈពេលប្រហែល ១ ឆ្នាំមកនេះ ដោយសារតែលំហូរចូលនៃជនជាតិ ចិន អាចនឹងមានការប្រែប្រួលក្នុងរយៈពេល ២-៣ ឆ្នាំខាងមុខ ខណៈពេលសំណង់ធំៗ ដែលភាគច្រើនជាការវិនិយោគរបស់ចិននឹងបញ្ចប់ការសាងសង់។ នេះបើតាមការអះអាងពីអ្នកជំនាញក្នុងវិស័យអចលនទ្រព្យ កាលពីថ្ងៃម្សិលមិញ។
បច្ចុប្បន្ន ទីតាំងសំខាន់ៗស្ទើរទាំងស្រុងក្នុងក្រុងព្រះសីហនុត្រូវបានជួលយកទៅវិនិយោគដោយជនជាតិចិន។ កាលពី ២-៣ ឆ្នាំមុន ផ្ទះ ឬអគារត្រូវបានជួលក្នុងតម្លៃពី ៥០០-១០០០ ដុល្លារ ប៉ុន្តែពេលនេះជនជាតិចិនហ៊ានឲ្យតម្លៃរហូតដល់ ៥ ០០០-៧ ០០០ ដុល្លារក្នុង ១ ខែ។
លោក នួន រិទ្ធី នាយកប្រតិបត្តិក្រុមហ៊ុនអចលនទ្រព្យ Khmer Foundation Appraisals បានប្រាប់ថា ការកើនឡើងនៃចំនួនអ្នក វិនិយោគនិងអ្នកមកស្នាក់នៅជនជាតិចិន បានធ្វើឲ្យតម្លៃជួលអចលនទ្រព្យក្នុងក្រុងព្រះសីហនុកើនឡើងយ៉ាងលឿនហួសពីការស្មានទុក។
ការកើនឡើងខ្ពស់នាពេលនេះដោយសារមានតម្រូវការខ្ពស់ពីជនជាតិចិន តែក្នុងរយៈពេល ២-៣ ឆ្នាំខាងមុខវាប្រាកដជាមិនមានកំណើនតម្លៃខ្ពស់ដូចពេលនេះទៀតទេ ប្រសិនបើអត្រាជនជាតិចិននៅរក្សាដូចបច្ចុប្បន្ន។
លោកថ្លែងថា៖ «តាមបទពិសោធការសាងសង់អគារធំៗក្នុងរាជធានីភ្នំពេញយើងឃើញថា ការសាងសង់សំណង់ទាំងនោះត្រូវការពេលចន្លោះពី ២-៣ ឆ្នាំ ដើម្បីបញ្ចប់គម្រោងដូច្នេះនៅពេលនោះនឹងមានការផ្គត់ផ្គង់ច្រើន។ ហេតុនេះតម្លៃជួលនឹងមិនអាចកើនឡើងខ្ពស់ទៀតទេ»។
ទោះយ៉ាងណានេះក្តី លោក រិទ្ធី បញ្ជាក់ថា បើការផ្គត់ផ្គង់មានដំណើរការយឺតយ៉ាវ (ការសាងសង់មិនទាន់បញ្ចប់) នោះវានឹងអាចមានឥទ្ធិពលសម្រាប់តម្លៃជួលក្នុងអំឡុងពេលនោះទេ។
បើតាម លោក រិទ្ធី តម្លៃជួល អចលនទ្រព្យនៅតំបន់ពាណិជ្ជកម្មក្នុងក្រុងព្រះសីហនុនាពេលនេះធៀបនឹងឆ្នាំមុនបានកើនឡើងចន្លោះពី ៣០០-៥០០ ភាគរយ។
