មេទ័ពអារ៉ាប៊ី សាអ៊ូឌីត លោកឧត្តមសេនីយ៍ត្រី Ahmed Asiri និង រូបតំណាងយន្តហោះចម្បាំង Tornado ។ AFP
ក្រុងរីយ៉ាដ: ក្រុមចម្រុះនិងសារព័ត៌មានរដ្ឋបានរាយការណ៍ឲ្យដឹងថាយន្តហោះចម្បាំងអារ៉ាប៊ីសាអ៊ូឌីតមួយគ្រឿងពីក្រុមចម្រុះ ដែលកំពុងធ្វើការប្រយុទ្ធប្រឆាំងក្រុមឧទ្ទាមនៅយេម៉ែនបានធ្លាក់កាលពីថ្ងៃអាទិត្យដោយសារបញ្ហានៃ«កំហុសឆ្គងផ្នែកបច្ចេកទេស»ដោយបានបន្ថែមទៀតថាយានិកទាំងពីររូបត្រូវបានជួយសង្គ្រោះទាន់ពេល។
លោក Turki al-Maliki អ្នកនាំពាក្យ ក្រុមចម្រុះ អារ៉ាប៊ី សាអ៊ូឌីត បានថ្លែងប្រាប់ AFP ថា យន្តហោះនោះមានបញ្ហាផ្នែកបច្ចេកទេសនៅវេលាម៉ោង ១០ និង ៤០ នាទីល្ងាចនិងបានធ្លាក់... នៅក្នុងតំបន់ដែលកំពុងប្រតិបត្តិការនៅយេម៉ែន។
លោកបានថ្លែងថា សមាជិកអ្នករួមប្រតិបត្តិការលើយន្តហោះពីរនាក់ត្រូវបានជួយសង្គ្រោះដោយមិនមានគ្រោះថ្នាក់និងបានវិលត្រឡប់ទៅអារ៉ាប៊ីសាអ៊ូឌីតវិញដោយសុវត្ថិភាព។
លោក Maliki មិនបានផ្តល់ព័ត៌មានលំអិតបន្ថែមទៀតឡើយ។
សេចក្តីថ្លែងការណ៍ពីក្រុមចម្រុះមួយដែលត្រូវបានផ្សព្វផ្សាយនាពេលក្រោយទៀតដោយទីភ្នាក់ងារសារព័ត៌មានអារ៉ាប៊ីសាអ៊ូឌីតផ្លូវការបានឲ្យដឹងថាយន្តហោះចម្បាំងដែលបានធ្លាក់នោះគឺជាយន្តហោះរបស់អារ៉ាប៊ីសាអ៊ូឌីតហើយដែលកិច្ចប្រតិបត្តិការជួយសង្គ្រោះក្រុមយានិកទាំងនោះត្រូវការកម្លាំងកងទ័ពជើងគោក។
យោងតាមប្រភពព័ត៌មានពី ប៉ុស្ត៍ ទូរទស្សន៍ Al-Masirah បានឲ្យដឹងថា ក្រុមឧទ្ទាម ហ៊ូធី គាំទ្រដោយ អុីរ៉ង់ ដែលបានជាប់នៅក្នុងសង្គ្រាមជាមួយរដ្ឋាភិបាលយេម៉ែនដែលគាំទ្រដោយ អារ៉ាប៊ី សាអ៊ូឌីត បានឲ្យដឹងថាពួកគេបានបាញ់ទំលាក់យន្តហោះ នោះខណៈកំពុងហោះហើរលើដែនអាកាសទីក្រុងសាដា (Saada) ដែលជាតំបន់ឈរជើងដ៏រឹងមាំនៅយេម៉ែនភាគខាងជើង។
ក្រុមចម្រុះដឹកនាំដោយអារ៉ាប៊ីសាអ៊ូឌីតបានចូលរួមជាមួយកងទ័ពរដ្ឋាភិបាលយេម៉ែននៅក្នុងប្រតិបត្តិការប្រយុទ្ធប្រឆាំងក្រុមឧទ្ទាមហ៊ូធីនៅក្នុងខែមីនាឆ្នាំ២០១៥បន្ទាប់ពីក្រុមឧទ្ទាមបានច្បាំងដណ្តើមត្រួតត្រាលើរដ្ឋធានីសាណា។
យោងតាមប្រភពព័ត៌មានពីអង្គការសុខភាពពិភពលោក (WHO) បានឲ្យដឹងថា ពលរដ្ឋជាង ៨៧៥០ នាក់ត្រូវបានសម្លាប់ចាប់តាំងពីក្រុមចម្រុះបានចូលអន្តរាគមន៍នៅ យេម៉ែន៕ AFP/ ប្រែសម្រួលដោយ សុឹម សានិត
