រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន និង លោក Jacques Pellet ឯកអគ្គរដ្ឋទូតនៃសាធារណៈបារាំងប្រចាំកម្ពុជា បើកសិក្ខាសាលាស្ដីពី ការអនុវត្ដគម្រោងអភិវឌ្ឍយុវជន ដំណាក់កាលទី ១ និងប្រកាសបន្ដគម្រោងដំណាក់ទី ២ និងការសម្ពោធឯកសារសិក្សាសិល្បៈ និងវប្បធម៌ «ទេពហត្ថា»។ រូបថត ហុង រស្មី
ភ្នំពេញ៖ ការសម្ពោធសៀវភៅ «ទេព ហត្ថា» ឬ «The Perfect Motion» ជាប្រភេទមគ្គុទ្ទេសក៍អប់រំជាភាសាខ្មែរ រួមជាមួយនឹងការអនុវត្ដគម្រោងអភិវឌ្ឍយុវជន ដំណាក់កាលទី ១ និងប្រកាសបន្ដគម្រោងដំណាក់ទី ២ បានកត់សម្គាល់ពេលវេលាដ៏សំខាន់មួយនៅក្នុងទិដ្ឋភាពនៃការអប់រំនៅកម្ពុជា កាលពីថ្ងៃទី ៥ ខែវិច្ឆិកា នៅសណ្ឋាគារសូហ្វីតែលភ្នំពេញភូគីត្រា។
គំនិតផ្តួចផ្តើមទាំងនេះមានគោលបំណងផ្តល់អំណាចដល់យុវជនកម្ពុជាតាមរយៈការបណ្តុះបណ្តាលវិជ្ជាជីវៈ គុណតម្លៃវប្បធម៌ ទៅដល់សិស្សានុសិស្សនៅទូទាំងខេត្តជាច្រើន។
សៀវភៅមគ្គុទ្ទេសក៍នេះភ្ជាប់មកជាមួយនូវភាពយន្តឯកសារដែលទទួលបានការកោតសរសើរយ៉ាងខ្លាំងដោយអ្នកដឹកនាំជនជាតិបារាំង លោក ហ្សាវីយេ ដឺឡូហ្សាន ដែលរៀបរាប់អំពីដំណើរ និងសារៈសំខាន់នៃវប្បធម៌នៃរបាំព្រះរាជទ្រព្យកម្ពុជា។
ដើមឡើយផលិតជាភាសាបារាំងដោយ Lycée français René Descartes សៀវភៅមគ្គុទ្ទេសក៍នេះត្រូវបានកែសម្រួលដោយអង្គការ ស៊ីប៉ា ដើម្បីគាំទ្រដល់សាលាកម្ពុជាក្នុងការបង្រៀនសិស្សអំពីបេតិកភណ្ឌសិល្បៈរបស់ប្រទេស។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន លោកបានអរគុណដល់ផលិតករភាពយន្ដឯកសារទេពហត្ថា លោក ហ្សាវីយេ ដឺឡូហ្សាន ក្នុងគោលដៅផ្សព្វផ្សាយវប្បធម៌កម្ពុជា និងរៀបចំជាឯកសារសម្រាប់ការសិក្សាស្រាវជ្រាវ និងបណ្ដុះបណ្ដាលដល់យុវជនឱ្យបានយល់ដឹងអំពីសិល្បៈ វប្បធម៌ខ្មែរ ជាពិសេសរបាំព្រះរាជទ្រព្យ។
