សកម្មភាពបុក និងលីងស្រូវធ្វើអំបុកនៅខេត្តកំពង់ធំ។ ហ៊ឹន ពិសី
ភ្នំពេញៈ អំបុកកំពង់ធំ ដែលទើបក្រសួងពាណិជ្ជកម្មផ្តល់ឱ្យជាផ្លូវការ «ម៉ាកសមូហភាព» ត្រូវបានគេរំពឹងថា នឹងចូលរួមចំណែកថែរក្សាអភិរក្សវិធីសាស្ត្រប្រពៃណីនៃការផលិត ការទាក់ទាញភ្ញៀវទេសចរ និងការលើកកម្ពស់សេដ្ឋកិច្ចប្រជាជនក្នុងតំបន់ឱ្យកាន់តែប្រសើរ។
អំបុកកំពង់ធំ ដែលទើបបានទទួល «ម៉ាកសមូហភាព» នេះស្ថិតនៅឃុំសាន់គរ ស្រុកកំពង់ស្វាយ ខេត្តកំពង់ធំ។
ក្នុងមហាសន្និបាតរបស់ក្រុមអ្នកផលិតអំបុកកំពង់ធំ ដែលរៀបចំឡើងកាលពីថ្ងៃទី ១៦ ខែកុម្ភៈ លោក អ៊ុក ប្រជា រដ្ឋលេខាធិការក្រសួងពាណិជ្ជកម្មបានឱ្យដឹងថា ការផ្តល់ «ម៉ាកសមូហភាព» ដល់អំបុកកំពង់ធំ គឺធ្វើឡើងក្នុងគោលបំណងដើម្បីថែរក្សាកេរដំណែលវប្បធម៌របស់ដូនតាខ្មែរ ក៏ដូចជាបង្កើននូវភាពទាក់ទាញភ្ញៀវទេសចរ និងបង្កើតការងារថ្មីៗសម្រាប់ប្រជាជនក្នុងតំបន់តែម្តង។
លោកបន្តថា តាមរយៈម៉ាកសមូហភាព គេក៏អាចប្រមូលផ្តុំនូវផលិតករដែលមានជំនាញ និងទេពកោសល្យក្នុងការផលិតអំបុក ដើម្បីធ្វើការបណ្តុះបណ្តាលបន្ត និងលើកកម្ពស់ចំណេះដឹង ភាពច្នៃប្រឌិត និងវិធីសាស្ត្រថ្មីៗដល់អ្នកជំនាន់ក្រោយផងដែរ។
លោកថ្លែងថា៖ «ខ្ញុំសូមលើកទឹកចិត្តឱ្យក្រុមអ្នកផលិតអំបុកកំពង់ធំ និងអាជ្ញាធរពាក់ព័ន្ធត្រូវប្រឹងប្រែងសហការអនុវត្តគម្រោងនេះដើម្បីឱ្យគម្រោងនេះឈានដល់ទីបញ្ចប់ប្រកបដោយជោគជ័យក្នុងការអភិវឌ្ឍភូមិមួយ ផលិតផលមួយដែលជាប្រយោជន៍ដល់ការអភិវឌ្ឍជនបទ កាត់បន្ថយភាពក្រីក្រ និងចំណាកស្រុក ដែលនឹងរួមចំណែកដល់ការអភិវឌ្ឍសេដ្ឋកិច្ចជាតិឱ្យបានកាន់តែប្រសើរឡើងថែមមួយកម្រិតទៀត»។
លោក សួន វិជ្ជា ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្មបានប្រាប់ ភ្នំពេញ -ប៉ុស្តិ៍ កាលពីថ្ងៃទី ១៨ ខែកុម្ភៈថា «ម៉ាកសមូហភាព» គឺជាសញ្ញាដែលអាចសម្គាល់នូវប្រភពដើមទំនិញ ឬសេវា ឬសម្គាល់ចរិតលក្ខណៈរួមទាំងគុណភាពទំនិញ ឬសេវារបស់សហគ្រាសផ្សេងៗគ្នាដែលប្រើសញ្ញានោះក្រោមការគ្រប់គ្រងរបស់ម្ចាស់ម៉ាកសមូហភាពដែលបានចុះបញ្ជី។
លោកនិយាយថា៖ «ការទទួលបាននូវម៉ាកសមូហភាពរបស់អំបុកកំពង់ធំ នឹងធ្វើឱ្យក្រុមអ្នកផលិតក្នុងទីនោះទទួលបានអត្ថប្រយោជន៍យ៉ាងច្រើន ពិសេសកំណើនសេដ្ឋកិច្ច»។
អ្នកនាំពាក្យរដ្ឋបាលខេត្តកំពង់ធំ លោក យ៉ូវ សេងគុណ បានប្រាប់ថា នេះជាលើកទី១ ដែលខេត្តកំពង់ធំទទួលបានការចុះបញ្ជីម៉ាកសមូហភាព។ ការទទួលបានម៉ាកសមូហភាពនឹងជំរុញឱ្យអ្នកផលិតក្នុងតំបន់បង្កើនការខិតខំបង្កើនសមត្ថភាពផលិត និងគុណភាព ដើម្បីឆ្លើយតបនឹងតម្រូវការ និងកេរ្តិ៍ឈ្មោះផលិតផល។
លោកបន្ថែមថា៖ «ការទទួលបានម៉ាកសមូហភាពរបស់អំបុកកំពង់ធំ នឹងធ្វើឱ្យទីផ្សារនេះកាន់តែរីកធំ ដែលនឹងជួយឱ្យក្រុមអ្នកផលិតមានប្រាក់ចំណូលកាន់តែច្រើន»។
យោងតាមលោក សេងគុណ បន្ទាប់ពីអំបុកកំពង់ធំទទួលបានម៉ាកសមូហភាព បច្ចុប្បន្នអាជ្ញាធរក៏ចាប់អារម្មណ៍ពីសក្តានុពលរបស់ស្វាយចន្ទី ដែលអាចនឹងពិចារណាពីការស្នើសុំចុះបញ្ជីម៉ាកសមូហភាពផងដែរ៕LA
