ទីតាំងលើកស្លាកសញ្ញារថយន្ត TESLA តាមផ្លូវសហព័ន្ធរុស្ស៊ី។ ហេង ជីវ័ន
ភ្នំពេញៈ អ្នកនាំពាក្យក្រសួងពាណិជ្ជកម្មលោក ប៉ែន សុវិជាតិ បានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា ក្រសួងពុំទាន់បានទទួលការស្នើសុំណាមួយពីក្រុមហ៊ុនផលិតរថយន្តអគ្គិសនី TESLA របស់អាមេរិកបោះទីតាំងនៅប្រទេសកម្ពុជានៅឡើយទេ។
ការអះអាងនេះបានធ្វើឡើងប៉ុន្មានថ្ងៃបន្ទាប់ពីមានផ្ទុះការចាប់អារម្មណ៍នៅលើបណ្តាញសង្គមហ្វេសប៊ុកទាក់ទងនឹងវត្តមានរបស់ការិយាល័យតាំងបង្ហាញ (Showroom) ដោយមានដាក់រូបរថយន្ត Tesla នៅតាមមហាវិថីសហព័ន្ធរុស្ស៊ី ទល់មុខនឹងក្រសួងពាណិជ្ជកម្ម។
លោក ប៉ែន សុវិជាតិ បានថ្លែងថា៖ «ចំពោះករណីដែលលេចឮព័ត៌មានក្នុងសង្គមហ្វេសប៊ុក និងបណ្តាញសារព័ត៌មានថា TESLA ដែលជាក្រុមហ៊ុនផលិតរថយន្តអគ្គិសនីបានមកបោះទីតាំងនៅកម្ពុជា ដោយមានការលើកស្លាកសញ្ញា TESLA នៅទីតាំងតាមមហាវិថីសហព័ន្ធរុស្ស៊ីជាដើមយោងតាមការពិនិត្យជាក់ស្តែងក្នុងបញ្ជីពាណិជ្ជកម្ម ក្រុមហ៊ុន TESLA របស់មហាសេដ្ឋី Elon Musk មិនទាន់មាននៅក្នុងបញ្ជីពាណិជ្ជកម្មរបស់ក្រសួងនៅឡើយទេ»។
លោកបន្ថែមថា៖ «ចំពោះអ្នកទទួលសិទ្ធិផ្តាច់មុខក្នុងការចែកចាយលក់រថយន្ត TESLA នេះក្រសួងក៏បានពិនិត្យបញ្ជីទទួលតម្កល់សិទ្ធិផ្តាច់មុខខាងកម្មសិទ្ធិបញ្ញាដែរ ហើយបានរកឃើញថា ពុំទាន់មានបុគ្គល ឬក្រុមហ៊ុនណាទទួលបានសិទ្ធិផ្តាច់មុខ និងបានយកមកតម្កល់នៅក្រសួងពាណិជ្ជកម្មនៅឡើយទេចំពោះទំនិញម៉ាក TESLA នេះ»។
ភ្នំពេញ ប៉ុស្តិ៍ បានធ្វើការពិនិត្យមើលទៅលើការចុះបញ្ជីក្រុមហ៊ុននៅក្រសួងពាណិជ្ជកម្ម គឺមានក្រុមហ៊ុនចំនួន ២ ដែលមានឈ្មោះ Tesla នេះរួមមាន Tesla Engineering and Construction Co., Ltd.(ថេសឡា អេនជីនារីង អេន ខនស្ត្រាក់សិន ឯ.ក) និង Tesla Industries Co., Ltd. (ថេសឡា អ៊ិនដាសស្ទ្រី) ដែលក្រុមហ៊ុនទាំង ២ នេះត្រូវបានចុះបញ្ជីតាំងពីឆ្នាំ ២០១៣ កាន់កាប់ដោយលោក Chieu ADISORN។
លោក Chieu ADISORN បានប្រាប់ ភ្នំពេញ ប៉ុស្តិ៍ថា ក្រុមហ៊ុនរបស់ខ្លួនគឺមិនជាប់ទាក់ទងនឹងក្រុមហ៊ុនផលិតរថយន្តអគ្គិសនី TESLA របស់អាមេរិកឡើយ។ លោកប្រាប់ថា ក្រុមហ៊ុនរបស់លោកគឺបម្រើសេវាកម្មផ្នែកបច្ចេកវិទ្យា។
