រដ្ឋមន្ត្រីក្រសួងកសិកម្មបញ្ជាក់ថា សត្វស្លាបព្រៃដែលងាប់ក្នុងតំបន់អភិរក្សបឹងស្នេហ៏ទួលពាន់តាឡី បណ្ដាលមកពីមេរោគផ្ដាសាយបក្សី H5N1។ រូបថត ហ្វេសប៊ុក
ព្រៃវែងៈ ក្រសួងកសិកម្ម រុក្ខាប្រមាញ់ និងនេសាទ បានប្រកាសថា សត្វស្លាបព្រៃដែលបានងាប់ជាបន្តបន្ទាប់នៅក្នុងតំបន់អភិរក្សបឹងស្នេហ៍ទួលពាន់តាឡី ក្នុងស្រុកបាភ្នំ ខេត្តព្រៃវែងនាពេលកន្លងមកនេះ គឺបង្កឡើងដោយមេរោគគ្រុនផ្ដាសាយបក្សីប្រភេទ H5N1។
នេះបើយោងតាមលិខិតរបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និង នេសាទ ដែលបានគោរពជូនទៅលោក សាយ សំអាល់ រដ្ឋមន្ត្រីក្រសួងបរិស្ថាន កាលពីថ្ងៃទី២៤ ខែមីនា ឆ្នាំ ២០២១ ដែលភ្នំពេញប៉ុស្ត៍ទទួលបាននៅថ្ងៃ២៥ខែមីនានេះ។
ក្នុងលិខិតនោះ លោក វេង សាខុន បានគូសបញ្ជាក់ថា៖ «យោងតាមលទ្ធផលពិសោធន៍លើសំណាកសពសត្វចង្កៀលខ្យងចំនួន ៥ ក្បាល ដែលមន្ត្រីជំនាញយើងនាំមកពីតំបន់អភិរក្សបឹងស្នេហ៍ទួលពាន់តាឡី ក្នុងឃុំធាយ ស្រុកបាភ្នំ ខេត្តព្រៃវែងនោះ គឺមានវត្តមានវីរុសគ្រុនផ្ដាសាយបក្សី ដែលបង្កឡើងដោយវីរុសក្នុងអនុក្រុម A|H5N1»។
នៅក្នុងលិខិតនោះ លោក វេង សាខុន ក៏បានអំពាវនាវ ដល់គ្រប់ភាគីពាក់ព័ន្ធទាំងអស់ ចូលរួមទប់ស្កាត់ការឆ្លងរាលដាលជំងឺឆ្លងសត្វដោយត្រូវចាត់វិធានការបន្ទាន់មួយចំនួន ដូចជាបំផ្លាញចោលចំពោះបក្សីដែលសង្ស័យមានជំងឺ សាកសពបក្សី និងផលិតផលបក្សីក្នុងតំបន់ផ្ទុះជំងឺតាមវិធានបច្ចេកទេសបសុពេទ្យ និងត្រូវផ្អាកជាបណ្តោះអាសន្នលើការចូល-ចេញ ឬឆ្លងកាត់ក្នុងរង្វង់កាំប្រវែង ៣ (បី) គីឡូម៉ែត្រ ពីចំណុចផ្ចិត នៃតំបន់ផ្ទុះជំងឺ និងដាក់តំបន់នេះជាតំបន់ត្រួតពិនិត្យ និងតាមដានសិក្សាស្រាវជ្រាវប្រភពជំងឺផ្ដាសាយបក្សីក្នុងរយៈពេល ៣០ ថ្ងៃ និងត្រួតពិនិត្យមើលចលនាបក្សីជាប្រចាំក្នុងរង្វង់ដែលមានកាំប្រវែង ១០ (ដប់ ) គីឡូម៉ែត្រ ពីចំណុចផ្ចិតនៃតំបន់ផ្ទុះជំងឺ និងត្រូវរាយការណ៍ពីកន្លែងបក្សីងាប់ដល់មន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ដើម្បីអនុវត្តវិធានបច្ចេកទេសបសុពេទ្យ៕
