ប្រជាកសិករបង្ហាញគ្រាប់ស្វាយចន្ទី ដែលទើបប្រមូលផលបាននៅខេត្តកំពង់ធំ នាពេលកន្លងមក។ ហុង មិនា
ភ្នំពេញៈ កម្ពុជាបាននាំចេញគ្រាប់ស្វាយចន្ទីចំនួនជាង ៨៦ ម៉ឺនតោន ក្នុងរយៈពេល ៧ ខែ ដើមឆ្នាំ ២០២១ កើនជាង ៣០០ ភាគរយ ធៀបនឹងរយៈពេលដូចគ្នាឆ្នាំមុន។ ប្រទេសវៀតណាម គឺជាទីផ្សារចម្បងជាងគេសម្រាប់គ្រាប់ស្វាយចន្ទីរបស់កម្ពុជា។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទឱ្យដឹងថា ក្នុងរយៈពេល ៧ ខែដើមឆ្នាំនេះ កម្ពុជាបាននាំចេញគ្រាប់ស្វាយចន្ទីចំនួន ៨៦៦ ២០៧,៧៧ តោន កើនឡើង ៣៤៥,២៩ ភាគរយបើធៀបនឹងរយៈពេលដូចគ្នាកាលពីឆ្នាំមុន។
របាយការណ៍ខាងលើឱ្យដឹងទៀតថា ក្នុងនោះការនាំទៅវៀតណាមមានចំនួន ៨៥៩ ២៩០ តោន, ប្រទេសចិន ៣ ៦៣៩,៥ តោន ប្រទេសថៃ ៣ ១៩៩,៤០ តោន, ជប៉ុនចំនួន ៣៤,៤៣ តោន, ឥណ្ឌា ១៧ តោន, អារ៉ាប់ ១៤,៥១ តោន, បង់ក្លាដែស ៧ តោន, កូរ៉េ ៣,៩១ តោន, និងឡាវ ២ តោន។
អ្នកស្រី អ៊ិន ឡៃហួត ម្ចាស់សិប្បកម្មកែច្នៃគ្រាប់ស្វាយចន្ទីជ័យសំបូរ ប្រាប់ភ្នំពេញប៉ុស្តិ៍ថា គ្រាប់ស្វាយចន្ទីកម្ពុជាកំពុងមានតម្រូវការខ្ពស់នៅលើទីផ្សារអន្តរជាតិ។ ជាក់ស្តែងសិប្បកម្មរបស់អ្នកស្រីបានផ្គត់ផ្គង់គ្រាប់ស្វាយចន្ទីឱ្យក្រុមហ៊ុន Top Planning Japan Co., Ltd ចន្លោះ ៨៩ តោនជារៀងរាល់ខែ ដើម្បីចែកចាយនៅក្នុងទីផ្សារប្រទេសជប៉ុន។
អ្នកស្រីប្រាប់ថា៖ «គ្រាប់ស្វាយចន្ទីសហគមន៍ខ្ញុំកំពុងមានទីផ្សារល្អ។ យើងផលិតផ្គត់ផ្គង់ឱ្យក្រុមហ៊ុននៅជប៉ុនជារៀងរាល់ខែនូវផលិតផលគ្រាប់ស្វាយចន្ទីគ្រប់ប្រភេទដែលមាននៅក្នុងរោងចក្ររបស់យើង»។
បច្ចុប្បន្នរដ្ឋាភិបាលកម្ពុជាបាន និងកំពុងរៀបចំសេចក្តីព្រាងគោលនយោបាយជាតិស្វាយចន្ទីនៅក្នុងគោលបំណង ដើម្បីពង្រឹងសមត្ថភាពដាំដុះ កែច្នៃ និងនាំចេញផលិតផលស្វាយចន្ទីទៅកាន់ទីផ្សារអន្តរជាតិឱ្យបានកាន់តែច្រើន។
លោក រាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារចម្រុះរៀបចំគោលនយោបាយស្វាយចន្ទីកម្ពុជា បានលើកឡើងកាលពីខែមិថុនាថា ស្វាយចន្ទី គឺជាទំនិញមានសក្តានុពលដែលកម្ពុជាមានទាំងការដាំដុះ និងការផ្គត់ផ្គង់លើទីផ្សារក្នុងស្រុក និងនាំចេញ។
លោកថ្លែងថា៖ «គោលបំណងនៃសេចក្តីព្រាងគោលនយោបាយជាតិ គឺប្រែក្លាយកម្ពុជាឱ្យទៅជាប្រទេសផលិត និងផ្គត់ផ្គង់ផលិតផលស្វាយចន្ទីដ៏សំខាន់សម្រាប់បម្រើទីផ្សារក្នុងស្រុក និងពិភពលោក»។
របាយការណ៍ក្រសួងកសិកម្មឱ្យដឹងថា ក្នុងឆ្នាំ ២០២០ កម្ពុជានាំចេញគ្រាប់ស្វាយចន្ទីចំនួន ២១៨ ៩៨១ តោនកើនឡើង ៨,២៤ ភាគរយពីចំនួន ២០២ ៣១៨ តោនក្នុងឆ្នាំ ២០១៩។ កម្ពុជាមានផ្ទៃដីចម្ការស្វាយចន្ទីជាង ៥០ ម៉ឺនហិកតាដោយ ១ ហិកតា អាចផ្តល់ផលមធ្យម ១,៥ តោន ក្នុង ១ ឆ្នាំ៕ LA
វីដេអូ៖
