អត្រាស្លាប់នៃជំងឺរបេងបានថយចុះពី ៤២ ករណីក្នុងចំណោមប្រជាជន ១០ ម៉ឺននាក់ នៅឆ្នាំ ២០០០ មកត្រឹម ១៧ ករណី ក្នុងចំណោមប្រជាជន ១០ ម៉ឺននាក់ ក្នុងឆ្នាំ ២០១៩ ដែលមានការធ្លាក់ចុះស្មើនឹង ៦០ ភាគរយ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន ចេញសារលិខិតចូលរួមអបអរសាទរ ទិវាពិភពលោកកម្ចាត់រោគរបេងថ្ងៃទី ២៤ ខែ មីនា ឆ្នាំ ២០២១ ខណៈលោកគូសបញ្ជាក់ថា កម្ពុជាបានទទួលជោគជ័យយ៉ាងខ្លាំងក្នុងការងារកម្ចាត់ជំងឺរបេង ដែលធ្វើឱ្យអត្រាស្លាប់ដោយជំងឺនេះមានការធ្លាក់ចុះប្រមាណ ៦០ ភាគរយ។
ទិវាពិភពលោកកម្ចាត់រោគរបេងថ្ងៃទី ២៤ ខែមីនា ក្នុងឆ្នាំ ២០២១ នេះត្រូវបានរដ្ឋាភិបាលលើកយកប្រធានបទ «នាឡិការោទិ៍ដល់ពេលយើងរួមគ្នារក្សាកិច្ចសន្យាប្ដេជ្ញាចិត្តដើម្បីបញ្ចប់ជំងឺរបេង» ក្នុងគោលបំណងបន្តជំរុញ និងយកចិត្តទុកដាក់បន្ថែមទៀតក្នុងការលើកកម្ពស់សុខភាពរបស់ប្រជាជនឱ្យកាន់តែទូលំទូលាយ និងបំផុសការយល់ដឹង ការយកចិត្តទុកដាក់ក្នុងការប្រយុទ្ធនឹងជំងឺរបេងជាមួយពិភពលោក។
លោក ហ៊ុន សែន បានសង្កត់ធ្ងន់ក្នុងសារលិខិតថា ការប្រយុទ្ធនឹងជំងឺរបេងក្នុងរយៈពេលប៉ុន្មានឆ្នាំកន្លងមកនេះកម្ពុជាបានក្លាយជាប្រទេសគំរូមួយសម្រាប់ពិភពលោកចំពោះការងារកម្ចាត់ជំងឺរបេងយ៉ាងសកម្ម និងប្រកបដោយប្រសិទ្ធភាព ខណៈដែលកាលពី ២០ ឆ្នាំមុនប្រទេសកម្ពុជាបានស្ថិតក្នុងចំណោមប្រទេសដែលមានអត្រាអ្នកកើតជំងឺរបេងខ្ពស់ជាងគេក្នុងពិភពលោក។
លោកបន្តថាសមិទ្ធផលទាំងនេះ គឺបានមកដោយសារតែការខិតខំប្រឹងប្រែងរបស់រដ្ឋាភិបាលក្នុងការពង្រីកសេវាពិនិត្យ និងព្យាបាលជំងឺរបេងតាមយុទ្ធសាស្ត្រដូតស៍នៅគ្រប់មន្ទីរពេទ្យមណ្ឌលសុខភាពទូទាំងប្រទេស។
បន្ថែមពីនេះ លោកបញ្ជាក់ថា៖ «យើងក៏បានធ្វើការស្រាវជ្រាវ និងការព្យាបាលជំងឺរបេងជូនប្រជាពលរដ្ឋដោយឥតគិតថ្លៃដែលកិច្ចការនេះមានការរីកចម្រើនគួរឱ្យកត់សម្គាល់ និងជាហេតុធ្វើឱ្យអត្រាឈឺ និងស្លាប់ដោយជំងឺរបេងក្នុងប្រទេសកម្ពុជាយើងមានការធ្លាក់ចុះយ៉ាងខ្លាំងច្រើនជាងប្រទេសដទៃ»។
