លោកនាយករដ្ឋមន្ត្រី ហ៊ុន សែន ពេលអញ្ជើញពិនិត្យការដ្ឋានសាងសង់អាកាសយានដ្ឋានអន្តរជាតិតេជោក្រុងតាខ្មៅ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវឱ្យធនាគារក្នុង និងក្រៅប្រទេស ចូលរួមទិញសញ្ញាបណ្ណ (បណ្ណបំណុល) របស់ក្រុមហ៊ុនវិនិយោគអាកាសយានដ្ឋានកម្ពុជា [Cambodia Airport Investment Company CAIC)] ដែលនៅសល់តម្លៃជាង ២០០ លានដុល្លារនៃទឹកប្រាក់សរុប ៣០០ លានដុល្លារ ដោយមានអត្រាការប្រាក់ ៥,៥ ភាគរយប្រចាំឆ្នាំ ដើម្បីកាត់បន្ថយការខ្ចីបំណុលពីធនាគារក្រៅប្រទេសយកមកសាងសង់អាកាសយានដ្ឋានអន្តរជាតិថ្មី។
ការអំពាវនាវរបស់លោកនាយករដ្ឋមន្ត្រីបានធ្វើឡើងក្នុងគ្រាលោកអញ្ជើញចុះទៅត្រួតពិនិត្យវឌ្ឍនភាពគម្រោងសាងសង់អាកាសយានដ្ឋានអន្តរជាតិតេជោក្រុងតាខ្មៅជាលើកទី ២ ដែលការងារសាងសង់សម្រេចបានប្រមាណ ២៧ ភាគរយសម្រាប់គម្រោងដំណាក់កាលទី ១ នៅខេត្តកណ្តាល កាលពីថ្ងៃទី ៩ ខែធ្នូ ឆ្នាំ ២០២១។
លោក ហ៊ុន សែន បញ្ជាក់ថា៖ «ខ្ញុំមានគោលដៅមួយ គឺចង់ប្រមូលទុនក្នុងស្រុកដើម្បីធ្វើចេញជាស្នាដៃកូនខ្មែរតែម្តង តាមរយៈទុនក៏ខ្មែរ ការរចនាប័ទ្មសាងសង់ផ្សេងៗចេញពីដៃខ្មែរ ដូចនេះបានជាយើងផ្តល់ការអនុញ្ញាតធានាសម្រាប់ការខ្ចី ការលក់សញ្ញាបណ្ណរបស់ក្រុមហ៊ុនសម្រាប់ទឹកប្រាក់ ៣០០ លានដុល្លារក្នុងអត្រាការប្រាក់ត្រឹម ៥,៥ ភាគរយ»។
លោកអះអាងថា ក្នុងករណីដែលក្រុមហ៊ុនឯកជនផ្សេងទៀត ក្រៅពីធនាគារ អាចទិញសញ្ញាបណ្ណនេះដែរ គឺជារឿងល្អដើម្បីឱ្យអាកាសយានដ្ឋានប្រមូលទុនបានកាន់តែច្រើនកាត់បន្ថយលើការពឹងពាក់ពីធនាគារក្រៅប្រទេស។
លោក ពុង ឃាវសែ អគ្គនាយកក្រុមហ៊ុនវិនិយោគទុនអាណិកជនកម្ពុជា (OCIC) ដែលជាក្រុមហ៊ុនសាងសង់គម្រោងអាកាសយានដ្ឋានអន្តរជាតិតេជោក្រុងតាខ្មៅបាននិយាយថា ទោះបីមានវិបត្តិកូវីដ ១៩ ក៏ក្រុមហ៊ុនប្តេជ្ញាថា នឹងបន្តការសាងសង់ឱ្យរួចរាល់បានឆាប់តាមផែនការគ្រោងទុក។ លោកបន្តថា ក្រុមហ៊ុន CAIC បានធ្វើការបោះផ្សាយសញ្ញាបណ្ណមានតម្លៃសរុប ៣០០ លានដុល្លារដែលរហូតមកដល់ពេលនេះមានក្រុមហ៊ុនហិរញ្ញវត្ថុ និងស្ថាប័នរដ្ឋមួយចំនួនបានទិញអស់តម្លៃជិត ៩០ លានដុល្លារ។
បើតាមសេចក្តីរាយការណ៍របស់ លោក ពុង ឃាវសែ ស្ថាប័នរដ្ឋ ធនាគារ និងក្រុមហ៊ុនធានារ៉ាប់រងក្នុងស្រុកដែលបានចំណាយទុនទិញសញ្ញាបណ្ណ មានដូចជា ធនាគារ APDB, ធនាគារ FTB, ធនាគារព្រីនស៍, ធនាគារប្រៃសណីយ៍, ធនាគារឯកទេសវីង, ធនាគារជីបម៉ុង, ធនាគារពាណិជ្ជ Alpha, ធនាគារហិនហឺ ,ក្រុមហ៊ុនធានារ៉ាប់រងសុវណ្ណភូមិ, ក្រុមហ៊ុនធានារ៉ាប់រង AIA, ក្រុមហ៊ុន ព្រូដិនសល, សាជីវកម្មធានាឥណទានកម្ពុជា, បេឡាជាតិរបបសន្តិសុខសង្គម។
លោកបញ្ជាក់ថា៖ «ស្ថាប័ន និងក្រុមហ៊ុនទាំងនេះទិញបានសរុប ៨៧ លានដុល្លារ ដោយនេះជាការប្រើប្រាស់មូលធនក្នុងស្រុកក្នុងការគាំទ្រការសាងសង់គម្រោងអាកាសយានដ្ឋានអន្តរជាតិតេជោក្រុងតាខ្មៅ»។
