.jpg)
គ្រឿងចក្រកំពុងលើកកុងតឺន័រនៅកំពង់ផែស្វយ័តភ្នំពេញ។ ហេង ជីវ័ន
ភ្នំពេញៈ ក្រសួងសាធារណការ និងដឹកជញ្ជូនគ្រោងនឹងរៀបចំឱ្យមានការតភ្ជាប់ការដឹកជញ្ជូនតាមផ្លូវទឹកពីទន្លេបាសាក់ទៅសមុទ្រខេត្តកែប ដើម្បីជំរុញកំណើនសេដ្ឋកិច្ច តាមរយៈការដឹកជញ្ជូនទំនិញ និងទេសចរណ៍តាមផ្លូវទឹក ដោយមិនចាំបាច់ឆ្លងកាត់តាមប្រទេសវៀតណាម។
អ្នកនាំពាក្យក្រសួងសាធារណការ និងដឹកជញ្ជូនលោក វ៉ាស៊ីម សូរិយា បានប្រាប់ភ្នំពេញប៉ុស្តិ៍ នាថ្ងៃទី ៣១ ខែមករាថា តាមការលើកឡើងរបស់រដ្ឋមន្ត្រីក្រសួងសាធារណការគម្រោងតភ្ជាប់ការដឹកជញ្ជូនតាមផ្លូវទឹករវាងទន្លេបាសាក់ និងសមុទ្រខេត្តកែបនេះបានបញ្ចប់ការសិក្សាជំហានទី ១ រួចហើយ និងត្រូវការពេលសិក្សាបន្ថែមទៀតមុននឹងឈានដល់ការចាប់ផ្តើមអនុវត្តគម្រោងដ៏ធំមួយនេះ។
លោកបន្តថា គម្រោងនេះត្រូវបានសិក្សាដោយមន្ត្រីជំនាញរបស់ក្រសួង សហការជាមួយអ្នកជំនាញបរទេស។ ទោះយ៉ាងណា លោក សូរិយា ប្រាប់ថា លោកមិនទាន់ទទួលបានរបាយការណ៍សិក្សាលម្អិតជុំវិញគម្រោងនេះថាមានប្រវែងប៉ុន្មានគីឡូម៉ែត្រចាប់ផ្តើមកសាងពីចំណុចណាទៅចំណុចណា និងចំណាយថវិកាប៉ុន្មានសម្រាប់អនុវត្តគម្រោងនេះនៅឡើយទេ។
លោកថ្លែងថា៖ «ការសិក្សាបឋមនេះ ខ្ញុំមិនទាន់បានទទួលឯកសារបង្ហាញជាផ្លូវការនៅឡើយទេ។ គម្រោងនេះក៏មិនទាន់មានការដាក់ស្នើសុំទៅប្រមុខរាជរដ្ឋាភិបាល ដើម្បីអនុវត្តនៅឡើយទេ ព្រោះមន្ត្រីជំនាញរបស់ក្រសួង និងបរទេសកំពុងធ្វើការសិក្សាឱ្យលម្អិតជាមុនសិន។ ទោះគម្រោងតូច ឬធំ គឺត្រូវតែសិក្សាឱ្យបានច្បាស់»។
បើតាម លោក សូរិយា ការដឹកជញ្ជូនតាមផ្លូវអាកាស និងផ្លូវគោកមិនស្មើនឹងការដឹកជញ្ជូនតាមផ្លូវទឹកទេ ព្រោះងាយស្រួលបានចំនួនច្រើន និងមានសុវត្ថិភាព។ លោកបន្តថា កំពង់ផែនៅតាមផ្លូវទឹក គឺមានសារៈសំខាន់ខ្លាំងណាស់សម្រាប់កំណើនសេដ្ឋកិច្ច។
រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល នៅក្នុងសន្និបាតបូកសរុបការងារក្រសួងឆ្នាំ ២០២១ កាលពីថ្ងៃទី ២៨ មករាបានលើកឡើងថា ក្រសួងបានសិក្សារួចហើយចំពោះគម្រោងនេះ និងបានរាយការណ៍ទៅលោកនាយករដ្ឋមន្ត្រី ហ៊ុន សែន និងលោកឧបនាយករដ្ឋមន្ត្រី ស ខេង រួចហើយដែរ។
លោកថ្លែងថា៖ «យើងចង់ឱ្យមានការរីកចម្រើនតាមផ្លូវទឹក ហើយខេត្តមួយចំនួនដូចជាខេត្តតាកែវនឹងបានទទួលផលល្អពីការដឹកជញ្ជូនតាមផ្លូវទឹកពីទន្លេបាសាក់ ទៅកាន់សមុទ្រត្រង់ទៅតែម្តង នេះជំហានទី ១»។
បើតាមលោក ចាន់ថុល សម្រាប់ជំហានទី ២ ក្រសួងនឹងសិក្សាលម្អិតពីផលប៉ះពាល់ និងការចំណាយរបស់គម្រោងនេះដើម្បីធ្វើយ៉ាងណាឱ្យមានការដឹកជញ្ជូនទំនិញ និងទេសចរណ៍ពីភ្នំពេញទៅកាន់សមុទ្រ ដោយមិនបាច់ឆ្លងកាត់តាមច្រកក្អមសំណ និងឆ្លងកាត់ប្រទេសវៀតណាម។ លោកបន្តថា៖ «គម្រោងនេះយើងក៏បានសិក្សាជាមួយក្រសួងធនធានទឹក ពិនិត្យលើទិដ្ឋភាពច្បាប់របស់គណៈកម្មការទន្លេមេគង្គ គឺអត់មានផលប៉ះពាល់អីទេ គឺយើងអាចធ្វើបាន»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បាននិយាយថា ការដឹកជញ្ជូនតាមផ្លូវទឹកទន្លេសាបក្នុងប្រទេសកម្ពុជាតាំងពីមុន និងបច្ចុប្បន្ន គឺពឹងផ្អែកទៅប្រទេសវៀតណាមតាមច្រកក្អមសំណ ប៉ុន្តែពេលរដ្ឋាភិបាលរៀបចំឱ្យមានផ្លូវទឹកដោយភ្ជាប់រវាងទន្លេសាប និងសមុទ្របែបនេះ គឺបង្ហាញពីការបង្កើតអំណាចសេដ្ឋកិច្ច និងដែលត្រូវធ្វើជាចាំបាច់។
លោកពន្យល់ថា ការបង្កើតឱ្យមានការតភ្ជាប់ដោយខ្លួនឯងដោយបន្ថែមពីលើកំពង់ផែទឹកជ្រៅនៅសមុទ្ររាម និងកំពង់ផែទេសចរណ៍នៅខេត្តកំពតនឹងជួយធ្វើឱ្យការដឹកទំនិញ និងភ្ញៀវទេសចរចូលមកភ្នំពេញកាន់តែងាយស្រួលបន្ថែមទៀត។
លោកថ្លែងថា៖ «ខ្ញុំយល់ថា នេះគឺជាកត្តាមួយល្អសម្រាប់បង្កើតអំណាចសេដ្ឋកិច្ចដោយខ្លួនឯង។ ក្រៅពីយើងមានផែទឹកជ្រៅ យើងនឹងលែងពឹងពាក់លើកំពង់ផែទឹកជ្រៅរបស់វៀតណាម។ ឥឡូវនេះយើងលែងពឹងពាក់ផ្លូវទន្លេបាសាក់ពីវៀតណាមទៀត កម្ពុជាកាន់តែឯករាជ្យ និងអាចមានកំណើនសេដ្ឋកិច្ចកាន់តែខ្លាំង»៕ LA
