.jpg)
កសិដ្ឋានចិញ្ចឹមគោយកទឹកដោះនៅក្នុងតំបន់ Olion ភាគខាងលិចប្រទេសស្វ៊ីស។ AFP
ទីក្រុងហ្សឺណែវៈ ប្រទេសស្វ៊ីសកាលពីចុងសប្តាហ៍បានបដិសេធសំណើដែលនឹងធ្វើឲ្យខ្លួនក្លាយជាប្រទេសអឺរ៉ុបដំបូងគេ ក្នុងការហាមឃាត់ថ្នាំសម្លាប់សត្វល្អិតសំយោគ បន្ទាប់ពីយុទ្ធនាការប្រយុទ្ធប្រឆាំងមួយយ៉ាងជូរចត់។
ក្រុមអ្នកបោះឆ្នោតបានគាំទ្រការអំពាវនាវរបស់រដ្ឋាភិបាលបានបដិសេធគំនិតផ្តួចផ្ដើមដែលស្នើឡើងជាសាធារណៈចំនួនពីរដែលនឹងផ្លាស់ប្តូរតំបន់ដ៏ធំសម្រាប់ការធ្វើកសិកម្មរបស់ប្រទេសស្វ៊ីស។
អ្នកបោះឆ្នោត និងតំបន់ជាច្រើនត្រូវបានទាមទារឲ្យជំរុញតាមរយៈគំនិតផ្តួចផ្ដើមដ៏ពេញនិយម ប៉ុន្តែសំណើពីរបានបរាជ័យ ខណៈដែល ៦១ ភាគរយក្នុងចំណោមអ្នកបោះឆ្នោតទាំងអស់ និងស្ទើរតែទាំងអស់លើកលែងតែតំបន់មួយក្នុងចំណោមតំបន់ចំនួន ២៦ មិនបានយកចិត្តទុកដាក់លើគំនិតផ្តួចផ្ដើមនេះទេ។
លោក Guy Parmelin ប្រធានាធិបតីស្វ៊ីសបានប្រាប់ក្រុមអ្នកយកព័ត៌មានថា៖ «នេះគឺជាការសម្រេចចិត្តសមហេតុផល និងសំអាងលើហេតុផល ដែលធានាអនាគតកសិកម្មរបស់យើង និងសន្ដិសុខស្បៀងអាហាររបស់ប្រទេសនេះ»។
លោកបន្តថា៖ «លទ្ធផលនេះផ្ដល់ដល់វិស័យកសិកម្មនូវឱកាសក្នុងការបន្តសម្រេចបានការកែទម្រង់អន្តរកាលឆ្ពោះទៅការផលិតកាន់តែមាននិរន្តរភាព»។
ទន្ទឹមនឹងនេះ អំណាចនគរបាលថ្មីដ៏ទូលំទូលាយចម្រូងចម្រាស់ក្នុងការប្រយុទ្ធប្រឆាំងនឹងអំពើភេរវកម្មបានឆ្លងផុតដោយមានការគាំទ្រ ៥៧ ភាគរយ ដែលធ្វើឲ្យអ្នកធ្វើយុទ្ធនាការសិទ្ធិមនុស្សអន្តរជាតិភ័យខ្លាច ដូចជាអង្គការលើកលែងទោសអន្តរជាតិ។
ស្ថិតក្រោមប្រព័ន្ធប្រជាធិបតេយ្យផ្ទាល់របស់ប្រទេសស្វ៊ីស ការធ្វើប្រជាមតិ និងការបោះឆ្នោតដ៏ពេញនិយមធ្វើឡើងជារៀងរាល់ពីរបីខែម្ដងនៅកម្រិតជាតិ តំបន់ និងមូលដ្ឋាន។
គំនិតណាមួយបានមកពីសាធារណៈអាចត្រូវបានដាក់ដើម្បីបោះឆ្នោតជាតិ ប្រសិនបើប្រមូលហត្ថលេខាបានចំនួន ១០០ ០០០ នាក់ពីប្រជាជន ៨,៦ លាននាក់ នោះអ្វីដែលហៅថាជាគំនិតដ៏ពេញនិយមទាំងនេះ តម្រូវឲ្យមានសម្លេងភាគច្រើនទ្វេដង ដើម្បីអនុម័ត។
ដើម្បីជំរុញការធ្វើប្រជាមតិលើច្បាប់ថ្មីៗដែលបានយល់ព្រមដោយសភា ដំបូងអ្នកត្រូវការហត្ថលេខាចំនួន ៥០ ០០០ នាក់ ហើយបន្ទាប់មកសម្លេងភាគច្រើនធម្មតា ដើម្បីអនុម័ត។
រហូតមកដល់ពេលនេះមិនមានប្រទេសធំៗហាមឃាត់ថ្នាំសម្លាប់សត្វល្អិតដែលផលិតឡើងដោយមនុស្សនោះទេ។ ប្រទេសប៊ូតង់ប្រកាសកាលពីឆ្នាំ ២០១២ ថា ខ្លួនចង់ក្លាយជាប្រទេសដំបូងគេលើពិភពលោកក្នុងការងាកទៅរកអាហារដែលដាំដុះនៅក្នុងប្រទេសរបស់ខ្លួន និងកសិករសរីរាង្គ ១០០ ភាគរយ។
ការពិភាក្សាគ្នាលើថ្នាំសម្លាប់សត្វល្អិតរបស់ប្រទេសស្វ៊ីសគឺការពិភាក្សាដ៏ជូរចត់មួយ។ ក្រុមអ្នកលួចដុត បានដុតរថយន្តសណ្ដោងដែលបង្ហាញបដាពាក្យថា «មិនយល់ព្រម» នៅភាគខាងលិចតំបន់ Vaud canton ខណៈដែលកសិករដែលគាំទ្រពាក្យ «យល់ព្រម» បានឲ្យដឹងថា ពួកគេគឺជាជនរងគ្រោះដោយសារតែការប្រមាថ ការគំរាមកំហែង និងការបំភិតបំភ័យ៕ LA
