លោក ធន សារ៉ាយ (ឆ្វេង) ប្រធានអង្គការអាដហុក ក្នុងសន្និសីទកាសែតមួយកាលពីពេលកន្លងមក។ ផា លីណា
ភ្នំពេញៈ អង្គភាពប្រឆាំងអំពើពុករលួយ (ACU) នឹងមិនបើកការស៊ើបអង្កេតទៅលើបណ្តឹងរបស់ជនអនាមិក ដែលបានប្ដឹងចោទប្រកាន់ប្រធានអង្គការអាដហុកនិងភរិយារបស់លោក ថា គេចវេះ មិនព្រមបង់ពន្ធថ្លៃជួលផ្ទះជូនរដ្ឋ កាលពីឆ្នាំ ២០១៥ និងឆ្នាំ ២០១៦នោះទេ។ នេះបើយោងតាម លោក ឱម យ៉ិនទៀង ប្រធាន ACU បានប្រាប់ភ្នំពេញប៉ុស្តិ៍កាលពីម្សិលមិញ។
ក្នុងលិខិតរបស់ ACU ដែលភ្នំពេញប៉ុស្តិ៍ទទួលបានកាលពីម្សិលមិញ បានឲ្យដឹងថា ACU បានទទួលពាក្យបណ្តឹងពីជនអនាមិក កាលពីថ្ងៃទី ១៩ ខែមិថុនា ឆ្នាំ ២០១៨ ដោយចោទប្រកាន់ប្រធានសមាគមអាដហុក លោក ធន សារ៉ាយ និងភរិយាថា គេចវេះមិនព្រមបង់ពន្ធថ្លៃឈ្នួលផ្ទះជូនរដ្ឋ កាលពីឆ្នាំ ២០១៥ និងឆ្នាំ២០១៦។
លោក ឱម យ៉ិនទៀង ប្រធាន ACU បានឲ្យដឹងតាមសារទូរស័ព្ទកាលពីម្សិលមិញថា បន្ទាប់ពី ACU បានធ្វើការស្រាវជ្រាវ ប្រមូលព័ត៌មាន និងឯកសារភ័ស្តុតាង ពាក់ព័ន្ធនឹងពាក្យបណ្តឹងខាងលើរួចមក ACU ចាត់ទុកថា ករណីនេះ មិនជាប់ពាក់ព័ន្ធនឹងរឿងពុករលួយទេ។
លោកបានបញ្ជាក់ថា៖«នេះមិនមែនជាករណីពុករលួយទេ ព្រោះលោក ធន់ សារាយ មិនបានសូក អ្នកណា ហើយ មន្ត្រីពន្ធដារ មិនបានទារសំណូក ឬទារប្រាក់បន្ថែមអ្វីដែរ។ ប្រសិនបើទាំងពីរនាក់ ប្តី និងប្រពន្ធមិនបានបង់ពន្ធមែន វាជាបទល្មើស ស្ថិតក្នុងសមត្ថកិច្ចអគ្គនាយកដ្ឋានពន្ធដារ មិនស្ថិតនៅក្នុងសមត្ថកិច្ចអង្គភាពប្រឆាំងអំពើពុករលួយទេ»។
លោកបានបន្ថែមថា៖«អ្នកទាំងពីរពិតជាបានជួលផ្ទះរបស់ខ្លួន ឲ្យទៅអង្គការរបស់ខ្លួនមែន ហើយបានបង់ពន្ធកាត់ទុក គ្រប់ចំនួននេះ បើយោងតាមប្រព័ន្ធកុំព្យូទ័រពីថ្ងៃទី ១ ខែមករា ឆ្នាំ ២០១៦។ មូលដ្ឋានខាងលើនេះ មិនអាចឲ្យអង្គភាពប្រឆាំង អំពើពុករលួយអាចបើកការស៊ើបអង្កេតតាមពាក្យប្តឹងនេះបានទេ»។
បើតាមលិខិតរបស់ ACU ដដែល បានឲ្យដឹងថា តាមប្រព័ន្ធគ្រប់គ្រងទិន្ន័យរបស់ អគ្គនាយកដ្ឋានពន្ធដារ ម្ចាស់ផ្ទះបានបំពេញកាតព្វកិច្ចសារពើពន្ធដោយបានបង់ប្រាក់ពន្ធកាត់ទុក លើឈ្នួលផ្ទះ និងដីចំនួន ១០% ជាង៩២០០០០រៀល ឬស្មើនឹង ២៣០ ដុល្លារអាមេរិក សម្រាប់ឆ្នាំ ២០១៦។ ដោយឡែក ចំពោះទិន្នន័យក្នុងឆ្នាំ ២០១៥ វិញ អគ្គនាយកដ្ឋានពន្ធដារមិនមានទេ ព្រោះមិនទាន់បានដាក់ឲ្យប្រើប្រាស់ប្រព័ន្ធ Single Invoices នៅឡើយ។
មន្ត្រីស៊ើបអង្កេតជាន់ខ្ពស់ សមាគមអាដហុក លោក សឹង សែនករុណា បានថ្លែថា សមាគមអាដហុកមិនដឹងថា អ្នកដែលប្តឹងគឺផ្អែកលើមូលដ្ឋានអ្វីនោះទេ ហើយថា សមាគមអាដហុក បានបំពេញកាតព្វកិច្ចសារពើពន្ធតាម ច្បាប់យ៉ាងទៀងទាត់។
លោកបញ្ជាក់ថា៖«ការប្តឹងនេះ គឺជារឿងមួយ ដែលមិនត្រឹមត្រូវ ដោយសារតែវាមិនឆ្លុះបញ្ចាំង ពីការពិត ដូច្នេះការរកឃើញរបស់អង្គភាពប្រឆាំងអំពើពុករលួយ ហាក់ដូចបង្ហាញឲ្យឃើញថា សមាគមអាដហុកយើងមានតម្លាភាពស្អាតស្អំ»៕