លោកអះអាងថា៖ «ឈ្មោះក្រុមហ៊ុនខ្ញុំបានចុះបញ្ជីពាណិជ្ជកម្មតាំងពីឆ្នាំ ២០១៣ មកម្ល៉េះ និងមិនជាប់ពាក់ព័ន្ធក្រុមហ៊ុនផលិតរថយន្ត TESLA ទេ។ ក្រុមហ៊ុនយើងគឺដាក់ឈ្មោះយកតាមអ្នកវិទ្យាសាស្ត្រដ៏ល្បីឈ្មោះម្នាក់ដែលមានឈ្មោះថា Nikola Tesla»។
«ខ្ញុំសូមបញ្ជាក់ឱ្យច្បាស់ថា ក្រុមហ៊ុនខ្ញុំមិនបានទទួលសិទ្ធិចែកចាយណាមួយពីក្រុមហ៊ុនរថយន្តអគ្គិសនី TESLA របស់អាមេរិកទេ»។ នេះបើយោងតាមការអះអាងរបស់លោក។
ភ្នំពេញ ប៉ុស្តិ៍ ក៏បានផ្ញើអ៊ីមែលទៅក្រុមហ៊ុន TESLA ផ្ទាល់ដែលមានមូលដ្ឋាននៅក្នុងរដ្ឋកាលីហ្វ័រនីញ៉ាសហរដ្ឋអាមេរិក និងទីតាំងចែកចាយប្រចាំតំបន់អូស្ត្រាលី ទ្វីបអាស៊ី និងទីតាំងចែកចាយប្រចាំនៅប្រទេសចិនដែរ ប៉ុន្តែពុំមានការឆ្លើយតបទេរហូតមកដល់ល្ងាចថ្ងៃអង្គារម្សិលមិញ។
លោក សុវិជាតិ បានពន្យល់ថា ការលើកស្លាកនេះអាចជាអ្នកទទួលសិទ្ធិផ្តាច់មុខក្នុងការចែកចាយលក់នៅកម្ពុជា (Exclusive distributor/dealership) ដែលទទួលសិទ្ធិបន្តពីតំណាង TELSA ក្នុងតំបន់ ឬទទួលសិទ្ធិផ្ទាល់ពីម្ចាស់ដើម ដូចករណីតំណាងចែកចាយរថយន្តម៉ាកផ្សេងទៀតដូចជា MAZDA, Volvo, Mitshubishi ជាដើម ឬគ្រាន់តែជាអ្នកនាំចូលរថយន្តម៉ាកនេះមកលក់ធម្មតា ហើយលើកស្លាកក្នុងបំណងផ្សព្វផ្សាយពាណិជ្ជកម្មលើទីផ្សារ។ ក្រសួងនឹងតាមដានបន្តទៀតចំពោះករណីនេះ។
លោកប្រាប់ថា៖ «ជារួមក្រសួងពាណិជ្ជកម្មស្វាគមន៍នូវរាល់ការរីកចម្រើនសម្បូរបែបនៃមុខទំនិញម៉ាកល្បីៗដែលចូលមកក្នុងទីផ្សារកម្ពុជា ដែលនេះជាសញ្ញាមួយនៃទំនុកចិត្តរបស់ធុរជន និងអាជីវកម្មធំៗដែលផ្តល់ការជឿជាក់មកលើបរិយាកាសធុរកិច្ចប្រកបដោយតម្លាភាព និងស្ថិរភាពរបស់កម្ពុជា ហើយក៏ជាភ័ស្តុតាងបង្ហាញថាទីផ្សារកម្ពុជាមានកម្លាំងទិញគ្រប់គ្រាន់ដែលអាចស្រូបទាញម៉ាកល្បីទាំងនេះឱ្យចូលមក»។
បើយោងតាមរបាយការណ៍ក្រុមហ៊ុនផលិតរថយន្តអគ្គិសនីយក្សអាមេរិកមួយនេះ កាលពីត្រីមាសទី១ ឆ្នាំ ២០២១ ខ្លួនផលិតរថយន្តបានជាង ១៨០ ០០០ គ្រឿង និងបានចែកចាយលក់ប្រមាណជា ១៨៥ ០០០ គ្រឿង ទៅបណ្តាប្រទេសនានានៅលើពិភពលោក៕ LA
វីដេអូ៖
