សាលារៀនដែលសាងសង់ដោយអង្គការ Save the Children នឹងត្រូវប្រគល់ជូនរដ្ឋាភិបាល។ រូបថត សហការី
ពោធិ៍សាត់ៈ អង្គការ Save the Children នៅថ្ងៃទី ១២ ខែធ្នូនេះនឹងប្រគល់សមិទ្ធផលគម្រោងរយៈពេល ៣ ឆ្នាំក្នុងការពង្រឹងការគាំពារ និងអភិវឌ្ឍន៍កុមារតូចដល់រដា្ឋភិបាលកម្ពុជារួមជាមួយអគារមត្តេយ្យសិក្សាថ្មីចំនួន ៧ កន្លែងក្នុងខេត្ដកំពង់ឆ្នាំង និងខេត្ដពោធិ៍សាត់។ នេះបើតាមសេចក្តីប្រកាសព័ត៌មានស្ដីពីការប្រគល់សមិទ្ធផលនេះ ដែលភ្នំពេញប៉ុស្ដិ៍ទទួលបានកាលពីថ្ងៃអង្គារ។
សេចក្ដីប្រកាសព័ត៌មានឲ្យដឹងថា លោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡានឹងធ្វើជាគណៈអធិបតីក្នុងពិធីប្រគល់សមិទ្ធផលនេះនៅថ្ងៃទី ១២ ខែធ្នូ ឆ្នាំ ២០១៩ ស្ថិតក្នុងស្រុកបាកាន ខេត្ដពោធិ៍សាត់រួមនឹងអភិបាលខេត្តពោធិ៍សាត់តំណាងមកពីធនាគារពិភពលោក និងដៃគូអង្គការមិនមែនរដ្ឋាភិបាល និងឪពុកម្តាយ លោកគ្រូ-អ្នកគ្រូ និងកុមារផងដែរ។
សមិទ្ធផលគម្រោងដែលមានរយៈពេល ៣ ឆ្នាំក្នុងការពង្រឹងការគាំពារ និងអភិវឌ្ឍន៍កុមារតូចនេះបានជួយដល់ពលរដ្ឋ ១៣៧ សហគមន៍នៅក្នុងបឹងទន្លេសាប និងជុំវិញតំបន់លិចទឹកក្នុងខេត្តកំពង់ឆ្នាំង និងខេត្តពោធិ៍សាត់ ខណៈគម្រោងនេះមានគោលបំណងក្នុងការបង្កើនការទទួលបានសេវាគាំពារ និងអភិវឌ្ឍន៍កុមារតូចប្រកបដោយគុណភាពតាមរយៈកម្មវិធីអប់រំកុមារតូចតាមផ្ទះ និងក្នុងសហគមន៍សម្រាប់កុមារអាយុចាប់ពី ០ ដល់ ៥ ឆ្នាំ ជាពិសេសកុមារដែលជួបការលំបាក។
សេចក្ដីប្រកាសបញ្ជាក់ថា៖ «កុមារទាំងអស់មិនថាពួកគេរស់នៅទីណា ឬមានជីវភាពបែបណាទេត្រូវការការថែទាំដោយយកចិត្តទុកដាក់ ដើម្បីធានាថា ពួកគេទទួលបានសុខភាពល្អ បញ្ញាការគិត រាងកាយមាំមួន ការលូតលាស់ផ្នែកសង្គម និងអារម្មណ៍ចាប់តាំងពីពេលដែលពួកគេចាប់បដិសន្ធិនៅក្នុងផ្ទៃម្តាយដល់វ័យកុមារតូច»។
លោកស្រី Elizabeth Pearce នាយិកាអង្គការ Save the Children ប្រចាំប្រទេសកម្ពុជាបានលើកឡើងថា គម្រោងគាំពារ និងអភិវឌ្ឍន៍កុមារតូចបានបង្កើតអត្ថប្រយោជន៍ដ៏យូរអង្វែងសម្រាប់កុមារ និងសង្គមរួមមានការបង្កើនលទ្ធផលការយល់ដឹង និងសុខភាព ការបង្កើនជំនាញសមត្ថភាព និងផលិតភាពយ៉ាងសម្បូរបែប និងកាត់បន្ថយភាពក្រីក្រ និងវិសមភាព។
លោកស្រីថ្លែងថា៖ «កុមារដែលរស់នៅក្នុងសហគមន៍ជុំវិញបឹងទន្លេសាប នៅក្នុងប្រទេសកម្ពុជាគឺមានលទ្ធភាពតិចតួចបំផុតក្នុងការទទួលបានសេវាអប់រំកុមារតូចដែលមានគុណភាព ហើយពួកគេក៏ងាយនឹងជួបនូវកង្វះអាហារូបត្ថម្ភ និងផលពិបាកក្នុងការទទួលបានសេវាសុខភាពគុណភាពទឹកស្អាត និងអនាម័យ។
