លោក ស៊ុន ចាន់ថុល ពិនិត្យមើលកំពង់ផែ LM១៧ កាលពីថ្ងៃចន្ទ។ ហេង ជីវ័ន
ភ្នំពេញៈ កំពង់ផែស្វយ័តភ្នំពេញ (ក.ស.ភ.) ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា (CSX) កាលពីថ្ងៃទី ២០ ខែកញ្ញា បានសម្ពោធឱ្យប្រើប្រាស់ជាផ្លូវការនូវហេដ្ឋារចនាសម្ព័ន្ធចំណតផែកុងតឺន័រ LM១៧ ជំហានទី ៣ ដំណាក់កាលទី ១ ដែលមានតម្លៃវិនិយោគសរុប ១៨,៤ លានដុល្លារ ដើម្បីជាការឆ្លើយតបទៅនឹងកំណើនកុងតឺន័រឆ្លងកាត់ ពិសេសបន្ទាប់ពីស្ថានភាពជំងឺកូវីដ ១៩ មានភាពធូរស្រាល។
ចំណតផែកុងតឺន័រ LM១៧ ជំហានទី ៣ ដំណាក់កាលទី ១ មានទីតាំងនៅឃុំបន្ទាយដែក ស្រុកកៀនស្វាយ ខេត្តកណ្តាល លើផ្ទៃដីទំហំ ២,៧៥ ហិកតា ដោយស្ថិតនៅខាងជើងចំណតផែកុងតឺន័រ LM១៧ ជំហានទី ១ និងជំហានទី ២ ។ LM១៧ ជំហានទី ៣ ដំណាក់កាលទី ១ នេះត្រូវបានសាងសង់ដោយក្រុមហ៊ុន សៀង ហៃ ខនស្ត្រាក់សិន តាមរយៈនីតិវិធីដេញថ្លៃអន្តរជាតិ សាធារណៈ ដោយបានចាប់ផ្តើមសាងសង់កាលពីចុងឆ្នាំ ២០១៩ និងបានបញ្ចប់កាលពីពាក់កណ្តាលឆ្នាំ ២០២១។
ប្រធានអគ្គនាយកកំពង់ផែស្វយ័តភ្នំពេញ លោក ហ៊ឺ បាវី បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវហេដ្ឋារចនាសម្ព័ន្ធចំណតផែកុងតឺន័រ LM១៧ ជំហានទី ៣ ដំណាក់កាលទី ១ ថា នេះជាសមិទ្ធផលថ្មីមួយទៀតរបស់កំពង់ផែស្វយ័តភ្នំពេញ ដែលបានពង្រីកសមត្ថភាពផ្ទុកកុងតឺន័ររបស់ខ្លួនឱ្យបានកាន់តែច្រើន ដើម្បីឆ្លើយតបនឹងកំណើនកុងតឺន័រឆ្លងកាត់ជារៀងរាល់ឆ្នាំ ពិសេសបន្ទាប់ពីវិបត្តិនៃការឆ្លងរាលដាលជំងឺកូវីដ ១៩ ត្រូវបានបញ្ចប់។ លោកបន្តថា គម្រោងនេះបានប្រើប្រាស់ទុនវិនិយោគប្រមាណ ១៨,៤ លានដុល្លារដែលជាថវិកាផ្ទាល់របស់ ក.ស.ភ. បានពីប្រាក់ចំណេញ និងប្រាក់សន្សំអភិវឌ្ឍន៍សហគ្រាស។
លោកថ្លែងថា៖ «ទោះបីជាមានវិបត្តិដែលកើតឡើងដោយសារជំងឺកូវីដ-១៩ ក៏បរិមាណនៃការឆ្លងកាត់របស់ទូកុងតឺន័រនៅ ក.ស.ភ. បានឈានជិតដល់សមត្ថភាពផ្ទុកកុងតឺន័រសរុបនៃចំណតផែកុងតឺន័រ LM១៧ ជំហានទី ១ និងទី ២ ដែលនាំឱ្យមានតម្រូវការធ្វើការពង្រីកហេដ្ឋារចនាសម្ព័ន្ធបន្ថែមនៃចំណតផែកុងតឺន័រ LM១៧ នេះ»។ ដូច្នេះហើយទើបចុងឆ្នាំ ២០១៩ ក.ស.ភ. បានអនុវត្តគម្រោងពង្រីកហេដ្ឋារចនាសម្ព័ន្ធនៃចំណតផែកុងតឺន័រ LM១៧ ជំហានទី ៣ ដំណាក់កាលទី ១ នេះឡើង»។
LM១៧ ជំហានទី ៣ ដំណាក់កាលទី ១ នេះមានសមត្ថភាពអាចផ្ទុកកុងតឺន័របាន ១០០ ០០០ TEUs ក្នុង ១ ឆ្នាំបន្ថែមលើសមត្ថភាពផ្ទុកកុងតឺន័រសរុប (ជំហានទី ១ និងទី ២) ដែលធ្វើឱ្យសមត្ថភាពផ្ទុកនៃចំណតផែកុងតឺន័រ LM១៧ ទាំងមូលពេលនេះកើនឡើង ៤០០ ០០០ TEUs ក្នុង ១ ឆ្នាំ។
