ជំនួបសវនការរវាង លោក ថោង ខុន រដ្ឋមន្ត្រីក្រសួងទេសចរណ៍ និងលោក ហ្សាហៀរូដឌីន បាបារ ថាហ៊ីម (Zaheeruddin Babar Thaheem) ឯកអគ្គរដ្ឋទូតនៃសាធារណរដ្ឋអ៊ិស្លាមប៉ាគីស្ថានប្រចាំកម្ពុជា កាលថ្ងៃទី ៣០ ខែមីនា ឆ្នាំ ២០២២ នៅទីស្ដីការក្រសួងទេសចរណ៍។ រូបថត ក្រសួងទេសចរណ៍
ភ្នំពេញៈ កម្ពុជា និងប៉ាគីស្ថានដែលស្ថិតនៅតំបន់អាស៊ីខាងត្បូងបានឈានដល់ការឯកភាពគ្នារៀបចំឱ្យមានអនុស្សរណៈនៃការយោគយល់គ្នា (MoU) ស្ដីពីកិច្ចសហប្រតិបត្តិការលើវិស័យទេសចរណ៍ នាពេលឆាប់ៗខាងមុខ ដើម្បីបង្កើនកិច្ចសហប្រតិបត្តិការលើការជំរុញចលនាទេសចរទៅវិញទៅមក ខណៈប្រទេសទាំង ២ សុទ្ធតែមានសក្ដានុពលលើវិស័យទេសចរណ៍ដូចគ្នា។
ការព្រមព្រៀងគ្នានេះត្រូវបានធ្វើឡើងក្នុងជំនួបសវនការរវាង លោក ថោង ខុន រដ្ឋមន្ត្រីក្រសួងទេសចរណ៍ និងលោក ហ្សាហៀរូដឌីន បាបារ ថាហ៊ីម (Zaheeruddin Babar Thaheem) ឯកអគ្គរដ្ឋទូតនៃសាធារណរដ្ឋអ៊ិស្លាមប៉ាគីស្ថានប្រចាំកម្ពុជា កាលថ្ងៃទី ៣០ ខែមីនា ឆ្នាំ ២០២២ នៅទីស្ដីការក្រសួងទេសចរណ៍។
លោក ថោង ខុន បានលើកឡើងថា ដើម្បីឱ្យការពង្រឹងកិច្ចសហប្រតិបត្តិការលើវិស័យទេសចរណ៍អាចប្រព្រឹត្តទៅបានរឹងមាំ កម្ពុជាមានបំណងរៀបចំអនុស្សរណៈនៃការយោគយល់គ្នាជាមួយប៉ាគីស្ថានឱ្យបានឆាប់រហ័សនាពេលខាងមុខ ហើយនៅពេលរៀបចំហើយ ភាគីទាំង ២ នឹងចុះហត្ថលេខាលើអនុស្សរណៈនេះជាមួយគ្នា។
លោក ថោង ខុង បានបន្តថា ក្រោមឆ័ត្រនៃអនុស្សរណៈនេះ ប្រទេសទាំង ២ នឹងបង្កើតឱ្យមានទស្សនកិច្ចទេសចរណ៍ទៅវិញទៅមក ទាំងវិស័យរដ្ឋ និងវិស័យឯកជន ដើម្បីជំរុញចលនាទេសចររវាងប្រទេសទាំង ២ ឱ្យកាន់តែមានកំណើនឈានឡើង។
លោក រដ្ឋមន្ត្រីក៏បានបន្ថែមថា បច្ចុប្បន្ន កម្ពុជា-ប៉ាគីស្ថានមិនទាន់មានជើងហោះហើរត្រង់ជាមួយគ្នានៅឡើយទេ ដូច្នេះកិច្ចការសំខាន់គឺការសម្រួលដល់ការធ្វើដំណើររបស់ភ្ញៀវទេសចរ ព្រោះប្រសិនបើចង់ឱ្យមានកំណើនទេសចរ ចាំបាច់ត្រូវមានការតភ្ជាប់ការធ្វើដំណើរជាមុនសិន។
ក្នុងជំនួបនោះ លោក ហ្សាហៀរូដឌីន បានកោតសរសើរពីនយោបាយវ៉ាក់សាំងរបស់រាជរដ្ឋាភិបាលកម្ពុជា ដែលបានអនុវត្តយុទ្ធនាការចាក់វ៉ាក់សាំងបង្ការមេរោគកូវីដ ១៩ ពង្រឹងភាពសុំាក្នុងសហគមន៍ រហូតឈានដល់ការបើកសេដ្ឋកិច្ច-សង្គម និងបើកប្រទេសទទួលទេសចរអន្តរជាតិឡើងវិញ។
លោកទូតក៏បានកត់សម្គាល់អំពីសក្ដានុពលទេសចរណ៍របស់កម្ពុជា ដែលមានភាពទាក់ទាញយ៉ាងសម្បូរបែប មានដូចជា តំបន់សៀមរាប-អង្គរ តំបន់ឆ្នេរ និងតំបន់អេកូទេសចរណ៍។
លោក ហ្សាហៀរូដឌីន បានប្ដេជ្ញាចិត្តថា ក្នុងអាណត្តិបេសកកម្មជាឯកអគ្គរដ្ឋទូតប៉ាគីស្ថាននៅកម្ពុជានេះ លោកនឹងខិតខំពង្រឹងកិច្ចសហប្រតិបត្តិការរវាងកម្ពុជា-ប៉ាគីស្ថានលើវិស័យទេសចរណ៍ឱ្យកាន់រឹងមាំ និងរីកចម្រើនបន្ថែមទៀត ដោយហេតុថាកម្ពុជា និងប៉ាគីស្ថានសុទ្ធមានសក្ដានុពលលើវិស័យទេសចរណ៍ដូចគ្នា។
ភាគីទាំង ២ ក៏បានលើកឡើងអំពីការជំរុញឱ្យអ្នកវិនិយោគប៉ាគីស្ថានឱ្យមកវិនិយោគនៅកម្ពុជា ពិសេសលើវិស័យទេសចរណ៍ ដើម្បីទាក់ទាញភ្ញៀវទេសចរអ៊ិស្លាមមកពីប្រទេសប៉ាគីស្ថាន និងប្រទេសដទៃទៀតផងដែរ៕
