ការសាងសង់ផ្លូវល្បឿនលឿនភ្នំពេញ-ក្រុងព្រះសីហនុ សម្រេចបាន ៥១,៣៥% ដែលមានប្រវែង ១៨៧,០៥០គីឡូម៉ែត្រ។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូនបានឱ្យដឹងថា គម្រោងសាងសង់ផ្លូវល្បឿនលឿនតភ្ជាប់ពី ភ្នំពេញ-ទៅក្រុងព្រះសីហនុ តម្លៃជិត ២ ០០០ លានដុល្លារសម្រេចបាន ៥១,៣៥ ភាគរយហើយ ខណៈគម្រោងធ្វើឱ្យប្រសើរឡើងផ្លូវជាតិលេខ ៣ ពីភ្នំពេញទៅក្រុងកំពត តម្លៃជិត ២២០ លានដុល្លារសម្រេចបាន ៩៨,០៤ ភាគរយ ដែលទាំងនេះគឺជាកិច្ចខិតខំប្រឹងប្រែងរបស់រដ្ឋាភិបាលក្នុងការធ្វើពិពិធកម្មវិស័យដឹកជញ្ជូននៅកម្ពុជា។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា ផ្លូវល្បឿនលឿនដំបូងគេនៅកម្ពុជានេះត្រូវបានកំណត់កាលបរិច្ឆេទដំណើរការនៅឆ្នាំ ២០២៣ ប៉ុន្តែតាមល្បឿននៃការស្ថាបនា គម្រោងនេះអាចបញ្ចប់ការសាងសង់មុនពេលវេលាកំណត់។
លោកបានបន្ថែមថា៖ «គម្រោងនេះនឹងជួយជំរុញវិស័យដឹកជញ្ជូន និងពាណិជ្ជកម្មតាមរយៈកំពង់ផែទឹកជ្រៅនៅក្រុងព្រះសីហនុ»។
គម្រោងសាងសង់ផ្លូវល្បឿនលឿននេះត្រូវបានវិនិយោគដោយក្រុមហ៊ុនប្រទេសចិន Cambodia PPSHV Expressway Co.,Ltd ក្នុងតម្លៃប្រមាណ ១,៩ ពាន់លានដុល្លារ និងបានបើកការដ្ឋានសាងសង់កាលពីខែមីនា ឆ្នាំ ២០១៩។ ផ្លូវនេះមានចម្ងាយសរុប ១៩០,៣ គីឡូម៉ែត្រ និងទទឹង ២៤,៥ ម៉ែត្រ ដែលការស្ថាបនាផ្លូវនេះនឹងត្រូវអនុវត្តតាមគម្រោង BOT។
ដោយឡែកគម្រោងពង្រីក និងលើកកម្រិតផ្លូវជាតិលេខ ៣ តម្លៃជាង ២១៩ លានដុល្លារដែលជាហិរញ្ញប្បទានពីប្រទេសចិន និងថវិកាបដិភាគរបស់រដ្ឋាភិបាលកម្ពុជា ក៏សម្រេចបាន ៦០ ភាគរយនៃគម្រោងទាំងមូល។
គម្រោងនេះប្រើរយៈពេលសាងសង់ ៤៨ ខែ និងបើកការដ្ឋានកាលពីថ្ងៃទី ៧ ខែឧសភា ឆ្នាំ ២០១៨។ គម្រោងនេះមានប្រវែង ១៣៤ គីឡូម៉ែត្រសាងសង់ដោយក្រុមហ៊ុន China Road and Bridge Corporation និងត្រួតពិនិត្យបច្ចេកទេសដោយក្រុមហ៊ុន Guangzhou Wanan Construction Supervision Co., Ltd។
ក្រសួងបានឱ្យដឹងថា៖ «បច្ចុប្បន្ននេះក្រសួងសាធារណការ និងដឹកជញ្ជូនកំពុងខិតខំប្រឹងប្រែងយកចិត្តទុកដាក់ពន្លឿនការងារ បំពាក់កាមេរ៉ាចាប់ល្បឿនយានយន្ត កាមេរ៉ាសុវត្ថិភាព ជញ្ជីងថ្លឹងទម្ងន់ក្រោមដី និងជញ្ជីងថ្លឹងទម្ងន់នៅក្នុងស្ថានីយ ហើយស្ពានអាកាសថ្មើរជើងនៅលើកំណាត់ផ្លូវជាតិលេខ ៣ ម្ដុំត្រាំខ្នាគ្រោងនឹងបញ្ចប់ការងារទាំងស្រុងនៅចុងខែមិថុនា ឆ្នាំ ២០២១ ខាងមុខ»។
បើតាម លោក សុរិយា គម្រោងនេះត្រូវបានសាងសង់លឿនជាងផែនការក្នុងរយៈពេល ១ ឆ្នាំ។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញបានសង្កេតឃើញថាគម្រោងទាំងនេះគឺជាផ្លូវសេដ្ឋកិច្ចមួយដ៏សំខាន់តភ្ជាប់ទៅកំពង់ផែក្រុងព្រះសីហនុ។
លោកថ្លែងថា៖ «ផ្លូវទាំងនេះគឺជាផ្លូវវាងដ៏សំខាន់ក្នុងការដឹកជញ្ជូនទំនិញ និងបម្រើដល់វិស័យទេសចរណ៍ ពិសេសតំបន់មាត់សមុទ្រ ហើយតាមបណ្តោយផ្លូវទាំងនេះមានបណ្តារោងចក្រ សហគ្រាសជាច្រើន អ៊ីចឹងខ្ញុំគិតថាវិស័យដឹកជញ្ជូននឹងមានសក្តានុពលខ្លាំង»៕LA
វីដេអូ៖
