ត្រឹមរយៈពេល ៤ ខែដើមឆ្នាំនេះ កម្ពុជានាំចេញអង្ករសប្រមាណ ១៩២ ៤៩៥ តោន ទៅក្រៅប្រទេស។ រូបថត ភ្នំពេញ ប៉ុស្តិ៍
ភ្នំពេញៈ សហព័ន្ធស្រូវអង្ករកម្ពុជា (CRF) កាលពីសប្តាហ៍មុនបានជួបពិភាក្សាតាមប្រព័ន្ធអនឡាញជាមួយសហគ្រិនខ្មែរ (Khmer Enterprise) ក្នុងបំណងដើម្បីស្វែងយល់ពីលទ្ធភាពសហការគ្នាជួយធ្វើទីផ្សារ និងការផ្សព្វផ្សាយ (Marketing and Branding) ពីអង្ករកម្ពុជាឱ្យកាន់តែទូលំទូលាយសម្រាប់ទីផ្សារនាំចេញ។
លោកស្រី គឹម ស្រីរ័ត្ន អនុប្រធានសហព័ន្ធស្រូវអង្ករកម្ពុជា និងជាប្រធានគណៈកម្មការប្រតិបត្តិផ្នែកទីផ្សារ និងជំរុញការនាំចេញ បាននិយាយថា ការផ្សព្វផ្សាយ និងធ្វើទីផ្សារមានសារៈសំខាន់ណាស់ក្នុងការធ្វើឱ្យកេរ្តិ៍ឈ្មោះ និងគុណភាពអង្ករកម្ពុជាត្រូវបានគេទទួលស្គាល់កាន់តែច្រើន។ ទោះជាជំនួបលើកដំបូង ប៉ុន្តែវាជាភាពវិជ្ជមានមួយសម្រាប់វិស័យស្រូវអង្ករកម្ពុជា ដែលត្រូវបានសហគ្រិនខ្មែរចាប់អារម្មណ៍ក្នុងការងារទីផ្សារ និងផ្សព្វផ្សាយសម្រាប់ទីផ្សារនាំចេញអង្ករកម្ពុជា។
លោកស្រីអះអាងថា៖ «ជាការងារបន្តទៅមុខជាមួយគ្នាទៀត សហព័ន្ធស្រូវអង្ករកម្ពុជានឹងធ្វើជាសំណើទៅកាន់សហគ្រិនខ្មែរលើការងារជាក់លាក់ផ្នែកទីផ្សារ និងផ្សព្វផ្សាយដោយផ្តោតលើគោលបំណងសំខាន់គឺពង្រីកទីផ្សារនាំចេញ ដើម្បីបង្កើននូវកេរ្តិ៍ឈ្មោះផលិតផលខ្មែរទាំងក្នុងប្រទេស និងក្រៅប្រទេស»។
សហគ្រិនខ្មែរ ជាកម្មវិធីមួយរបស់ក្រសួងសេដ្ឋកិច្ច និងហិរញ្ញវត្ថុសម្រាប់ជួយដល់សហគ្រាសក្នុងស្រុកក្នុងការលើកកម្ពស់ប្រសិទ្ធភាព និងប្រសិទ្ធផលសេដ្ឋកិច្ច និងពាណិជ្ជកម្ម។
លោក គង់ សុភីវឌ្ឍនៈ ប្រធានផ្នែកទីផ្សារ និងការវិនិយោគនៃសហគ្រិនខ្មែរ បាននិយាយថា កិច្ចពិភាក្សានេះធ្វើឡើងដើម្បីស្វែងយល់អំពីលទ្ធភាពក្នុងការសហការគ្នាលើការពង្រីកទីផ្សារនាំចេញអង្ករកម្ពុជា ដោយផ្តោតលើការងារទីផ្សារ និងការងារផ្សព្វផ្សាយលើឆាកអន្តរជាតិ តាមរយៈការផ្តល់នូវប្រសិទ្ធភាពខ្ពស់ក្នុងការបញ្ជ្រាបអំពីកិត្តិនាមអង្ករកម្ពុជាប្រកបដោយគុណភាព។
លោកបន្ថែមថា សហគ្រិនខ្មែរកំពុងចាប់អារម្មណ៍ខ្ពស់លើទីផ្សារស្រូវអង្ករកម្ពុជា ពិសេសលើការធ្វើម៉ាកសញ្ញាអង្ករ ដែលសហព័ន្ធបានធ្វើកន្លងមក «ម៉ាកម្លិះអង្គរ»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាប្រាប់ ភ្នំពេញ ប៉ុស្តិ៍ថា ជំនួបពិភាក្សាកាលពីសប្តាហ៍មុន គ្រាន់តែជាការបើកផ្លូវសម្រាប់កិច្ចប្រជុំនៅពេលខាងមុខតែប៉ុណ្ណោះ ដោយមិនទាន់មានការសម្រេចបែបណានៅឡើយទេ៕ LA
