តម្លៃប្រេងបន្តកើន ធ្វើឱ្យប៉ះពាល់ទៅដល់ជីវភាពរស់នៅ ដោយតម្លៃសាំងធម្មតាឡើងពី ៤ ៥០០៛ ទៅ ៤ ៧០០៛។ រូបថត ហ្វេសប៊ុក
ភ្នំពេញៈ តម្លៃប្រេងហក់ឡើងជាង ៤,៤ ភាគរយរហូតដល់ ៤ ៧០០ រៀលក្នុង ១ លីត្រ ដែលគិតរហូតដល់ដំណាច់ខែកុម្ភៈនៅលើទីផ្សារលក់រាយកម្ពុជាបានបង្កឱ្យប្រជាពលរដ្ឋប្រកបរបរក្នុងកិច្ចការដឹកជញ្ជូនដែលជាអ្នកប្រើប្រាស់ផ្ទាល់នូវប្រេងសាំងជាចាំបាច់មានក្តីបារម្ភចំពោះការបាត់បង់ប្រាក់ចំណូលដែលរងផលប៉ះពាល់ដោយសារការរីករាលជំងឺកូវីដ ១៩ អស់រយៈពេលជាង ២ ឆ្នាំរួចទៅហើយ។
តម្លៃប្រេងឥន្ធនៈចាប់ពីថ្ងៃទី ១៦-២៨ ខែកុម្ភៈបានបន្តឡើងថ្លៃ ២០០ រៀលថែមទៀតដោយកើនដល់ ៤ ៧០០ រៀលក្នុង ១ លីត្រសម្រាប់សាំងធម្មតា និង ៤ ៤៥០ រៀលសម្រាប់ប្រេងម៉ាស៊ូត។ នេះបើតាមការក្រសួងពាណិជ្ជកម្មដែលជាស្ថាប័នរៀបចំកិច្ចប្រជុំជាមួយក្រុមហ៊ុននាំចូលប្រេង និងលក់ប្រេង។
ដោយសារការបន្តឡើងថ្លៃឥតឈប់ឈរនេះ ពលរដ្ឋភាគច្រើនបានត្អូញត្អែរ ដោយសារការចំណាយលើមធ្យោបាយដឹកជញ្ជូនកាន់តែខ្ពស់ ហើយពលរដ្ឋដែលជួបការលំបាកខ្លាំងជាងគេភាគច្រើនប្រកបរបរ ដឹកជញ្ជូនដូចជា អ្នកដឹកអីវ៉ាន់តាមអនឡាញ អ្នករត់ម៉ូតូឌុប អ្នករត់រ៉ឺម៉កកង់បី និងអ្នកបើកបររថយន្តតាក់ស៊ី ជាដើម។
លោក ចាន់ សាមឿន ប្រកបរបររត់ម៉ូតូឌុបនៅក្បែរផ្សារទួលសង្កែបានប្រាប់ភ្នំពេញប៉ុស្តិ៍នាថ្ងៃទី ១៦ ខែកុម្ភៈថា ចាប់តាំងពីតម្លៃប្រេងសាំងឡើងលើស ៤ ០០០ រៀលមក ការចំណាយលោកបានកើនឡើង ខណៈដែលចំណូលវិញនៅដដែល និងថ្ងៃខ្លះថយចុះថែមទៀត។
លោកបានរៀបរាប់ថា កាលពីមុន តម្លៃប្រេងសាំងមិនទាន់ឡើងខ្លាំង លោកអាចរកចំណូលបានចន្លោះពី ៤ ទៅ ៥ ម៉ឺនរៀល ក្រោយទូទាត់ចំណាយថ្លៃសាំងរួច ប៉ុន្តែប៉ុន្មានខែចុងក្រោយនេះ សាំងឡើងថ្លៃឥតឈប់ ស្របពេលមិនសូវមានអ្នកដំណើរជិះនោះទេ ដោយសារជំងឺកូវីដ-១៩ ចាប់ផ្តើមរាតត្បាតឡើងវិញទៀតដែលបានធ្វើគ្រួសាររបស់លោក ដែលសមាជិក ៥ នាក់ត្រូវកាត់បន្ថយការចំណាយ។
លោកបញ្ជាក់ថា៖ «ខ្ញុំមិនដឹងថាហេតុអ្វីបានជាសាំងឡើងថ្លៃរហូតបែបនេះ បើនៅបន្តឡើងទៀត ខ្ញុំប្រហែលជារកការងារសំណង់ធ្វើវិញហើយ ព្រោះសព្វថ្ងៃសាំងឡើងថ្លៃខ្លាំង តែតម្លៃដឹកនៅដដែល ហើយក៏មិនសូវមានអ្នកជិះដែរ គេខ្លាចកូវីដ។ ខ្ញុំត្រូវចិញ្ចឹមប្រពន្ធ និងកូន ៣ នាក់ សុទ្ធតែនៅរៀនដោយត្រូវចំណាយលើថ្លៃម្ហូប ថ្លៃផ្ទះជួល ថ្លៃទឹកភ្លើង បើរកបានមួយថ្ងៃ ២-៣ ម៉ឺន តើខ្ញុំសង្ឃឹមអី!»។
អ្នករត់រ៉ឺម៉កកង់បីខ្មែរម្នាក់ទៀត ដែលចតនៅក្បែរច្រកចូលផ្សារទួលសង្កែដែរ លោក សឿន សុភាព និយាយថា ឥឡូវនេះគេនិយមជិះកង់បីឥណ្ឌាជាង ព្រោះធូរថ្លៃ ដោយសារប្រើហ្គាស ខណៈដែលកង់បីរបស់ខ្មែរត្រូវប្រើសាំង ដូចនេះភាគច្រើនលោកដឹកទំនិញដូចជាផ្លែឈើ និងបន្លែជាដើម។
