ត្រីនៅកន្លែងចិញ្ចឹមត្រីមួយ នៅក្នុងខេត្តកណ្តាល។ រូបថត Cambodia Aquaculturist Association
ភ្នំពេញ៖ ប្រធានសមាគមវារីវប្បករនៅកម្ពុជា និងអ្នកចិញ្ចឹមត្រីបានស្នើសុំឱ្យក្រសួងពាក់ព័ន្ធជួយរកដំណោះស្រាយបញ្ហាកកស្ទះត្រីចិញ្ចឹមដែលនៅសល់ប្រមាណជាង ២ ម៉ឺនតោន នៅក្នុងឆមាសទី១ ឆ្នាំ ២០២១ នេះ ដោយសារតែមានការនាំចូលត្រីក្នុងចំនួនច្រើនពីក្រៅប្រទេស។
លោក សុខ រ៉ាដែន ប្រធានសមាគមវារីវប្បករនៅកម្ពុជាថ្លែងថា សមាគមរបស់លោកមានសមាជិក ២៧០ គ្រួសារ ហើយពួកគេកំពុងត្អូញត្អែរថា ត្រីកកស្ទះនៅសល់ពេញក្នុងស្រះប្រមាណជាង ២ ម៉ឺនតោន ដោយសារតែគ្មានឈ្មួញចុះទៅទិញ ដែលបញ្ហានេះអាចបណ្តាលមកពីការនាំត្រីចូលពីក្រៅប្រទេសមានចំនួនច្រើន។
លោកថ្លែងថា៖ «មូលហេតុធំដែលត្រីលក់មិនដាច់ គឺអ្នកដែលជាឈ្មួញធំៗ គាត់អត់មកទិញ ហើយឈ្មួញកណ្តាល ក៏គាត់អត់មកចុះចាប់ដែរ គាត់ទៅយកតែត្រីនាំចូលស្រេចៗពីប្រទេសជិតខាង ខុសពីរាល់ដង ដែលយើងមានឈ្មួញតូចៗ ដែលគេហៅថា ឈ្មួញក្នុងស្រុកដើរចាប់ត្រីតាមស្រះ» សមាគមវារីវប្បករនៅកម្ពុជា ស្នើសុំយ៉ាងទទូចដល់រដ្ឋាភិបាលក៏ដូចជាក្រសួងពាក់ព័ន្ធសូមចាត់វិធានការជាបន្ទាន់ ដើម្បីដោះស្រាយទៅលើបញ្ហាត្រីដែលកកស្ទះនៅក្នុងស្រះ ព្រោះបើមិនចាប់ទាន់ពេលវេលាទេ វាធ្វើឱ្យខូចគុណភាព ហើយត្រីនឹងអាចស្គម ប៉ុន្តែបើនៅបន្តរក្សាត្រីទៀត ត្រីវាអាចធំលើសទម្ងន់ ប្រឈមការចំណាយច្រើនដល់វារីវប្បករថែមទៀតផង។
មួយវិញទៀត រដូវកាលនេះ ជារដូវកាលរាំងស្ងួត ដែលធ្វើឱ្យតំបន់មួយចំនួនអាចខ្វះទឹកដែលត្រីអាចងាប់នាំឱ្យមានការខាតបង់កាន់តែច្រើន។ ក្នុងន័យនេះ ប្រសិនបើគ្មានអន្តរាគមន៍ទាន់ពេលវេលាទេ វាអាចធ្វើឱ្យប៉ះពាល់ និងអាចធ្វើឱ្យវារីវប្បករបាក់ទឹកចិត្ត ហើយអាចឈានទៅដល់ការលែងចិញ្ចឹមត្រីក្នុងស្រុកផងដែរ។ នេះបើតាមលោក សុខ រ៉ាដែន។
លោកបញ្ជាក់ថា៖ «ស្នើសុំឱ្យខាងរដ្ឋាភិបាលក៏ដូចជាក្រសួងពាក់ព័ន្ធលោកជួយ ជួយរបៀបម៉េច? គឺមិនចាំបាច់ផ្អាកការនាំចូលទេ សុំតែធ្វើម៉េចឱ្យឈ្មួញមកជួយទិញតាមស្រះយើងសិន ហើយយកទៅចែកចាយលក់នៅក្នុងស្រុកទៅ មានន័យថា សម្រួលការផលិតក្នុងស្រុកឱ្យលក់បានសិនចាំនាំចូលបន្ថែម»។
