ថ្មីៗ​នេះ ខ្ញុំ​បាន​អាន​អត្ថបទ​ជា​ភាសា​អង់គ្លេស​មួយ ដែល​មាន​ចំណង​ជើង​ថា៖ បុរស​នៅ​ពី​ក្រោយ​ការ​ប្រឡង (បាក់ឌុប) ដែល​ចុះ​ផ្សាយ​ដោយ​កាសែត ភ្នំពេញ ប៉ុស្តិ៍។ នៅ​ក្នុង​អត្ថបទ​ដ៏​វែង​អន្លាយ​នោះ លោក ហង់ ជួនណារ៉ុន ដែល​ជា​រដ្ឋ​មន្ត្រី​ក្រសួង​អប់រំ​កម្ពុជា បាន​មាន​ប្រសាសន៍​ជាច្រើន​ទាក់ទង​ទៅ​នឹង​ការ​កែ​ទម្រង់​ប្រព័ន្ធ​អប់រំ​នៅ​កម្ពុជា។ អ្វី​ដែល​ធ្វើ​ឲ្យ​ខ្ញុំ​ចាប់​អារម្មណ៍​ជាង​គេ​នៅ​ក្នុង​ប្រសាសន៍​របស់​លោក​រដ្ឋ​មន្ត្រី​វ័យ​ក្មេង​រូប​នេះ​គឺ​នៅ​ត្រង់​ចំណុច​មួយ​ឆ្លើយ​តប​ទៅ​នឹង​សំណួរ ថា​តើ​ត្រូវ​ធ្វើ​ដូច​ម្តេច​ដើម្បី​ដោះ​ស្រាយ​បញ្ហា​សិស្ស​ដែល​ប្រឡង​បាក់ឌុប​ធ្លាក់​ដ៏​ច្រើន​លើស​លប់​នោះ បន្ទាប់​ពី​មាន​ការ​រឹត​បន្តឹង​កម្មវិធី​ប្រឡង​នា​ពេល​ថ្មីៗ​នេះ?