រូបភាពគំរូស្ថានីយបញ្ចូលចរន្តអគ្គិសនី។ រូបថត MPWT
ភ្នំពេញៈ កម្ពុជានឹងដំឡើងស្ថានីយបញ្ចូលចរន្តអគ្គិសនីចំនួន ១០ នៅរាជធានីភ្នំពេញ និងខេត្តសំខាន់ៗដើម្បីលើកកម្ពស់ការប្រើប្រាស់រថយន្តអគ្គិសនី (EV) សំដៅសម្រេចទៅតាមការប្តេជ្ញាចិត្តរបស់ខ្លួនក្នុងការជំរុញការប្រើប្រាស់រថយន្ត និងរថយន្តក្រុងអគ្គិសនីឱ្យបាន ៤០ ភាគរយ និងម៉ូតូ ៧០ ភាគរយត្រឹមឆ្នាំ ២០៥០ សម្រាប់យុទ្ធសាស្ត្រអភិវឌ្ឍន៍ការបំភាយឧស្ម័នកាបូនសូន្យរបស់រដ្ឋាភិបាល។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងក្នុងកម្មវិធីមួយកាលពីថ្ងៃទី ២២ ខែមីនាថា ក្រសួងកំពុងសហការជាមួយដៃគូអភិវឌ្ឍន៍ និងស្ថានីយប្រេងឥន្ធនៈ ដើម្បីលើកទឹកចិត្តឱ្យពួកគេដំឡើងស្ថានីយបញ្ចូលចរន្តអគ្គិសនីដែលជាកិច្ចខំប្រឹងប្រែង ដើម្បីជំរុញការប្រើប្រាស់រថយន្តអគ្គិសនី (EV)។
លោកថ្លែងថា៖ «កម្មវិធីអភិវឌ្ឍន៍សហប្រជាជាតិ (UNDP) ក៏បានរួមចំណែកកសាងស្ថានីយបញ្ចូលចរន្តអគ្គិសនីចំនួន ៤ កន្លែងដល់ក្រសួងយើងផងដែរ ដោយស្ថានីយ ១ នឹងត្រូវដំឡើងនៅក្រសួង ១ នៅខេត្តបាត់ដំបង ១ នៅសៀមរាប និង ១ ទៀតនៅក្រុងព្រះសីហនុ»។
លោកបន្ថែមថា៖ «ក្រុមហ៊ុនប្រេងឥន្ធនៈដូចជា Caltex, PTT និង Total ក៏យល់ព្រមដំឡើងស្ថានីយបញ្ចូលចរន្តអគ្គិសនីនៅស្ថានីយប្រេងឥន្ធនៈរបស់ពួកគេផងដែរ។ យើងសង្ឃឹមថា ត្រឹមចុងឆ្នាំនេះ យើងប្រហែលជាមានស្ថានីយបញ្ចូលចរន្តអគ្គិសនី យ៉ាងហោចណាស់ចំនួន ១០ កន្លែងក្នុងប្រទេស។ នេះជាអ្វីដែលយើងចង់ឱ្យអ្នកដឹងថា ក្រៅពីការកសាងហេដ្ឋារចនាសម្ព័ន្ធ យើងក៏រួមចំណែករក្សាបរិស្ថានស្អាតផងដែរ»។
លោកប្រាប់ទៀតថា ក្រសួងនឹងធ្វើបទបង្ហាញពីរថយន្ត EV នៅថ្ងៃទី ២៦ ខែមីនា ខាងមុខ ខណៈក្រសួងបានអញ្ជើញក្រុមហ៊ុនផលិតរថយន្ត EV និងម៉ូតូ EV ទាំងអស់មកតាំងបង្ហាញ ហើយក៏នឹងមានការពិភាក្សាជាក្រុមអំពីយុទ្ធសាស្ត្ររបស់ប្រទេសឆ្ពោះទៅរក EV ផងដែរ។
កាលពីថ្ងៃទី ១១ ខែមីនា ក្រសួងសាធារណការបានបើកសិក្ខាសាលាអន្តរក្រសួងដោយសហការជាមួយនឹងក្រុមហ៊ុន EnergyLab ដើម្បីស៊ើបអង្កេតលើគោលនយោបាយដែលអាចត្រូវបានអនុម័តនៅក្នុងប្រទេសកម្ពុជាដើម្បីលើកកម្ពស់ការប្រើប្រាស់រថយន្ត EV។ សិក្ខាសាលានេះមានការចូលរួមពីអគ្គនាយកដ្ឋានគយ និងរដ្ឋាករក្រុមហ៊ុនផ្គត់ផ្គង់ថាមពលរបស់រដ្ឋ អគ្គិសនីកម្ពុជា អង្គការអភិវឌ្ឍន៍អន្តរជាតិអាល្លឺម៉ង់ (GIZ) និងសម្ព័ន្ធការប្រែប្រួលអាកាសធាតុកម្ពុជា។
លោក វ៉ាស៊ីម សូរិយា អ្នកនាំពាក្យក្រសួងសាធារណការបានប្រាប់ភ្នំពេញប៉ុស្តិ៍នៅពេលថ្មីៗនេះថា កម្ពុជាបានប្តេជ្ញាចិត្តថានឹងជំរុញការប្រើប្រាស់រថយន្ត និងរថយន្តក្រុងអគ្គិសនីឱ្យបាន ៤០ ភាគរយ និងម៉ូតូ ៧០ ភាគរយត្រឹមឆ្នាំ ២០៥០ ស្របតាមយុទ្ធសាស្ត្រអភិវឌ្ឍន៍ការបំភាយឧស្ម័នកាបូនសូន្យរយៈពេលវែងរបស់រដ្ឋាភិបាល។ លោកបន្តថា ក្រសួងបានខិតខំចាត់វិធានការ ដើម្បីចូលរួមជាមួយភាគីពាក់ព័ន្ធនានាស្ដីពីការបង្កើនការប្រើប្រាស់រថយន្ត EV ដែលរួមមានការរៀបចំសិក្ខាសាលា និងកិច្ចសហប្រតិបត្តិការជាមួយដៃគូអភិវឌ្ឍន៍នានា៕ LA
វីដេអូ៖
