ភ្នំពេញៈ មន្ត្រីជាន់ខ្ពស់រដ្ឋាភិបាលបានថ្លែងនាពេលថ្មីៗនេះថា កម្ពុជាកំពុងពិចារណាលើផែនការបង្កើនល្បឿនចាក់វ៉ាក់សាំងឱ្យបានលឿន ព្រមទាំងអាចនឹងឈានដល់ការចាក់វ៉ាក់សាំងដូសទី ៣ ឱ្យប្រជាពលរដ្ឋរបស់ខ្លួន ដើម្បីផ្តល់ឱកាសឱ្យរដ្ឋាភិបាលអាចបើកប្រទេស និងសេដ្ឋកិច្ចឡើងវិញក្នុងពេលដ៏ឆាប់ នៅក្នុងបរិបទថ្មីនៃការឆ្លងរាលដាលជំងឺកូវីដ ១៩។
លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងពិធីទទួលវ៉ាក់សាំងចំនួន ១ លានដូសដែលបញ្ជាទិញពីប្រទេសចិននៅព្រលានយន្តហោះអន្តរជាតិភ្នំពេញកាលពីចុងសប្តាហ៍មុនថា ជាមួយនឹងសម្ទុះនៃការទទួលបានវ៉ាក់សាំងក្នុងល្បឿនដ៏លឿន កម្ពុជានឹងរៀបចំផែនការចាក់វ៉ាក់សាំងឱ្យប្រជាពលរដ្ឋបានលឿនជាងមុន ហើយក៏នឹងសិក្សាលទ្ធភាពនៃការចាក់វ៉ាក់សាំងឱ្យក្មេងតូចៗ ព្រមទាំងការចាក់ដូសទី ៣ ដល់ប្រជាជនទូទៅផងដែរ។ លោកបន្តថា បើសិនចំនួនវ៉ាក់សាំងដែលកម្ពុជាបញ្ជាទិញ បានមកដល់តាមការគ្រោងទុក កម្ពុជានឹងមានវ៉ាក់សាំង ២០ លានដូសនៅត្រឹមខែសីហា ខាងមុខ។
លោកថ្លែងថា៖ «បន្តិចទៀតយើងនឹងមានផែនការប្រជុំមួយដើម្បីពិនិត្យលទ្ធភាពកែសម្រួលឡើងវិញនៃផែនការចាក់វ៉ាក់សាំង ដោយយើងនឹងគិតដល់ក្មេងមានអាយុក្រោម ១៨ ឆ្នាំថា តើគួរចាក់បាន ឬមិនបាន និងលទ្ធភាពមួយទៀតដែលកំពុងសិក្សាផងដែរ គឺការចាក់វ៉ាក់សាំងដូសទី ៣។ នេះជាការគិតរបស់រដ្ឋាភិបាល ១ ជំហានទៅមុនឱ្យហើយ»។
គិតត្រឹមថ្ងៃទី ២៦ ខែមិថុនា ឆ្នាំ ២០២១ ប្រទេសកម្ពុជាបានទទួលវ៉ាក់សាំងទាំងការបញ្ជាទិញ ការផ្តល់ជំនួយពីមជ្ឈមណ្ឌលកូវ៉ាក់ និងពីប្រទេសចិន សរុបជាង ១០ លានដូស។
លោក វិស្សុត លើកឡើងទៀតថា ការចាក់វ៉ាក់សាំងបានលឿន និងប្រកបដោយប្រសិទ្ធភាព គឺពិតជាមានសារៈសំខាន់ណាស់ក្នុងការជំរុញកំណើនសេដ្ឋកិច្ចកម្ពុជាឱ្យមានសម្ទុះឡើងវិញ ព្រោះបើមិនអាចកាត់បន្ថយ ឬទប់ស្កាត់ការឆ្លងកូវីដ ១៩ បានការបើកប្រទេស ឬសេដ្ឋកិច្ចឡើងវិញក៏ជួបបញ្ហាដែរ។