លោក សុភាព បានអះអាងថា៖ «បើសាំងឡើងរហូតបែបនេះខ្ញុំមិនដឹងអាចទប់ទល់នឹងការចំណាយបានទៀតឬអត់ទេ ព្រោះឥឡូវដឹកបានអីវ៉ាន់តិចតួច នេះសំណាងខ្ញុំមិនជួលផ្ទះគេនៅ ព្រោះយប់ឡើងខ្ញុំគេងលើកង់បីហ្នឹង បើមិនអ៊ីចឹងទេ មិនដឹងមានលុយឯណាផ្ញើទៅប្រពន្ធកូននៅស្រុកទេ»។
ងាកទៅអ្នកប្រកបរបរបើករថយន្តឈ្នួលនៅក្បែររង្វង់មូលជ្រោយចង្វារវិញ លោក វណ្ណដេ ដែលបានចាប់អាជីពនេះជិត ១០ ឆ្នាំមកនោះ បានប្រាប់ថារថយន្តរបស់លោកបានដឹកអ្នកដំណើរ និងទំនិញពីភ្នំពេញទៅកំពង់ចាមជារៀងរាល់ថ្ងៃ ប៉ុន្តែថ្ងៃខ្លះ គ្មានអ្នកជិះឡើយ។
លោកបញ្ជាក់ថា៖ «ថ្ងៃខ្លះខ្ញុំចេញឡានទទេ គ្មានម៉ូយទេ ហើយថ្ងៃខ្លះដឹកអីវ៉ាន់បានតិចតួច ដល់ពេលសាំងឡើងបែបនេះទៀត មើលទៅមានតែផ្អាករត់សិន ទៅធ្វើស្រែវិញ ចាំសាំងចុះថ្លៃបន្តិចចាំរត់វិញ»។
ប្រធានសមាគមភ័ស្តុភារកម្មកម្ពុជា លោក ស៊ិន ចន្ធី បានប្រាប់ភ្នំពេញប៉ុស្តិ៍ដែរថា ប្រេងឥន្ធនៈឡើងថ្លៃនេះ មិនត្រឹមជាបញ្ហាប្រឈមសម្រាប់វិស័យដឹកជញ្ជូនទេ តែប្រជាពលរដ្ឋទូទៅក៏ជួបបញ្ហានេះដែរ។
លោកនិយាយថា៖ «ថ្វីដ្បិតតែប្រេងឥន្ធនៈឡើងថ្លៃ ប៉ុន្តែតម្លៃនៃការដឹកជញ្ជូនពីខាងសមាគមមិនមានការឡើងថ្លៃឡើយ ពោលគឺនៅតម្លៃដដែល ដែលបានធ្វើឱ្យចំណូលធ្លាក់ចុះ ដោយសារការចំណាយទៅលើឥន្ធនៈច្រើនជាងមុន»។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានប្រាប់ភ្នំពេញប៉ុស្តិ៍ថា កន្លងទៅសម្តេចតេជោ បានអនុញ្ញាតផ្តល់ការឧបត្ថម្ភធន ៤ សេនដុល្លារក្នុង ១ លីត្រ ក្រសួងបានអនុវត្តជាហូរហែមក ក្រៅពីនេះ ក្រសួងពាណិជ្ជកម្មនឹងបន្តប្រឹងប្រែងពិនិត្យ និងតាមដាន បើសភាពនៅតែមិនល្អ ដោយតម្លៃនៅតែឡើងក្រសួងនឹងបើកកិច្ចប្រជុំជាមួយវិស័យឯកជន។
លោកបញ្ជាក់ថា៖ «វិធានការតទៅមុខទៀត គឺយើងមិនមែនព្រងើយកន្តើយចំពោះបញ្ហានេះឡើយ កាលណាតម្លៃប្រេងឡើងខ្ពស់ដល់ដំណាក់កាលដែលយើងត្រូវជជែកជាមួយវិស័យឯកជន យើងនឹងរៀបចំ ដើម្បីស្វះស្វែងរកវិធីសាស្ត្រធ្វើយ៉ាងណាដើម្បីសម្រួលថា ខាងភាគីឯកជនអាចទទួលយកបានហើយពលរដ្ឋអាចមានប្រេងប្រើប្រាស់បាន»។
លោកបានអះអាងថា កម្ពុជាចៀសមិនផុតពីបញ្ហាតម្លៃប្រេងឥន្ធនៈប្រែប្រួលនោះទេ ដោយសារតែជាប្រទេសនាំចូលប្រេង ដូចនេះត្រូវតែពឹងផ្អែកលើតម្លៃប្រេងអន្តរជាតិ។ លោកនិយាយថា៖ «ពេលណាតម្លៃប្រេងអន្តរជាតិឡើងថ្លៃ យើងក៏ត្រូវឡើងដូចគ្នាដែរ។ ម្យ៉ាងវិញទៀត ការឡើងថ្លៃនេះមិនមែនតែកម្ពុជាទេ គ្រប់ប្រទេសដែលនាំចូលប្រេង ដូចជា ថៃនិង វៀតណាម ក៏ឡើងដូចគ្នា»៕ LA
វីដេអូ៖
