អ្នកបើកម៉ូតូជិះកាត់មុខអគារផ្សារមូលបត្រកម្ពុជានៅខណ្ឌដូនពេញ។ ហ៊ាន រង្សី
ភ្នំពេញៈ ក្រុមហ៊ុនផ្សារមូលបត្រកម្ពុជា ផ.ម.ក. បានបំភ្លឺសាធារណជនថា ខ្លួនមិនជាប់ពាក់ព័ន្ធក្នុងវិវាទរបស់ក្រុមហ៊ុន ហ្គោលអេហ្វអិកស៍ អ៊ិនវេសម៉ិន (GoldFX) នោះទេ។
សេចក្តីស្រាយបំភ្លឺរបស់ ផ.ម.ក. ផ្សាយនៅថ្ងៃទី ៣ ខែសីហាថា ដោយសារនាពេលថ្មីៗនេះមានសាធារណជន និងសារព័ត៌មានមួយចំនួនមានការភាន់ច្រឡំ និងសួរសំណួរមកកាន់ ផ.ម.ក. ជារឿយៗពាក់ព័ន្ធនឹងករណីវិវាទរបស់ក្រុមហ៊ុន ហ្គោលអេហ្វអិកស៍ ដែលបាននិងកំពុងស្ថិតក្រោមការដោះស្រាយដោយនិយតករមូលបត្រកម្ពុជា (ន.ម.ក)។
សេចក្តីជូនដំណឹងបានសរសេរថា៖ «ផ.ម.ក.សូមស្រាយបំភ្លឺថា ផ.ម.ក គឺជាសហគ្រាសសាធារណៈដែលមានភាគហ៊ុនរបស់រាជរដ្ឋាភិបាលកម្ពុជាតំណាងដោយក្រសួងសេដ្ឋកិច្ច និងហិរញ្ញវត្ថុចំនួន ៥៥ ភាគរយ និងផ្សារមូលបត្រកូរ៉េ (KRX) ចំនួន ៤៥ ភាគរយ។ ផ.ម.ក ទទួលបានអាជ្ញាប័ណ្ណពី ន.ម.ក ធ្វើអាជីវកម្មជាប្រតិបត្តិករទីផ្សារមូលបត្រ ប្រតិបត្តិករប្រព័ន្ធផាត់ទាត់ និងទូទាត់មូលបត្រ និងប្រតិបត្តិកររក្សាទុកមូលបត្រ។
បច្ចុប្បន្ន ប្រភេទមូលបត្រដែលអាចចុះបញ្ជី និងដាក់ឱ្យជួញដូរបានទៅ ផ.ម.ក.រួមមាន មូលបត្រកម្មសិទ្ធិ (ភាគហ៊ុន) និងមូលបត្របំណុល (បណ្ណបំណុល) ដែលជាមូលបត្រដើមបោះផ្សាយដោយក្រុមហ៊ុនក្នុងស្រុក។
សេចក្តីបំភ្លឺបន្តថា ការវិនិយោគលើភាគហ៊ុនរបស់ក្រុមហ៊ុនមួយធ្វើឱ្យវិនិយោគិនក្លាយជាម្ចាស់ភាគហ៊ុនរបស់ក្រុមហ៊ុននោះ ហើយការវិនិយោគលើសញ្ញាបណ្ណវិញធ្វើឱ្យវិនិយោគិន ក្លាយជាម្ចាស់បំណុល។
ចំណែកឯឧបករណ៍និស្សន្ទ ដែលជាមូលបត្រមានតម្លៃយោងតាមតម្លៃរបស់មូលបត្រដើម ដូចជា លោហធាតុមានតម្លៃ រូបិយប័ណ្ណ អត្រាការប្រាក់ភាគហ៊ុន និងសន្ទស្សន៍ជាដើម ពុំមានការជួញដូរនៅ ផ.ម.ក ទេ។ កន្លងមកមានការប្រើប្រាស់ពាក្យ «ភាគហ៊ុន» ឬ «ហ៊ុន» ដើម្បីសំដៅដល់ឧបករណ៍និស្សន្ទទាំងនេះជាការមិនត្រឹមត្រូវទេ។
ផ.ម.ក មានក្រុមហ៊ុនឈ្មួញជើងសាមូលបត្រដែលជាសមាជិកចំនួន ៩។ វិនិយោគិនដែលមានបំណងជួញដូរមូលបត្រកម្មសិទ្ធិ និងមូលបត្របំណុលដែលចុះបញ្ជីនៅ ផ.ម.ក. ត្រូវមានគណនីជួញដូរនៅក្រុមហ៊ុនឈ្មួញជើងសាមូលបត្រណាមួយក្នុងចំណោមក្រុមហ៊ុនទាំង ១១ និងអាចដាក់បញ្ហាជួញដូរតាមរយៈក្រុមហ៊ុនឈ្មួញជើងសាមូលបត្ររបស់ខ្លួន ឬដោយខ្លួនឯងផ្ទាល់តាមប្រព័ន្ធជួញដូរចល័ត (MTS)។
បញ្ជីមូលបត្រកម្មសិទ្ធិ និងមូលបត្របំណុល រួមទាំងបញ្ជីក្រុមហ៊ុនឈ្មួញជើងសាមូលបត្រទាំង ១១ ដែលជាសមាជិករបស់ ផ.ម.ក ត្រូវបានភ្ជាប់មកជាមួយនៅខាងក្រោម។
វិនិយោគិនមិនអាចជួញដូរមូលបត្រកម្មសិទ្ធិ និងមូលបត្របំណុលជាមួយក្រុមហ៊ុនឈ្មួញជើងសាមូលបត្រដែលមិនស្ថិតនៅក្នុងបញ្ជីសមាជិករបស់ ផ.ម.ក. ឡើយ។ ក្នុងន័យនេះ ផ.ម.ក សូមលើកទឹកចិត្តវិនិយោគិនគួរសួរបញ្ជាក់ពីប្រភេទផលិតផលហិរញ្ញវត្ថុដែលអាចជួញដូរបានឱ្យបានច្បាស់លាស់សិនមុននឹងបើកគណនីជួញដូរជាមួយក្រុមហ៊ុនឈ្មួញជើងសាណាមួយ។
រាល់ការជួញដូរនៅ ផ.ម.ក. គឺប្រព្រឹត្តឡើងដោយតម្លាភាពគោរពតាមនីតិវិធី បទប្បញ្ញត្តិដែលមានចែងនៅក្នុងវិធាន ជួញដូរ និងបទប្បញ្ញត្តិពាក់ព័ន្ធជាធរមាន។
វិនិយោគិនទាំងអស់ក៏អាចតាមដានពិនិត្យមើលសមតុល្យសាច់ប្រាក់មូលបត្រ ក៏ដូចជា ប្រតិបត្តិការជួញដូរទាំងអស់របស់ខ្លួនបានភ្លាមៗផងដែរ។ ផ.ម.ក ខិតខំឱ្យអស់លទ្ធភាព ដើម្បីរក្សានូវបរិយាកាសជួញដូរដែលប្រកបដោយភាពយុត្តិធម៌ និងតម្លាភាព ដើម្បីរក្សាទំនុកចិត្ត និងផលប្រយោជន៍របស់វិនិយោគិននានាទាំងក្នុង និងក្រៅប្រទេស៕ LA
វីដេអូ៖
