អគារទីស្នាក់ការនៃអគ្គនាយកដ្ឋានពន្ធដារ។ ហេង ជីវ័ន
ភ្នំពេញៈ អគ្គនាយកដ្ឋានពន្ធដារ ប្រមូលពន្ធលើមធ្យោបាយដឹកជញ្ជូនបានប្រមាណ ៩៣ លានដុល្លារពីយានយន្តជិត ៨០ ម៉ឺនគ្រឿង ស្មើនឹង ១៧៤,២ ភាគរយនៃផែនការឆ្នាំ ២០២១ កើនជិត ៨ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យក្នុងប្រព័ន្ធរបស់អគ្គនាយកដ្ឋានពន្ធដារដែលភ្នំពេញប៉ុស្តិ៍ទទួលបានក្នុងថ្ងៃទី ៩ ខែធ្នូ ឆ្នាំ ២០២១។
ទិន្នន័យបង្ហាញថា ពន្ធលើមធ្យោបាយដឹកជញ្ជូនឆ្នាំ ២០២១ បានចាប់ផ្តើមប្រមូលពីថ្ងៃទី ១ ខែមិថុនា ដល់ដំណាច់ខែវិច្ឆិកា ឆ្នាំ ២០២១។ ពន្ធលើមធ្យោបាយដឹកជញ្ជូនត្រូវបានប្រមូលពីយានយន្តចំនួន ៧៩១ ១៦៨ គ្រឿង ដោយទទួលបានប្រាក់ពន្ធ ៣៨៥ ៣៤៧,៨ លានរៀល ស្មើនឹងប្រមាណ ៩៣ លានដុល្លារ។
តាមទិន្នន័យខាងលើចំនួនយានយន្តដែលត្រូវប្រមូលពន្ធក្នុងឆ្នាំនេះបានកើន ៧២ ០៦៧ គ្រឿងដោយប្រាក់ពន្ធមានចំនួន ២៨ ២៤៤,៣ លានរៀល ស្មើជិត ៧ លានដុល្លារ។
ប្រធាននាយកដ្ឋានពន្ធចលនទ្រព្យ និងអចលនទ្រព្យនៃអគ្គនាយកដ្ឋានពន្ធដារ លោក ខឹម តុលា ធ្លាប់បាននិយាយថា ចំនួនអ្នកបង់ពន្ធមធ្យោបាយដឹកជញ្ជូនបានកើនឡើងលើសផែនការនេះ ដោយសារតែការដាក់ឱ្យដំណើរការបង់តាម App GDT Taxpayer គួបផ្សំនឹងការអ្នកបង់ពន្ធមានការភ្ញាក់រឭក។
លោកបញ្ជាក់ថា កាលពីឆ្នាំ ២០២០ ចំនួនយានយន្តដែលទទួលរងការពិន័យ មានប្រមាណ ៣ ម៉ឺនគ្រឿង គិតជាប្រាក់ជិត ៣ លានដុល្លារ។
បែបនេះក្តី ក៏មានប្រភេទយានជំនិះមួយចំនួនត្រូវបានលើកលែងការបង់ពន្ធផងដែរ។ រថយន្តទាំងនោះរួមមាន រថយន្តគិលានសង្គ្រោះ និងរថយន្តពន្លត់អគ្គិភ័យជាកម្មសិទ្ធិរបស់រដ្ឋ, យានយន្តជាកម្មសិទ្ធិរបស់អង្គភាពកងយោធពលខេមរភូមិន្ទ កងរាជអាវុធហត្ថ នគរបាលជាតិ ដែលបានចុះបញ្ជីសារពើភណ្ឌរបស់ស្ថាប័ន, យានយន្តជាកម្មសិទ្ធិរបស់ស្ថានទូត ឬស្ថានកុងស៊ុលបរទេស, អង្គការអន្តរជាតិ ទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានា និងទោចក្រយានយន្ត ត្រីចក្រយានយន្តគ្រប់ប្រភេទ ត្រាក់ទ័រ និងគ្រឿងយន្តប្រហាក់ប្រហែល រួមទាំងជលយានយន្តគ្រប់ប្រភេទមានកម្លាំងដល់ ១៥០ សេះ។
សូមជម្រាបថា ចាប់ពីខែមករា ឆ្នាំ ២០២២ តទៅ អគ្គនាយកដ្ឋានពន្ធដារនឹងធ្វើការផាកពិន័យដល់អ្នកដែលមិនទាន់បានបង់ពន្ធមធ្យោបាយដឹកជញ្ជូនទាំងអស់ ដោយមន្ត្រីរបស់អគ្គនាយកដ្ឋានពន្ធដារនឹងចុះត្រួតពិនិត្យការប្រកាសបង់ពន្ធប្រភេទនេះ ដោយសហការជាមួយកម្លាំងកងរាជអាវុធហត្ថ នគរបាលជាតិ និងអាជ្ញាធរមូលដ្ឋានចុះត្រួតពិនិត្យតាមដងផ្លូវ៕LA
វីដេអូ៖
