កម្ពុជា គឺជាម្ចាស់ស្របច្បាប់នៃប្រេងឆៅ ២៩៥ ០០០ បារ៉ែល ដែលត្រូវបាននាវា MT Strovolos លួចដឹកចេញ។ រូបថត ក្រសួងរ៉ែ និងថាមពល
ភ្នំពេញៈ រដ្ឋាភិបាលកម្ពុជាបញ្ជាក់ថា ប្រេងឆៅប្រមាណ ២៩៥ ០០០ បារ៉ែល ដែលត្រូវបានក្រុមនាវិកនាវា MT Strovolos លួចដឹកចេញ ហើយត្រូវអាជ្ញាធរឥណ្ឌូនេស៊ីចាប់បាន គឺជាកម្មសិទ្ធិស្របច្បាប់របស់ព្រះរាជាណាចក្រកម្ពុជា។
កាលពីថ្ងៃទី ២៥ សីហា កងនាវាប្រទេសឥណ្ឌូនេស៊ីបានឱ្យដឹងថា ខ្លួនបានចាប់នាវាដឹកប្រេង ដែលមានប្រធានក្រុមជាជនជាតិបង់ក្លាដែស និងសមាជិកនាវិក ១៨ នាក់ផ្សេងទៀត។ នាវានេះ មានផ្ទុកប្រេងប្រមាណ ២៩៥ ០០០ បារ៉ែល (ជិត ៤៧,៣៣ លានលីត្រ) ដោយធ្វើដំណើរចេញពីប្រទេសថៃ ទៅកាន់កោះ Batam។
សេចក្ដីជូនដំណឹងក្រសួងរ៉ែ និងថាមពល កាលពីថ្ងៃទី ៣០ ខែកញ្ញា ឱ្យដឹងថា «ក្រសួងរ៉ែ និងថាមពលបានឃើញព័ត៌មាន និងការអះអាងមិនពិតពាក់ព័ន្ធនឹងកម្មសិទ្ធិលើប្រេងឆៅក្នុងសេចក្តីថ្លែងការណ៍មួយចំនួនរបស់ម្ចាស់នាវា និងអ្នកគ្រប់គ្រងនាវា MT Strovolos ដែលចាំបាច់ត្រូវកែតម្រូវ។ ប្រេងឆៅទាំងអស់ គឺជាទ្រព្យសម្បត្តិរបស់ព្រះរាជាណាចក្រកម្ពុជាគ្រប់ពេលទាំងអស់។ ការលួច ឬ ការរំលោភបំពានកម្មសិទ្ធិលើប្រេងកាតដោយម្ចាស់នាវា អ្នកគ្រប់គ្រង និងក្រុមនាវិកនៃនាវា MT Strovolos និងបក្ខពួករបស់គេ គឺជាបទល្មើសស្ថិតក្រោមច្បាប់កម្ពុជា»។
យោងតាមក្រសួង ម្ចាស់នាវា អ្នកគ្រប់គ្រង និងក្រុមនាវិកនៃ MT Strovolos ត្រូវបានជូនដំណឹងអំពីកម្មសិទ្ធិលើប្រេងឆៅ និងការបំពានច្បាប់កម្ពុជាតាំងពីប៉ុន្មានខែមុនមកម្ល៉េះ។ ពួកគេមិនត្រឹមតែមិនធ្វើសកម្មភាពណាមួយនៅក្នុងការបង្វិលសងប្រេងឆៅមកកម្ពុជាវិញទេ ប៉ុន្តែគេថែមទាំងធ្វើដំណើរទៅកាន់កំពង់ផែជាច្រើននៅក្នុងប្រទេសថៃ និងប្រទេសឥណ្ឌូនេស៊ីជាដើម ដោយពួកគេបានបន្តបិទប្រព័ន្ធកំណត់អត្តសញ្ញាណស្វ័យប្រវត្តិរបស់នាវាក្នុងរយៈពេលយូរ ពេលដែលពួកគេធ្វើដំណើរ រួមទាំងពេលចាកចេញពីដែនទឹកកម្ពុជាដោយគ្មានការអនុញ្ញាត, ចាកចេញពីដែនទឹកថៃ, និងចូលទៅដែនទឹកប្រទេសឥណ្ឌូនេស៊ី។
ជាមួយគ្នានេះក្រសួងក៏បានពន្យល់ថា ពេលដែលនាវា MT Strovolos ចាកចេញពីដែនទឹកកម្ពុជាដោយខុសច្បាប់ នាវានេះត្រូវបានជួលដោយក្រុមហ៊ុន KrisEnergy ដែលក្រុមហ៊ុនទទួលបានកិច្ចសន្យាអភិវឌ្ឍន៍ជម្រកប្រេងកាតកម្ពុជា។ វិវាទរវាងម្ចាស់នាវា និងអ្នកគ្រប់គ្រងនាវា និងក្រុមហ៊ុន KrisEnergy ពាក់ព័ន្ធនឹងការជួលនាវា ប្រហែលជាបានកើតឡើង ប៉ុន្តែបញ្ហានេះមិនពាក់ព័ន្ធដល់ព្រះរាជាណាចក្រកម្ពុជាឡើយ។
