លោក សាយ ឈុំ អនុប្រធានគណបក្សប្រជាជនកម្ពុជាដែលទើបជាប់ឆ្នោតជាប្រធានព្រឹទ្ធសភា សាជាថ្មី ។ រូបថតៈ ហ្វេសប៊ុក
ភ្នំពេញៈ លោក សាយ ឈុំ អនុប្រធានគណបក្សប្រជាជនកម្ពុជាត្រូវបានសមាជិកព្រឹទ្ធសភាទាំង៦២រូប បោះឆ្នោតជាឯកច្ឆន្ទក្លាយជាប្រធានព្រឹទ្ធសភាជាថ្មីក្នុងសម័យប្រជុំដំបូងនីតិកាលទី៤ ក្រោមព្រះរាជាធិបតីព្រះមហាក្សត្រ បន្ទាប់ពីគណបក្សកាន់អំណាចឈ្នះបានអាសនៈទាំង៥៨របស់ព្រឹទ្ធសភាក្នុងការបោះឆ្នោតព្រឹទ្ធសភាកាលពីខែកុម្ភៈ ដោយគ្មានវត្តមានគណបក្សប្រឆាំង។
មុនប្រកាសសុពលភាពសមាជិកព្រឹទ្ធសភាថ្មី និងការបោះឆ្នោតជ្រើសរើសប្រធាន និងអនុប្រធានទាំងពីររូបនៃព្រឹទ្ធសភា នៅម៉ោងប្រមាណ៩ ព្រឹក ព្រះមហា-ក្សត្រ នរោត្តម សីហមុនី បានយាងបើកសម័យប្រជុំដំបូង និងអានព្រះរាជសាររបស់ព្រះអង្គសម្ដែងនូវអំណរសាទរជូនសមាជិក សមាជិកាព្រឹទ្ធសភាថ្មី និងអំពាវនាវឲ្យ«រួមសាមគ្គីគ្នាជាធ្លុងមួយ»ធានាការពារឯករាជ្យជាតិ អធិបតេយ្យ និងបូរណភាពដែនដី។
ព្រះអង្គមានបន្ទូលថា៖«ជាមួយគ្នានេះដែរ ព្រឹទ្ធសភាត្រូវធានាការពារយុត្តិធម៌ និងគោរពសិទ្ធិមនុស្ស ដើម្បីបង្កើតឡើងនូវសុខដុមរមនាយូរអង្វែងក្នុងសង្គមជាតិយើង»។
ក្រោយការប្រកាសសុពលភាពសមាជិកទាំង៦២រូប ដែល៥៨រូបមកពីគណបក្សប្រជាជនកម្ពុជា ២រូបជ្រើសតាំងដោយព្រះមហាក្សត្រ និង២រូបផ្សេងទៀតជ្រើសតាំងដោយរដ្ឋសភាជាតិរួចមក ព្រឹទ្ធសភាបានបោះឆ្នោតដាច់ដោយឡែកពីគ្នាជ្រើសរើសប្រធាន និងអនុប្រធាន២រូបផ្សេងទៀតដោយគ្មានសំឡេងជំទាស់។
លោក សាយ ឈុំ អតីតប្រធានព្រឹទ្ធសភា លោក នៃ ប៉េណា និងលោក ទេព ងន ដែលជាអតីតអនុប្រធានទី១ និងទី២នៃព្រឹទ្ធសភានីតិកាលទី៣ ត្រូវបានសមាជិកព្រឹទ្ធបោះឆ្នោតគាំទ្រដោយសំឡេង៦២លើ៦២សំឡេង។
លោក ម៉ុម ជឹមហុយ ប្រធានបណ្តោះអាសន្នព្រឹទ្ធសភានីតិកាលទី៤ ដែលបានដឹកនាំកិច្ចប្រជុំនេះបានថ្លែងអបអរដល់ឥស្សរជនទាំង៣ដែលជាប់ជាប្រធាន និងអនុប្រធានព្រឹទ្ធសភា ខណៈសមាជិកព្រឹទ្ធសភាថ្មីនឹងត្រូវធ្វើសច្ចាប្រណិធានក្នុងព្រះបរមរាជវាំងនៅរសៀលថ្ងៃចន្ទនេះមុនចូលកាន់តំណែង។
មុនប្រកាសបិទសម័យប្រជុំលោក សាយ ឈុំ ប្រធានព្រឹទ្ធសភាថ្មី បានថ្លែងអំណរគុណដល់សមាជិកព្រឺទ្ធសភាដែលបានគាំទ្ររូបលោកជាប្រធាន និងប្ដេជ្ញាកសាងនីតិរដ្ឋនៅកម្ពុជាឲ្យកាន់តែប្រសើរ។
លោកថ្លែងថា៖«ខ្ញុំក៏ដូចជាឯកឧ ត្តមអនុប្រធានទី១ និងអនុប្រធានទី២ សូមសង្ឃឹមជឿជាក់ថាព្រឹទ្ធសភាយើងនឹងខិតខំប្រឹងប្រែងបន្ថែមទៀតក្នុងការពង្រឹងកសាងកម្ពុជាជានីតិរដ្ឋ ក្នុងបរិយាកាសសាមគ្គីភាតរភាព យោគយល់អធ្យាស្រ័យ និងសហការជួយគ្នាទៅវិញទៅមកដោយស្មោះស្ម័គ្រដើម្បីរួមចំណែកឲ្យកាន់តែសកម្មថែមទៀតក្នុងការជំរុញអភិវឌ្ឍគោលនយោបាយវិមជ្ឈការ និងវិសហមជ្ឈការនៅកម្ពុជា»៕