យោងតាមសេចក្តីប្រកាសព័ត៌មានកំណើនកុងតឺន័រឆ្លងកាត់ ក.ស.ភ. ជាមធ្យមប្រចាំឆ្នាំមានចន្លោះពី ១៥-១៨ ភាគរយ។ កាលពីឆ្នាំ ២០១៩ បរិមាណកុងតឺន័រឆ្លងកាត់មាន ២៨១ ០៤៣ TEUs និងនៅឆ្នាំ ២០២០ មានចំនួន ២៩០ ៨៥៧ TEUs។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានថ្លែងថា ជាការល្អណាស់ដែលកំពង់ផែស្វយ័តភ្នំពេញអាចមានលទ្ធភាពក្នុងការប្រើប្រាស់ថវិកាដែលខ្លួនសន្សំយកមកអភិវឌ្ឍ LM១៧ ជំហានទី ៣ ដំណាក់កាលទី ១ នេះ។ ការពង្រីកសមត្ថភាពលើកដាក់ និងស្តុកទំនិញរបស់ ក.ស.ភ. នឹងចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចកម្ពុជា។
លោកថ្លែងថា៖ «កំពង់ផែនេះ នឹងដើរតួនាទីកាន់តែសំខាន់ក្នុងការដឹកជញ្ជូនទំនិញចូលមកកម្ពុជា ក៏ដូចជាដឹកទំនិញចេញពីប្រទេសកម្ពុជាទៅលក់នៅក្រៅប្រទេស។ យើងនឹងខិតខំប្រឹងប្រែងជំរុញ ដើម្បីធ្វើយ៉ាងណាឱ្យការដឹកជញ្ជូនទំនិញតាមផ្លូវទឹកនេះបានកាន់តែច្រើនបន្ថែមទៀត ដើម្បីជួយកាត់បន្ថយគ្រោះថ្នាក់ចរាចរណ៍ កាត់បន្ថយតម្លៃដឹកជញ្ជូនទំនិញ និងកាត់បន្ថយការខូចខាតផ្លូវថ្នល់»។
លោកប្រាប់ទៀតថា នៅពេលនេះក្រសួងសាធារណការ និងដឹកជញ្ជូនក្រោមកិច្ចសហការជាមួយដៃគូ ដែលមានដូចជា JICA ធនាគារពិភពលោក ព្រមទាំងស្ថាប័នពាក់ព័ន្ធជាច្រើនទៀតបានសិក្សា និងបញ្ចប់សព្វគ្រប់ហើយនូវផែនការមេវិស័យដឹកជញ្ជូន ដែលក្នុងនោះការដឹកជញ្ជូនតាមផ្លូវទឹក គឺជាចំណែកដ៏សំខាន់នៅក្នុងផែនការមេវិស័យដឹកជញ្ជូននៅកម្ពុជា។
ក្នុងឱកាសនោះ លោក ចាន់ថុល ក៏បានលើកឡើងពីលទ្ធភាពនៅក្នុងការតភ្ជាប់ផ្លូវដែកពីរាជធានីភ្នំពេញមកកាន់កំពង់ផែកុងតឺន័រ LM១៧ នេះផងដែរ។ លោកបានលើកឡើងថា៖ «យើងគួរពិចារណាពីការតភ្ជាប់ផ្លូវដែក (ភ្នំពេញ) ទៅកាន់កំពង់ផែកុងតឺន័រ LM១៧ នេះបានឬទេ?»។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជាបានប្រាប់ភ្នំពេញ-ប៉ុស្តិ៍ថា វិបត្តិនៃការឆ្លងរាលដាលជំងឺកូវីដ ១៩ បានបង្កផលប៉ះពាល់ច្រើនដល់វិស័យដឹកជញ្ជូននៅទូទាំងពិភពលោករួមទាំងកម្ពុជា ប៉ុន្តែនៅពេលនេះស្ថានភាពបានចាប់ផ្តើមល្អប្រសើរឡើងវិញជាបណ្តើរៗហើយ។
«ខ្ញុំមានសុទិដ្ឋិនិយមយ៉ាងខ្លាំងថា វិស័យដឹកជញ្ជូននៅកម្ពុជានឹងមានសម្ទុះឡើងវិញខ្លាំងក្នុងពេលឆាប់ៗនេះ ខណៈពេលរដ្ឋាភិបាលកម្ពុជាបានបើកដំណើរការសកម្មភាពសេដ្ឋកិច្ច និងអប់រំបានភាគច្រើនរួចមកហើយ ហើយក៏គ្រោងនឹងត្រៀមបើកទ្វារទទួលភ្ញៀវទេសចរអន្តរជាតិចាក់វ៉ាក់សាំងឡើងវិញផងដែរ»។ នេះបើយោងតាមលោក ស៊ិន ចន្ធី។
បើតាមលោក ចន្ធី បច្ចុប្បន្ននេះការដឹកជញ្ជូនទំនិញតាមផ្លូវទឹកបានគ្របដណ្តប់ប្រហែលជាង ៦០ ភាគរយនៃការដឹកជញ្ជូនទំនិញទាំងផ្លូវគោក និងផ្លូវអាកាស៕ LA
វីដេអូ៖