ក្រសួងបន្តថា៖ «ប្រេងឆៅមិនអាចក្លាយជាកម្មវត្ថុនៃការទាមទាររបស់ម្ចាស់នាវា និងអ្នកគ្រប់គ្រង MT Strovolos ឡើយ ព្រោះថាប្រេងឆៅទាំងនេះមិនមែនជាកម្មសិទ្ធិរបស់អ្នកជួលនាវា (ក្រុមហ៊ុន គ្រីសអេនើជី) ទេ។ ដូចបញ្ជាក់កន្លងមកប្រេងឆៅជាទ្រព្យសម្បត្តិរបស់ព្រះរាជាណាចក្រកម្ពុជា។ គ្មានការទាមទារណាមួយក្រោមកិច្ចព្រមព្រៀងជួលនាវាអាចផ្តល់ហេតុផលសមរម្យ ឬអនុញ្ញាតឱ្យនាវា MT Strovolos ចាកចេញពីដែនទឹកកម្ពុជាដោយខុសច្បាប់ ឬអនុញ្ញាតឱ្យមានការរំលោភបំពានកម្មសិទ្ធិប្រេងឆៅរបស់កម្ពុជាឡើយ»។
ក្រសួងបន្តថា៖ «ម្ចាស់នៃនាវា MT Strovolos បានថ្លែងការណ៍ថាខ្លួនយកចិត្តទុកដាក់ដល់សុខុមាលភាពរបស់ក្រុមនាវិកនៅក្នុងសេចក្តីប្រកាសព័ត៌មានរបស់ខ្លួន។ ប៉ុន្តែសេចក្តីថ្លែងការណ៍នេះគឺផ្ទុយទៅនឹងការពិតដែលក្រុមនាវិករបស់ពួកគេមិនបានគោរពគោលការណ៍សុវត្ថិភាពនៃជីវិតមនុស្សនៅលើលម្ហសមុទ្រឡើយ។ ពួកគេបានបិទប្រព័ន្ធអត្តសញ្ញាណស្វ័យប្រវត្តិរបស់នាវាក្នុងពេលពួកគេធ្វើដំណើរ ទន្ទឹមនឹងការដែលពួកគេចាកចេញពីដែនទឹកកម្ពុជាដោយគ្មានការអនុញ្ញាត ឬដោយគ្មានសិទ្ធិ ដោយនាំចេញយកទៅជាមួយនូវប្រេងឆៅរបស់កម្ពុជា»។
លោក ជៀប សួរ អគ្គនាយកនៃអគ្គនាយដ្ឋានប្រេងកាតបានប្រាប់ ភ្នំពេញ ប៉ុស្តិ៍ កាលពីថ្ងៃទី ៣០ ខែកញ្ញាថា ចាប់តាំងពីអាជ្ញាធរឥណ្ឌូនេស៊ី ចាប់នាវា នាវិក និងប្រេងឆៅនោះ រដ្ឋាភិបាលកម្ពុជាបានធ្វើការយ៉ាងជិតស្និទ្ធដោយផ្តល់នូវឯកសារចាំបាច់ពាក់ព័ន្ធនានាតបតាមសំណើរបស់ឥណ្ឌូនេស៊ី ដើម្បីយកប្រេងឆៅ នាវា និងនាវិកទាំងអស់ត្រឡប់មកវិញ។
លោកថ្លែងថា៖ «យើងកំពុងតាមដានអង្កេតដោយយកចិត្តទុកដាក់អំពីដំណើរការផ្លូវច្បាប់ទាំងសមភាគីឥណ្ឌូនេស៊ី និងអាំងទែប៉ូលអំពីចំណាត់ការនេះថា តើវាឆ្លើយតបទៅនឹងសំណើកម្ពុជាឬយ៉ាងណា? យើងនឹងធ្វើឱ្យអស់ពីលទ្ធភាពសហការជាមួយអាជ្ញាធរឥណ្ឌូនេស៊ី»។
យោងតាមក្រសួង ការចាប់ខ្លួននេះត្រូវបានធ្វើឡើង ក្រោយពេលនិវេទន៍ក្រហមរបស់អាំងទ័រប៉ូល ត្រូវបានចេញពាក់ព័ន្ធនឹងការចោទប្រកាន់បទល្មើសព្រហ្មទណ្ឌនៅប្រទេសកម្ពុជា។
ក្រសួងបន្តថាលើសពីនេះទៀត ពេលនេះពួកគេគួរតែត្រូវរៀបចំបង្វិលសងប្រេងឆៅមកឱ្យម្ចាស់ស្របច្បាប់ គឺព្រះរាជាណាចក្រកម្ពុជាវិញ និងគួរតែបោះបង់ការព្យាយាមទាមទារប្រាក់ពីកម្ពុជា ចំពោះបញ្ហាដែលជាវិវាទរបស់ពួកគេជាមួយក្រុមហ៊ុន KrisEnergy៕ LA
វីដេអូ៖
