អ្នកតវ៉ាជាប់ឃុំឃាំងអមការពារដោយប៉ូលិសឈរនៅមុខតុលាការនៅក្នុងខេត្ត Binh Tuan នៃប្រទេសវៀតណាមភាគខាងត្បូងកាលពីថ្ងៃទី ២៣ កក្កដា។ AFP
ក្រុងហាណូយៈ មនុស្ស ១០ នាក់ ត្រូវតុលាការកាត់ទោសជាប់ពន្ធនាគារនៅក្នុងប្រទេសវៀតណាមកាលពីថ្ងៃចន្ទពីបទចូលរួមការតវ៉ា ដែលត្រូវបានគេដឹងឮទូទាំងប្រទេសកុម្មុយនីស្តនេះ កាលពីខែមុនក្រោយពីសេចក្តីព្រាងច្បាប់វិនិយោគមួយបង្កឲ្យផ្ទុះកំហឹងទូទៅ។
ការជួបជុំដ៏កម្រជាច្រើននៅក្នុងប្រទេសឯកបក្ស ជាទីដែលការតវ៉ាអហិង្សាត្រូវបានចាត់ទុកថា ខុសច្បាប់ បានទាក់ទាញមនុស្សរាប់ពាន់នាក់ ឲ្យឡើងទៅតាមដងផ្លូវ នៅក្នុងនោះ មានខេត្ត Binh Thuan ភាគខាងត្បូង ជាទីដែលការតវ៉ាជាច្រើនមិនអាចគ្រប់គ្រងបាន។
នៅក្នុងតំបន់ខ្លះនៃខេត្តនេះ ក្រុមអ្នកតវ៉ាបានធ្វើការវាយប្រហារទៅលើប៉ូលិស ដុតរថយន្តល្បាតជាច្រើនគ្រឿង និងបំផ្លាញទ្រព្យជាច្រើន នៅក្នុងការជួបជុំតវ៉ាប្រឆាំងនឹងច្បាប់ ដែលត្រូវបានស្នើឡើង ដែលនឹងផ្តល់ឲ្យក្រុមវិនិយោគិន នូវការជួលដីរយៈពេលយូរនៅក្នុងតំបន់សេដ្ឋកិច្ចពិសេស។
មនុស្ស ១០ នាក់នោះ កាលពីថ្ងៃចន្ទ ត្រូវបានផ្តន្ទាទោសនៅក្នុងខេត្ត Binh Thuan ពីបទចូលរួមក្នុងការតវ៉ាដោយហិង្សា និងត្រូវបានកាត់ទោសឲ្យជាប់ពន្ធនាគារ ចន្លោះពី ២ ឆ្នាំទៅ ៣ ឆ្នាំកន្លះ នៅក្នុងការជម្រះក្តី នៅតុលាការរយៈពេល ១ ថ្ងៃ ដែលក្រុមជនសង្ស័យ ត្រូវបានអមការពារដោយប៉ូលិស។
អង្គការសំឡេងវៀតណាម Voice of Vietnam បាននិយាយនៅលើគេហទំព័ររបស់ខ្លួនថា ពួកគេទាំង ១០ នាក់នោះ ត្រូវបានរកឃើញថា មានទោសពីបទធ្វើការវាយប្រហារប្រឆាំងនឹងប៉ូលិសនៅក្នុងអំឡុងពេលតវ៉ា ដោយបានបង្កឲ្យមន្ត្រីខ្លះរងរបួស ធ្វើឲ្យខូចខាតរថយន្តរដ្ឋាភិបាល ២ គ្រឿងនិងបណ្តាលឲ្យមានកកស្ទះចរាចរណ៍រយៈពេល ១៥ ម៉ោងនៅលើផ្លូវហាយវេមួយ។
អ្នកផ្សេងជាច្រើននាក់ទៀត ក៏ត្រូវបានផ្តន្ទាទោសពីបទចូលរួមការជួបជុំនៅទូទាំងប្រទេស ក្នុងនោះ មាននិស្សិតអាមេរិកម្នាក់ឈ្មោះ William Nguyen ដែលត្រូវបានរកឃើញថា មានទោសពីបទបង្កការរំខានដល់សាធារណៈ កាលពីសប្តាហ៍មុន និងត្រូវបានបញ្ជូនចេញពីប្រទេសនេះ ក្រោយពីជាប់ពន្ធនាគារអស់រយៈពេលជាង ១ ខែ៕
