លោក វ៉ី សំណាង កាលពីចុងឆ្នាំមុន។ រូបថតVei Samnang FB
កំពង់ស្ពឺៈ អភិបាលខេត្តកំពង់ស្ពឺ លោក វ៉ី សំណាង បានបញ្ជាឱ្យអភិបាលក្រុងស្រុកទូទាំងខេត្តទាំងអស់បញ្ឈប់ការអនុញ្ញាតបើកអាជីវកម្មឆ្នោតឡូតូ ល្បែងផ្សងសំណាង ហើយត្រូវចាត់វិធានការបង្ក្រាបល្បែងស៊ីសងគ្រប់ប្រភេទក្នុងភូមិសាស្ត្រខេត្តកំពង់ស្ពឺ ទោះបីស្របច្បាប់ និងមិនស្របច្បាប់។
លោក វ៉ី សំណាង បានផ្ញើលិខិតទៅអភិបាលក្រុងស្រុកក្នុងខេត្តកំពង់ស្ពឺទាំងអស់កាលពីថ្ងៃទី៩ ខែកុម្ភៈ ដោយបានបញ្ជាក់ថា ដើម្បីធានាបានសុខសន្តិភាព ការអភិវឌ្ឍ លើកកម្ពស់ជីវភាពពលរដ្ឋឱ្យមានភាពរីកចម្រើនជាលំដាប់ អាជ្ញាធរមានសមត្ថកិច្ចគ្រប់លំដាប់ថ្នាក់តែងតែយកចិត្តទុកដាក់អនុវត្តគោលនយោបាយភូមិ ឃុំ សង្កាត់ មានសុវត្ថិភាព និងធ្វើការបង្ក្រាបរាល់បទល្មើសជាប្រចាំ ធ្វើឱ្យពលរដ្ឋមានជំនឿទុកចិត្តមកលើការដឹកនាំរបស់រាជរដ្ឋាភិបាលនិងអាជ្ញាធរពាក់ព័ន្ធផងដែរ។
លោកបានបញ្ជាក់ថា៖«រដ្ឋបាលខេត្តសូមស្នើឱ្យលោកអភិបាលនៃគណៈអភិបាលក្រុង ស្រុក ចូលរួមអនុវត្តការបញ្ឈប់ឬបញ្ចប់ការផ្តល់អាជ្ញាប័ណ្ណបើកអាជីវកម្មឆ្នោតឡូតូ ល្បែងផ្សងសំណាងគ្រប់ប្រភេទ និងបន្តស្រាវជ្រាវបង្ក្រាបនូវទីតាំងលេងល្បែងស៊ីសងខុសច្បាប់និងបទល្មើសគ្រប់ប្រភេទក្នុងដែនសមត្ថកិច្ច ព្រមទាំងចាត់វិធានការតាមច្បាប់ឱ្យបានម៉ឺងម៉ាត់បំផុត»។
ស្នងការដ្ឋាននគរបាលខេត្តកំពង់ស្ពឺ នៅថ្ងៃទី១០ ខែកុម្ភៈ ក៏បានលើកឡើងតាមរយៈហ្វេសប៊ុកដែរថា កន្លងមកក្រោមការដឹកនាំនិងបញ្ជាផ្ទាល់ពីលោក វ៉ី សំណាង បានដាក់ចេញវិធានការមិនអនុញ្ញាតឱ្យមានការផ្សព្វផ្សាយតាំងរូបភាព ផ្ទាំងប៉ាណូ ផ្សាយពាណិជ្ជកម្មស្រាបៀរគ្រប់ប្រភេទឡើយ ដោយវិធានការនេះបានទទួលការកោតសរសើរទូទាំងផ្ទៃប្រទេសថាជាខេត្ដគំរូមួយក្នុងចំណោមរាជធានីខេត្តទាំង២៥ នៃប្រទេសកម្ពុជា។
ស្នងការដ្ឋានបានបន្តថា៖ «នេះជាវិធានការនិងជាជម្រើសទី២ នៃការប្ដេជ្ញាចិត្ដរបស់ឯកឧត្ដមអភិបាលខេត្ដកំពង់ស្ពឺ។ប្រជាពលរដ្ឋប្រាកដណាស់សាទរនូវចំណាត់ការដ៏ម៉ឺងម៉ាត់នេះ។ អភិបាលក្រុង ស្រុក និងរដ្ឋបាលឃុំ សង្កាត់ ភូមិ ប្រាកដជានឹងចូលរួមអនុវត្ដឱ្យបានពេញលេញនិងមានប្រសិទ្ធភាព»។