បន្ថែមលើការសាងសង់មណ្ឌលមត្តេយ្យសិក្សាថ្មីចំនួន ៧ មណ្ឌលយើងបានជួយសាលា និងសហគមន៍ក្នុងតំបន់ បង្កើតថ្នាក់មត្តេយ្យសិក្សាចំនួន ៣៣ ថ្នាក់នៅក្នុងសាលាបឋមសិក្សា និងមណ្ឌលសហគមន៍»។ លោកស្រីបន្ថែមថា៖ «អ្វីដែលសំខាន់ជាងនេះទៅទៀត គឺយើងបានធ្វើការយ៉ាងច្រើនជាមួយឪពុកម្តាយប្រមាណ ៨០០០ នាក់ដើម្បីបណ្តុះបណ្តាលពួកគេនូវជំនាញ និងចំណេះដឹងសម្រាប់អប់រំកូនៗរបស់ពួកគេនៅផ្ទះតាមរយៈសកម្មភាពប្រចាំថ្ងៃនៅផ្ទះ និងប្រើប្រាស់ជាមួយសម្ភារនៅផ្ទះដែលផ្តល់អត្ថប្រយោជន៍ដល់កុមារជាង ១ ម៉ឺននាក់»។
បើតាមសេចក្ដីប្រកាសព័ត៌មានអង្គការ Save the Children បានចាប់ផ្តើមអនុវត្តគម្រោងគាំពារ និងអភិវឌ្ឍន៍កុមារតូចនៅតំបន់បណ្តែតទឹក និងលិចទឹកនៅក្នុងឆ្នាំ ២០១៦ ក្រោមការឧបត្ថម្ភមូលនិធិពីមូលនិធិអភិវឌ្ឍន៍សង្គមរបស់រដ្ឋាភិបាលប្រទេសជប៉ុនតាមរយៈធនាគារពិភពលោក អង្គការ Save the Children អូស្ត្រាលី និងអង្គការ Save the Children ហុងកុង។
បើតាមអង្គការ Save the Children កត្តាសំខាន់ក្នុងការបង្កើនការទទួលបានសេវាអប់រំកុមារតូច ប្រកបដោយគុណភាពគឺការសាងសង់មត្តេយ្យសិក្សាថ្មីចំនួន ៧ កន្លែងទាំងក្នុងតំបន់បណ្តែតទឹក និងតំបន់លិចទឹក។ អគារសិក្សាទាំងអស់នេះត្រូវបានកសាងឡើងប្រកបដោយគុណភាពខ្ពស់បំផុតទាំងបរិយាកាស និងស្តង់ដាកុមារមេត្រី ដើម្បីធានាថា កុមារស្ថិតនៅក្នុងកន្លែងមានសុវត្ថិភាព និងការថែទាំប្រកបដោយការយកចិត្តទុកដាក់ខ្ពស់។
លោក អ៊ុន សូលីឌិន មន្ត្រីសម្របសម្រួលផ្នែកវិស្វករប្រចាំខេត្តនៃអង្គការ Save the Children បានពណ៌នាពីការរចនាប្លង់នៃមត្តេយ្យសិក្សាថ្មីនេះថា៖ «យើងបានសាងសង់អគារមត្តេយ្យសិក្សាចំនួន ៤ កន្លែងដែលផុតពីដី មិនលិចទឹកនៅក្នុងរដូវវស្សា»។
បន្ថែមពីនេះទៀតក្រុមការងារលោកបានសាងសង់មត្តេយ្យសិក្សាបណ្តែតទឹកចំនួន ៣ អគាររចនាប្លង់យ៉ាងពិសេស ដែលអាចបណ្តែតលើទឹក ឬអាចនៅលើដីគោកអាស្រ័យទៅតាមរដូវកាល និងបានរចនាប្លង់ និងសង់ឡើងគោរពទៅតាមស្តង់ដាគុណភាពខ្ពស់ ដើម្បីធានាពីសុវត្ថិភាពកុមារបរិយាប័ន្ន អនាម័យ និងចំណាយថវិកាតិចក្នុងការថែទាំ និងប្រតិបតិ្តការ។
លោក រស់ សុវាចា អ្នកនាំពាក្យក្រសួងអប់រំបានថ្លែងថា ក្រសួងអប់រំ ស្វាគមន៍កិច្ចសហការណ៍វិជ្ជមានពីគ្រប់ភាគីពាក់ព័ន្ធក្នុងការចូលរួមចំណែកការងារកំណែទម្រង់អប់រំ យុវជន និងកីឡា។
លោក រស់ សុវាចា បានថ្លែងថា៖ «ដៃគូអភិវឌ្ឍន៍រួមមាន Save the Children បាននិងកំពុងមានតួនាទីសំខាន់មួយក្នុងការចូលរួមលើកកម្ពស់គុណភាពអប់រំកម្រិតមត្តេយ្យសិក្សា។ ជាក់ស្តែងការអនុវត្តគម្រោងមត្តេយ្យសហគមន៍បណ្តែតទឹកនេះជាគម្រោងមួយមានការគាំទ្រដល់គោលនយោបាយជាតិស្តីពីការគាំពារ និងអភិវឌ្ឍន៍កុមារតូច និងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣៕
