ក្រសួងកសិកម្មកំពុងជំរុញឲ្យប្រជាកសិករបង្កើនការដាំដុះបន្ថែមក្នុងស្រុកឲ្យបានច្រើន។ រូបថត ភ្នំពេញប៉ុស្តិ៍
ភ្នំពេញ: ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា កម្ពុជានឹងរក្សាបាននិរន្តរភាពស្បៀងគ្រប់គ្រាន់ក្នុងអំឡុងពេលនៃការរាតត្បាតជំងឺកូវីដ ១៩ ដែលជាយន្តការមួយត្រូវបានរៀបចំឡើងដោយរដ្ឋាភិបាលក្នុងការរក្សាស្ថិរភាពថ្លៃលើទីផ្សារ។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍កាលពីថ្ងៃពុធថា ការផ្គត់ផ្គង់ផលិតផលកសិកម្មរួមមានបន្លែ ត្រី និងសាច់នឹងគ្រប់គ្រាន់សម្រាប់តម្រូវការក្នុងស្រុកក្នុងពេលរដ្ឋាភិបាលធ្វើការទប់ស្កាត់ការរីករាលដាលកូវីដ ១៩។
លោកបន្ថែមថា ក្រសួងបានត្រៀមស្តុកសាច់ជ្រូកប្រមាណ ១៣០ តោន ក្នុងមួយថ្ងៃសម្រាប់រយៈពេល ៣ ខែនៃការរីករាលដាលជំងឺកូវីដ១៩ ខណៈលទ្ធភាពក្នុងការផ្គត់ផ្គង់សាច់សត្វក្នុងស្រុកសរុបប្រចាំឆ្នាំមានជាង ២៣៩ ពាន់តោន។
លោកថ្លែងថា៖ «រដ្ឋាភិបាលនឹងពិភាក្សាការទិញសាច់ជ្រូកស្តុកទុកនេះជាមួយក្រុមហ៊ុននាំចូលសាច់ឲ្យជួយទិញស្តុក ដោយមានការផ្តល់សម្បទានផ្សេងៗដល់ក្រុមហ៊ុន»។
លោកបានបន្តថា៖ «ក្រសួងនឹងផ្តល់ពូជសត្វ ពិសេសពូជមាន់ដែលមានរយៈពេលខ្លីក្នុងការទទួលផលព្រមទាំងផ្តល់ចំណីសត្វដល់អ្នកចិញ្ចឹម ដើម្បីពង្រីកផលិតកម្មសត្វ»។
លោកបន្ថែមថាទន្ទឹមនឹងនេះកម្ពុជាមានលទ្ធភាពក្នុងការផ្គត់ផ្គង់បន្លែក្នុងស្រុកប្រចាំឆ្នាំ ២០២០ នេះបានប្រមាណ ៧១៦ ១១៣ តោន ស្មើនឹង ៦៨ ភាគរយ នៃតម្រូវការបន្លែសរុបជាង ១ លានតោន។ លោកបានបន្ថែមថា ទោះបីយ៉ាងណាកម្ពុជាចាំបាច់ធ្វើការនាំចូលបន្លែពីប្រទេសជិតខាងប្រមាណ ៣២ ភាគរយ ដើម្បីបំពេញតម្រូវការកង្វះខាតបន្លែក្នុងស្រុក។
លោកថ្លែងថា៖ «ដើម្បីរក្សាសន្តិសុខស្បៀងក្នុងអំឡុងមានការរីករាលដាលវីរុសកូរ៉ូណា រដ្ឋាភិបាលបានចេញវិធានការមួយចំនួនដូចជា ការជ្រើសរើសទីតាំងដែលមានសក្តានុពលដាំបន្លែ និងមានប្រភពទឹកគ្រប់គ្រាន់សម្រាប់អនុវត្តផលិតកម្មបានពេញមួយឆ្នាំ និងជ្រើសរើសសហគមន៍ដែលមានសក្តានុពល និងមានសមត្ថភាពគ្រប់គ្រាន់ក្នុងការផលិតដំណាំបន្លែក្នុងទ្រង់ទ្រាយធំ»។
ជាមួយគ្នានេះលោកក៏បានប្រាប់ដែរថា ក្រសួងនឹងផ្គត់ផ្គង់គ្រាប់ពូជបន្លែ សម្ភារ និងឧបករណ៍កសិកម្មចាំបាច់ទៅដល់កសិករផលិតបន្លែ ជាពិសេសកសិករក្រីក្រខ្វះលទ្ធភាព ហើយក្រសួងក៏នឹងផ្តល់បច្ចេកវិទ្យាទំនើបតាមរយៈការអនុវត្តកសិកម្មល្អដោយភាពវៃឆ្លាត ដើម្បីបង្កើនផលិតកម្ម ដំណាំបន្លែសុវត្ថិភាព និងរៀបចំប្រតិទិនដាំដុះក្នុងការផ្គត់ផ្គង់តាមតម្រូវការទីផ្សារដល់កសិករផលិតបន្លែ។
លោកបន្តថា៖ «ការបង្កើតបណ្តាញទីផ្សារដើម្បីផ្សារភ្ជាប់អ្នកទិញ និងសហគមន៍ផលិតបន្លែក្នុងទិសដៅធ្វើឲ្យមាននិរន្តរភាពនៃការផ្គត់ផ្គង់ដល់ទីផ្សារ និងការអនុវត្តយន្តការផលិតកម្មកសិកម្មតាមកិច្ចសន្យា»។
កាលពីថ្ងៃទី ៥ ខែមេសា ក្រសួងសេដ្ឋកិច្ច និងហិរញ្ញវត្ថុបានបង្កើតក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លែទំនិញយុទ្ធសាស្ត្រក្នុងអំឡុងប្រយុទ្ធប្រឆាំងនឹងជំងឺកូវីដ១៩។ ក្រុមការងារនេះមានតំណាងមកពីក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងកសិកម្ម រុក្ខាប្រមាញ់ និងនេសាទ។
លោក ចាន់ សុឃាំង អនុប្រធានសហព័ន្ធស្រូវអង្ករកម្ពុជាបានឲ្យដឹងថា សមាជិកសហព័ន្ធរបស់លោកទាំងអស់បានត្រៀមស្រូវ និងអង្ករក្នុងស្តុកគ្រប់គ្រាន់ក្នុងការរក្សានិរន្តរភាពស្បៀងក្នុងស្រុកចំពេលមានការរីករាលដាលជំងឺកូវីដ ១៩ នេះ។ លោកបានបន្តថា វិធានការរក្សាស្បៀងក្នុងស្តុកនេះក៏បានជួយរក្សាតម្លៃអង្ករលើទីផ្សារក្នុងស្រុកផងដែរ។
លោកថ្លែងថា៖ «យើងបានត្រៀមអង្ករគ្រប់គ្រាន់ក្នុងអំឡុងពេលមានការរាតត្បាតជំងឺកូវីដ-១៩នេះ ហើយយើងសង្កេតឃើញថា សព្វថ្ងៃមិនមានការប្រែប្រួលតម្លៃអង្ករលើទីផ្សារក្នុងស្រុកគួរឲ្យកត់សម្គាល់ទេ»។
បើយោងតាមលោក ស្រី វុឌ្ឍី តម្រូវការសាច់សរុបប្រចាំឆ្នាំមានចំនួន ២៩០ ពាន់តោន ក្នុងនោះសាច់គោក្របីមានចំនួន ៨២ ពាន់តោន សាច់ជ្រូក មាន ១៥៣ ពាន់តោន សាច់បក្សី ៥៤ ពាន់តោន និងសាច់ផ្សេងទៀតសរុប ១៦៥ តោន ខណៈផលិតកម្មក្នុងស្រុកប្រចាំឆ្នាំមានលទ្ធភាពផ្គត់ផ្គង់ប្រមាណ ២៣៩ ពាន់តោនស្មើនឹង ៨២ ភាគរយ៕ LA
វីដេអូ៖