ធនាគារពិភពលោកកាលពីថ្ងៃ ១៧ ខែមិថុនា បានព្យាករថា កំណើនសេដ្ឋកិច្ចកម្ពុជានឹងកើនឡើង ៤ ភាគរយក្នុងឆ្នាំ ២០២១ ដោយសារតែការចាប់ផ្ដើមកម្មវិធីចាក់វ៉ាក់សាំងប្រឆាំងជំងឺកូវីដ ១៩ ដ៏រហ័ស និងការស្ទុះងើបឡើងវិញតម្រូវការពិភពលោក។
ប៉ុន្តែធនាគារមួយនេះក៏បានព្រមានថា ខ្លួនក៏បានពិនិត្យមើលឃើញនូវសេណារីយោអវិជ្ជមានផងដែរដែលក្នុងនោះអាចថា កម្មវិធីចាក់វ៉ាក់សាំងមានភាពយឺតយ៉ាវ ហើយវិធានការបិទខ្ទប់ទូទាំងប្រទេសនៅតែមានភាពញឹកញាប់ និងអូសបន្លាយពេលយូរ។ ក្រោមលក្ខខណ្ឌបែបនេះ សេដ្ឋកិច្ចតាមការព្យាករនឹងមានកំណើនតែ ១ ភាគរយប៉ុណ្ណោះក្នុងឆ្នាំ ២០២១ នេះ។
លោក Ly Sodeth សេដ្ឋវិទូជាន់ខ្ពស់នៅធនាគារពិភពលោកបានឱ្យដឹងនៅក្នុងអំឡុងពេលការធ្វើបទបង្ហាញថា កម្ពុជាបានពន្លឿនកម្មវិធីការចាក់វ៉ាក់សាំងការពារជំងឺកូវីដ ១៩ ដល់ពលរដ្ឋដែលជាសញ្ញាវិជ្ជមានមួយនៃទំនុកចិត្តសេដ្ឋកិច្ច។
លោកថ្លែងថា៖ «ជាមួយកម្មវិធីការចាក់វ៉ាក់សាំងការពារជំងឺកូវីដ ១៩ បានយ៉ាងឆាប់រហ័ស កម្ពុជាជាប្រទេសឈានមុខគេទី ២ នៅអាស៊ាននៃការពន្លឿនការចាក់វ៉ាក់សាំងកូវីដ ១៩»។ ប៉ុន្តែលោកថា ការចាក់វ៉ាក់សាំងបានលឿននេះ ដោយសារកត្តាភូមិសាស្ត្រនៅរាជធានីភ្នំពេញ និងខេត្តកណ្តាលដែលមានប្រជាពលរដ្ឋប្រមូលម្តុំដែលអំណោយផលក្នុងការមកចាក់វ៉ាក់សាំង ប៉ុន្តែលោកថាសម្រាប់ការចាក់វ៉ាក់សាំងតាមខេត្តអាចនឹងចំណាយពេលច្រើនដោយសារបញ្ហាទីតាំងអាចឆ្ងាយៗ។
ការផ្ទុះឡើងនៃការឆ្លងរាលដាលជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ដែលបានបន្តអូសបន្លាយមកដល់ពេលនេះបានធ្វើឱ្យចង្វាក់ផលិតកម្មនៅកម្ពុជាទទួលរងផលប៉ះពាល់យ៉ាងដំណំ ដែលអាចនឹងធ្វើឱ្យប៉ះពាល់ដល់ការព្យាករកំណើនសេដ្ឋកិច្ចឆ្នាំ ២០២១ នេះផងដែរ។
លោក វិស្សុត ដែលទទួលស្គាល់បញ្ហានេះ បាននិយាយថា ក្នុងរយៈពេល ៥ ខែមកនេះ កម្ពុជានៅតែអាចទប់ទល់បាន ដោយមិនធ្លាក់ខ្លាំងពេកទេ ប៉ុន្តែបើធៀបនឹងការរំពឹងកំណើនសេដ្ឋកិច្ចឆ្នាំ ២០២១ នឹងមាន ៤ ភាគរយនោះ វានឹងមានប៉ះពាល់ខ្លះ។
