![](https://pppkhmer.sgp1.digitaloceanspaces.com/image/main/field/image/rui_li_cambodia_bank.jpg)
លោក ជា ចាន់តូ ទេសាភិបាលធនាគារជាតិនៃកម្ពុជា ថ្លែងក្នុងពិធីបើកសម្ពោធជាផ្លូវការ ធនាគារ រួយ លី (ខេមបូឌា) ម.ក។ រូបថត ហ្វេសប៊ុក
ភ្នំពេញ: ធនាគារពាណិជ្ជ Rui Li (Cambodia) Bank PLC ដែលគ្រប់គ្រងដោយវិនិយោគិនចិនបានធ្វើពិធីបើកសម្ពោធប្រតិបត្តិការជាផ្លូវការរបស់ខ្លួនហើយនៅក្នុងទីក្រុងភ្នំពេញកាលពីថ្ងៃទី ៧ ខែវិច្ឆិកា កន្លងមក។
ធនាគារ Rui Li ត្រូវបានសម្ពោធឱ្យដំណើរការជាផ្លូវការក្រោមអធិបតីភាព លោក ជា ចាន់តូ ទេសាភិបាលធនាគារជាតិនៃកម្ពុជាជាមួយលោក Dong Le Cheng ស្ថាបនិកក្រុមហ៊ុន Yunnan Jingcheng Group។
លោក Dong Le Cheng បានឱ្យដឹងថា ក្រោមទស្សនវិស័យភ្លឺស្វាងរវាងប្រទេសចិន និងកម្ពុជា ដែលកំពុងបន្តជំរុញផែនការសហប្រតិបត្តិការលើគម្រោងផ្លូវមួយ ខ្សែក្រវាត់មួយក្រុមហ៊ុនលោកបានសម្រេចវិនិយោគបង្កើតធនាគារនេះឡើងដើម្បីពង្រីកវិសាលភាពអភិវឌ្ឍសក្តានុពលរបស់ខ្លួនក្នុងប្រទេសកម្ពុជាចាប់តាំងពីខែតុលា ឆ្នាំ ២០១៨ មក។ ក្រុមហ៊ុនបានទទួលអាជ្ញាប័ណ្ណប្រតិបត្តិការធនាគារពីធនាគារជាតិនៃកម្ពុជាកាលពីថ្ងៃទី ២០ ខែតុលា ឆ្នាំ ២០២០។
លោកថ្លែងថា៖ «ធនាគារនឹងផ្តល់សេវាជាច្រើនដូចជា ការទទួលប្រាក់បញ្ញើជាសាធារណៈ សេវាឥណទាន សេវាប្តូររូបិយប័ណ្ណ សេវាទូទាត់ និងប្រតិបត្តិការរូបិយប័ណ្ណក្នុងស្រុក និងបរទេសជាដើម។ យើងមានក្រុមការងារប្រកបដោយវិជ្ជាជីវៈ។ ធនាគារនឹងផ្តល់ជូនសហគ្រាស និងបុគ្គលគ្រប់រូបនូវសេវាកម្មហិរញ្ញវត្ថុដែលមានគុណភាពល្អ ប្រសិទ្ធភាពខ្ពស់ និងទូលំទូលាយ»។
លោកបន្ថែមថា ធនាគារនឹងប្រកាន់ខ្ជាប់នូវទស្សនៈអាជីវកម្ម «គុណភាព និរន្តរភាព និងបច្ចេកវិទ្យា» ដែលបានកំណត់យកប្រតិបត្តិការដោយស្ថិរភាព ការអភិវឌ្ឍបែបវិទ្យាសាស្ត្រ និងការគ្រប់គ្រងកម្រិតស្តង់ដា។ ធនាគារក៏បានប្រើប្រាស់ទម្រង់គ្រប់គ្រងបែបជឿនលឿនក្នុងឧស្សាហកម្មហិរញ្ញវត្ថុឱ្យសមស្របជាមួយតម្រូវការទីផ្សារនៅកម្ពុជា ដោយនាំយកអាជីវកម្មបែបប្រពៃណីបូកបញ្ចូលជាមួយនឹងបច្ចេកវិទ្យាអ៊ីនធឺណិត ដើម្បីទទួលបានការអភិវឌ្ឍសេវាកម្មប្រកបដោយច្នៃប្រឌិត។