លោកបានឱ្យដឹងថា៖ «ខ្ញុំសូមអំណរគុណដល់រដ្ឋាភិបាលបារាំង ទីភ្នាក់ងារបារាំងសម្រាប់ការអភិវឌ្ឍន៍ (AFD) អង្គការស៊ីប៉ា ដៃគូអភិវឌ្ឍ និងអង្គភាពជំនាញពាក់ព័ន្ធទាំងអស់ ដែលតែងតែជួយជ្រោមជ្រែងយ៉ាងសកម្មក្នុងកំណែទម្រង់វិស័យអប់រំ ជាពិសេសការអភិវឌ្ឍយុវជន សំដៅធានាការផ្តល់សេវាអប់រំប្រកបដោយគុណភាព សមធម៌ បរិយាបន្ន និងការផ្តល់ឱកាសសិក្សាពេញមួយជីវិតសម្រាប់ទាំងអស់គ្នា»។
ភាពយន្តឯកសារ ទេពហត្ថា បង្ហាញពីទម្រង់សិល្បៈដ៏ល្អឯកនៃរបាំព្រះរាជទ្រព្យរបស់ប្រទេសកម្ពុជា និងការវិវត្តន៍របស់វាតាំងពីឆ្នាំ ១៩០៦។
វាបានរួមបញ្ចូលគ្នានូវការបង្កើតដោយស្នាព្រះហត្ថសម្ដេចរាជបុត្រី ព្រះរៀម នរោត្តម បុប្ផាទេវី និងប្រវត្តិដ៏ទូលំទូលាយនៃរបាំព្រះរាជទ្រព្យ ក្រោយការបំផ្លិចបំផ្លាញក្នុងសម័យខ្មែរក្រហម និងការរស់ឡើងវិញជាបន្តបន្ទាប់។
ដោយបង្ហាញពីប្រវត្ដិរបាំព្រះរាជទ្រព្យ រួមទាំងដំណើររឿងផ្ទាល់ខ្លួនពីអ្នករាំវ័យក្មេង និងអ្នករាំជើងចាស់ ភាពយន្តឯកសារនេះ គឺជាការលើកតម្កើនវប្បធម៌ និងជាធនធានសម្រាប់អ្នកអប់រំ។
កញ្ញា ឡាច រចនា មន្ដ្រីអង្គការស៊ីប៉ា បាននិយាយថា ឯកសារសិល្បៈ និងវប្បធម៌នៃខ្សែភាពយន្ដឯកសារ «ទេពហត្ថា» ត្រូវបានចងក្រងឡើងដើម្បីបង្រៀនអមដោយការទស្សនាភាពយន្ដឯកសារ។
កញ្ញាបានឱ្យដឹងថា៖ «សិស្សានុសិស្សមិនត្រឹមតែទស្សនាភាពយន្ដដើម្បីកម្សាន្ដប៉ុណ្ណោះទេ ប៉ុន្ដែពួកគេអាចជជែកពិភាក្សាអំពីប្រធានបទដែលលើកឡើងក្នុងភាពយន្ដទៀតផង»។
ឯកសារនេះត្រូវបានចងក្រងឡើងសម្រាប់លោកគ្រូអ្នកគ្រូដែលមានបំណងសិក្សាស្វែងយល់បន្ថែមអំពីប្រធានបទក្នុងខ្សែភាពយន្ដជាមួយសិស្សានុសិស្ស។
កញ្ញាបានថ្លែងទៅកាន់លោកនាយកសាលា និងតំណាងមន្ទីរអប់រំមកពីបណ្ដាខេត្ដនានាថា៖ «តាមរយៈព័ត៌មានក្នុងភាពយន្ដ និងលំហាត់នៅក្នុងសៀវភៅនេះ លោកគ្រូអ្នកគ្រូអាចយកណែនាំដល់សិស្សដើម្បីជំរុញឱ្យពួកគេចូលរួមពិភាក្សា និងពិចារណាស៊ីជម្រៅអំពីខ្លឹមសារអំពីខ្សែភាពយន្ដចង់បង្ហាញ»។
លោក ញឹក សុគន្ធ អនុប្រធានមន្ទីរអប់រំ យុវជន និងកីឡាខេត្តសៀមរាប សមាជិកក្នុងសិក្ខាសាលាបានឱ្យដឹងថា សៀវភៅសិល្បៈ និងវប្បធម៌ ទេពហត្ថា មានតម្លៃផ្នែកសិល្បៈ និងវប្បធម៌ ក្នុងការផ្តល់ចំណេះដឹងដល់លោកគ្រូ អ្នកគ្រូ និងសិស្សានុសិស្ស។
