អណ្តូងប្រេងអប្សរានៅប្លុក A បានបូមប្រេងឆៅជាង ៤ ម៉ឺនបារ៉ែល ក្នុងរយៈពេល ៣៣ ថ្ងៃ។ រូបថត ក្រសួងរ៉ែ និងថាមពល
ភ្នំពេញៈ លោកនាយករដ្ឋមន្ត្រី ហ៊ុន សែន បានអះអាងថា អណ្តូងប្រេងអប្សរានៅប្លុក A ក្នុងបាសាំងខ្មែរ វិនិយោគដោយក្រុមហ៊ុនរុករកប្រេង និងឧស្ម័ន KrisEnergy Ltd របស់សិង្ហបុរីបូមប្រេងឆៅបានជាង ៤ ម៉ឺនបារ៉ែលហើយមកដល់ពេលនេះ (ថ្ងៃចន្ទ)។
លោក ហ៊ុន សែន បានថ្លែងនៅក្នុងកម្មវិធីសម្ពោធរោងចក្រប្រព្រឹត្តិកម្មទឹកស្អាតចំការមន និងបើកការដ្ឋានសាងសង់រោងចក្រប្រព្រឹត្តិកម្មទឹកស្អាតបាក់ខែងកាលពីថ្ងៃទី ១ ខែកុម្ភៈ ថា អណ្តូងប្រេងទី១ នៅក្នុងតំបន់ប្រេងអប្សរាបូមប្រេងឆៅបានចំនួន ៤០ ៧៨៨ បារ៉ែល គិតចាប់ពីដាក់ឱ្យដំណើរការកាលពីថ្ងៃទី ២៨ ខែធ្នូ ឆ្នាំ ២០២០។
លោកបានថ្លែងថា៖ «ខ្ញុំសូមបញ្ជាក់ជូនជនរួមជាតិរបស់យើងថា អណ្តូងទី១ របស់យើងបានដំណើរការរយៈពេល ៣៣ ថ្ងៃមកហើយ ដែលផលិតបាន ១ ២៣៦ បារ៉ែល ក្នុង ១ ថ្ងៃ។ ក្នុងរយៈពេល ៣៣ ថ្ងៃ បាន ៤០ ៧៨៨ បារ៉ែល»។
លោក ហ៊ុន សែន បានបន្ថែមទៀតថា អណ្តូងប្រេងទី២ ទើបបានដាក់ឱ្យដំណើរការខួងកាលពីថ្ងៃទី ៣០ ខែ មករា ឆ្នាំ ២០២១ ដើម្បីញែករវាងប្រេង និងល្បាប់ភក់។ លោកប្រាប់ថា៖ «យើងនឹងបន្តដំណើរការបូមប្រេងអណ្តូងជាបន្តបន្ទាប់ទៀតនៅឆ្នាំ ២០២១ នេះ»។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលបានប្រាប់ ភ្នំពេញ ប៉ុស្ដិ៍ថា ក្រុមហ៊ុន KrisEnergy កំពុងដំណើរការខួងអណ្តូងប្រេង ៤ ទៀតនៅក្នុងចំណោមអណ្ដូងប្រេង ៥ ក្នុងអណ្តូងប្រេង A-01D នៃផ្លាតហ្វ៉ម។ ប្រសិនបើអណ្តូងទាំង ៥ នេះដាក់ឱ្យដំណើរការ ក្រុមហ៊ុនអាចផលិតប្រេងបាន ៧ ៥០០ បារ៉ែល ក្នុង ១ ថ្ងៃ។
លោកថ្លែងថា៖ «តាមផែនការរបស់ក្រុមហ៊ុននឹងអាចដាក់ឱ្យដំណើរការអណ្តូងថែម ១ ទៀតនៅចុងខែកុម្ភៈនៃផ្លាតហ្វ៉មនេះ ហើយក្រុមហ៊ុននឹងដំណើរការជាបន្តបន្ទាប់ទៀត»។
លោកនាយករដ្ឋមន្ត្រីឱ្យដឹងទៀតថា តាមការព្យាកររបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល កម្ពុជានឹងទទួលបានចំណូលពីឧស្សាហកម្មប្រេងប្រមាណ ៣០ លានដុល្លារ ក្នុង ១ ឆ្នាំ ប្រសិនបើតម្លៃប្រេងអន្តរជាតិស្ថិតក្នុងតម្លៃ ៥៥ ដុល្លារ ក្នុង ១ បារ៉ែលដូចសព្វថ្ងៃនេះ។
លោកបន្ថែមទៀតថា៖ «តាមការប៉ាន់ប្រមាណយើងនឹងទទួលបានប្រមាណចន្លោះពី ៧ ០០០ ទៅ ៧ ៥០០ បារ៉ែល ក្នុង ១ ថ្ងៃ គឺជាទំហំតូចណាស់ ដែលវាមិនទាន់ជះឥទ្ធិពលទៅលើផ្នែកសេដ្ឋកិច្ចយើងបានទេ ប៉ុន្តែវាជាការចាប់ផ្តើមដ៏ល្អនៃដំណើរការក្នុងឧស្សាហកម្មប្រេង និងឧស្ម័ននៅកម្ពុជា»។
ជាមួយគ្នានេះលោកនាយករដ្ឋមន្ត្រីក៏បានអះអាងថា កម្ពុជាកំពុងជំរុញចរចាជាមួយភាគីថៃពីគម្រោងអភិវឌ្ឍន៍ប្រេង និងឧស្ម័ននៅតំបន់អះអាងត្រួតស៊ីគ្នាក្នុងឈូងសមុទ្រថៃជាប់ព្រំដែនទឹករវាងប្រទេសទាំង ២។
លោកថ្លែងថា៖ «យើងត្រូវខិតខំធ្វើការចរចាជាមួយថៃ យើងនឹងជំរុញការចរចាជាមួយថៃដើម្បីឈានដល់ទៅធ្វើអាជីវកម្មនៅតំបន់ត្រួតស៊ីគ្នានេះ»។
សិទ្ធិអភិវឌ្ឍន៍នៅលើតំបន់អះអាងត្រួតស៊ីគ្នាមានទំហំ ២៦ ០០០ គីឡូម៉ែត្រការ៉េរវាងប្រទេសកម្ពុជា និងថៃ ក្នុងឈូងសមុទ្រថៃដែលភាគីទាំង ២ បានទាមទាររៀងៗខ្លួនតាំងពីដើមទសវត្សរ៍ឆ្នាំ ១៩៧០។
តំបន់អះអាងត្រួតស៊ីគ្នានេះត្រូវបានគេប៉ាន់ប្រមាណថា មានប្រេង និងឧស្ម័ន ៥០០ លានបារ៉ែល នៅក្រោមបាតសមុទ្រ៕ LA
វីដេអូ៖
