SME bank ប្រកាសដាក់ដំណើរការគម្រោងសហហិរញ្ញប្បទានជំហានទី២ ក្នុងគោលបំណងជួយជំរុញសកម្មភាពអាជីវកម្មរបស់ SMEs។ ហេង ជីវ័ន
ភ្នំពេញៈ ធនាគារសហគ្រាសធុនតូច និងមធ្យមកម្ពុជា (SME bank) បានប្រកាសដាក់ឱ្យដំណើរការជាផ្លូវការ «គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី ២» ក្នុងគោលបំណងជួយជំរុញសកម្មភាពអាជីវកម្មរបស់ SMEs ក្នុងស្រុកឱ្យបន្តដំណើរការរបស់ខ្លួនក្នុងអំឡុងពេលដ៏លំបាកនៃការរីករាលដាលជំងឺកូវីដ ១៩ ក្នុងសហគមន៍។
យោងតាមសេចក្តីប្រកាសព័ត៌មាននាថ្ងៃទី ១៦ ខែសីហា ឱ្យដឹងថា ធនាគារសហគ្រាសធុនតូច និងមធ្យមកម្ពុជាបានដាក់ឱ្យដំណើរការ «គម្រោងសហហិរញ្ញប្បទានទ្រទ្រង់សហគ្រាសធុនតូច និង មធ្យម ជំហាន ទី ២» បន្ទាប់ពីទទួលបានលទ្ធផលវិជ្ជមានក្នុងគម្រោងទី ១ រួចមក។
សេចក្តីប្រកាសព័ត៌មានបានឱ្យដឹងថា៖ «ក្នុងនាមរដ្ឋាភិបាលកម្ពុជា ក្រសួងសេដ្ឋកិច្ច និងហិរញ្ញវត្ថុសូមជូនដំណឹងទៅដល់ម្ចាស់សហគ្រាសធុនតូច និងមធ្យម ជ្រាបថា ក្រោមគំនិតផ្តួចផ្តើមរបស់រាជរដ្ឋាភិបាល និងតាមរយៈកិច្ចសហប្រតិបត្តិការជាមួយគ្រឹះស្ថានហិរញ្ញវត្ថុចូលរួមក្នុងការអនុវត្តគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមជំហានទី២ បន្ទាប់ពីទទួលបានភាពជោគជ័យនៃគម្រោងទី១ ដើម្បីចូលរួមស្តារសេដ្ឋកិច្ចឡើងវិញ និងជួយដល់ SMEs ដែលកំពុងត្រូវការហិរញ្ញវត្ថុសម្រាប់ទ្រទ្រង់អាជីវកម្មបន្ត។ គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម ជំហានទី២ ត្រូវបានបង្កើតឡើង និងដាក់ឱ្យដំណើរការជាផ្លូវការចាប់ពីពេលនេះតទៅ»។
សម្រាប់គម្រោងសហហិរញ្ញប្បទាននេះមានគោលបំណងផ្តល់ឥណទានមានការប្រាក់ទាប ដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាពដូចជា ឧស្សាហកម្ម សេវាកម្ម និងពាណិជ្ជកម្មសម្រាប់ជំនួសឱ្យការនាំចូល បម្រើសេចក្តីត្រូវការក្នុងស្រុក ឬបម្រើធាតុចូលក្នុងការផលិតរបស់ក្រុមហ៊ុនធំៗជាដើម។
លោក សាយ សូនី នាយកប្រតិបត្តិការនៃគ្រឹះស្ថានមីក្រូហិរញ្ញវត្ថុ ប្រាសាក់ បានប្រាប់ភ្នំពេញប៉ុស្ដិ៍ថា ប្រាសាក់ បាននិងកំពុងធ្វើការជាមួយធនាគារសហគ្រាសធុនតូច និងមធ្យម ចាប់តាំងពីជំហានដំបូង តាមរយៈការចូលរួមផែនការសរុប ៥ លានដុល្លារ ប៉ុន្តែជាក់ស្តែងស្ថាប័នរបស់លោកបានបញ្ចេញ ១០ លានដុល្លាររួចទៅហើយនៅដំណាក់កាលទី ១។ លោកបានបន្តថា នៅជុំទី ២ ថ្នាក់គ្រប់គ្រងបានបញ្ជាក់ថានឹងចូលរួម ៥ លានដុល្លារទៀត ដែលនឹងអាចឱ្យបញ្ចេញប្រាក់ ១០ លានដុល្លារបន្ថែមទៀត។