លោកបានប្រាប់ភ្នំពេញប៉ុស្ដិ៍ថា៖ «ប្រសិនបើមានការបង្ហាត់បង្រៀនថែមទៀត វាកាន់តែល្អ ពីព្រោះពួកគេនឹងកាន់តែយល់ច្បាស់អំពីមរកតវប្បធម៌ជាតិ»។
អ្នកគ្រូ សុខ ស៊ីថា ជាអ្នកបង្ហាត់បង្រៀនរបាំនៅសាលារបាំសម្ដេចនរោត្ដម បុប្ផាទេវី បាននិយាយថា បច្ចុប្បន្ននេះ សាលារបាំបានសិស្សជាច្រើនជាតិសាសន៍ជាង ២០០នាក់។
អ្នកចូលរួមទស្សនាសេចក្ដីផ្ដើមក្នុងភាពយន្ដ «ទេពហត្ថា» អំឡុងពេលបើកសិក្ខាសាលា។ រូបថត ហុង រស្មី
អ្នកគ្រូបានឱ្យដឹងថា៖ «សាលាបានបង្រៀនសិស្សដោយមិនគិតថ្លៃ រួមទាំង របាំ ទំនៀមទម្លាប់ប្រពៃណី ដូចជា ការសំពះ ដែលមានប្រភពមកពីរបាំបុរាណខ្មែរ»។
ផលិតករជនជាតិបារាំងលោក ហ្សាវីយេ ដឺឡូហ្សាន បាននិយាយថា សិល្បៈបុរាណខ្មែរមានតម្លៃជាសកល។
លោកបានបន្ថែមថា៖ «ទេពហត្ថា គឺមិនត្រឹមតែជាសិល្បៈបុរាណរបស់ប្រទេសកម្ពុជាប៉ុណ្ណោះទេ ប៉ុន្តែក៏ជាការតភ្ជាប់សំខាន់រវាងអត្តសញ្ញាណរបស់មនុស្ស និងការច្នៃប្រឌិតសិល្បៈផងដែរ»។
លោកបានបន្ដថា៖ «កញ្ញា សុខ ណាលីស អ្នករបាំវ័យក្មេងម្នាក់ក្នុងរឿងនេះនិយាយថា “«ពេលវប្បធម៌រលុត ជាតិរលាយ។ នៅពេលដែលវប្បធម៌រីកចម្រើន ប្រទេសជាតិកាន់តែរីកចម្រើន»។ របាំព្រះរាជទ្រព្យបានជួយស្ដារឡើងវិញនូវសេចក្តីថ្លៃថ្នូររបស់ប្រទេសកម្ពុជា ក្រោយរបបខ្មែរក្រហម»។
ដើម្បីឈានដល់ទស្សនិកជនបានទូលំទូលាយ លោកបានពន្យល់ថា ភាពយន្តនេះត្រូវបានគេដាក់ឈ្មោះជាភាសាខ្មែរ។ឡើងកេរ្តិ៍ឈ្មោះជាអ្នករបាំព្រះរាជទ្រព្យ និងក្រោយមកបានស៊ូទ្រាំជីវិតនៅក្នុងជំរុំជនភៀសខ្លួនតាមព្រំដែនថៃ អ្នកស្រី វន់ សាវ៉េ ជាគ្រូបង្ហាត់របាំម្នាក់ ដែលបានបង្ហាញខ្លួននៅក្នុងភាពយន្តឯកសារនោះ បាននាំយកមរតកនៃរបាំបុរាណខ្មែរ។
ដោយធ្លាក់ខ្លួនឈឺក្រោយរបបខ្មែរក្រហម ដំបូងឡើយ អ្នកស្រីបានព្យាយាមភៀសខ្លួនទៅបរទេស ប៉ុន្តែបានប្តូរចិត្តនៅព្រំដែន ដោយជ្រើសរើសស្នាក់នៅ ប្រមូលកុមារ និងបង្រៀនសិល្បៈរបាំជំនួសវិញ។
