ការសមសម្រាប់ពិធីសម្ពោធវិមានឈ្នះ ឈ្នះ ដែលនឹងត្រូវប្រារព្ធធ្វើឡើងនៅថ្ងៃទី ២៩ ខែធ្នូ ឆ្នាំ ២០១៨។ រូបថត ហ្វេសប៊ុក General Tea Banh
ភ្នំពេញៈ វិមានឈ្នះ ឈ្នះនឹងត្រូវសម្ពោធរយៈពេល ៣ ថ្ងៃចាប់ពីថ្ងៃទី ២៩ ដល់ថ្ងៃទី ៣១ ធ្នូ ដោយមានការប្រគំតន្ត្រីខ្នាតធំដើម្បីរំឭកដល់ការធ្វើសមាហរណកម្មកងទ័ពខ្មែរក្រហមកាលពីឆ្នាំ ១៩៩៨ ដែលនាំសន្តិភាពពេញលេញដល់កម្ពុជាក្នុងប្រវត្តិសាស្ត្រ ៥០០ ឆ្នាំដោយមានការចូលរួមពីឧត្តមសេនីយ៍ជាន់ខ្ពស់មកពីប្រទេសចំនួន ៤។
វិមាននេះស្ថិតនៅលើទីតាំងទំហំ ៨ ហិកតានៅខាងមុខកីឡដ្ឋានមរតកតេជោ ក្នុងសង្កាត់ព្រែកតាសេក ខណ្ឌជ្រោយចង្វារ ដែលត្រូវបានផ្ដើមសាងសង់តាំងពីខែកុម្ភៈ ឆ្នាំ ២០១៦ ដោយមានកម្ពស់ ៥៤ ម៉ែត្រតួមានផ្ទៃ ១១៧ ម៉ែត្រ គុណនឹង ១១៧ ម៉ែត្រ។ តួខាងក្រោមមានជ្រុងចំនួន ៥ ដែលតំណាងឲ្យយុទ្ធសាស្ត្រចំនួន ៥ ចំណុចរួមមាន បំបែក ឯកោ បញ្ចប់ ធ្វើសមាហរណកម្ម និងអភិវឌ្ឍ។ ចំណែកកំពូលដែលមានកម្ពស់ ៣៣ ម៉ែត្រខាងលើតំណាងឲ្យការធានាចំនួន ៣ គឺ ទី ១ ការធានារូបកាយ និងអាយុជីវិត ទី ២ ការធានាអាជីព និងមុខរបរ និងទី ៣ ការធានាកម្មសិទ្ធិទាំងចលនទ្រព្យ និងអចលនទ្រព្យ។
លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសប៊ុករបស់លោកថា វិមានឈ្នះ ឈ្នះ «គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៃកម្ពុជាទាំងមូល»។
លោកបន្តថា៖ «វិមានឈ្នះ- ឈ្នះ គឺបញ្ជាក់ច្បាស់ថាកម្ពុជាបានរួបរួមគ្នាជាធ្លុងមួយ ឈ្នះរួចផុតពីសង្គ្រាម ឈ្នះរួចផុតពីរបបប្រល័យពូជសាសន៍ ឈ្នះរួចផុតពីការបែងចែកទឹកដីតំបន់ត្រួតត្រា ឈ្នះរួចផុតពីភាពក្រីក្រ និងឈ្នះរួចផុតពីការអុជអាលដោយបរទេស ដែលពេលនេះកម្ពុជាកំពុងដឹកនាំអនាគតវាសនាប្រទេសជាតិឆ្ពោះទៅរកភាពរុងរឿងនៅក្នុងសន្តិភាពដ៏យូរអង្វែងនេះតទៅ»។
វីដេអូឯកសារដែលបង្ហោះនៅលើទំព័រហ្វេសប៊ុករបស់លោកនាយករដ្ឋមន្ត្រី បានអត្ថាធិប្បាយថាកម្ពុជាបានយកឈ្នះរបបខ្មែរក្រហមនៅថ្ងៃទី ៧ មករា ១៩៧៩ ប៉ុន្តែសន្តិភាពពេញលេញមិនទាន់ទទួលបាននៅឡើយរហូតដល់ខែធ្នូ ឆ្នាំ ១៩៩៨ ដោយសារតែកងកម្លាំងខ្មែរក្រហមនៅសេសសល់ និងបន្តការវាយប្រហារជាពិសេសនៅតាមតំបន់ព្រំដែនខ្មែរ-ថៃ។
