ទីក្រុងស៊ាងហៃៈ តម្លៃភាគហ៊ុនរបស់ក្រុមហ៊ុន China Mobile របស់ចិនបានហក់ឡើងភ្លាមៗដល់ជាង ៩ ភាគរយនៅថ្ងៃពុធ ក្នុងការបង្ហាញខ្លួនលើទីផ្សារហ៊ុនស៊ាងហៃជាលើកដំបូង បន្ទាប់ពីក្រុមហ៊ុនបច្ចេកវិទ្យាយក្សមួយនេះត្រូវបានបដិសេធចុះបញ្ជីនៅផ្សារហ៊ុនញូវយ៉ករបស់សហរដ្ឋអាមេរិក ចំពេលការកើនឡើងនៃភាពតានតឹងរវាងទីក្រុងប៉េកាំង និងទីក្រុងវ៉ាស៊ីនតោនក្រោមរដ្ឋបាលរបស់អតីតប្រធានាធិបតីអាមេរិក ដូណាល់ ត្រាំ។
តម្លៃភាគហ៊ុនបានហក់ឡើងច្រើនរហូតដល់ ៩,៤ ភាគរយ មុនពេលបំបែកការកើនឡើងទាំងនោះយ៉ាងឆាប់រហ័ស និងខ្ពស់ជាង ៣ ភាគរយក្នុង ១ ម៉ោងក្នុងការជួញដូរ។
Bloomberg News បានផ្សព្វផ្សាយថា ការបោះផ្សាយលក់ភាគហ៊ុននេះត្រូវបានគេរំពឹងថា នឹងប្រមូលបានសាច់ប្រាក់ ៨,៨ ពាន់លានដុល្លារ បន្ទាប់ពីក្រុមហ៊ុនអនុវត្តជម្រើសលើការបែងចែក ដែលឱ្យធ្វើឱ្យក្រុមហ៊ុននេះជាក្រុមហ៊ុនធំបំផុតលើទីផ្សារហ៊ុនក្នុងស្រុករយៈពេលជាង ១ ទសវត្សរ៍។
ក្រុមហ៊ុនបណ្តាញទូរស័ព្ទឥតខ្សែធំបំផុតរបស់ចិន ដោយផ្អែកតាមប្រាក់ចំណូល ត្រូវបានច្រានចោលពីផ្សារហ៊ុនញូវយ៉ក កាលពីឆ្នាំមុន ស្របជាមួយក្រុមហ៊ុន China Telecom និង China Unicom ដែលជាក្រុមហ៊ុនទូរគមនាគមន៍រដ្ឋ។
នោះធ្វើតាមបញ្ជាប្រតិបត្តិរបស់អតីតប្រធានាធិបតី Donald Trump ដែលហាមឃាត់ជនជាតិអាមេរិកពីការបណ្តាក់ទុននៅក្នុងក្រុមហ៊ុនជាច្រើនដែលគេចាត់ទុកថា កំពុងផ្គត់ផ្គង់ ឬគាំទ្រឧបករណ៍យោធា និងសន្តិសុខរបស់ចិន។
ក្រុមហ៊ុននេះបាននិយាយថា មូលនិធិដែលប្រមូលបាននឹងឆ្ពោះទៅរកការកសាងហេដ្ឋារចនាសម្ព័ន្ធ 5G ក៏ដូចជាគម្រោង «ផ្ទះឆ្លាតវៃ» និងគំនិតផ្តួចផ្តើមផ្សេងៗទៀត។
ក្រុមហ៊ុនបច្ចេកវិទ្យា និងទូរគមនាគមន៍ដ៏ធំបំផុតមួយចំនួនរបស់ចិនបានចុះបញ្ជីនៅលើទីផ្សារភាគហ៊ុនសហរដ្ឋអាមេរិកក្នុងប៉ុន្មានទសវត្សរ៍ ថ្មីៗនេះ ខណៈដែលពួកគេស្វែងរកលទ្ធភាពទទួលបានមូលនិធិថ្មីៗ និងទីផ្សារមូលធនហិរញ្ញវត្ថុដែលមានការអភិវឌ្ឍបន្ថែមទៀត។
ប៉ុន្តែស្ថានភាពដែលបានប្រែក្លាយជាភាពតានតឹងរវាងក្រុងប៉េកាំង និងក្រុងវ៉ាស៊ីនតោនបានកើនឡើងក្នុងរយៈពេលប៉ុន្មានឆ្នាំចុងក្រោយនេះ។
រដ្ឋាភិបាលរបស់ប្រទេសចិនក៏បានលើកទឹកចិត្តដល់ក្រុមហ៊ុននានាក្នុងការចុះបញ្ជីផ្សារហ៊ុន ក្នុងស្រុកដែលជាផ្នែកមួយនៃការជំរុញក្រុមហ៊ុនបច្ចេកវិទ្យាធំៗឱ្យនៅក្នុងប្រទេស និងជួយអភិវឌ្ឍទីផ្សារមូលធនរបស់ប្រទេសចិន។
China Telecom ដែលជាប្រតិបត្តិករបណ្តាញទូរស័ព្ទចល័តដ៏ធំបំផុតរបស់ប្រទេសមហាយក្សសេដ្ឋកិច្ចនៅតំបន់អាស៊ី បានបង្ហាញខ្លួនជាលើកដំបូងនៅទីក្រុងស៊ាងហៃកាលពីខែសីហាឆ្នាំមុន បន្ទាប់ពីបានប្រមូលសាច់ប្រាក់បាន ៧,៣ ពាន់លានដុល្លារនៅក្នុងការបោះផ្សាយមូលបត្រដំបូង ( IPO) របស់ខ្លួន។
China Unicom បានចុះបញ្ជីភាគហ៊ុនរបស់ក្រុមហ៊ុនបុត្រសម្ព័ន្ធនៅទីក្រុងស៊ាងហៃតាំងពីឆ្នាំ ២០០២។
កាលពីខែតុលា មន្ត្រីអាមេរិកបានប្រាប់ក្រុមហ៊ុនបច្ចេកវិទ្យា China Mobile ឱ្យបញ្ឈប់សេវាកម្មរបស់ខ្លួនក្នុងប្រទេសអាមេរិក ដោយបញ្ចប់ប្រតិបត្តិការជិត ២ ទសវត្សរ៍ នៅក្នុងទង្វើមួយដែលទីក្រុងប៉េកាំងហៅថាជា «ការគាបសង្កត់ដោយចេតនា» របស់ក្រុមហ៊ុនចិន។
គណៈកម្មការគមនាគមន៍ សហព័ន្ធរបស់សហរដ្ឋអាមេរិកបាននិយាយថា៖ «ភាពជាម្ចាស់ និងការគ្រប់គ្រងរបស់ក្រុមហ៊ុនដោយរដ្ឋាភិបាលចិនជាផ្នែកនៃការបង្កើនហានិភ័យដល់សន្តិសុខជាតិ និងការអនុវត្តច្បាប់យ៉ាងសំខាន់»៕ RR