អ្នកស្រីបានបន្ថែមថា៖ «ខ្ញុំអាចស្លាប់ និងកើតឡើងវិញបាន ប៉ុន្តែសិល្បៈមិនអាចស្លាប់បានទេ»។
អ្នកចូលរួមទស្សនាសេចក្ដីផ្ដើមក្នុងភាពយន្ដ «ទេពហត្ថា» អំឡុងពេលបើកសិក្ខាសាលា។ រូបថត ហុង រស្មី
បិទបញ្ចប់ដំណាក់កាលទី១ និងប្រកាសដំណាក់កាលទី២ នៃគម្រោងពង្រឹងសមត្ថភាពយុវជន
សិក្ខាសាលានេះបានឆ្លុះបញ្ចាំងពីភាពជោគជ័យនៃដំណាក់កាលទី ១ នៃគម្រោងពង្រឹងសមត្ថភាពយុវជន ដែលត្រូវបានសហការផ្តល់មូលនិធិដោយទីភ្នាក់ងារបារាំងសម្រាប់ការអភិវឌ្ឍន៍ (AFD) និងបង្កើតឡើងដោយអង្គការ ស៊ីប៉ា សហការជាមួយក្រសួងអប់រំ យុវជន និងកីឡារបស់កម្ពុជា។
គំនិតផ្តួចផ្តើមរយៈពេលបីឆ្នាំនេះ (ខែតុលា ឆ្នាំ ២០២១ ដល់ខែកញ្ញា ឆ្នាំ ២០២៤) បានគាំទ្រសិស្សជាង ២៧,០០០ នាក់នៅទូទាំងអនុវិទ្យាល័យចំនួន ១៦ ក្នុងខេត្តចំនួន ១៤។
គម្រោងនេះបានផ្តល់នូវសេវាបណ្ណាល័យទំនើបកម្ម ធនធានអំណាន ការបណ្តុះបណ្តាលវិជ្ជាជីវៈ កម្មវិធីជំនាញឌីជីថល និងឱកាសចូលរួមជាមួយប្រជាពលរដ្ឋ។
លោក ហុក សុទ្ធិ អគ្គនាយកអង្គការស៊ីប៉ា បានលើកឡើងថា ក្នុងគម្រោងដំណាក់ទីមួយនេះ អង្គការបានផលិតសៀវភៅបានចំនួន ១១ចំណងជើង និងមាតិកាឌីជីថលចំនួន ៤ ប្រភេទដើម្បីឆ្លើយតបទៅនឹងការសិក្សាស្រាវជ្រាវ និងបណ្ដុះបណ្ដាលវិជ្ជាជីវៈរបស់យុវជន។
អ្នកចូលរួមអានសៀវភៅមគ្គុទេសក៍ឯកសារសិក្សាសិល្បៈ និងវប្បធម៌ «ទេពហត្ថា»។ រូបថត ហុង រស្មី
លោក សុទ្ធិ បានថ្លែងថា៖ «ដំណាក់កាលទីមួយ បានបញ្ចប់ដោយជោគជ័យនៅបំណាច់ខែកញ្ញា ឆ្នាំ២០២៤ នេះ ហើយនៅពេលនេះ យើងមានក្ដីសោមនទស្សយ៍រីករាយដែលក្រសួងអប់រំ យុវជន និងកីឡានិងទីភ្នាក់ងារបារាំងសម្រាប់ការអភិវឌ្ឍន៍បន្ដគាំទ្រគម្រោងដំណាក់កាលទីពីរ ដែលមានរយៈពេល៣២ខែ ដើម្បីបំណងពង្រីកទៅកាន់ខេត្ដថ្មីចំនួន ៩ ទៀត ដែលស្មើនឹង ២៤ខេត្ដ លើកលែងតែរាជធានីភ្នំពេញ»។
អ្នកចូលរួមទស្សនាសេចក្ដីផ្ដើមក្នុងភាពយន្ដ «ទេពហត្ថា» អំឡុងពេលបើកសិក្ខាសាលា។ រូបថត ហុង រស្មី