វីដេអូឯកសារបានអធិប្បាយថា យុទ្ធសាស្ត្រឈ្នះ ឈ្នះរបស់លោក ហ៊ុន សែន មានការធានា ៣ យ៉ាងគឺការធានាអាយុជីវិត និងរូបកាយនៃអ្នកដែលបានផ្ដាច់ខ្លួនពីរបបខ្មែរក្រហម ទី ២ ការរក្សានូវអាជីព និងមុខរបរ និងទី ៣ ការរក្សាកម្មសិទ្ធិលើទ្រព្យសម្បត្តិ និងអចលនទ្រព្យផ្សេងៗ។ លោក ហ៊ុន សែន បានថ្លែងថា៖ «ចំណុច ៣ នេះគឺជាចំណុចគន្លឹះនៃនយោបាយឈ្នះ ឈ្នះ ដែលនាំមកនូវសន្តិភាព និងការបង្រួបបង្រួមជាតិ ឯកភាពទឹកដីជាលើកដំបូងក្នុងប្រវត្តិ ៥០០ ឆ្នាំរបស់ប្រទេសកម្ពុជា»។
ក្រោយពីមានសមាហរណកម្មហើយលោក ហ៊ុន សែន បានថ្លែងថាលោកមានយុទ្ធសាស្ត្រ ២ គឺប្រែក្លាយតំបន់អតីតសមរភូមិឲ្យទៅជាទីផ្សារ និងតំបន់អភិវឌ្ឍន៍ និងទី ២ ប្រែក្លាយតំបន់ព្រំដែនទៅជាតំបន់ជាប់ប្រទេសជិតខាងឲ្យទៅជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។
លោក ណឹម សុវត្ថិ ប្រធានគណៈកម្មការសាងសង់វិមាននយោបាយ ឈ្នះ-ឈ្នះ បានពន្យល់នៅលើហ្វេសប៊ុករបស់លោកអំពីគោលបំណង ៣ យ៉ាងនៃការកសាងវិមានឈ្នះ ឈ្នះនេះដោយលោកថ្លែងថា ទី ១ គឺដើម្បីជាការចងចាំ និងដឹងគុណដល់ការពុះពារគ្រប់យ៉ាងដើម្បីទទួលបានសន្តិភាព ទី ២ សម្រាប់ជាការបង្ហាញសមិទ្ធផលនានាដែលកម្ពុជាទទួលបានរយៈពេល ២០ ឆ្នាំក្រោមនយោបាយឈ្នះ ឈ្នះ ហើយទី ៣ គឺដើម្បីជាកន្លែងសម្រាប់សិក្សាស្វែងយល់អំពីប្រវត្តិសាស្ត្រ និងចក្ខុវិស័យបែបនេះ។
លោក ណឹម សុវត្ថិ បន្តថានយោបាយឈ្នះ-ឈ្នះរបស់លោកនាយករដ្ឋមន្ត្រីជាការបញ្ចប់សង្គ្រាមដោយខ្មែរខ្លួនឯង ដោយមិនមានការបង្ហូរឈាម និងប្រើប្រាស់ការចំណាយពលិកម្មដ៏ច្រើនដូចការបញ្ចប់សង្គ្រាមដូចនៅក្នុងប្រវត្តិសាស្ត្រតំបន់ និងនៅប្រទេសដទៃ។ លោកថាវិមាននេះក៏តំណាងឲ្យការរក្សាសន្តិភាពដែលជំរុញឲ្យមានការអភិវឌ្ឍរហូតមកដល់ពេលសព្វថ្ងៃនេះ។
បើតាមលោក ណឹម សុវត្ថិ វិមានឈ្នះ-ឈ្នះ មានឆ្លាក់រូបនៅតាមជញ្ជាំងជុំវិញបរិវេណដែលបរិយាយអំពីដំណើរឆ្ពោះទៅរកការផ្ដូលរំលំរបបខ្មែរក្រហម ដែលចាប់ផ្ដើមតាំងពីថ្ងៃទី ២០ មិថុនា ១៩៧៧ នៅពេលដែលលោក ហ៊ុន សែន និងអ្នកពាក់ព័ន្ធបានធ្វើដំណើរទៅវៀតណាមដើម្បីរំដោះប្រទេសកម្ពុជាពីការគ្រប់គ្រងរបស់ប៉ុលពត។ ក្រៅពីនេះក៏មានរូបដែលឆ្លុះបញ្ចាំងពីការអភិវឌ្ឍរបស់ប្រទេសកម្ពុជាក្នុងសម័យកាលដឹកនាំដោយលោកនាយករដ្ឋមន្ត្រី ហ៊ុន សែន ផងដែរ។