យ៉ាងណាក៏ដោយលោក រ៉ាដែន បញ្ជាក់ថា កាលពីថ្ងៃទី ១៦ ខែមីនា លោកបានប្រជុំបន្ទាន់ជាមួយលោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារ ARDB ដើម្បីពិភាក្សាដោះស្រាយបញ្ហាកកស្ទះត្រីក្នុងស្រះ។ «ឥឡូវនេះតាមខ្ញុំដឹងក្រសួងកំពុងរកធាតុចូលបន្ថែមទៀត មុនដាក់ចេញជាដំណោះស្រាយ ហើយប្រហែលជានៅសប្តាហ៍ក្រោយគេអាចនឹងប្រជុំដោះស្រាយបញ្ហានេះហើយ»។
ម្ចាស់កសិដ្ឋានចិញ្ចឹមត្រីម្នាក់ នៅភូមិសង្កើប ឃុំសំបូរ ស្រុកបាធាយ ខេត្តកំពង់ចាម ប្រាប់ ភ្នំពេញ ប៉ុស្តិ៍ ក្នុងលក្ខណៈមិនបញ្ចេញឈ្មោះកាលពីម្សិលមិញថា កសិដ្ឋានរបស់លោកសល់ត្រីប្រមាណ ១ ០០០ តោន ដែលមានត្រីពោ និងត្រីឆ្តោ។
លោកបញ្ជាក់ថា៖ «អត់មានម៉ូយមកចាប់មកអីហ្មង ដល់អ៊ីចឹងទៅវាពិបាកមិនដឹងត្រូវធ្វើម៉េច។ មកដល់ម៉ោងនេះអត់ទាន់មានឃើញដំណោះស្រាយអីពីខាងមន្ត្រីជំនាញពាក់ព័ន្ធ ហើយត្រីនៅតែមានការនាំចូលយ៉ាងគំហុកដដែល ដល់អ៊ីចឹងវាសម្លាប់ទីផ្សារក្នុងស្រុក មិនមែនមានតែកន្លែងខ្ញុំទេ ដែលសល់ត្រីកន្លែងផ្សេងៗក៏ដូចគ្នាដែរគ្រប់កន្លែងទាំងអស់»។
លោកសំណូមពរឱ្យរដ្ឋាភិបាលជួយកម្រិតការនាំចូលត្រី ដើម្បីឱ្យអ្នកចិញ្ចឹមត្រីក្នុងស្រុកអាចបន្តការចិញ្ចឹម និងធ្វើអាជីវកម្មបាន។ ជាមួយគ្នានេះ លោកក៏ស្នើសុំឱ្យក្រសួងពាក់ព័ន្ធធ្វើការត្រួតពិនិត្យសាច់ត្រី ដែលនាំចូលមកផងព្រោះគុណភាពត្រីនាំចូលមិនល្អលក់ថោកជាងត្រីពលរដ្ឋចិញ្ចឹមក្នុងស្រុក។ ក្នុងនោះលោកក៏សំណូមពរឱ្យក្រសួងពាក់ព័ន្ធជួយរកទីផ្សារសម្រាប់វារីវប្បករទាំងអស់នៅកម្ពុជា។
ចំណែក លោក ស៊ី ម៉ៅ ម្ចាស់កសិដ្ឋានចិញ្ចឹមត្រីនៅខណ្ឌព្រែកព្នៅបានថ្លែងថា ត្រីសល់ហើយលក់មិនចេញអាចបណ្តាលមកពីបញ្ហាកូវីដ ១៩ ផង និងដោយសារការនាំចូលត្រីច្រើនពីក្រៅប្រទេសផង។
លោកថ្លែងថា ក្នុងកសិដ្ឋានរបស់លោកសល់ត្រីទាំងអស់ប្រមាណជាង ១០០ តោន ដែលមានត្រីឡាបយ៉ា ត្រីឆ្តោ និងត្រីប្រា។ លោកបន្តថា៖ «ការនាំចូលពីប្រទេសជិតខាងមានចំនួនច្រើន ដូចជាត្រីប្រាអីហ្នឹង គេគិតនាំចេញទៅប្រទេសផ្សេង ដល់ពេលនាំទៅមិនបាន គេបែរជារុញមកស្រុកខ្មែរងាប់តែអ្នកចិញ្ចឹមត្រីនៅស្រុកខ្មែរលក់មិនចេញ»។
នៅពេលសាកសួរពីបញ្ហាគ្មានទីផ្សារលក់ត្រី រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ លោក វេង សាខុន បានថ្លែងថា ករណីនេះគួរសួរទៅកាន់ក្រសួងដែលទទួលបន្ទុកផលិតចំណី និងទីផ្សារ។ ចំណែកលោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបញ្ជាក់យ៉ាងខ្លីថា ករណីនេះលោកសូមសាកសួរទៅខាងអគ្គនាយកដ្ឋានគយសិន៕
វីដេអូ៖