តាមការព្យាករគម្រោងទាំងនោះនឹងបញ្ចប់ដាក់ដំណើរការចាប់ពីឆ្នាំ ២០២០ ទៅ ដែលនឹងធ្វើឲ្យការផ្គត់ផ្គង់កន្លែងស្នាក់នៅ មជ្ឈមណ្ឌលពាណិជ្ជកម្ម និងអគារការិយាល័យជាច្រើនលេចឡើងក្នុងក្រុងព្រះសីហនុ។ ការវិនិយោគភាគច្រើនរបស់ចិនគឺសណ្ឋាគារ អគារស្នាក់ និងកាសីុណូ។
លោក ឌឹត ចណ្ណា អគ្គនាយកក្រុមហ៊ុន អចលនទ្រព្យ ឡាក់គី រៀលធី ក៏យល់ឃើញប្រហាក់ប្រហែលគ្នានេះដែរ។ លោកបន្តថា៖ «ខ្ញុំគិតថា តម្លៃជួលនឹងបន្តកើនឡើងយ៉ាងហោចណាស់ ៣ ឆ្នាំទៀត»។
ទោះបីយ៉ាងនេះក្តី លោកអះអាងថា ក្រុងព្រះសីហនុនឹងបន្តទទួលបានអ្នកវិនិយោគច្រើនបន្ថែមទៀត ដូច្នេះតម្លៃជួលអចលនទ្រព្យនៅទីនោះនឹងបន្តកើនឡើងក្នុងរយៈពេលយូរទៀត។
លោកថ្លែងថា៖ «សម្រាប់ខ្ញុំវាហាក់ដូចលឿនពេកក្នុងការវាយតម្លៃពីការវិវឌ្ឍនៃទីផ្សារតម្លៃជួលអចលនទ្រព្យនៅក្រុងព្រះសីហនុ»។
លោកលើកឡើងថា ជារួមវិស័យអចលនទ្រព្យទាំងមូលនៅក្នុងខេត្តព្រះសីហនុនៅពេលអនាគត នឹងកាន់តែមានសក្តានុពលបន្ថែមទៀតដោយសារទីនោះមានលក្ខណពិសេសមួយចំនួនដូចជាមានគម្រោងអភិវឌ្ឍន៍ច្រើន មានកំពង់ផែទឹកជ្រៅ មានព្រលានយន្តហោះ តំបន់សេដ្ឋកិច្ចពិសេស ផែនការសាងសង់ផ្លូវល្បឿនលឿនរាជធានីភ្នំពេញ ពិសេសកម្ពុជាមានស្ថិរភាពនយោបាយល្អប្រសើរ។
បច្ចុប្បន្នតាមផ្លូវក្នុងក្រុងព្រះសីហនុ គេឃើញហាងដាក់យីហោជាភាសាចិនជាច្រើនព្រោងព្រាតដែលមានដូចជា ហាងទំនិញ ហាងលក់អាហារ ហាងកាត់សក់ ម៉ាស្សា និងមន្ទីរព្យាបាលជាដើម ដែលធ្វើឲ្យទីនោះប្រៀបដូចជាទីក្រុងចិន។
អតីតម្ចាស់ហាងកាហ្វេ មួយកន្លែងនៅជិតផ្សារលើ ក្រុងព្រះសីហនុ លោក មាស វិចិត្រ បាននិយាយថា បច្ចុប្បន្នលោកជួលទីតាំងបន្តទៅឲ្យជនជាតិចិនក្នុងតម្លៃជួល ២ ៥០០ ដុល្លារក្នុង ១ ខែ ដែលកើនឡើងពីតម្លៃ ៥០០ ដុល្លារ។
លោកបានប្រាប់ថា៖ «ដោយសារចិនឲ្យតម្លៃជួលខ្ពស់ ខ្ញុំក៏ជួលហាងបន្តទៅឲ្យពួកគេរហូតអស់កុងត្រាតែម្តង»។
លោកបន្តថា៖ «អ្នកជួលបន្តពីខ្ញុំគេហ៊ានជួលក្នុងតម្លៃខ្ពស់ ដោយសារគេមានភ្ញៀវជនជាតិចិនច្រើន។ ជនជាតិចិន គេនិយមប្រើប្រាស់ ឬទិញផលិតផលតែរបស់ចិនតែប៉ុណ្ណោះ»៕LA