នៅលើផ្ទាំងមួយនៅតាមជញ្ជាំងមានរូបលោក ហ៊ុន សែន និងសារសរសេរថា៖ «ទង្វើ (សមាហរណកម្ម) ដែលជនរួមជាតិយើងបានរួមគ្នាធ្វើគឺមិនមែនជាការចុះចាញ់ ឬការសារភាពនោះទេ ប៉ុន្តែនេះគឺជាកាតព្វកិច្ចកូនខ្មែរទាំងអស់ដែលមានភារកិច្ចដើម្បីបង្កើតឡើងនូវសន្តិភាពសម្រាប់ប្រទេសរបស់ខ្លួន ហើយសន្តិភាពដែលយើងធ្វើនេះគឺជាសន្តិភាពដែលបានកើតឡើងពីបាតដៃរបស់ជនរងគ្រោះជាអ្នកបង្កើតឡើង។ ទីបំផុតដំណោះស្រាយឈ្នះ ឈ្នះ ដោយជនរងគ្រោះនេះហើយដែលស្វែងរកសន្តិភាពដើម្បីប្រទេសរបស់ខ្លួន»។
វីដេអូឯកសារមួយនៅលើហ្វេសប៊ុករបស់លោក ណឹម សុវត្ថិ បានអត្ថាធិប្បាយថា៖ «ថ្ងៃទី ២៩ ខែធ្នូ ឆ្នាំ ១៩៩៨ គឺជាថ្ងៃដែលត្រូវចងចាំក្នុងការដាក់ចេញនូវនយោបាយឈ្នះឈ្នះរបស់សម្ដេចតេជោ ហ៊ុន សែន ក្នុងការទាមទារឲ្យកងកម្លាំងខ្មែរក្រហមទម្លាក់អាវុធចុះហើយរួមរស់ក្រោមដំបូលរាជរដ្ឋាភិបាលតែមួយ នាយករដ្ឋមន្ត្រីតែមួយ កងទ័ពតែមួយ រដ្ឋធម្មនុញ្ញតែមួយ ហើយនិងទទួលបាននូវសុខសន្តិភាព»។
លោក កើត សុធា អតីតអភិបាលខេត្តប៉ៃលិនហើយធ្លាប់ជាមន្ត្រីយោធាខ្មែរក្រហមបានថ្លែងយ៉ាងខ្លីពីម្សិលមិញថា លោកពេញចិត្តនឹងយុទ្ធសាស្ត្រឈ្នះឈ្នះ របស់លោក ហ៊ុន សែន។
លោកបានថ្លែងថា៖ «ខ្ញុំអបអរសាទរពីព្រោះនេះជាសមិទ្ធផលមួយធំធេងណាស់ សម្រាប់ប្រជាជនខ្មែរយើងក្រោមការដឹកនាំផ្ទាល់របស់សម្ដេចតេជោ ហើយយើងខំរក្សាប្រពៃណីនេះឲ្យបានខ្ជាប់ខ្ជួនធ្វើម៉េចឲ្យសន្តិភាពកើតមាននៅស្រុកយើងយូរអង្វែងដើម្បីអភិវឌ្ឍស្រុកយើងឲ្យបានកាន់តែរីកចម្រើន»។
លោក អ៊ី ឈាន រដ្ឋលេខាធិការក្រសួងការពារជាតិ និងជាអតីតមេទ័ពខ្មែរក្រហមមិនអាចទាក់ទងសុំមតិយោបល់បានទេកាលពីម្សិលមិញ។
លោក ឈុំ សុជាតិ អ្នកនាំពាក្យក្រសួងការពារជាតិបានសរសេរនៅលើហ្វេសប៊ុករបស់លោកថា ពិធីសម្ពោធវិមានឈ្នះ ឈ្នះក៏មានការចូលរួមពីឧត្តមសេនីយ៍យោធាជាន់ខ្ពស់ពីប្រទេសចំនួន ៤ រួមមានចិន វៀតណាម ឡាវ និងថៃ។
ជាមួយគ្នានេះស្ថាប័នក្រសួងនានាក៏បានត្រៀមឯកសារអំពីសមិទ្ធផលរបស់ខ្លួនដើម្បីដាក់តាំងនៅវិមានសន្តិភាពក្នុងពិធីបើកសម្ពោធនេះដែរ៕
