ភ្នំពេញៈ សហព័ន្ធស្រូវអង្ករកម្ពុជា (ស.អ.ក) និងគ្រឹះស្ថានមីក្រូហិរញ្ញវត្ថុ AMK បាននិងកំពុងសិក្សាពីលទ្ធភាពផ្តល់ហិរញ្ញប្បទានដល់វិស័យស្រូវអង្កររវាងភាគីទាំង ២។
លោក ចាន់ សុឃាំង អនុប្រធាន ស.អ.ក និងជាប្រធានគណៈកម្មាធិការប្រតិបត្តិទទួលបន្ទុកផ្នែកវិនិយោគ និងហិរញ្ញវត្ថុរបស់ ស.អ.ក និងលោក លន់ យ៉េង អគ្គលេខាធិការ ស.អ.ក បានជួបពិភាក្សាតាមរយៈប្រព័ន្ធអនឡាញ កាលពីថ្ងៃទី ២៩ កក្កដា ជាមួយនឹងក្រុមការងារជាន់ខ្ពស់របស់គ្រឹះស្ថានមីក្រូហិរញ្ញវត្ថុ AMK ដើម្បីសិក្សាស្វែងយល់អំពីលទ្ធភាពនៅក្នុងហិរញ្ញប្បទានសម្រាប់វិស័យស្រូវអង្ករ ពិសេសទៅដល់រោងម៉ាស៊ីនកិនស្រូវ និងសហគមន៍កសិកម្ម។
ក្នុងជំនួបនេះ ស.អ.ក បានលើកឡើងអំពីស្ថានភាពនៃវិស័យស្រូវអង្ករកម្ពុជា និងសក្តានុពលនៃរោងម៉ាស៊ីនកិនស្រូវនិងសហគមន៍កសិកម្ម ដែលជាសមាជិក ស.អ.ក ហើយអ្វីដែលជាចាំបាច់មិនអាចខ្វះបាននោះគឺ ហិរញ្ញប្បទាន សម្រាប់ជាដើមទុនបង្វិល ការទ្រទ្រង់អាជីវកម្ម និងពង្រីកអាជីវកម្ម។
ស.អ.ក បានឱ្យដឹងថា ក្រុមការងាររបស់គ្រឹះស្ថានមីក្រូហិរញ្ញវត្ថុ នឹងចងក្រងនូវការវាយតម្លៃការសិក្សាស៊ីជម្រៅទៅលើសក្តានុពលនិងកាលានុវត្តភាពនាពេលបច្ចុប្បន្ន និងពេលអនាគតរបស់វិស័យស្រូវអង្ករកម្ពុជា ហើយនឹងបន្តឈានទៅដល់ការរៀបចំផែនការ ក្នុងការសម្រួល និងពង្រីកនូវការផ្តល់ទាំងហិរញ្ញប្បទាន និងឥណទានផ្សេងៗសម្រាប់វិស័យស្រូវអង្ករ។
ស.អ.ក សង្ឃឹមថា៖ «ទៅថ្ងៃមុខ ការសហការលើការផ្តល់កម្ចី ក៏ដូចជា ការទ្រទ្រង់ហិរញ្ញវត្ថុចំពោះវិស័យស្រូវអង្ករពីសំណាក់ធនាគារពាណិជ្ជ និងគ្រឹះស្ថានមីក្រូហិរញ្ញវត្ថុនឹងកើនឡើង បន្ថែមពីលើយន្តការរបស់រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ ដែលមានដូចជា កញ្ចប់ឥណទានសម្រាប់បណ្តារោងម៉ាស៊ីនកិនស្រូវ និងក្រុមហ៊ុនកិនកែច្នៃ និងនាំចេញអង្ករ ដើម្បីប្រមូលទិញស្រូវ ពីបងប្អូនប្រជាកសិករ និងការធានាឥណទានផ្សេងទៀតផងដែរ»។
ទំព័រហ្វេសប៊ុករបស់លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានផ្សាយនៅថ្ងៃទី ៣១ កក្កដានេះ បង្ហាញថា កម្ពុជាបាននាំចេញអង្ករបានចំនួន ៣០៩ ៨៦៥ តោន ក្នុងរយៈពេល ៧ ខែដើមឆ្នាំ ២០២១នេះ ធ្លាក់ចុះ ២៧,២៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ការនាំចេញអង្ករធ្លាក់ចុះនេះដោយសារបញ្ហាកង្វះទូកុងតឺន័រ និង តម្លៃដឹកជញ្ជូនឡើងថ្លៃខ្ពស់។
លោករដ្ឋមន្រ្តី បានឱ្យដឹងទៀតថា ក្នុងរយៈពេល ៧ ខែដើមឆ្នាំនេះ កម្ពុជាក៏បាននាំចេញស្រូវបានចំនួនជាង ២ លានតោន ទៅកាន់ប្រទេសវៀតណាមកើនឡើង ៨១,៣៤ ភាគរយ ធៀបនឹងរយៈពេលដូចគ្នាកាលពីឆ្នាំមុន៕