លោកបញ្ជាក់ថា៖ «ធនាគារនឹងផ្តល់ជូនអតិថិជននូវសេវាកម្មហិរញ្ញវត្ថុដ៏សម្បូរបែប ងាយស្រួល និងក្បែរខ្លួនជានិច្ច ព្រមទាំងខិតខំអភិវឌ្ឍទៅជាធនាគារពាណិជ្ជប្រកបដោយបច្ចេកវិទ្យាឆ្លាតវៃមួយក្នុងប្រទេសកម្ពុជា។ យើងក៏គ្រោងនឹងបើកសាខាបន្ថែមទៀតនៅទីក្រុងភ្នំពេញ និងខេត្តព្រះសីហនុនាឆ្នាំក្រោយផងដែរ»។
បច្ចុប្បន្នធនាគារនេះបានប្រើប្រាស់ប្រព័ន្ធគ្រប់គ្រង (Core System) ដែលមានភាពជឿនលឿនរបស់ប្រទេសចិន ដើម្បីផ្ដល់នូវភាពងាយស្រួល និងធានាសុវត្ថិភាពប្រតិបត្តិការជូនអតិថិជនរបស់ខ្លួន។
ទីស្នាក់ការកណ្តាលរបស់ធនាគារនេះស្ថិតនៅផ្ទះលេខ ២៩៦ មហាវិថីសហព័ន្ធរុស្ស៊ី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
ទេសាភិបាលធនាគារជាតិនៃកម្ពុជាលោក ជា ចាន់តូ បានឱ្យដឹងថា ក្នុងរយៈពេល ២ ទសវត្សរ៍ចុងក្រោយនេះទុនបម្រុងអន្តរជាតិដុលរបស់កម្ពុជា ត្រូវបានគរពូនឱ្យមានកម្រិតខ្ពស់ជាលំដាប់រហូតដល់ ២០ ពាន់លានដុល្លារស្មើនឹងប្រមាណ ១០ ខែនៃការនាំចូលទំនិញ និងសេវាដែលខ្ពស់ជាង ៣ ដងនៃកម្រិតអប្បបរមាដែលប្រទេសកំពុងអភិវឌ្ឍន៍គួរមាន (៣ ខែ)។
លោកបន្តថា ទ្រព្យសកម្មវិស័យធនាគារបានកើនយ៉ាងឆាប់រហ័សពីប្រមាណត្រឹម ០,៥ ពាន់លានដុល្លារក្នុងឆ្នាំ ១៩៩៨ ដល់ ៥៦ ពាន់លានដុល្លារនាពេលបច្ចុប្បន្ន គឺកើនឡើងប្រមាណ ១១២ ដង។ ឥណទានប្រព័ន្ធធនាគារដែលត្រូវបានបែងចែកទៅកាន់គ្រប់វិស័យនៃសេដ្ឋកិច្ច និងប្រាក់បញ្ញើក្នុងស្រុកបានកើនឡើង ១៦៥ ដង ប្រហាក់ប្រហែលគ្នាគឺពីចំនួនប្រមាណ ០,២ ពាន់លានដុល្លារដល់ជាង ៣៣ ពាន់លានដុល្លារ។
គិតត្រឹមចុងឆ្នាំ ២០១៩ ប្រទេសកម្ពុជា មានធនាគារពាណិជ្ជ ៤៦ ធនាគារឯកទេស ១៥ និងគ្រឹះស្ថានមីក្រូហិរញ្ញវត្ថុ ៨២ ប្រតិបត្តិករឥណទានជនបទ ២៤៨ ក្រុមហ៊ុនភតិសន្យា ១៥ និងក្រុមហ៊ុនផ្ដល់សេវាទូទាត់ ២។ នេះបើតាម NBC៕ LA