គំនូរដែលបង្ហាញពីការផ្សារភ្ជាប់ទំនាក់ទំនងរបស់វិចិត្រករ ចូវ ធានលី ជាមួយធម្មជាតិ ជាប្រភេទគំនូរប្រេងទំហំ ៨០ គុណ ១២០ សង់ទីម៉ែត្រ។ រូបភាពសហការី
ភ្នំពេញ៖ ការតាំងពិព័រណ៍ទោលថ្មីរបស់វិចិត្រករខ្មែរដ៏ល្បីឈ្មោះ ចូវ ធានលី ដែលមានចំណងជើងថា «ឫសគល់» នឹងត្រូវដាក់បង្ហាញនៅទីស្នាក់ការស្នាររដ្ឋបាលសិល្បៈ ចាប់ពីថ្ងៃទី ២៧ ខែមីនា ដល់ថ្ងៃទី ១៣ ខែឧសភា ឆ្នាំ ២០២៥។
ការតាំងពិព័រណ៍នេះផ្តោតលើប្រធានបទនៃការផ្លាស់ប្តូរផ្ទាល់ខ្លួន ជំនឿ និងទំនាក់ទំនងយ៉ាងស៊ីជម្រៅរវាងធម្មជាតិ និងវប្បធម៌។
អ្នកស្រី ជុំ ច័ន្ទវាសនា (SNA) ស្ថាបនិក ទីស្នាក់ការស្នាររដ្ឋបាលសិល្បៈ បានឱ្យដឹងថា៖ «មួយរយៈកន្លងទៅ សិល្បករ ចូវ ធានលី បានព្យាយាមស្វែងរកខ្លួនឯង គាត់បានផ្លាស់ប្តូរទីលំនៅពីកន្លែងមួយទៅកន្លែងមួយទៀតជាច្រើនដង ពេលខ្លះគាត់ទទួលបាននូវភាពស្រពិចស្រពិល ភាពមិនច្បាស់លាស់ ឬនាំដល់ការវង្វេង»។
កើតនៅខេត្តបាត់ដំបងក្នុងឆ្នាំ ១៩៨៥ លោក ធានលី បានតាំងខ្លួនជាបុគ្គលសំខាន់ម្នាក់ក្នុងវិស័យសិល្បៈសហសម័យរបស់កម្ពុជា។ ដំបូងឡើយជាអ្នករចនាក្រាហ្វិក លោកបានផ្លាស់ប្តូរពេញលេញទៅសិល្បៈវិចិត្រនៅឆ្នាំ ២០១១។
ស្នាដៃរបស់លោកជាគំនូរប្រេង និងការផ្ដោតលើសាច់រឿងយ៉ាងស៊ីជម្រៅ ត្រូវបានដាក់តាំងបង្ហាញទាំងក្នុងស្រុក និងក្រៅស្រុក រួមទាំងនៅ Busan Biennale ឆ្នាំ ២០២៤ ក្នុងប្រទេសកូរ៉េខាងត្បូង វិចិត្រសាល Flinn នៅសហរដ្ឋអាមេរិក និង Musée de l'Hospice-Comtesse នៅប្រទេសបារាំង។
លោក ធានលី បានប្រើចំណេះដឹង សមត្ថភាពដោយពឹងលើវិទ្យាសាស្ត្រអស់ពីលទ្ធភាព តែនៅមិនអាចដោះស្រាយ បញ្ហាប្រឈមដែលខ្លួនចង់បាន ហើយធ្វើឱ្យលោកនៅជាប់គាំងមិនអាចទៅមុខរួច។
អ្នកស្រី ច័ន្ទវាសនា បាននិយាយថា ក្រោយពីបានរៀនសូត្រអំពីគ្រួសារ អ្នកចាស់ទុំបុរាណជាច្រើនស្តីពីវប្បធម៌ជំនឿ ពួកគេបានប្រតិបត្តិ ពួកគេហាក់បីដូចជាទទួលយកនូវបញ្ហាជីវិតបាននាំមកនូវសុភមង្គល និងទទួលថាមពលបរិសុទ្ធពោរពេញដោយភាពស្ងប់សុខជូនដល់ក្រុមគ្រួសារ សហគមន៍របស់ពួកគេ។
លោក ធានលី ក៏បានផ្សារភ្ជាប់ខ្លួនជាមួយទំនៀមទម្លាប់ ទស្សនៈ និងប្រព័ន្ធជំនឿដើម (ជំនឿជីវចល) ដែលលោកបានគោរពប្រតិបត្តិជំនឿនេះតាមចាស់បុរាណ ដែលជាទីអាស្រ័យនៃភាពស្ងប់ស្ងាត់បានចាប់ផ្តើមឡើងធ្វើឱ្យភាពស្មុគ្រស្មាញរសាយទៅ លោក ធានលី ក៏ទទួលបានចម្លើយជាច្រើនដែលមិនធ្លាប់មាន។
អ្នកស្រីបាននិយាយថា ពិព័រណ៍លើកឡើងពីការលូតលាស់នៃគំនិត ការផ្លាស់ប្តូរនៃជីវិត ឥទ្ធិពលសង្គម ដំណើរនៃបទពិសោធន៍ក្នុងការព្យាបាលផ្លូវចិត្តតាមរយៈវប្បធម៌ ថាមពលនៃការប្រតិបត្តិជំនឿជាមួយនឹងការផ្សាំងខ្លួនជាមួយធម្មជាតិ ទឹក ដី ព្រៃឈើជាដើម។