លោកបានថ្លែងថា៖ «សរុបមកយើងអាចបញ្ចេញទឹកប្រាក់ ២០ លានដុល្លារ ដើម្បីជួយដល់ SME រួមជាមួយនឹងធនាគារ SME bank នៅជុំទាំង ២។ ផែនការពិសេសនេះនឹងអាចឱ្យ SME មានលទ្ធភាពទទួលបានកម្ចីពីគ្រឹះស្ថានហិរញ្ញវត្ថុកាន់តែងាយស្រួល ដោយមានអត្រាការប្រាក់កាន់តែទាប។ ដូច្នេះពួកគេអាចមកកាន់ប្រាសាក់ ឬធនាគារដែលចូលរួមផ្សេងទៀត (ធនាគារ ឬគ្រឹះស្ថានមីក្រូហិរញ្ញ) ប្រសិនបើពួកគេត្រូវការកម្ចី ដើម្បីគាំទ្រអាជីវកម្មរបស់ពួកគេក្នុងអំឡុងពេលដ៏ពិបាកនេះ»។
លោក សូនី ក៏បានកោតសរសើររាជរដ្ឋាភិបាលជុំវិញយុទ្ធនាការចាក់វ៉ាក់សាំងប្រកបដោយជោគជ័យ និងបេសកកម្មការងារកាន់តែលំបាករបស់រដ្ឋាភិបាលនៅក្នុងការប្រយុទ្ធប្រឆាំងនឹងជំងឺកូវីដ ១៩។
លោកបានបន្ថែមថា៖ «យើងសង្ឃឹមថា សកម្មភាពអាជីវកម្មជាទូទៅនឹងត្រឡប់ទៅរកភាពធម្មតាជាថ្មីក្នុងពេលឆាប់បំផុត ហើយយើងសង្ឃឹមថា អតិថិជនចាស់ និងអតិថិជនថ្មីនឹងមករកយើងដើម្បីទទួលបានកម្ចី សម្រាប់ចាប់ផ្ដើមជាថ្មីនូវអាជីវកម្មរបស់ពួកគេ ឬការពង្រីកអាជីវកម្ម ដូច្នេះយើងត្រៀមខ្លួនជាស្រេច ដើម្បីបម្រើពួកគេ តាមរយៈផែនការធនាគារ SME ព្រមទាំងការដឹកនាំទៅរកផ្ដល់ហិរញ្ញប្បទានផ្ទាល់ខ្លួនរបស់យើង»។
មូលនិធិគម្រោងនេះមានទឹកប្រាក់ ១០០ លានដុល្លារដែលជាការផ្តល់សហហិរញ្ញប្បទានបដិភាគស្មើគ្នារវាង SME bank ជាមួយនឹងគ្រឹះស្ថានហិរញ្ញវត្ថុចូលរួមទាំងអស់។
បច្ចុប្បន្នមានគ្រឹះស្ថានហិរញ្ញវត្ថុចូលរួមនៃគម្រោងហិរញ្ញប្បទាននេះចំនួន ២៦ ក្នុងនោះ ធនាគារពាណិជ្ជ ចំនួន ២១ ធនាគារឯកទេស ១ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើចំនួន ៣ និងគ្រឹះស្ថានមីក្រូហិរញ្ញវត្ថុចំនួន ១។
«សហគ្រាសធុនតូច និងមធ្យមមានតម្រូវការឥណទាន អាចដាក់ពាក្យស្នើសុំឥណទានក្រោមគម្រោងសហហិរញ្ញប្បទាននេះនៅគ្រឹះស្ថានហិរញ្ញវត្ថុចូលរួមណាមួយ ដោយគោរពតាមលក្ខខណ្ឌរបស់គម្រោងសហហិរញ្ញប្បទាននេះ និងលក្ខខណ្ឌផ្តល់ឥណទានរបស់គ្រឹះស្ថានហិរញ្ញវត្ថុដែលចូលរួមនីមួយៗ»។ នេះបើយោងតាមធនាគារសហគ្រាសធុនតូច និងមធ្យមកម្ពុជា៕ LA