លោក ឡុង ឌីម៉ង់ អភិបាលរងខេត្តព្រះសីហនុបានឱ្យដឹងនៅថ្ងៃទី១១ ខែកុម្ភៈដែរថា សម្រាប់រដ្ឋបាលខេត្តព្រះសីហនុ ចាប់តាំងពីរដ្ឋាភិបាលអាណត្តិមុន(អាណត្តិទី ៦)ដែលដឹកនាំដោយ លោក ហ៊ុន សែន អតីតនាយករដ្ឋមន្ត្រី និងលោក ស ខេង អតីតរដ្ឋមន្ត្រីក្រសួងមហាផ្ទៃ បានដាក់បទបញ្ជាដាច់ណាត់ក្នុងការបង្ក្រាបល្បែងស៊ីសងខុសច្បាប់។
លោកបានបន្តថា ការបង្ក្រាបល្បែងស៊ីសងខុសច្បាប់នេះត្រូវបានរដ្ឋបាលខេត្តព្រះសីហនុ អនុវត្តជាប្រចាំជាមួយនឹងគោលនយោបាយភូមិ ឃុំមានសុវត្ថិភាព កុំឱ្យមានមហន្តរាយដល់ប្រជាពលរដ្ឋ។រីឯល្បែងពាណិជ្ជកម្មវិញ ដែលមានមូលដ្ឋាននៅក្នុងខេត្តត្រូវបានត្រួតពិនិត្យពីគណៈកម្មការគ្រប់គ្រងល្បែងពាណិជ្ជកម្មជាប់ជានិច្ច។
លោកបានបញ្ជាក់ថា៖«ទាំងក្រសួងមហាផ្ទៃ ទាំងក្រសួងសេដ្ឋកិច្ច និងហិរញ្ញវត្ថុ គឺត្រួតពិនិត្យកិច្ចការងារនេះ បានត្រឹមត្រូវណាស់។ ល្បែងស៊ីសងខុសច្បាប់ ដែលមានកើតឡើងនៅតាមមូលដ្ឋានរបស់ប្រជាពលរដ្ឋគឺយើងមិនអនុញ្ញាតឱ្យមានជាដាច់ខាត»។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ បានគាំទ្រចំពោះចំណាត់ការរបស់រដ្ឋបាលខេត្តកំពង់ស្ពឺលើវិធានការមិនឱ្យមានល្បែងស៊ីសងគ្រប់ភេទនៅក្នុងខេត្ត ព្រោះល្បែងស៊ីសងនេះធ្វើឱ្យប៉ះពាល់ដល់សន្តិសុខសង្គម អំពើហិង្សា និងចោរកម្មផ្សេងៗទៀត។
ទោះជាយ៉ាងណាលោក អំ សំអាត ថា វិធានការនេះជោគជ័យទៅបានលុះត្រាតែមន្ត្រីគ្រប់លំដាប់ថ្នាក់យកចិត្តទុកដាក់ និងតាំងចិត្តអនុវត្តជាពិសេស មន្ត្រីទាំងនោះ មិនជាប់ព័ន្ធនឹងល្បែងស៊ីសង ទើបអនុវត្តបានជោគជ័យ ដូចបញ្ហាផ្លាកសញ្ញាផ្សព្វផ្សាយស្រាបៀរដូច្នោះដែរ។
លោកបានថ្លែងថា៖ «យើងរង់ចាំមើលថា តើបានជោគជ័យប៉ុនណា ប៉ុន្តែកន្លងមក ខេត្តកំពង់ស្ពឺ ធ្វើការបានជោគជ័យលើការហាមផ្សាយពាណិជ្ជកម្មស្រាបៀរ អ៊ីចឹងយើងរង់ចាំមើលការបង្ក្រាបល្បែងស៊ីសងទៅមុខទៀត ដែលវាអាស្រ័យទៅលើឆន្ទៈ និងការតាំងចិត្តខ្ពស់ ហើយអាជ្ញាធរទាំងអស់ត្រូវនៅឱ្យឆ្ងាយនិងកុំពាក់ព័ន្ធរឿងទាំងអស់ហ្នឹងគឺអាចចូលរួមទប់ស្កាត់បាននិងជោគជ័យដូចស្រាបៀរដែរ»៕
