តម្លៃប្រេងឥន្ទនៈនៅស្ថានីយ Caltex កាលពីថ្ងៃទី ១៧ ខែតុលា។ ហេង ជីវ័ន
ភ្នំពេញៈ តម្លៃប្រេងឥន្ធនៈលក់រាយនៅកម្ពុជាបានកើន ២០០ រៀល ក្នុង ១ លីត្រចាប់ពីថ្ងៃទី ១៦ ខែ តុលា ឆ្នាំ ២០២១ ស្របពេលដែលតម្លៃប្រេងឆៅនៅលើពិភពលោកកើនដល់ ៨០ ដុល្លារក្នុង ១ បារ៉ែល។
បើយោងតាម អ្នកលក់ប្រេងឱ្យស្ថានីយតូតាល់ ១ កន្លែងក្នុងក្រុងភ្នំពេញស្នើសុំមិនបញ្ចេញឈ្មោះប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែ តុលា ឆ្នាំ ២០២១ ថា តម្លៃប្រេងចាប់ផ្តើមឡើងថ្លៃកាលពីថ្ងៃទី ១៦ ខែតុលា ដែលបានធ្វើឱ្យប្រជាពលរដ្ឋរអ៊ូរទាំចំពោះការឡើងថ្លៃនេះ។
លោកបានបន្តថា ប្រេងបានឡើងតម្លៃ ២០០ រៀលទាំងអស់ ដោយនៅពេលនេះប្រេងម៉ាស៊ូតមានតម្លៃ ៤ ០០០ រៀល ក្នុង ១ លីត្រ សាំងធម្មតា ៤ ៣០០ រៀល និងសាំងស៊ុបពែរ ៤ ៨៥០ រៀល។
អ្នករត់តាក់ស៊ីនៅក្នុងទីក្រុងភ្នំពេញ លោក លឿង វង្សវិសុទ្ធិ បានឱ្យដឹងថា តម្លៃប្រេងឡើងថ្លៃជាបន្តបន្ទាប់ធ្វើឱ្យប៉ះពាល់ដល់ជីវភាពរបស់លោក និងប្រជាពលរដ្ឋផ្សេងទៀត។
លោកថ្លែងថា៖ «ប្រជាពលរដ្ឋរកចំណូលមិនបាន ប៉ុន្តែប្រេងសាំងគិតតែពីឡើងថ្លៃ ដែលឡើងម្តង ២០០ រៀល...ប៉ុន្តែពេលចុះម្តងតែ ៥០ រៀល វាអត់ស្មើភាពគ្នា»។
លោកបានស្នើឱ្យរដ្ឋាភិបាលគិតគូរពីការបញ្ចុះតម្លៃប្រេងសាំងឡើងវិញ បើមិនដូច្នេះវានឹងធ្វើឱ្យប៉ះពាល់ដល់ជីវភាពប្រជាពលរដ្ឋគ្រប់រូបជាពិសេសអ្នករត់តាក់ស៊ីដូចរូបលោក និងអ្នកផ្សេងទៀត ខណៈការរកចំណូលមិនសូវបាន។
លោក ណុត វិរៈ អ្នករត់ម៉ូតូកង់បីក្នុងទីក្រុងភ្នំពេញបានឱ្យដឹងថា មិនចំពោះតែតម្លៃប្រេងសាំងឡើងថ្លៃទេ សូម្បីតែហ្គាស ក៏កើនឡើង ៥០០ រៀលដែរ ក្នុងរយៈពេលប៉ុន្មានថ្ងៃមកនេះ។ កាលពីមុនតម្លៃត្រឹមតែ ២ ០០០ រៀល ប៉ុន្តែឥឡូវ ២ ៥០០ រៀល ដែលធ្វើឱ្យប៉ះពាល់ជីវភាពអ្នករកស៊ីកង់បីដូចជារូបលោក។
លោកថ្លែងថា៖ «តាំងពីឡើងថ្លៃមក ខ្ញុំរត់អត់ចំណេញ ខ្ញុំធ្លាប់ចាក់អស់ ២ ម៉ឺនកាលពីមុន រកបាន ១០ ម៉ឺនរៀលក្នុង ១ ថ្ងៃ ប៉ុន្តែឥឡូវនេះចាក់ ៤ ម៉ឺនរៀល ហើយរកអត់បានទៀត»។
លោកក៏បានស្នើដល់រដ្ឋាភិបាល និងក្រុមហ៊ុននាំចូលប្រេងឱ្យបញ្ចុះតម្លៃប្រេងសាំង និងហ្គាសបន្ថែមទៀត ដើម្បីជួយឱ្យប្រជាពលរដ្ឋមានលទ្ធភាពក្នុងការប្រើប្រាស់ ទាំងការធ្វើដំណើរ និងដឹកជញ្ជូនទំនិញ។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃរាជបណ្ឌិត្យកម្ពុជាបាននិយាយថា ពាក់ព័ន្ធនឹងតម្លៃប្រេងឡើងថ្លៃ នេះវាមិនមែនជាការដំឡើងទៅតាមការនឹកឃើញរបស់កម្ពុជា និងវិស័យឯកជនទេ ដោយតម្លៃប្រេងឡើងចុះនេះត្រូវបានអនុវត្តតាមចរន្តតម្លៃទីផ្សារពិភពលោក ព្រោះកម្ពុជាមិនមែនជាប្រទេសផលិតប្រេង៕ LA
វីដេអូ៖