តាមរយៈសារលិខិតដដែលបានឱ្យដឹងថា អត្រាស្លាប់នៃជំងឺរបេងបានថយចុះពី ៤២ ករណីក្នុងចំណោមប្រជាជន ១០ ម៉ឺននាក់ នៅឆ្នាំ ២០០០ មកត្រឹម ១៧ ករណី ក្នុងចំណោមប្រជាជន ១០ ម៉ឺននាក់ ក្នុងឆ្នាំ ២០១៩ ដែលមានការធ្លាក់ចុះស្មើនឹង ៦០ ភាគរយ។ ចំណែកអត្រាកើតមានជំងឺថ្មីបានធ្លាក់ចុះពី ៥៧៩ ករណី ក្នុងចំណោមប្រជាជន ១០ ម៉ឺននាក់ នៅឆ្នាំ ២០០០ ចុះមកដល់ ២៨៧ ករណី ក្នុងចំណោមប្រជាជន ១០ ម៉ឺននាក់ នៅឆ្នាំ ២០១៩ ដែលស្មើនឹង ៥០ ភាគរយ។
បើទោះជាទទួលបានលទ្ធផលបែបនេះក៏លោក ហ៊ុន សែន មិនបានពេញចិត្តចំពោះភាពជោគជ័យនេះនោះទេ ដោយលោកនៅតែទទួលស្គាល់ថា កម្ពុជាមានអត្រាឈឺ និងស្លាប់ដោយសារជំងឺរបេងខ្ពស់នៅឡើយបើប្រៀបធៀបនឹងបណ្តាប្រទេសមួយចំនួនទៀត និងមានមនុស្សច្រើននៅឡើយដែលនៅពុំទាន់ទទួលបានសេវាថែទាំ និងព្យាបាល។
លោក ជំរុញយ៉ាងដូច្នេះថា៖ «បញ្ហានេះតម្រូវឱ្យយើងត្រូវបង្កើនល្បឿននៃកិច្ចខិតខំប្រឹងប្រែងបំពេញកិច្ចការបន្ថែមទៀត ដើម្បីកាត់បន្ថយឱ្យបានកាន់តែច្រើនថែមទៀតនូវអត្រាឈឺ និងស្លាប់ដោយសារជំងឺរបេង ស្របតាមគោលដៅអភិវឌ្ឍប្រកបដោយចិរភាពនៃកម្ពុជា និងពិភពលោក»។
តាមការប៉ាន់ស្មាននៅក្នុងពិភពលោកក្នុងមួយឆ្នាំៗមានប្រជាជនប្រមាណ ១០ លាននាក់បានកើតជំងឺរបេង ប៉ុន្តែក្នុងនោះ អ្នកជំងឺប្រហែល ៣ លាននាក់ក្នុងមួយឆ្នាំៗមិនបានទទួលសេវាថែទាំ និងព្យាបាលជំងឺនេះនោះឡើយ ខណៈជំងឺនេះបានឆក់យកអាយុជីវិតមនុស្សក្នុងមួយឆ្នាំៗប្រមាណ ១ លាន ៤ សែននាក់។ នេះបើតាមសារលិខិតរបស់លោក ហ៊ុន សែន។
លោកនាយករដ្ឋមន្ត្រីក៏រំពឹងដែរថា យុទ្ធនាការទិវារបេងពិភពលោកឆ្នាំ ២០២១ នេះនឹងបន្តបំផុសឱ្យមនុស្សទាំងឡាយនៅលើសកលលោកឱ្យមានការយល់ដឹងបន្ថែម និងធ្វើសកម្មភាពរួមគ្នាមានលក្ខណៈសកម្មជាងមុន ដើម្បីឱ្យអ្នកសង្ស័យកើតជំងឺរបេងគ្រប់គ្នាទទួលបាននូវការធ្វើរោគវិនិច្ឆ័យទាន់ពេលវេលា និងព្យាបាលជាសះស្បើយ ឈានទៅរកថ្ងៃអនាគត ដែលពិភពលោក គ្មានជំងឺរបេង និងគ្មានអ្នកស្លាប់ដោយសារជំងឺរបេង៕