បើតាម លោក ពុង ឃាវសែ ធនាគារជាតិនៃកម្ពុជាបានធ្វើការវាយតម្លៃពីហានិភ័យស្មើនឹងសូន្យភាគរយសម្រាប់ការបោះផ្សាយសញ្ញាបណ្ណរបស់ក្រុមហ៊ុន Cambodia Airport Investment Company។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា (CSX) ឱ្យដឹងថា ការបោះផ្សាយលក់សញ្ញាបណ្ណរបស់ក្រុមហ៊ុន CAIC គឺមិនបានការឆ្លងកាត់ការចុះបញ្ជីនៅក្រុមហ៊ុនផ្សារមូលបត្រកម្ពុជាទេ ប៉ុន្តែលោកគិតថា ក្រុមហ៊ុននេះអាចលក់ជាលក្ខណៈឯកជន និងទទួលបានការអនុញ្ញាតពីនិយតករមូលបត្រកម្ពុជា។
លោកបានបន្ថែមថា ការបោះផ្សាយលក់សញ្ញាបណ្ណនេះ គឺសម្រាប់អ្នកត្រូវការលុយ ដែលមិនចង់លក់ភាគហ៊ុនដោយអាចបង់ការប្រាក់ជាប្រចាំ ត្រីមាស ឬប្រចាំឆ្នាំបាន តាមកាលកំណត់របស់ក្រុមហ៊ុននោះ ដូចនេះមិនចាំបាច់បែងចែកភាគហ៊ុនទៅភាគីដទៃនោះទេ។
លោកបានបញ្ជាក់ថា៖ «នៅក្នុងករណីដែលក្រុមហ៊ុនបោះផ្សាយលក់ជាលក្ខណៈសាធារណៈទៅឱ្យវិនិយោគិនទូទៅ គឺត្រូវតែទទួលបានការអនុញ្ញាតពីអាជ្ញាធរមូលបត្រកម្ពុជា និងចុះបញ្ជីនៅក្រុមហ៊ុនផ្សារមូលបត្រកម្ពុជា ដូចនេះប្រហែលជាគាត់មិនចង់បំពេញនីតិវិធីច្រើន ឬក៏គាត់មិនចង់លក់ទៅឱ្យវិនិយោគច្រើនពេក»។
បើតាម លោក ពុង ឃាវសែ គិតមកដល់ពេលនេះ គម្រោងសាងសង់ព្រលានយន្តហោះថ្មីនេះ បានចំណាយថវិកាសាងសង់អស់ប្រមាណ ៣៧៥ ដុល្លារហើយនៃទំហំទឹកប្រាក់សម្រាប់សាងសង់គម្រោង ១ ៥០០ លានដុល្លារ។ បច្ចុប្បន្នទុនវិនិយោគទាំងនេះ គឺអាស្រ័យទាំងស្រុងទៅលើទុនរបស់ក្រុមហ៊ុន CAIC ហើយក្នុងឆ្នាំ ២០២២ ខាងមុខក្រុមហ៊ុនគ្រោងនឹងចំណាយថវិកាបន្ថែមចំនួន ៤៦៧ លានដុល្លារទៀត ដែលជាមធ្យមត្រូវការចំណាយ ១,២ លានដុល្លារក្នុង ១ ថ្ងៃ។
គម្រោងអាកាសយានដ្ឋានអន្តរជាតិតេជោក្រុងតាខ្មៅ ត្រូវបានសាងសង់ដោយក្រុមហ៊ុនវិនិយោគអាកាសយានដ្ឋានកម្ពុជា (Cambodia Airport Investment Company) សហការជាមួយនឹងរដ្ឋលេខាធិការដ្ឋានអាកាសចរស៊ីវិល សម្រេចការសាងសង់បានជិត ៣០ ភាគរយនៃគម្រោងទាំងមូល។
ក្នុងនោះការងារសាងសង់ស្ថានីយអ្នកដំណើរទំហំ ២៤,៣ ម៉ឺនម៉ែត្រការ៉េដែលសាងសង់ដោយក្រុមហ៊ុន China Construction សម្រេចបាន ២៩ ភាគរយគ្រោងនឹងបញ្ចប់នៅឆ្នាំ ២០២៣, មជ្ឈមណ្ឌលផ្គត់ផ្គង់ថាមពល ដោយក្រុមហ៊ុន China Construction សម្រេចបាន ៥៥ ភាគរយគ្រោងនឹងបញ្ចប់ក្នុងឆ្នាំ ២០២២,ទីលានចំណតយន្តហោះ ទំហំ ១៨៩ ហិកតាសម្រេចបាន ២១ ភាគរយ គ្រោងនឹងបញ្ចប់នៅឆ្នាំ ២០២៣ ស្ថានីយត្រួតពិនិត្យចរាចរណ៍ផ្លូវអាកាស កម្ពស់ ១១៨ ម៉ែត្រសម្រេចបាន ៤០ ភាគរយ គ្រោងនឹងប្រគល់ឱ្យក្រុមហ៊ុន Cambodia Air Traffic Ser-vice នៅខែកក្កដា ឆ្នាំ ២០២២ ដើម្បីត្រួតពិនិត្យចរាចរណ៍ផ្លូវអាកាស៕ LA
វីដេអូ៖