គម្រោងដំណាក់កាលទីពីរនេះបន្ដការគាំទ្រដល់គោលនយោបាយជាតិ យុវជន ក៏ដូចជាចូលរួមចំណែកតម្រង់ទិសវិជ្ជាជីវៈ និងការងារស្ម័គ្រចិត្ដក្នុងសហគមន៍សម្រាប់អ្នកទទួលផលប្រហែលជា ៤ម៉ឺននាក់ ជាយុវជនមកពីវិទ្យាល័យចំនួន ២៦ មជ្ឈមណ្ឌលយុវជនចំនួន ៣ រួមមានមជ្ឈមណ្ឌលខេត្ដសៀមរាប ខេត្ដកណ្ដាល និងមជ្ឈមណ្ឌលស្ដានិតិសម្បទាយុវជនខេត្ដកណ្ដាល ក៏ដូចជាសហគមន៍មូលដ្ឋានចំនួន ២៣ទៀត។
លោក Jacques Pellet ឯកអគ្គរដ្ឋទូតនៃសាធារណៈបារាំងប្រចាំកម្ពុជា បានថ្លែងថា លោកសង្ឃឹម និងជឿជាក់ថា សៀវភៅនៅតែមានតួនាទីសំខាន់នៅក្នុងសង្គម។
លោក ហង់ ជួនណារ៉ុន និង លោក Jacques Pellet ទស្សនាការសម្ដែងរបាំបុរាណ ព្រះថោង នាងនាគ។ រូបថត ហុង រស្មី
លោកបានលើកឡើងថា៖ «វប្បធម៌មានសារសំខាន់ណាស់នៅក្នុងប្រទេសកម្ពុជា ជាពិសេសសម្រាប់យុជនរបស់យើង។ ទីភ្នាក់ងារបារាំងសម្រាប់ការអភិវឌ្ឍន៍បានជួយគាំទ្រដល់អង្គការស៊ីប៉ារយៈពេលជា ១០ឆ្នាំមកនេះ ដោយសារយើងមើលឃើញពីសារៈសំខាន់នៃបេសកកម្មស៊ីប៉ាក្នុងការអភិវឌ្ឍវប្បធម៌ និងអប់រំ ជាពិសេសការអភិវឌ្ឍអំណានសម្រាប់ប្រទេសកម្ពុជា»។
លោក ជួនណារ៉ុន បានបន្ដថា គម្រោងអភិវឌ្ឍន៍យុវជនដំណាក់កាលទី២នេះ នឹងជាសមាសធាតុមួយយ៉ាងសំខាន់ក្នុងការតម្រង់ទិសវិជ្ជាជីវៈ និងការងារស្ម័គ្រចិត្តរបស់យុវជនក្នុងសហគមន៍ដែលគម្រោងនេះមានរយៈពេល ៣២ខែ (ចាប់អនុវត្តពីខែតុលា ឆ្នាំ២០២៤ ដល់ ខែឧសភា ឆ្នាំ២០២៧) ក្នុងគម្រោងថវិកាជាង ៩៨ម៉ឺនដុល្លារ ដែលក្នុងនោះ ៨០ ភាគរយទទួលបានពីទីភ្នាក់ងារបារាំងសម្រាប់អភិវឌ្ឍន៍ (AFD) និង២០ ភាគរយជាបន្ទុករបស់អង្គការស៊ីប៉ា។
លោករដ្ឋមន្ដ្រីបានថ្លែងថា៖ «គម្រោងនេះគាំទ្រដល់ការអនុវត្តគោលនយោបាយជាតិស្តីពីការអភិវឌ្ឍយុវជនកម្ពុជា តាមរយៈការផ្តល់ការតម្រង់ទិសវិជ្ជាជីវៈ និងការបង្កើនការចូលរួមក្នុងកិច្ចការស្ម័គ្រចិត្តតាមរយៈសហគមន៍ និងសកម្មភាពអភិវឌ្ឍយុវជនប្រមាណ ៤ម៉ឺននាក់ (៥០ ភាគរយជាយុវតី) អាយុចន្លោះពី១២ឆ្នាំ ដល់ ២៥ឆ្នាំ នៅតាមទីជនបទក្នុងខេត្តចំនួន ២៤ ដែលមានវិទ្យាល័យចំនួន២៦ មជ្ឈមណ្ឌលយុវជនចំនួន៣ និងអង្គការ សហគមន៍មូលដ្ឋានចំនួន២៣»៕
