លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ក្នុងកិច្ចប្រជុំលើកិច្ចព្រមព្រៀងពាណិជ្ជកម្មសេរី ជាមួយភាគីកូរ៉េ កាលពីថ្ងៃទី ៣ កុម្ភៈ។ ហេង ជីវ័ន
ភ្នំពេញៈ ប្រទេសកម្ពុជា និងកូរ៉េខាងត្បូង គ្រោងនឹងចុះកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) នៅថ្ងៃទី ២៦ ខែតុលា ខាងមុខ ដែលនេះគឺជាការបើកទំព័រថ្មីមួយទៀត ដើម្បីជំរុញលំហូរពាណិជ្ជកម្ម និងវិនិយោគ រវាងប្រទេសអាស៊ីទាំង ២។
កម្ពុជា-កូរ៉េខាងត្បូង បានប្រកាសរួមគ្នាពីការបិទបញ្ចប់ការចរចាលើកិច្ចព្រមព្រៀងពាណិជ្ជកម្មសេរីតាំងពីខែកុម្ភៈ ឆ្នាំ ២០២១ ខណៈអ្នកជំនាញនិងមន្ត្រីយល់ឃើញដូចគ្នាថា កូរ៉េខាងត្បូងនឹងក្លាយជាទីផ្សារនាំចេញដ៏ធំមួយរបស់កម្ពុជា បន្ទាប់ពីប្រទេសមហាយក្សចិន។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញ-ប៉ុស្តិ៍ នាថ្ងៃទី ២០ ខែតុលា ថា រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ និងលោកស្រី YOO Myung-hee រដ្ឋមន្ត្រីពាណិជ្ជកម្មកូរ៉េ នឹងចុះហត្ថលេខាលើកិច្ចព្រមព្រៀងនេះតាមរយៈប្រព័ន្ធអនឡាញ។ លោកបន្តថា តាមរយៈកិច្ចព្រមព្រៀងនេះទំនិញកម្ពុជាប្រមាណជាង ១០ ០០០ (១ ម៉ឺន) បន្ទាត់ពន្ធ នឹងនាំចេញទៅប្រទេសកូរ៉េដោយរួចពន្ធ។
លោកថ្លែងថា៖ «ដូចគ្នានឹងកិច្ចព្រមព្រៀងពាណិជ្ជកម្មសេរីកម្ពុជា-ចិនដែរ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ គឺជាកិច្ចខិតខំប្រឹងប្រែង និងជាជោគជ័យថ្មីមួយទៀតរបស់ក្រសួងពាណិជ្ជកម្មនៅក្នុងការបើកច្រកទីផ្សារពិភពលោកសម្រាប់ការនាំចេញទំនិញកម្ពុជា»។
លោក ហុង វណ្ណៈ អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជាបាននិយាយថា ប្រទេសទាំង ២ មានទំនាក់ទំនងពាណិជ្ជកម្មល្អជាមួយគ្នា ហើយវានឹងកាន់តែពិសេសបន្ថែមទៀតនៅពេលកិច្ចព្រមព្រៀងពាណិជ្ជកម្មសេរីទ្វេភាគីរវាងប្រទេស ២ ចូលជាធរមាន។
លោកបន្ថែមទៀតថា ជាមួយកិច្ចព្រមព្រៀងពាណិជ្ជកម្មសេរីទ្វេភាគីនេះ កម្ពុជាចាំបាច់ត្រូវខិតខំបន្ថែមទៀត ដើម្បីធ្វើខ្លួនឱ្យក្លាយទៅជាប្រទេសផលិត និងនាំចេញ ដោយមិនត្រឹមតែជាមួយកូរ៉េប៉ុណ្ណោះទេគឺសម្រាប់គ្រប់ទីផ្សារលើពិភពលោក។
លោកថា៖ «ការធ្វើពិពិធកម្មលើការផលិតផលិតផលសម្រាប់នាំចេញទៅទីផ្សារអន្តរជាតិនឹងជួយធ្វើឱ្យកម្ពុជាអាចមានឧត្តមភាពលើការធ្វើពាណិជ្ជកម្មជាអន្តរជាតិ»។
បើយោងតាមលោក សុវិជាតិ ទីផ្សារកូរ៉េនឹងបង្កើនឱកាសថែមទៀតសម្រាប់ទំនិញកសិផល, កសិផលកែច្នៃ សម្លៀកបំពាក់ ស្បែកជើង កាបូបធ្វើដំណើរ ផលិតផលកៅស៊ូ គ្រឿងបន្លាស់ គ្រឿងបង្គុំអេឡិចត្រូនិក ផលិតផលឧស្សាហកម្មស្រាល និងផលិតផលផ្សេងៗទៀត ដែលមួយចំនួនធំផលិតដោយអ្នកវិនិយោគក្នុង និងក្រៅតំបន់សេដ្ឋកិច្ចពិសេស ហើយអាចនាំចេញទៅកូរ៉េដោយរួចពន្ធ។
ទន្ទឹមនឹងនេះ លោកអះអាងថា តាមរយៈកិច្ចព្រមព្រៀងពាណិជ្ជកម្មសេរីនេះក៏បង្កលក្ខណៈងាយស្រួលដល់ការនាំចូលមកវិញនូវទំនិញអេឡិចត្រូនិក ថ្នាំពេទ្យ គ្រឿងបន្លាស់រថយន្ត និងសម្ភារបរិក្ខារដែលជាវត្ថុធាតុដើម និងម៉ាស៊ីនឧបករណ៍ផលិតកម្មផ្សេងៗទៀតបម្រើឱ្យការផលិតដែលនឹងនាំឱ្យមានការកើនឡើងនូវផលិតភាពផលិតកម្ម ក៏ដូចជាគុណភាពផលិតផលសម្រាប់នាំចេញ។
ទិន្នន័យពីសមាគមពាណិជ្ជកម្មអន្តរជាតិកូរ៉េ (Kita) បានបង្ហាញថា ចាប់ពីខែមករា ដល់ខែមិថុនា ឆ្នាំ ២០២១ ពាណិជ្ជកម្មទ្វេភាគីកម្ពុជា-កូរ៉េ មានទឹកប្រាក់សរុប ៤៥១,៩៨ លានដុល្លារកើន ៦,៧២ ភាគរយពីចំនួន ៤២៣,៥១ លានដុល្លារ ក្នុងរយៈពេលដូចគ្នាឆ្នាំមុន។ ក្នុងនោះការនាំចេញពីកម្ពុជាមានទឹកប្រាក់ ១៥៩,៤ លានដុល្លារធ្លាក់ចុះ ១,៦ ភាគរយពីចំនួន ១៦២,០៦ លានដុល្លារ និងការនាំចូលពីប្រទេសកូរ៉េមកកម្ពុជា មានតម្លៃ ២៩២,៥៩ លានដុល្លារកើនឡើង ១១,៩ ភាគរយពីចំនួន ២៦១,៤៥ លានដុល្លារ៕ LA