លោកបន្ថែមថា ទោះយ៉ាងណាកម្រិតនៃការប៉ះពាល់នេះ គឺត្រូវចាំមើលស្ថានភាពនៃការឆ្លងរាលដាលកូវីដ ១៩ ក្នុងប្រទេសរហូតដល់ចុងឆ្នាំសិន បើសេដ្ឋកិច្ចអាចងើបឡើងវិញបានចាប់ពីខែកញ្ញា ឬខែតុលា កម្ពុជានៅសង្ឃឹមថា អត្រាកំណើន ៤ ភាគរយឆ្នាំនេះនឹងសម្រេចបាន។
លោកថ្លែងថា៖ «ស្ថានភាពសេដ្ឋកិច្ចរបស់យើង បើធ្វើការវាយតម្លៃគឺអាចថានៅទប់ទល់បាន ប៉ុន្តែវាមិនល្អដូចការរំពឹងទុករបស់យើងទាំងស្រុងទេ។ យើងមើលឃើញថា សភាពការណ៍សេដ្ឋកិច្ចក្នុងរយៈពេល ៥ ខែដំបូងឆ្នាំនេះ ឆ្លុះបញ្ចាំងថា សេដ្ឋកិច្ចកម្ពុជាទោះជារងផលប៉ះពាល់ពីការផ្ទុះនៃព្រឹត្តិការណ៍ ២០ កុម្ភៈក៏ដោយ ពីការបិទខ្ទប់ក៏ដោយ ប៉ុន្តែនៅមានសមត្ថភាពមួយរស់បាន»។
លោកបន្តថា៖ «ខ្ញុំសូមជម្រាបថា ការនាំចេញក្នុងរយៈពេល ៥ ខែនេះបានឆ្លុះបញ្ចាំងថា ការនាំចេញរបស់កម្ពុជានៅតែមានភាពរឹងមាំ ត្រង់ថាទំនិញយើងនាំចេញទៅក្រៅ ដកមាសចេញ គឺនៅតែកើនឡើង ១៧ ភាគរយ»។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់ប្រាប់ ភ្នំពេញ ប៉ុស្តិ៍ថា ការបង្កើនល្បឿនចាក់វ៉ាក់សាំងដើម្បីឈានឆ្ពោះទៅបើកទ្វារទទួលភ្ញៀវទេសចរ និងវិនិយោគិនបរទេសឱ្យបានឆាប់ នឹងធ្វើឱ្យសេដ្ឋកិច្ចកម្ពុជាទទួលបានផលវិជ្ជមានច្រើន។ ក្រៅពីនេះកម្ពុជាក៏ទើបទទួលបានទីផ្សារថ្មីៗពីកិច្ចព្រមព្រៀងពាណិជ្ជកម្មសេរីទ្វេភាគីជាមួយចិន និងកូរ៉េផងដែរ។
លោកនិយាយថា៖ «ចំនួន ការចាក់វ៉ាក់សាំងនឹងផ្តល់ទំនុកចិត្តរបស់វិនិយោគិនក្នុងការចូលមកបណ្តាក់ទុន ព្រមទាំងជំរុញកម្លាំងផលិតឱ្យមានសម្ទុះកាន់តែខ្លាំង»។
ទិន្នន័យក្រសួងពាណិជ្ជកម្មឱ្យដឹងថា ទំហំពាណិជ្ជកម្មអន្តរជាតិដែលកម្ពុជាសម្រេចបានក្នុងឆ្នាំ ២០២០ មានតម្លៃសរុប ៣៥ ៨០៥,៨៥ លានដុល្លារ កើនឡើង ២,៥៤ ភាគរយធៀបនឹងឆ្នាំ ២០១៩ ក្នុងនោះការនាំចេញមានតម្លៃ ១៧ ២១៥,៣៧ លានដុល្លារ កើន ១៦,៧២ ភាគរយ និងនាំចូលមានតម្លៃ ១៨ ៥៩០,៤៨ លានដុល្លារធ្លាក់ ៧,៨៤ ភាគរយ៕ LA
វីដេអូ៖