កម្មករលីការុងជីកសិកម្មពីក្នុងឃ្លាំងស្តុក ទៅដាក់លើរថយន្ត។ រូបថត សហការី
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា កម្ពុជាបាននាំចូលថ្នាំ កសិកម្ម និងជីកសិកម្ម ចំនួនជាង ៩០ ម៉ឺនតោននៅក្នុងរយៈពេល ៥ ខែដំបូងឆ្នាំ ២០២១ ដែលចំនួននេះបានកើនឡើងខ្ពស់បើធៀបនឹងឆ្នាំមុន។ នេះបើយោងតាមសេចក្តីប្រកាសព័ត៌មានរបស់ក្រសួងកសិកម្ម។
សេចក្តីប្រកាសព័ត៌មានកាលពីថ្ងៃទី ៩ ខែសីហា ឱ្យដឹងថា គិតត្រឹមខែឧសភា ឆ្នាំ ២០២១ ក្រុមហ៊ុននានាបាននាំចូលថ្នាំកសិកម្មចំនួន ៤៧ ៤០៩ តោន និងជីកសិកម្ម ៨៥៨ ៦៣២ តោន។ ផលិតកម្មក្នុងវិស័យកសិកម្មកម្ពុជាក្នុងឆ្នាំ ២០២១ មានសម្ទុះកើនឡើងគួរឱ្យកត់សម្គាល់ដែលនាំឱ្យតម្រូវការថ្នាំកសិកម្ម និងជីកសិកម្ម ក៏មានសម្ទុះកើនឡើងខ្ពស់។ ការនេះបាននាំឱ្យតម្លៃថ្នាំកសិកម្ម និងជីកសិកម្មក៏ហក់ឡើងខ្ពស់។
ក្រសួងក៏បានពន្យល់ថា ជីកសិកម្មឆ្នាំនេះមានតម្លៃខ្ពស់ជាងឆ្នាំកន្លងទៅដោយសារតែកត្តាសំខាន់ៗមួយចំនួនដូចជា នៅបណ្តាប្រទេសផលិតថ្នាំកសិកម្ម និងជីកសិកម្មនាំចេញ មិនអាចផលិតឆ្លើយតបបានតាមការបញ្ជាទិញពីកម្ពុជា។ វត្ថុធាតុដើមមានការខ្វះខាតក្នុងការផ្គត់ផ្គង់ពីប្រទេសផលិតធំៗមានដូចជា ប្រទេសចិន ម៉ាឡេស៊ី និងប្រទេសអារ៉ាប់។
សេចក្តីប្រកាសព័ត៌មានបន្តទៀតថា ផលិតកម្មជីកសិកម្មក៏ត្រូវបានកាត់បន្ថយចំនួនកម្លាំងពលកម្មដោយសារបញ្ហានៃការរីករាលដាលជំងឺកូវីដ ១៩ ដូចជានៅក្នុងប្រទេសចិន ថៃ និងប្រទេសវៀតណាមក៏ជាមូលហេតុនាំឱ្យតម្លៃកើនឡើងផងដែរ ខណៈការដឹកជញ្ជូនត្រូវប្រើពេលយូរជាងមុនដែលបណ្តាលមកពីការរីករាលដាលជំងឺកូវីដ ១៩ (មានការប្រុងប្រយ័ត្នទៅលើផ្នែកសុខភាព និងការត្រួតពិនិត្យតាមវិធានសុខាភិបាល)។
ទន្ទឹមនឹងនេះ ការបញ្ជាទិញពីប្រទេសកម្ពុជា បណ្តាប្រទេសផ្សេងៗក៏បានបញ្ជាទិញដូចគ្នា ហេតុនេះការផ្គត់ផ្គង់មិនគ្រប់តាមតម្រូវការ ចំណែកការចំណាយលើការរៀបចំវេចខ្ចប់ឡើងវិញ ដែលត្រូវការសម្បកវេចខ្ចប់បោះពុម្ពជាភាសាខ្មែរ ព្រមទាំងក្រុមហ៊ុនផ្គត់ផ្គង់ជីថ្នាំកសិកម្មមួយចំនួនមិនបានទៅទិញដល់រោងចក្រផលិតផ្ទាល់ដោយឈ្មួញកណ្តាល ជាហេតុធ្វើឱ្យជីថ្នាំកសិកម្មថ្លៃជាងតម្លៃនៅរោងចក្រផលិត។
សេចក្តីប្រកាសព័ត៌មានបានបន្ថែមទៀតថា៖ «តម្រូវការជីកសិកម្មក្នុងស្រុកមានការកើនឡើងច្រើន ដោយសារអ្នកវិនិយោគមួយចំនួនប្តូរពីវិស័យផ្សេងៗមកវិនិយោគលើវិស័យកសិកម្ម។ ប្រទេសកម្ពុជាមិនទាន់មានលទ្ធភាពអាចផលិតជីកសិកម្មបាននៅឡើយ (មានលទ្ធភាពផលិតជីធម្មជាតិ និងជីសរីរាង្គតែប៉ុណ្ណោះ)»។
លោក យុន សុផាត អគ្គនាយកក្រុមហ៊ុន Huy Yun Agriculture ដែលជាក្រុមហ៊ុន ផលិតជីធម្មជាតិក្នុងស្រុកប្រាប់ភ្នំពេញប៉ុស្តិ៍ថា ទីផ្សារជីធម្មជាតិរបស់ក្រុមហ៊ុនលោកក៏មានតម្រូវការខ្ពស់ក្នុងអំឡុងពេលនេះ ប៉ុន្តែតម្លៃមិនបានកើនឡើងនោះទេ។
លោកបានប្រាប់ថា៖ «យើងជួបបញ្ហាការប្រកួតប្រជែងជាមួយនឹងជីកសិកម្មនាំចូលគ្មានគុណភាព ហើយលក់ទម្លាក់តម្លៃដែលធ្វើឱ្យយើងជួបការលំបាកយ៉ាងខ្លាំង ព្រោះក្រុមហ៊ុនយើងផ្តោតខ្លាំងលើគុណភាពសម្រាប់អ្នកប្រើប្រាស់»។ ក្រុមហ៊ុនយើងបានផ្តោតលើការផ្តល់ការបណ្តុះបណ្តាលបច្ចេកទេសដល់ប្រជាកសិករឥតគិតថ្លៃដែលនេះជាយុទ្ធសាស្ត្រក្រុមហ៊ុន ដើម្បីលើកស្ទួយជីវភាពកសិករខ្មែរ»។
ក្នុងឆ្នាំ ២០២០ កម្ពុជាបាននាំចូលថ្នាំកសិកម្មចំនួន ១០៣ ០០៥ តោន និងជីកសិកម្មចំនួន ១ ៤០៦ ៧៧៥ តោន។ នេះបើតាមក្រសួងកសិកម្ម រុក្ខាប្រមាញ់ និងនេសាទ៕ LA
វីដេអូ៖
