កាស៊ីណូ ១ កន្លែងក្នុងខេត្តព្រះសីហនុ កាលពីឆ្នាំ ២០១៨។ ហេង ជីវ័ន
ភ្នំពេញៈ រដ្ឋាភិបាលកម្ពុជាបានកំណត់ដើមទុនអប្បបរមាសម្រាប់ប្រតិបត្តិការល្បែងកាស៊ីណូ ដែលស្ថិតក្នុងមណ្ឌលល្បែងពាណិជ្ជកម្ម សមាហរ័ណ ត្រូវមានចាប់ពី ៨០០ ០០០ ០០០ ០០០ (ប្រាំបីរយពាន់លាន) រៀលឡើងទៅ និងប្រតិបត្តិការល្បែងកាស៊ីណូមិនស្ថិតក្នុងមណ្ឌលល្បែងពាណិជ្ជកម្ម សមាហរ័ណ ត្រូវមានចាប់ពី ៤០០ ០០០ ០០០ ០០០ (បួនរយពាន់លាន) រៀលឡើងទៅ។
យោងតាមអនុក្រឹត្យ លេខ ១៦៦ អនក្រ.បក ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៦ ខែ សីហា ឆ្នាំ ២០២១ បានពន្យល់ថា ដើមទុនសម្រាប់មណ្ឌលល្បែងពាណិជ្ជកម្មសមាហរ័ណ និងប្រតិបត្តិការល្បែងកាស៊ីណូ សំដៅដល់ទ្រព្យសកម្មចរន្តរួមទាំងមូលនិធិរបស់ម្ចាស់ភាគហ៊ុនក្នុងក្រុមហ៊ុន និងអចលនទ្រព្យរបស់ក្រុមហ៊ុននោះ។
អនុក្រឹត្យបន្តថា ទោះយ៉ាងណាត្រូវដកចេញនូវទ្រព្យសកម្មមិនមែនចរន្ត និងចំណាយដែលបានបង់មុនរបស់ក្រុមហ៊ុន ឥណទានដែលគ្មានការធានា និងប្រាក់បុរេប្រទានដែលផ្ដល់ដោយក្រុមហ៊ុន បានចាត់ទុកជាទ្រព្យសកម្មចរន្ត ជាដើម។
ចំពោះដើមទុនអប្បបរមាសម្រាប់ប្រតិបត្តិការល្បែងកាស៊ីណូដែលមានអាជ្ញាប័ណ្ណមុនច្បាប់ស្តីពីការគ្រប់គ្រង ល្បែងពាណិជ្ជកម្មចូលជាធរមានត្រូវកំណត់ជា ៥ ដំណាក់កាល គឺ ដំណាក់កាលទី ១ នៅឆ្នាំទី ១ ត្រូវមានដើមទុនចាប់ពី ៥០ ពាន់លានរៀលឡើងទៅដំណាក់កាលទី២ នៅឆ្នាំទី៤ ត្រូវមានដើមទុនចាប់ពី ១០០ ពាន់លានរៀល ដំណាក់កាលទី ៣ នៅឆ្នាំទី ៧ ត្រូវមានដើមទុនពី ២០០ ពាន់លានរៀល ដំណាក់កាលទី៤ នៅឆ្នាំទី ១១ ត្រូវមានដើមទុនចាប់ពី ៣០០ ពាន់លានរៀល និងដំណាក់កាលទី៥ នៅឆ្នាំទី១៥ ត្រូវមានដើមទុនចាប់ពី ៤០០ ពាន់លានរៀលឡើង។
ទាក់ទងករណីនេះ កម្មសិទ្ធិករកាស៊ីណូ ដែលមានអាជ្ញាប័ណ្ណមុនច្បាប់ស្តីពីការគ្រប់គ្រងល្បែងពាណិជ្ជកម្មចូលជាធរមានត្រូវបង្កើនដើមទុនឱ្យគ្រប់ចំនួនតាមកម្រិតអប្បបរមាដូចមានចែងក្នុងមាត្រា ៦ នៃអនុក្រឹត្យនេះទើបមានសិទ្ធិស្នើសុំបន្តសុពលភាពនៃអាជ្ញាប័ណ្ណសម្រាប់ប្រតិបត្តិការល្បែងកាស៊ីណូបាន។
លោក ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានប្រាប់ ភ្នំពេញ ប៉ុស្តិ៍ នៅថ្ងៃទី ២០ ខែតុលាថា ការកំណត់ដើមទុនថ្មីនេះ គឺដើម្បីឆ្លើយតបទៅនឹងការរីកចម្រើនសេដ្ឋកិច្ច ក៏ដូចជាការគ្រប់គ្រងវិស័យកាស៊ីណូនៅក្នុងប្រទេសកម្ពុជា និងអនុលោមតាមច្បាប់ស្តីពីការគ្រប់គ្រងល្បែងពាណិជ្ជកម្ម ដែលត្រូវបានអនុម័តកាលពីពេលកន្លងមក។
លោកបន្តថា៖ «យើងធ្វើនេះក្នុងក្របខ័ណ្ឌនៃភាពដែលអាចទៅរួចរវាងប្រតិបត្តិការកាស៊ីណូ ហើយនឹងនិរន្តរភាពនៃប្រតិបត្តិការកាស៊ីណូ និងធានាបាននៃអ្នកលេងល្បែង»។
លោកបន្តថា ចំពោះការវិនិយោគលើវិស័យកាស៊ីណូនេះ សម្រាប់អាជ្ញាប័ណ្ណថ្មី លុះត្រាតែមានដើមទុនដូចបានកំណត់នៅក្នុងអនុក្រឹត្យនេះទើបក្រសួងចេញលិខិតអនុញ្ញាតធ្វើអាជីវកម្មជាថ្មី ហើយសម្រាប់ក្រុមហ៊ុនវិនិយោគចាស់ត្រូវតែខិតខំបង្កើនដើមទុន ដើម្បីទទួលបានលិខិតអនុញ្ញាតធ្វើអាជីកម្ម។
បើតាម លោក ម៉ី វ៉ាន់ វិស័យកាស៊ីណូនារយៈពេល ២ ឆ្នាំមកនេះ បានទទួលរងផលប៉ះពាល់យ៉ាងធ្ងន់ធ្ងរពីការរីករាលដាលជំងឺកូវីដ ១៩ និងបាត់ចំណូលយ៉ាងច្រើន ដោយសារមិនមានភ្ញៀវទេសចរចូលលេង ខណៈតាមច្បាប់ ប្រជាពលរដ្ឋខ្មែរក៏មិនត្រូវបានអនុញ្ញាតឱ្យចូលលេងកម្សាន្តនោះទេ។
ទោះយ៉ាងណា លោករំពឹងថា វិស័យនេះនឹងងើបឡើងវិញលឿននៅពេលកម្ពុជាអនុញ្ញាតឱ្យភ្ញៀវទេសចរត្រឡប់ចូលមកវិញក្នុងពេលឆាប់ៗនេះ៕ LA
វីដេអូ៖