អ្នកស្រី ច័ន្ទវាសនា បាននិយាយថា៖ «គាត់ប្តូរមករស់នៅក្នុងខេត្តសៀមរាប គាត់កាន់តែជិតស្និទ្ធជាមួយធម្មជាតិ ភាពស្ងប់ស្ងាត់នៅតាមព្រៃឈើតំបន់អង្គរ និងប្រាសាទដែលជាទីសក្ការ បានជួយព្យាបាលផ្លូវចិត្ត ផ្តល់នូវថាមពលត្រឡប់មកវិញ»។
ផ្ទាំងគំនូរលើក្រណាត់ចំនួនប្រាំផ្ទាំងរបស់សិល្បករ ធានលី ដាក់តាំងបង្ហាញនៅក្នុងវិចិត្រសាលទីមួយ បង្ហាញពីការអង្កេតទៅលើធម្មជាតិ ការចំណាយពេលដ៏ច្រើនជាមួយដើមឈើ ព្រៃព្រឹក្សា និងការអង្កេតមើលផ្ទៃទឹកថ្លាឈ្វេងធំល្វឹងល្វើយ ធ្វើឱ្យសិល្បករអាចភ្ជាប់ទំនាក់ទំនងរបស់លោកទៅនឹងជម្រៅចិត្តខ្លួនឯង។
អ្នកស្រីបាននិយាយថា៖ «ទាំងនេះអាចជាការផ្សារភ្ជាប់ទំនាក់ទំនងខាងចិត្តវិញាណទៅនឹងទីឋានស័ក្កសិទ្ធ ពេលគាត់ទៅដល់ក្លោងទ្វារនៃប្រាង្គប្រាសាទនីមួយៗ ហាក់ដូចជាឈានចូលដល់ភពមួយដែលផ្តល់នូវពន្លឺថ្មី ធ្វើឱ្យគាត់ភ្លេចនូវបញ្ហា និងភាពស្មុគ្រស្មាញទាំងឡាយទាំងពួង»។
គំនូរខ្លោងទ្វារចំនួនបី មើលពីខាងក្នុងទៅខាងក្រៅឃើញពន្លឺនៃសេចក្តីស្ងប់ បើមើលពីខាងក្រៅចូលទៅក្នុងវិញក៏បង្ហាញពន្លឺនៃភាពបរិសុទ្ធ។
គំនូរទេសភាពផ្ទៃទឹកថ្លាឈ្វេងអមដោយស្រមោលរុក្ខជាតិជាច្រើន និងទេសភាពព្រៃឈើដ៏ធំត្រឈឹងត្រឈៃស្ថិតក្នុងតំបន់អង្គរបានភ្ជាប់ទំនាក់ទំនងជាវិជ្ជមាន ហើយទេសភាពទាំងនេះស្ថិតក្នុងដួងចិត្តរបស់លោកជានិច្ច ក៏ដូចជាស្ថិតក្នុងដួងចិត្តប្រជាពលរដ្ឋទូទៅ។
«ឫសគល់» នឹងដំណើរការចាប់ពីថ្ងៃទី ២៧ ខែមីនា ដល់ថ្ងៃទី ១៣ ខែឧសភា ឆ្នាំ ២០២៥ ជាមួយនឹងម៉ោងបើកចាប់ពីម៉ោង ១ ដល់ម៉ោង ៥ ល្ងាច ហើយការចូលមើលពេលព្រឹកអាចធ្វើការណាត់ជួបតែប៉ុណ្ណោះ។
ការតាំងពិព័រណ៍នឹងប្រព្រឹត្តទៅនៅទីស្នាក់ការស្នាររដ្ឋបាលសិល្បៈ ក្នុងរាជធានីភ្នំពេញ ដោយមានការបើកទទួលស្វាគមន៍នៅថ្ងៃទី ២៧ ខែមីនា ចាប់ពីម៉ោង ៥ ដល់ ៨ យប់។
ទីស្នាក់ការស្នាររដ្ឋបាលសិល្បៈ បន្តបេសកកម្មរបស់ខ្លួនក្នុងការលើកស្ទួយសិល្បករខ្មែរនៅលើឆាកសកលលោក ហើយ «ឫសគល់» គឺជាសក្ខីភាពមួយចំពោះថាមពលសិល្បៈ ជំនឿ និងបេតិកភណ្ឌដែលស្ថិតស្ថេរក្នុងការបង្កើតអត្តសញ្ញាណផ្ទាល់ខ្លួន និងសមូហភាព។
អ្នកស្រី ច័ន្ទវាសនា និយាយថា៖ «ខ្ញុំបានចំណាយជីវិតរបស់ខ្ញុំរស់នៅជាមួយសិល្បៈ។ ខ្ញុំធំដឹងក្ដីក្នុងគ្រួសារសិល្បៈសម្តែង ហើយបានរៀប ការជាមួយសិល្បករផ្នែកសិល្បៈសូនរូប។ ខ្ញុំគោរពភាពស្រស់ស្អាត និងភាពច្នៃប្រឌិតដ៏អស្ចារ្យ។ ខ្ញុំរស់នៅដើម្បី ចែករំលែកចំណង់ចំណូលចិត្តរបស់ខ្ញុំចំពោះសិល្បៈជាមួយអ្នកដទៃ ដោយបង្ហាញស្នាដៃរបស់សិល្បករខ្មែរ ទៅកាន់មនុស្សជុំវិញពិភពលោក»៕
