សិង្ហបុរីៈ ក្រុមហ៊ុន Ascott នឹងចំណាយ ២១០ លានដុល្លារ ដើម្បីទិញអចលនទ្រព្យពីនៅក្នុងប្រទេសបារាំង និងប្រទេសវៀតណាម តាមរយៈ Ascott Fund Serviced Residence Global Fund (ASRGF) ដែលជាមូលនិធិមូលធនរបស់ខ្លួនជាមួយមូលនិធិ Qatar Investment Authority។
ក្រុមហ៊ុន CapitaLand បានឲ្យដឹងនៅក្នុងឯកសារផ្សារហ៊ុនមួយកាលពីថ្ងៃចន្ទទី ២១ ខែមិថុនាថា ផ្នែកអាជីវកម្មលំនៅឋានដែលគ្រប់គ្រងទាំងស្រុងរបស់ក្រុមហ៊ុន CapitaLand បានចូលក្នុងកិច្ចព្រមព្រៀងពីរ ដើម្បីទិញអចលនទ្រព្យពីរដោយឈរមូលដ្ឋានសាងសង់ហើយទើបលក់។ ពួកគេគ្រោងនឹងបើកដំណើរការក្នុងឆ្នាំ ២០២៤។
ក្រុមហ៊ុម Ascott នឹងទិញទ្រព្យសកម្មដែលគ្រប់គ្រងស្របច្បាប់នៅទីក្រុងប៉ារីស ដែលនឹងត្រូវកែលម្អបន្ថែម និងស្ថិតក្រោមយីហោ lyf របស់ខ្លួន ដែលធ្វើឲ្យអចលនទ្រព្យរស់នៅរួមគ្នាលើកដំបូងរបស់ក្រុមហ៊ុន Ascott នៅអឺរ៉ុប។ ដោយមានឈ្មោះថា livelyfhere Gambetta Paris អចលនទ្រព្យមាន ១៣៩ យូនីតមួយនេះ មានទីតាំងស្ថិតនៅមណ្ឌលទី ២០ នៅជិតវិចិត្រសាល រោងភាពយន្ត ហាងកាហ្វេ និងភោជនីយដ្ឋាន ទីកន្លែងសិល្បៈ និងតន្ដ្រីតាមដងផ្លូវ។
ក្រុមហ៊ុន Ascott ក៏នឹងទិញអចលនទ្រព្យ Somerset Metropolitan West Hanoi ដែលមាន ៣៦៤ យូនីតផងដែរ។ ទ្រព្យសកម្មនេះមានទីតាំងស្ថិតនៅខណ្ឌអាជីវកម្មកណ្ដាលថ្មីរបស់ទីក្រុងហាណូយ និងនៅជិតទីភ្នាក់ងាររដ្ឋាភិបាលមួយចំនួន ព្រមទាំងសាជីវកម្មក្នុងស្រុក និងអន្តរជាតិជាច្រើន។ អចលនទ្រព្យនេះក៏មានចម្ងាយបើកបរ ១០ នាទីពីមជ្ឈមណ្ឌលសន្និសីទជាតិវៀតណាម និងបើកបររយៈពេលកន្លះម៉ោងពីព្រលានយន្តហោះអន្តរជាតិ Noi Bai ផងដែរ។
ក្រុមហ៊ុនបានបន្តថា ការទិញអចលនទ្រព្យនេះនឹងបង្កើនទ្រព្យសកម្មមូលនិធិសរុបរបស់ក្រុមហ៊ុន Ascott ស្ថិតក្រោមការគ្រប់គ្រង (FUM) ដល់ប្រហែល ៨ ពាន់លានដុល្លារ។ នឹងមានអចលនទ្រព្យចំនួន ៨ ស្ថិតក្រោម ASRGF ដោយមានប្រហែល ១៧០០ យូនីត៕ Straitstimes-ANN/LA