.jpg)
តំបន់ស្តុកប្រេងឆៅក្នុងក្រុង Cushing រដ្ឋ Oklahoma សហរដ្ឋអាមេរិក។ AFP
ទីក្រុងប៉ារីសៈ ទីភ្នាក់ងារថាមពលអន្តរជាតិ (IEA) បាននិយាយកាលពីថ្ងៃព្រហស្បតិ៍ថា ការខ្វះខាតនៃឧស្ម័នធម្មជាតិ និងធ្យូងថ្មបានបង្វែរទៅរកឥន្ធនៈ ជំរុញតម្រូវការសម្រាប់ប្រេងឆៅ និងរុញច្រានតម្លៃកើនឡើង។
IEA ដែលប្រឹក្សាយោបល់ដល់រដ្ឋាភិបាលលើគោលនយោបាយថាមពលបាននិយាយថា ពេលនេះខ្លួនរំពឹងតម្រូវការឥន្ធនៈសកលសម្រាប់ឆ្នាំនេះ និងឆ្នាំ ២០២២ ដល់កម្រិតខ្ពស់ជាងការព្យាករណ៍កាលពីពេលមុនរបស់ខ្លួន។
ភ្នាក់ងារមានមូលដ្ឋាននៅទីក្រុងប៉ារីសបាននិយាយថា៖ «តម្លៃឥន្ធនៈកំពុងកើនខ្ពស់ជាងតម្លៃដែលមានជាច្រើនឆ្នាំមកហើយ ពេលដែលការខ្វះខាតឧស្ម័នធម្មជាតិ ឧស្ម័នធម្មជាតិរាវ (LNG) និង ធ្យូងថ្មជំរុញតម្រូវការសម្រាប់វិស័យឥន្ធនៈ ដែលអាចធ្វើឱ្យទីផ្សារមានឱនភាពដល់យ៉ាងហោចណាស់ចុងឆ្នាំនេះ»។
IEA បាននិយាយក្នុងព្រឹត្តិបត្រប្រចាំខែស្តីពីទីផ្សារប្រេងថា៖ «តម្លៃធ្យូងថ្ម និងឧស្ម័នខ្ពស់ជាប្រវត្តិសាស្ត្រ ព្រមទាំងការខ្វះធ្យូងថ្មកំពុងធ្វើឱ្យវិស័យថាមពល និងឧស្សាហកម្មពឹងផ្អែកលើថាមពលងាកទៅរកប្រេងឥន្ធនៈ ដើម្បីរក្សាបន្តដំណើរផលិតកម្មដែលរងការវាយដំ»។
តម្លៃឧស្ម័នកើនឡើង ពេលដែលរដូវរងាជិតមកដល់នៅអឌ្គោលខាងជើងដោយបន្ថែមសម្ពាធអតិផរណា និងបង្កើនការព្រួយបារម្ភថាវាអាចប៉ះពាល់ដល់សេដ្ឋកិច្ច ដែលងើបឡើងវិញពីជំងឺរាតត្បាតកូវីដ ១៩។
តម្លៃប្រេងក៏បានកើនឡើងដល់កម្រិតខ្ពស់បំផុតក្នុងប៉ុន្មានថ្ងៃនេះ អំឡុងពេលជាច្រើនឆ្នាំ។
IEA និយាយថា តម្រូវការប្រេងជាសកលពេលនេះត្រូវបានព្យាករឡើងដល់ ៩៦,៣ លានបារ៉ែលក្នុង ១ ថ្ងៃនៅឆ្នាំនេះ កើនឡើង ៥,៥ លានបារ៉ែលពីរបាយការណ៍លើកមុខរបស់ខ្លួន។ វានឹងកើនឡើងចំនួន ៣,៣ លានបារ៉ែលក្នុងមួយថ្ងៃនៅឆ្នាំក្រោយ។
ទន្ទឹមនឹងនោះដែរ ការផ្គត់ផ្គង់ប្រេងឥន្ធនៈជាសកលត្រូវបានរំពឹងថានឹងកើនឡើងយ៉ាងខ្លាំងក្នុងខែតុលា ពេលដែលផលិតកម្មរបស់អាមេរិកងើបពីការធ្លាក់ចុះដោយសារភ្ជុះ ដែលរំខានយ៉ាងខ្លាំងចំពោះប្រតិបត្តិការក្នុងតំបន់នាយសមុទ្រក្នុងចុងខែសីហា។
IEA និយាយថាការផ្គត់ផ្គង់ក៏ទទួលបានការជំរុញ ពេលដែលអង្គការ OPEC និងក្រុមសម្ព័ន្ធមិត្តដឹកនាំដោយរុស្ស៊ី បន្តដើម្បីបន្ធូរបន្ថយការកាត់ផលិតកម្ម៕ RR
