អគ្គនាយកដ្ឋានគយនិងរដ្ឋាករកម្ពុជា។ ហេង ជីវ័ន
ភ្នំពេញៈ លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានឱ្យដឹងថា កម្ពុជាទទួលបានចំណូលពីពន្ធគយចំនួន ១ ៥២០ លានដុល្លារក្នុងរយៈពេល ៨ខែដើមឆ្នាំ ២០២១ ស្មើនឹង ៦៤,២ ភាគរយនៃផែនការកំណត់ដោយច្បាប់ហិរញ្ញវត្ថុ។
តួលេខនេះ ត្រូវបានលោក គុណ ញឹម លើកឡើងនៅក្នុងសន្និសីទសារព័ត៌មានកាលពីថ្ងៃទី១០ កញ្ញា ស្ដីពី «ការប្រមូលពន្ធនាំចូល លើយានយន្តជ្រកក្រោមស្លាកលេខផ្សេងៗ និងគ្មានពន្ធ និងអាករនាំចូល» តាមរយៈប្រព័ន្ធអនឡាញ។
ក្នុងកម្មវិធីនេះ លោកលើកឡើងទៀតថា អគ្គនាយកដ្ឋានគយ និងរដ្ឋាករកម្ពុជាបានដើរតួនាទីយ៉ាងសំខាន់ក្នុងការប្រមូលពន្ធអាករនាំចេញ-នាំចូល ពីការធ្វើពាណិជ្ជកម្មអន្ដរជាតិដើម្បីចំណូលជាតិ។
លោកថា ការនាំចូលរថយន្តគ្រឿងចក្រម៉ូតូនិងយានយន្តមួយចំនួនទៀត គឺជាប្រភពទំនិញដែលបានរួមចំណែកជំរុញកំណើនការប្រមូលពន្ធគយ។ ពិសេសការប្រមូលពន្ធលើការនាំចូលរថយន្តជ្រកក្រោមស្លាក ខ.ម និង ន.ប។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ក្នុងឆ្នាំ ២០២០ ការប្រមូលចំណូលសម្រេចបាន ២ ៤១៩,៦ លានដុល្លារ ធ្លាក់ចុះ ២៤,៨ ភាគរយ ធៀបនឹងឆ្នាំ ២០១៩៕
